Nyɔ ‑ɔ ‑jea tɔ' ble ‑ɔ ‑jea Kea 'a ‑tɩ' kma 'a 'srɩn ‑tu" wlu‑
37
Dafi 'a 'dʋ.
‑Ɩn ‑bo 'diwɔnyniʋn "jri ‑pʋn" ‑flu" ɛ.
Dɛsaʋnʋʋ 'a dɩ 'bo ‑ʋn pɛe 'di ‑saa.
2 Ka sii ke 'kwlawɩn nyɔ ɔ ‑pɛa" a ‑too" 'a 'sʋɛ jɛa a,
'kamɔ 'diwɔnyniʋn nɩ.
3 ‑Ɩn ‑te' Tʋ "bo ‑kwlɩ", ‑ɩn nʋ 'dɔe 'a 'sʋ.
‑Ma pɛe a muɛ i 'pɛan' see 'de ‑ma 'blʋa 'di.
4 Tʋ "bo nɩ ‑ma crɔn'
ɔɔ naa 'dɔe nʋ ‑tɩ tɔ' "kpei.
5 ‑Ɩn te' ‑ma 'kmʋ 'de Tʋ "bo 'kwai,
‑ɩn tbɛ tɔi", ɛɛ muɛ dɛ nʋa'.
6 Ɛɛ muɛ nʋa' ka ‑ma pɛe "kpei flɔn i
ka ‑sɔɔn' ‑sɩan' ‑klae" pɛɛn,
'de ‑ma ‑kɩn 'je "puu nɩ ka 'jrʋ a ‑tea ‑gbao ɛ.
7 ‑Ɩn ‑te 'tɩɩn 'de Tʋ "bo "juɛi, ‑ɩn ‑gbʋn ɛɛ' 'sʋ ja.
Nyɔ ‑ɔ kpa ‑jeblʋ jrɛ' ‑wɛe ɛ 'wɔɔn a kwa,
‑ɔɔ 'srɛ saɩn ‑wee'‑ a "siia, ‑ɩn ‑bo ɔ 'cɛn i 'kpaa.
8 ‑Ɩn po 'cɛn i, ɛ 'bo ‑mii" ‑siiɛ
dɛ 'bo ‑ʋn ‑kwlʋ kpʋn ɛ, ɛ je ‑ʋn dɛsaʋn 'di po.
9 Dɛ ‑nʋɛ, dɛsaʋnʋʋ a muɛ isɔan'
‑wɛe 'blʋa 'je 'de nyʋ ‑tba' Tʋ "bo tɔi" 'kwa sie‑.
10 Ɛ siɛ dɛ tʋɩɩ" 'diwɔnyniʋn 'je i sɔn‑.
‑Ta ɔ nɩa' 'de ɛ, ‑ma muɛ 'e ‑gbʋan', ‑ɩn se ɔ 'jei 'bode.
11 'blʋa a muɛ 'e 'flɛʋn nyʋ 'kwa 'bɔɔa',
tɔ' 'ɔ blua' a muɛ i siia', aoa doun" 'di 'je pee nɩ‑.
12 Dɛsaʋnʋɩ i a "peeɛ Kea 'a nyɔ ‑sɔn i,
ɔɔ diiɛ 'nynɩ "i 'de ɔɔ' ‑tɩ' 'ʋn.
13 'Kaa Nyɔ 'Blei a wlaa 'diwɔnynii ‑nɔ 'mɛ,
ɛ 'je kan' 'mɛ ɔɔ' ‑nɩ 'pee 'a 'wlʋ nɔ" ɔɔ nyni'.
14 'Diwɔnyniʋn a ‑sa ʋʋa' ‑cnɩ kpla' ʋʋa ‑tuɛ" ʋʋa plʋ mɛ"
ʋʋ 'je wɛenyʋ ke nɩa" nyʋ 'a 'blae 'wla,
‑wɛe ʋʋ 'je nyɔ ‑kpa' "isrɛ ‑je ‑pliɔn' cɛn.
15 'Kaa ʋʋa' ‑cnɛ ‑nɛ, ɛɛ nma ʋʋa' ‑cɛ" 'ɛ
'dooɛ 'ʋn 'ɛ, ʋʋa' plʋ mɛ" cɛn'.
16 Nyɔ ‑ɔɔ ‑jea Kea wɔn ɛ,‑bo ɔɔ' "wliiɛ nɩ ‑saan" mɔ 'de ɛ, "diwan nɩɛ "kpei, ɛ je 'diawɔnyʋ 'a "wliiɛ ‑tuu" ‑sii.
17 Dɛ ‑nʋɛ, dɛsaʋnʋɩ 'a sʋn a muɛ ‑craa',
'kaa Tʋ "bo a poɛ ‑tɩ' "i ‑klɛɛi sʋn o.
18 Tʋ "bo ‑ble nyʋ ‑ʋʋa nabʋ "srɛai 'a 'wɩ kwa,
ʋʋa' 'kɛn se i sɔn i.
19 'Kmʋ saʋn se ʋʋpʋ‑ i 'kpai, ɛ se ʋʋ ‑tɩn' "i 'dbaa i.
‑Bo 'mɩɩɛ ɛ sea jiɛ, ʋʋa muɛ dboa'.
20 'Kaa 'diwɔnyniʋn a muɛ 'mɛa'.
Kɩɩn Tʋ "bo 'a tʋnyʋ a muɛ i sɔan'
ka tu 'a ‑faɩn' a "jooa',
ʋʋa muɛ "ijroa' 'sʋ ʋʋa' dao' 'je "jɛi mu.
