Tʋ "bo ɛmɛ ‑ɛ ‑sa 'ʋn ‑sɔɔn ‑gbɛ "jru
31
Dafi 'a Kea ‑gbɛɛ'‑ dʋ ‑ɛ ‑wlʋa 'e bleʋn 'a klaa" 'a 'sbɛpun 'di ɛ.
2 Tʋ "bo, 'de ɛ 'ʋn 'bo 'ma ‑te 'flɛʋn.
'De ɛɛ' "isrɛa 'ʋn ɛ 'bo 'ʋn sʋn "kpei ‑saa
ɛ ‑seie 'ʋn ‑tɩn' je "mii 'dbaa‑
3 Ɛ po 'ma 'dawlu doun" o,
ɛ ‑too" ɛ 'je 'ʋn 'de ‑sa.
Ɛ nɩ 'ma ‑kliosou", 'ma 'wlaa ‑sɔn.
‑Ɛ nɩ 'ma 'saan ‑ɛ 'di 'ma 'jee 'pʋʋa.
4 Kɩɩn, ɛmɛ ‑nɩ 'ma ‑kliosou", ‑ɛ ‑nɩ 'ma 'saan.
Ɛmɛ ‑kɔn 'ʋn "juɛi ‑ɛɛ po 'ʋn ‑je o 'de ɛɛ' 'nynɩ 'ʋn.
5 Ɛɛ muɛ 'ʋn 'de ʋʋa' nya" sai 'di ‑saa',
dɛ ‑nʋɛ, ɛmɛ ‑ɛɛ fuo 'mii.
6 'Ɩn ‑teɛ' 'ma ‑suu 'de ɛ 'kwa i.
Ɛɛ muɛ 'ʋn ‑seia' see Tʋ "bo, tɔ' Kea.
7 Kɔin foe" po nyʋ a nyaa 'mii,
'kaa 'mɔ ‑teɛ 'e Tʋ "bo 'kwa i
8 'Ma "mlii 'ma nʋɛ 'mʋa‑
dɛ ‑nʋɛ ɛɛ 'wɔn 'ma "nmia ke 'ma 'kle
'mii 'de nyʋ 'a wɛe 'jea 'ʋn.
9 Ɛ se 'ʋn 'ma tʋnyʋ kwa 'bɔɔ‑,
ɛmɛ ‑kpa' 'ʋn "jɛi ‑wɛe 'ɩn wai 'ma na.
10 Ɛ 'je 'ma wɛe, Tʋ "bo, 'ma 'kpai.
'Ma "juua o, 'ma ku o,
'ma nyiɔjɔ ‑wee'‑ "joo 'de 'kle 'di.
11 'Ma 'kmʋ ‑wee'‑ a sin' 'de kui wɔn 'jea 'ʋn.
'Ma 'wɩ ‑wee'‑ nɩɛ 'e ‑sɔɔn ‑tua" 'di.
'Ma 'kpɩ a 'mɛɛ 'de 'ma dɛsaʋn 'a ‑tɩ' 'ʋn.
'Ma 'kmʋ ‑wee'‑ a ‑sɔɔn' "jɛi.
12 'Ma 'ʋnyɛʋn‑ ‑wee'‑ o,
nyʋ ‑ʋʋ ‑kɔɔn" a 'mii o,
ʋʋ ‑wee'‑ 'wla 'ʋn ‑crei" "jru
ʋʋa 'dbaa 'ʋn ‑tɩn' klae" klae" "i.
Ɛ 'bleɛ 'ma dbɛɛʋn ‑wee'‑ 'a faʋn‑,
Ʋʋa' nyʋ ‑ʋʋa ‑jea 'ʋn 'de "kpae' woi ‑wee'‑ a pleeɛ 'mii,
ʋʋa tɛɛn o fiin.
13 'Ma ‑tɩ' bluɛ 'e nyʋ 'dii, ɛ ‑kɔ' nyɔ ‑mɛ.
'Ɩn ‑kɔ' jae ‑wa
14 'Ma jaa" nyʋ ‑tuu" ‑tuu a pa 'ma 'wɔn i.
Ɛ 'bleɛ faʋn ‑tawee'‑.
Ʋʋ ‑wee'‑ 'bɛɛ 'ma 'kmʋ ‑saa' wlu 'ʋn 'ɛ
15 'Kaa ɛmɛ 'mɔ tba tɔi", Tʋ "bo.
'Ɩn 'na: Ɛmɛ ‑nɩ 'ma Kea
16 'Ma 'wɩ ‑wee'‑ nɩɛ 'de ɛ 'kwa.
Ɛ ‑seie 'ʋn 'de 'ma tʋnyʋ ke
'ma ‑cnun" un‑ "jrii nʋʋ 'kwa.
17 Ɛ ‑gbʋn 'ʋn "jriɛ ‑cɛɛn'‑ ja,
'mɔ ‑nɩa ɛɛ' dbonʋɩ ɛ,
ɛ 'pʋʋ 'ʋn 'de ɛɛ' 'saaʋn.
18 Tʋ "bo, ‑bo 'ma seɛ 'da a,
'ɩn 'bo "kɔun ‑kɔun 'kpaa,
'diwɔn nynii mɔ ‑tɩn' 'je "i 'dbaa‑,
‑ɔɔ wɔn 'je "sun 'sʋ ‑ɔ ‑je 'e ‑klu' mu.
19 Wɔn "klein ‑ɩa ‑tmʋa sɩ, ‑ɩ ‑kmai"
'de "isrɛi ‑pee ‑ɩa poa 'e ɩa' 'cɛ,
‑wɛe ‑ɩa ‑flɛɛan dɛ, ɩ ‑wee'‑ "sun.
20 'Kaa 'dɔe ɛ ‑teea nyʋ ɛɛ' faʋn nɩa 'e 'ʋn 'dei "bɛi.
Nyʋ ‑wee'‑ a 'jɩ i,
ɩmɩ ɛɛ nʋ 'de nyʋ ‑nɩa 'de ɛ 'ʋn "jrii.
21 Ɛɛ ‑criɛ" ʋʋ sʋn "kpei 'de ɛ "juɛi,
wlu saɩn ke ‑cnun" un‑ 'a 'jʋpʋ‑.
22 Tʋ "bo sɛ'‑, ɛɛ' 'saaʋn wa ‑gba 'de 'ʋn ‑pee,
dɛ ‑nʋɛ ka ‑kwlɔ tʋ 'a nyʋ kan' 'ɩn nɩ‑.
23 Tai' "maa 'ʋn 'ɛ 'de‑ 'ma jea wlu ka:
Ɛ nʋɛ 'mii 'ɩn 'jeɛ o tɛɛn fiin.
'Kaa 'ɩn 'da 'sʋ ɛ kpʋn 'ma baewlu 'mɛ.
24 Aomɔ kpʋan' wlu "kpei 'de Tʋ "bo 'a 'nynɩ 'ʋn ɛ, ao kma ɛɛ' ‑tɩ'.
Tʋ "bo a siɛ nyʋ ‑ʋʋa ‑teɛ' ‑kwlɩ" "jriɛ o,
'Kaa ɛɛ ‑sa ‑cɛi" 'bɛʋn klia".
25 Ao "duo 'kpɩ 'ʋn ao po 'e pɛe‑
ao nyʋ "klein" ‑tba' Tʋ "bo tɔi" ɛ.