Baewlu ke Kea sɛ' paoa' ke‑
28
Dafi 'a 'dʋ.
Tʋ "bo, 'ma ‑kliosou",
‑mɔ 'ma 'da, ‑Ɩn ‑bo 'ʋn "suɛn.
‑Bo ‑ɩn ‑sun" 'ʋn 'jaa,
‑mɛ 'ɩn ‑kɔ' nyɔ ‑mɛa ‑wɛe
ʋʋa kpa 'de 'mɛbie "wɛin ɛ.
2 ‑Bo 'ma sea ‑ʋn ‑too"‑ "i po ɛ,
ɛ ke ‑bo 'ɩn kpa sʋn "jɛi 'ɩn tooɛ 'e
‑ma ‑gbɛɛ'‑ na' ‑kwea i, ‑ɩn ‑wɔn 'ma 'dawlu‑.
3 ‑Ɩn ‑bo 'ʋn 'bleɛ ka nyɔ ɔ 'blea 'diwɔnyniʋn ɛ,
ʋʋa 'tmʋɛ pɛe 'a blutɩ‑ 'de ʋʋ ‑ponyiɔ ‑pee
de ‑mɛ dɛsaʋn "ji 'de ʋʋpʋ‑ 'ʋn 'mɛ.
4 Ka ʋʋa' nʋʋdɩ nɩa o, ka ʋʋa' kplɩn nɩa o,
‑ɩn ‑sa ʋʋpʋ‑ ɩa' ‑kei" kan'. Dɩ ʋʋa nʋa nyʋ "jrii ɛ,
‑ɩn nuɩ ʋʋpʋ‑ "jrii ‑ke
‑ɩn nʋɛ ʋʋa' dɩsaɩn 'a ‑kao 'je ʋʋ "jru bluua‑
5 Ʋʋa' 'wɔn Tʋ "bo 'a nʋʋdɩ ke dɩ ɛɛ' sʋn nʋa 'mii.
Kea, ‑sa ʋʋpʋ‑ i, ʋʋ 'bo 'kmʋ de jiɛ.
6 "Diwan kpʋn Tʋ "bo, dɛ ‑nʋɛ,
ɛɛ poɛ 'ma 'dawlu doun" o.
7 Tʋ "bo mɛ ‑nɩ 'ma 'kpɩ, ɛmɛ ‑nɩ 'ma "i kaan dɛ‑.
Ɛmɛ 'ɩn ‑te' ‑kwlɩ", ɛɛ muɛ 'ʋn o 'wlʋʋa',
'mʋa‑ "ji 'ma pɛe 'mɛ' 'ɩn nɩɛ "i 'ɩn 'je ble 'ɩn 'jeɛ 'da.
8 Tʋ "bo nɩɛ ʋʋ ‑wee'‑ "klein 'a Kea ‑o,
ɛ nɩɛ "ikmaa' ‑ɛɛ ‑seie a nyɔ ɛ poa 'cna "jru ‑o.
9 ‑Ɩn ‑pʋʋ' ‑ma 'cɛ, ‑ɩn po ʋʋ "diwan',
‑ɩn ‑nɩ ʋʋpʋ‑ 'a 'dei ‑tei,
‑ɩn ‑tu" ʋʋpʋ‑ 'a ‑tɩ' 'de nɔ" 'oo nɔ" ‑wee'‑ 'di.