Nyʋ ʋʋa ‑tua" 'kle 'a baewlu‑
35
Dafi 'a 'dʋ.
Tʋ "bo, ɛ 'ble 'ma ‑gba 'de nyʋ ‑ʋʋa tba
'ʋn ‑tɩ' ‑pʋn" "juɛi.
‑Ʋʋa ‑fɔan' 'ʋn o, ɛ ‑fɔn' ʋʋpʋ‑ o.
2 ‑Ɩn ‑duo" "jrii kaandɛ ke tʋ ‑fɔndɩ ‑wee'‑ "klein 'ʋn,
'de ‑ɩn ‑je 'ʋn sɔn ‑wɛe ‑ɩn ‑je 'ʋn sʋn o po.
3 ‑Ɩn ‑te' ‑ma "di ja, ‑ɩn ‑je 'ma tʋnyʋ ‑je de kaan‑,
ɛ 'tmʋʋ 'ʋn ɛ nʋ: 'Mɔ ‑nɩ ‑ma 'pʋʋ i.
4 Nyʋ ‑nɩai" ‑ʋʋ ‑jea 'ʋn 'dba, ‑tɩn' 'dbaa ʋʋpʋ‑ "i
‑suu 'wlʋ ʋʋpʋ‑ "kpei.
Nyʋ ‑ʋʋa naa tɔ' saʋn i 'de 'ʋn "kpei ɛ,
ʋʋ naade ‑tɩn' 'je ʋʋpʋ‑ "i 'dbaa‑ ʋʋa "jri 'je ‑flu".
5 ‑Sɔntɩ Tʋ "bo 'a "sooa i a mua ʋʋpʋ‑ i nʋa'
ka koflɩ pʋʋɔ' ɔ kpa nɩa, ʋʋ nɩ 'kan‑.
6 ‑Sɔntɩ Tʋ "bo 'a "sooai a mua ʋʋpʋ‑ i nʋa' a, "bɛɛ'‑
kwie kpʋn 'de ʋʋpʋ 'a ‑jei" ‑jeblʋ 'je sɩɩɛn‑.
7 "Jru ke ‑tɔn" se 'e nɩ ʋʋ je 'ʋn ‑klu' pɩɩ ‑pee ‑gba'.
Ʋʋ nʋ ɛɛ' dɛ tu 'mɛ ‑wɛe ʋʋ 'je 'ʋn 'kmʋ ‑sa.
8 'Kle klaa" ‑ka' ʋʋpʋ‑ "kpei, ʋʋa' ‑klu' pɩɩ ʋʋ ‑gba'
ɛ kpʋn ʋʋa' ‑cɛ". ‑Wɛe ʋʋ 'jeɛ "wɛin 'mɛɛ‑.
9 'Ma muɛ 'mʋa‑ nʋa'
'ɩn 'je "jɛi wei ‑pliin"‑ dɛ Tʋ "bo 'pʋʋa 'ʋn ɛ.
10 'De 'ma 'kmʋ ‑wee'‑ "klein 'ʋn Tʋ "bo,
'ɩn 'je nʋ: Nyɔ ‑ke ‑ʋn ‑kʋʋɔ'‑ "i ‑ɛ? ‑Ma ‑seie wɛenyɔ 'mɛ,
'de nyɔ ‑kmai" ‑ɔ siiɔ 'kwa. ‑Ma ‑seie'‑ nɩa" jei ke
nyɔ nyʋ a ‑tua" 'kle ‑ʋʋa dia ʋʋpʋ‑ ''jrui 'kwa.
11 Nyʋ ‑ʋʋa ‑daa' ʋʋa' ‑cɛ" ‑tɩ' 'a ‑ta 'jeʋn ɛ,
ʋʋpʋ‑ ‑a ‑tee' 'mii 'de dɩ 'ɩn sea juuo 'a ‑tɩ' 'ʋn.
12 'Dɔe 'ɩn nʋa, saʋn mɛ ʋʋ ‑sɛɛ ‑kei" 'ʋn. 'Ɩn siɛ due'.
13 'De 'mɔ ɛ, ‑ta 'wɛ ɛ nʋa ʋʋpʋ‑ ɛ, 'ɩn paa blɔ 'ʋn,
'ma pa "suɛn, 'ma bae ʋʋpʋ‑ 'a ‑Kea.
14 Ka "dɛi ke de 'di ‑tɩ nɩa, 'ɩn poɛ "jru ‑klu';
'ma na' ka nyɔ ‑ɔ pa ɔ 'de 'a 'kwɛ nɩa.
15 'Ɩn 'kpa 'e 'kle 'di, ʋʋ 'kɩɩɛn "jrui ‑wɛe ʋʋa wlaa 'ʋn.