21 'Diawɔnyii 'a kpʋn kpan ɔɔ' ‑sɛ.
'Diawɔnmɔ i a 'jeɛ nyɔ 'ɔ wɛe,ɔɔ ‑sa dɛ kwai.
22 Dɛ ‑nʋɛ, nyɔ Tʋ "bo poa "diwan‑ a, ʋʋpʋ‑ ‑a ‑ble 'blʋa,
nyʋ ɛɛ' 'daɩn kpʋan, ‑mʋ ‑wi" a sɔn i.
23 ‑Bo nyiɔ 'ɔ nʋʋdɩ nmɔɔ Tʋ "bo ‑kwlɩ' i ɛ,
ɛɛ kuuɛ ɔɔ' nabʋ i ‑wɛe ɛɛ poɔ ‑tɩ' o.
24 ‑Bo ɔ ‑srɛɛn i mɔ 'de ɛ, ɔ se i ‑kai' i,
Tʋ "bo 'a ‑cɛ" 'kpa ‑a kpʋn ɔ ‑cɛi".
25 'Ɩn nɩ nyiɔ ‑tɔo 'mɛ 'ɩn jeɛ 'je,
‑wɛe 'ɩn 'kpa nyiɔ ‑cɔɔn'‑ kaan.
'Ɩn se "isrɛi 'je due' Kea se ɔ 'bɔ,
'Ɩn se ɔɔ' "nynuu‑ 'je ʋʋ se bae' ‑te ke due'.
26 Ɔɔ' nyɔ tu a 'wɔn nyɔ 'ɔ 'kmʋ 'mii
ɔɔ ‑sa dɛ kwai jeejee,
‑wɛe "diwan‑ a kpʋn ɔɔ' "nynuu‑.
27 ‑Ɩn ‑gbla" dɛsaʋn "i,
‑ɩn nʋ 'dɔe 'a 'sʋ 'de ‑ɩn ‑je ‑kwle.
28 Dɛ ‑nʋɛ, Tʋ "bo a ‑pɔn "isrɛʋn,
ɛɛ' 'bɔ nyʋ ‑ʋʋa kpʋn a wlu i ɛ.
‑Ɛɛ fupʋ‑ i jeejee.
'Kaa ɛɛ ‑sa nyʋsaʋn 'a "ji i.
29 'blʋa a muɛ "isrɛʋn 'kwa ‑kwlea'
ʋʋa muɛ 'blea' mamaʋ 'sʋ.
30 Tɔ' ‑tɩ ‑a jii 'de "isrɛi 'wɔn,
"isrɛtɩ‑ 'a ‑po 'a 'sʋ ‑a jii 'de ɔ mɩɩɔ "kpei
31 Ɔɔ' Kea 'a kɛ' nɩɛ 'de ɔ pɛe o,
ɔɔ' nabʋ 'a kɔ'.
32 Nyʋsaʋn a blaa "isrɛi ‑gbaejriɛ i,
ɔɔ ‑pɔn ɔɔ' 'dba ‑kɔ i.
33 'Kaa Tʋ "bo 'a 'bɔɔ ɔ kwa,
'de ɛɛ' "tai ɔ "i 'de ɔ 'kwa 'pee 'a kpʋn ɔ.
34 ‑Ɩn tba Tʋ "bo tɔi", ‑ɩn kpʋn ɛɛ' ‑jeblʋ "i
'de ɛ 'e ‑ma "jru "jɛi kpa ‑wɛe ‑ɩn ‑je 'blʋa 'ble.
‑Ma muɛ 'diwɔnyniʋn 'a i sɔn ‑ta 'jea.
35 'Ɩn 'je dɛsaʋnʋɩ 'a 'kao ‑ta 'mɛ,
ɔ je kwli ‑sa ka tu klaa" a ‑sa kwli ɛ,
36 'Kaa ‑mɔ ‑si', ɔ se nɩ 'bode.
'Ɩn ‑pɔn' ɔ i ‑pɔnpɔn‑ 'ma 'a 'jeɔ.
37 ‑Ɩn sie tɔi" nyɔ "jriɛ o kea
‑ɩn ‑gbʋn nyɔ ‑ɔ ‑kma pɛe 'a blu ‑tɩ ja,
ɔɔ' jei tu 'a 'kmʋ a muɛ 'wɔan'.
38 'Kaa "jrui i nynaʋn ‑wee'‑ 'a ma" sɔn i,
'diwɔnyniʋn 'a "nynuu‑ ‑wee'‑ a ‑kwɛ'.
39 Nyʋ ‑ʋʋ ‑srɛai" 'a 'pʋʋa' 'wlʋɛ 'e Tʋ "bo 'ʋn.
Ɛmɛ ‑ɛɛ ‑cri" ʋʋpʋ‑ sʋn "kpei
‑bo 'nɔ 'kmʋ mɔ kmai" mɔ 'de ɛ
40 Tʋ "bo ‑a ‑wlʋ ʋʋpʋ‑ o, ‑ɛɛ ‑seie ʋʋpʋ‑.
Ɛmɛ ‑ɛɛ ‑seie ʋʋpʋ‑ 'de nyʋsaɩn 'kwa i
‑wɛe ‑ɛɛ ‑pʋʋ' ʋʋpʋ‑ dɛ ‑nʋɛ,
'de ɛ 'ʋn 'bo ʋʋa 'wlaa "jru.