Tʋ "bo "nyɩɛ 'ʋn 'kmʋ nɩa'
30
Dafi 'a Kea ‑gbɛɛ'‑ dʋ ‑ɛ ‑blea Keagbu‑ klaa" 'a Kea kwa ‑te' nɔ".
2 'Ma ‑sɛ 'nynɩ Tʋ "bo,
dɛ ‑nʋɛ ɛmɛ ‑kpa' 'ʋn "jɛi.
Ɛmɛ ‑se' 'wɔn ‑wɛe 'ma tʋnyʋ se 'ʋn 'mʋa‑ "kpei nʋʋ‑.
3 Tʋ "bo, 'ma Kea, 'ɩn 'dɛ 'sʋ
ɛ ‑sa 'ʋn 'de 'wɛ blʋɔ' 'mɛ.
4 Tʋ "bo, ɛ ‑sa 'ʋn 'de 'mɛa "wɩin 'mɛ,
ɛmɛ ‑sa 'ʋn 'de 'mɛ bie 'di ‑ɛ ‑ja 'ʋn 'kmʋ de.
5 Ao blee Tʋ "bo o, ao nyʋ "klein" ‑kma ɛɛ' ‑tɩ' ɛ.
Ɛ ‑kwɛi 'pepe, ao ‑sɛ 'nynɩ.
6 Dɛ ‑nʋɛ ɛɛ' 'cɛn nɩɛ "kwɛ ka,
'kaa ɛɛ' 'saaʋn ke nyɔ 'ɔ ‑kwleɛ' ba i
‑Bo nyɔ nɩ 'e 'kle 'di ɛ, ‑mɛ ka nyɔ ɔ nɩa 'e kuie 'di ɛ,
'kaa ‑bo nyɔ nɩ 'e 'mʋa‑ 'ʋn ɛ,
‑mɛ ka nyɔ ɔ nɩa 'e ‑sɔn' 'di ɛ.
7 ‑Ta 'ɩn ‑tea 'flɛʋn 'de ɛ,
'mɔ 'na ‑mɛ 'ɩn se ‑tɩ' 'jei 'de‑
8 Tʋ "bo, ɛmɛ ‑ɛ nʋ 'ʋn 'saaʋn "jrii,
‑wɛe 'ɩn ku 'e 'dei ka crʋ nɩa,
'kaa ɛ ‑sa 'ʋn "jri ‑pʋn" 'sʋ 'ɩn 'kpa "bluu bluu‑
9 Tʋ "bo, 'ɩn poɛ 'dawlu o,
'ɩn ‑tee' ɛ ɛɛ' kwa 'di 'ma 'blei‑.
10 'Ɩn 'na ‑bo 'ma nmɔ 'wlai,
‑bo 'ɩn 'mɛ 'ɩn mu 'de ‑klu' 'ee,
dɛ ɛ 'je 'oo 'jee ‑ɛ?
"Pueblʋ 'bɛɛ' ɛ 'jeɛ ‑gbɛɛ'‑?
Ɛ 'je ka ɛɛ kpʋn a wlu "kpei 'a "kuuan poo?
11 Ɛ 'wɔn 'ʋn, Tʋ "bo, ɛ 'je 'ma wɛe‑,
ɛ ‑seie 'ʋn Tʋ "bo.
12 Ɛ ‑sa 'ʋn ‑fɩn" 'a "wɛin 'sʋ 'ma jea "mli.
Ɛ ‑sa 'ʋn 'kwɛdɩ 'ʋn ‑wɛe ɛ paa 'ʋn ‑kɔ' dɩ 'ʋn.
13 'De 'ma pɛe 'je wɔn 'bai ɛ 'jeɛ o blee‑ Tʋ "bo,
'ma Kea, 'ɩn 'jeɛ 'nynɩ ‑sa ‑o jeejee.