Dɛɛ ‑tɩ 'diwɔnyniiʋn a pooa 'ma ‑tɩ'
‑wɛe ʋʋ 'jea 'ʋn 'mii dooa, 'ɩn seɛ juuo‑.
16 "Jridepoʋn ‑ʋʋa nyʋ wlaa' ‑sia' ‑jei" ‑nʋ
ʋʋa diiɛ 'nynɩ "i 'de 'ma ‑tɩ' 'ʋn.
17 Tʋ "bo, nɔ" ‑tiiɛ' ‑ɩn ‑je ‑mɩ "itai ɛ 'je nʋʋɛ ‑ɛ?
‑Ɩn ‑nynaa ʋʋa' ‑cnuu"‑ i, ‑ɩn ‑sa 'ʋn 'de ‑plaa 'wɔn.
18 'Ma muɛ ‑ma 'nynɩ "i 'bɛɛa' 'de blʋa‑ ‑wee'‑ 'a ‑kwea'‑,
‑wɛe 'ɩn 'je ‑ʋn 'nynɩ ‑sa ‑ta nyʋ ‑tuu" ‑tuu 'kɩɩan "jrui.
19 "Jru ke ‑tɔn" se 'e nɩ 'sʋ ʋʋ je 'ʋn ʋʋa' tʋnyʋ 'daa‑
ʋʋ 'bo tʋ 'a "jru kpaa 'bo 'ʋn "kpei.
Kaa' ‑tɩ' se 'e nɩ 'sʋ ʋʋ je mɔ 'ʋn 'nyɛ.
Ʋʋ 'bo "jri "kpei duuɛ 'de ʋʋ 'bo 'ʋn ‑fleɛɛn.
20 Ʋʋa' 'tmʋʋ ‑tɩ 'a blua nyɔ 'ɔ pɛe‑,
'de nyʋ ‑nɩa 'flɛʋn nyʋ 'de 'blʋa 'di mʋ ʋʋa bla ‑tɩ' "kpei foo" 'ʋn.
21 Ʋʋ tooɛ 'ʋn wɔn "kpei ‑wɛe ʋʋa wlaa 'ʋn ʋʋa nʋ:
‑A" ‑a" 'ee ‑aa ‑kweeɔ "jriɛ i ‑wɛ.
22 Tʋ "bo, ‑ma ‑jee',
‑ɩn ‑bo wɔn "muɛ ‑ɩn ‑bo i ‑teeɛ,
Tʋ "bo ‑ɩn ‑bo 'ʋn kɩɩn teɛn fiin.
23 Ɛ paa 'de ‑a 'nynɩ 'ja,
kɩɩn ɛ paa 'de ‑a 'nynɩ ɛ 'je 'ma tɔ' ‑tɩ 'tmʋ.
'Ma Kea, 'ma Tʋ "bo, ɛ 'tmʋ 'ma "kpei ‑tɩ.
24 Kea, ɛmɛ ‑srɛai" ɛ, ɛ 'tmʋ 'ma ‑tɩ' ka ‑cɔɔn'‑ ka‑.
Ɛ nʋɛ ʋʋ je 'ʋn ‑kɩn ‑saa, 'oo 'ma Tʋ "bo Kea
25 'Ma tʋnyʋ 'bo wluɛ ka, ʋʋ 'bo nʋɛ ‑ao"‑
‑a kpʋn ɔ' ‑wɛ, ɔ 'kpa 'de ‑a 'kwa ‑wɛ.
26 ‑Tɩn' 'dba nyʋ "klein ‑a ‑pɔan' a 'ma ‑cnuu"‑ "jrii nʋa' i,
nyʋ ‑bo ‑ʋʋ ‑nɩ 'ʋn bʋ ‑sɔn i sʋʋan'
‑mɛ ɛ nɩɛ ʋʋpʋ‑ 'a ‑cɛi" 'bɛɛ ‑tɩ ɛ,
‑tɩn' 'dbaa ʋʋpʋ‑ "i, tai" "maa ʋʋpʋ‑.
27 Nyʋ ‑ʋʋa ‑pɔan 'ma ‑kɩn 'jea i ɛ,
ʋʋa muɛ 'mʋa‑ cnuɛn" ‑saa,
ʋʋ 'je wlu ka: Tʋ "bo "bɛi,
ɛɛ ‑pɔn‑ ɛɛ' dbonʋɩ 'a tɔ' ɔɔ' blua' i.
28 ‑Wɛe 'ɩn 'je ‑ma "isrɛtɩ‑ ke
‑ma 'nynɩ "i 'bɛɛ‑ 'de 'wɩ 'oo 'wɩ ‑wee'‑ 'di.