‑Bo 'ɩn tba Kea tɔi" ɛ faʋn 'a nʋ 'ʋn
27
Dafi 'a 'dʋ.
Tʋ "bo ‑nɩ 'ma ‑sɔn', ɛmɛ ‑nɩ 'ma 'pʋʋɩ.
Nyɔ 'ɩn 'je plee ɛ?
Tʋ "bo ‑ble 'ma 'kmʋ kwa.
Nyɔ ‑ɔɔ faʋn 'je 'ʋn nʋ ‑ɛ?
2 ‑Bo 'diwɔnyniʋn a sea 'ʋn ‑pee ji
'de ʋʋ 'je 'ʋn 'wɔn i di ɛ,
ʋʋpʋ‑ ‑a ‑gbee' 'sʋ ‑ʋʋa ‑wla 'blae.
3 ‑Bo tʋ ‑fɔʋn ‑mʋ bla bɔ'
'de 'ma ‑tɩ' 'ʋn mɔ 'de ɛ, 'ma pɛe se i blai,
‑bo nyɔ ɔ sea 'ʋn tʋ o ‑fɔn' mɔ 'de ɛ,
'ɩn 'bleɛ tɔ' tba ‑ta.
4 'Tʋbo 'ma ‑tee' ɛ dɛ due' koun i ‑ɛ kpʋn 'ma pɛe 'a 'kpa i,
'ma ‑pɔn 'ɩn 'je 'e Tʋ "bo o ‑gbu" ‑sɔn "ti
'de 'ma 'wɩ ‑wee'‑ "klein" 'di,
'de 'ma "jriɛ 'je ɛɛ' ‑gbu" 'jraa‑.
5 Dɛ ‑nʋɛ ɛ, ‑sɔntɩ 'wɩ saɩn a mua nynia' a,
ɛmɛ ‑ɛɛ mu 'ʋn sʋn "kpei ‑cria" 'de ɛɛ' ‑gbu" 'di,
‑ɛɛ mu 'ʋn 'kwla ‑tu" 'a 'de ɛɛ' ‑gbu" 'a "kɛ o,
'de ɛ 'je 'ʋn i nynaa‑ 'de "sou crʋ "kpei ‑wɛe ‑tɩ' 'je 'ʋn 'je.
6 ‑Bo ɛ nɩ kan' ‑mɛ 'ɩn 'ja 'ma tʋ o ‑fɔʋn
‑ʋʋ ‑pin' a 'ʋn 'dewei "jru,
'ma pa 'e Tʋ "bo o ‑gbu",
'ma ‑sa 'sraa‑ 'ma bla, 'ma ble,
'ma ‑sa 'ma Tʋ "bo 'nynɩ .
7 Tʋ "bo, ɛ 'wɔn 'ma wlu, 'ma weɛ o,
ɛ 'je 'ma wɛe, ɛ kpʋn 'ma baewlu.
8 Ɛ 'tmʋʋɛ 'ma pɛe‑, ɛ 'na: Ao ‑pɔn 'ma juua' i.
Ɛmɛ ‑tɩ 'ɩn "bie 'de ɛ o, 'oo Tʋ "bo.
9 Ɛ 'bo ɛɛ' "juua 'kwla ‑tu" ɛ 'de 'ʋn ‑pee.
Ɛ 'bo ɛɛ' dbonʋɩ nya i ‑fuuɛn 'de 'cɛn 'ʋn.
Ɛmɛ 'ɩn ‑pee' "i, ɛ 'bo 'ʋn "i "itaiɛ,
ɛ 'bo 'ʋn 'bɔ ɛ, 'ma Kea, 'ma 'pʋʋɩ;
10 ‑Bo 'ɩn "bo ke 'ɩn de 'bɔ 'ʋn mɔ 'de ɛ,
ɛmɛ Tʋ "bo, ɛɛ muɛ 'mii 'tɛan'
11 Tʋ "bo, ɛ tɔɔ 'ʋn ɛɛ' ‑je.
Ɛ po 'ʋn ‑je ‑srɛai" o
'ma nabʋ je 'kɔ 'de 'ma tʋnyʋ 'a ‑tɩ' 'ʋn.
12 Ɛ 'bo 'ʋn ʋʋ 'kwa ‑tu" ɛ,
ʋʋ 'bo 'ʋn ʋʋa' ‑kwlʋtɩ "jrii nʋʋɛ.
Dɛ ‑nʋɛ, ‑tɩ' 'a ‑ta 'jei saʋn a bla 'ʋn ‑tɩ' "kpei.
‑Mɛ ʋʋa ‑sa 'nʋ 'mlai 'de 'ʋn ‑pee.
13 ‑Bo 'mɔ se ɛɛ' 'diwɔnmɔa' ‑kwlɩ" ‑te' 'de ɛ Tʋ "bo,
‑mɛ dɛ 'mɔ 'je 'ʋn 'wlʋ 'de nyiɔɔ' 'blʋa ‑nɛ "kpei ‑ɛ?
14 ‑Mɛ ‑mɔ ‑te' Tʋ "bo ‑kwlɩ"
‑Ɩn ‑duo" 'kpɩ 'ʋn, ‑ɩn ‑bo pɛe i pleeɛ.
Kɩɩn, ‑ɩn ‑te' Tʋ "bo ‑kwlɩ".