Nyɔ 'kpɩ wai" 'a baewlu‑
38
Dɩ Kea nʋa Dafi "jrii 'a ‑tɩ' ‑kwlʋ o podʋ‑.
2 Tʋ "bo, ‑ɩn ‑bo 'ʋn 'kle "kpei jaa 'de ‑ma 'cɛn jri 'di,
'de ‑ɩn ‑bo 'cɛn nʋɛ ‑ɩn ‑bo 'ʋn 'srɩn ‑tu" ɛ.
3 ‑Ma ‑jee', ‑ma 'sɩn tba 'ʋn 'ɛ,
wɛe ‑ɩn po 'ʋn sʋn ‑pʋn".
4 'Ma dɛsaʋn 'a 'cɛn ‑ɩn ‑kpa a,
'ma sɩɩn" o, 'ma 'kpɩ o, ɩ ‑wee'‑ nyna nɛ'.
5 'Ma dɛsaʋn ‑siiɛ 'ʋn "jrui,
ɛɛ' ‑gbɛ ɛ 'nyɛ 'ʋn "kpei.
6 'Ma kpaiɛ ‑wee'‑ ‑sɔɔn',
ɩa' 'nʋ a ji' 'ma se tɔ' 'di nɩ 'a ‑tɩ' 'ʋn.
7 'Kpɩ wa 'mii", 'ma dɩ cɛn',
'ɩn ‑criɛ" "jrii, 'ɩn ‑klɔn' 'ma jea na' 'de ‑sɔn 'di.
8 'Ma 'mɩ 'di ‑wee'‑ nyna nɛ',
'ma ku 'a ‑ta ‑jrɔ se 'e sie‑.
9 'Ɩn se 'kpɩ 'ble, 'ɩn ‑wee'‑ ‑craa i,
ɛ poɛ 'ʋn ‑souu" ‑souu.
10 Tʋ "bo, 'ma 'tʋnʋtɩ‑ ke 'ma fɩɩɛ' i 'wlatɩ‑
se 'kwla pa 'de ɛ "juɛi.
11 'Ma pɛe a blai, 'kpɩ ‑wee'‑ wa "mii,
'ma "jri ‑wee'‑ 'bɔ i 'je ‑tɩ 'mɛ.
12 'Ma ‑ci" a nʋɛ' 'ma "dɛi ‑wi" o,
'ma ‑tɩ' kmanyʋ ‑wee'‑ a tɛɛn 'ʋn kɩɩn.
13 Nyʋ ‑ʋʋa ‑pɔan' a 'ma 'mɩɩa' ʋʋa wluuɛ 'mii,
ʋʋa bla 'ʋn sɩ ‑tɩ "kpei 'de ‑sɔn 'di.
14 'Kaa 'mɔ ɛ, 'ɩn nʋɛ 'ma ‑cɛ" doun" ‑gbai" "jru 'ʋn,
‑wɛe 'ɩn je i 'wɔn, 'ɩn poɛ wɔn kpoi" ka "muu nɩa.
15 'Ɩn ‑kɔ' ka nyɔ ‑ɔɔ' 'wɔan i 'de ‑ɔ sea wlu 'ble nɩa.
16 Tʋ "bo, ɛmɛ 'ɩn tba tɔi",
Tʋ "bo 'ma Kea, ɛmɛ ‑je 'ma baewlu kpʋn.
17 Dɛ 'ɩn ‑teea' ‑mii 'de ɛ: ɛ ‑nɩ ʋʋ 'bo 'ʋn wlaa, ‑bo 'ma bʋ mɔ ‑gbie' 'de ɛ.
18 'Kmʋ a 'kpa 'ʋn 'wɔn i,
'ma 'kle a 'nyɛ 'ʋn "kpei jeejee.
19 'Ɩn juuɛ 'ma dɛsaʋn "i, 'ɩn nɩɛ 'e "jrii "kaea' 'di.
20 'Ma tʋnyʋ 'a ‑klatain‑ a 'jaa, "jru ke ‑tɔn" see nɩ
ka ʋʋ ‑wee'‑ ‑tia ʋʋa jea 'ʋn wlaa.
21 Ʋʋa nʋɛ dɛsaʋn ‑wɛe ʋʋa ‑sa 'ma 'dɔe 'a kpan.
Ʋʋ 'nyɛ 'ʋn 'ɛ, dɛ dɛ‑nʋɛ', 'ma ‑pɔn 'dɔe 'a nʋa' i.
22 'Ma Kea, ‑ɩn ‑bo 'ʋn o "maeɛ,
Tʋ "bo, ‑ɩn ‑bo 'ʋn o tɩɩɛn.
23 'Ma 'pʋʋi‑, 'ma Tʋ "bo, ‑ɩn ‑too" "mii.