'Saaʋn' Kea nʋa ɛɛ' dbonʋɩ "jrii ɛ
40
Dafi 'a 'dʋ ɔ "nyɩa bleʋn 'a klaa".
2 'De 'ma 'kmʋnɩa ‑wee'‑ "klein 'ʋn 'ɩn tba Tʋ "bo tɔi".
Ɛ poɛ 'ʋn doun" o ‑wɛe ɛɛ 'wɔn 'ma baewlu‑.
3 Ɛ ‑sa 'ʋn 'de 'mɛ bie 'di, 'de 'pɔɔ ‑kwea.
Ɛ kpa 'ʋn "jɛi, ɛ nynaa 'mii 'de 'soa "kpei ‑wɛe 'ma bɩ 'je i ku‑.
4 Ɛ tuɛ" 'ʋn 'dʋ dee 'wɔn,
Ɛɛ' 'nynɩ ‑sa dʋ ‑wɛe, ‑a ‑je Kea o blee‑.
Nyʋ ‑tuu" a muɛ ɛɛ' ‑ta 'jea ‑wɛe ka
Tʋ "bo nɩa dɛwɔn ʋʋ 'jeɛ juuo 'de ʋʋ 'jeɛ ‑kwlɩ" ‑te'.
5 'Mʋa‑ nʋ nyɔ ‑ɔ ‑tea' Tʋ "bo ‑kwlɩ"
‑wɛe ‑ɔɔ' 'bɛaa 'de nyʋ ‑ʋʋa
‑bɛɛa' ʋʋa' ‑cɛi" ke sɩ di nyʋ o ɛ.
6 'Oo Tʋ "bo, 'ma Kea, ka dɩ 'dɔe ɛ nʋa ‑a ke,
dɩ ɛ ‑tea' 'de ‑aa ‑tɩ' 'ʋn i ‑ti kan' ‑a?
Nyɔ jrɔ' ke ɛ ‑kʋʋɔ' 'ɩn nɩɛ "i 'ɩn 'je ɩa' ‑tɩ' 'tmʋ,
'kaa ɩ cɛn "jri "kpei ‑tie".
7 ‑Ɩn se 'ʋn 'sraa ‑ɛɛ nmɔ 'jea i 'wla ke
‑paan' ‑ɛ ‑jea 'ma dɛsaʋn ‑kɔ' i ‑tee'‑.
Dɛ ‑nʋɛ, ‑ɩn se 'ʋn 'sraa ke ‑paan' jrɛ' i ‑tee'‑.
‑Wɛe ‑ɩ ‑je 'ma dɛsaʋn ‑kɔ'.
8 ‑Wɛe 'ɩn wlu 'ɩn 'na:
'Ma ji' 'sbɛ pun ‑nɩa 'mʋʋa‑ 'mɔ ‑ɔɔ ‑tɩ' ɛ 'tmʋ.
9 'Ma Kea, ‑ma 'tʋnʋtɩ‑ nʋa' 'bleɛ 'ma 'mʋa‑,
‑wɛe ‑ma kɛ' 'crɩɩɛ 'de 'ma pɛe 'a "kɛ o.
10 ‑Ta nyʋ ‑tuu" 'kɩɩan "jru i 'bo 'ma 'tmʋ ‑ma ‑pɔia" ‑tɩ
'ɩn seɛ wɔn "muu i, ‑ɩn ‑juuɛ' Tʋ "bo.
11 'Maa ‑tu" ‑ma "i 'srea' 'kwla 'de 'ma 'mɩ ‑sɔn.
‑Ma nyʋ 'pʋʋ ‑tɩ ke ka ‑maa' pooa wlu fai" mɩ 'ma 'tmʋ.
‑Ta nyʋ ‑tuu" 'kɩɩan "jrui 'maa ‑tu" ‑ma 'diwɔnmɔa'
ke ‑ma wlu "kpei kpʋn 'a i.
12 'De ‑mɔ ɛ Tʋ "bo,
‑ɩn se' ‑ʋn ‑ma nyiɔɔ' wɛe 'jea kɩɩn tɛɛn i,
‑ma nyiɔɔ' ‑tɩ' kmaa' ke ‑ma wlu "kpei kpʋan' ke,
ɩmɩ ‑ɩa ‑tɩ' ‑ma mu 'ʋn kwa "kpei ‑cria" 'de 'wɩ 'oo 'wɩ.
13 'Kle ‑tuu" ‑tuu a jiɛ 'ʋn "kpei, ɩ se ‑sro' ‑ta 'ble;
'ma dɩsaɩn a kpʋn ɛ ʋn ‑kwlʋ,
‑ɩn seɛ 'bɛɛ‑ ‑ɩn ‑jɩ ja ‑gbʋn.
Ɩ ‑tiɛi" ɩ je 'ma "jru mɩɩ ‑sii ɛmɛ ‑tɩ 'kpɩ a wa "mii.
14 Tʋ "bo, ‑ɩn ‑seie 'ʋn,
‑ɩn ji 'ʋn o ‑too"‑ ‑ɩn ‑je 'ʋn kwawɛi ‑te'.
15 Nyʋ ‑nɩɛ "i ‑ʋʋ ‑jea 'ʋn 'kmʋ ‑sa a,
‑tɩn' 'dbaa ʋʋpʋ‑ "i tai" "maa ʋʋpʋ‑,
nyʋ ‑bo ‑tɩ' nʋ 'ʋn "jrii ‑ʋʋa nʋa 'mʋa‑
‑Tɩn 'dbaa ʋʋpʋ‑ "i, ʋʋ bla "jru ‑kwlɩ" ʋʋ naade.
16 Nyʋ "klein ‑ʋʋa wlaa 'ʋn ‑ʋʋa nʋa ‑a" ‑a" 'ee ɛ,
‑tɩn' 'dbaa ʋʋpʋ‑ "i.
17 'Kaa nyʋ "klein ‑a ‑pɔan ‑mii' nʋ 'mʋa‑,
nyʋ "klein ‑ke ‑ɩn ‑sii" 'a "i ɛ,
ʋʋ nʋ 'mua‑ ɛ 'je "jri "kpae po.
Wɛe ʋʋ wlu ka Tʋ "bo ‑ma 'nynɩ 'bo "i 'bɛɛ ‑tɩ o 'bɔ ɛ.
18 'Mɔ ɛ, 'ɩn nɩɛ wɛenyɔ, 'ɩn nɩɛ nɩa" nyɔ ‑o,
'kaa Tʋ "bo a ‑tuɛ" 'ma ‑tɩ'.
‑Mɔ ‑nɩa 'ma o 'wlʋ i ke 'ma ‑seie i ɛ,
‑ɩn ‑too"‑ ‑ɩn ‑je 'ʋn o ji.