Nyɔ ‑nɩa 'de 'kle 'di 'a baewlu‑
25
Dafi 'a 'dʋ.
Tʋ "bo, 'ma "biiɛ 'de ɛ o.
2 Kea, ɛmɛ 'ɩn tba tɔi", ‑tɩn' 'bo 'ʋn "i 'dbaa,
‑wɛe 'ma tʋnyʋ 'bo 'ʋn wlaa.
3 Nyɔ ‑tea' ɛmɛ Kea ‑kwlɩ" ‑tɩn' se ɔ "i 'dbaa i.
'Kaa nyʋ "klein ‑a pooa ‑mɔ Kea 'srɛi foo" 'ʋn ɛ,
‑tɩn' a muɛ ʋʋ "i 'dbaa.
4 Tʋ "bo, ‑tɔɔ 'ʋn ‑jeblʋ 'ɩn 'jea kpa,
‑ɩn ‑tɔɔ 'ʋn ka 'ɩn 'jea na sʋn nʋɛ.
5 ‑Ɩn ‑tɔɔ 'ʋn dɛ, ‑ɩn po 'ʋn tɔ' ‑tɩ 'a ‑je o.
Dɛ ‑nʋɛ Kea, ‑mɔ ‑ɔɔ ‑pʋʋ' 'ʋn.
‑Mɔ 'ɩn ‑te' ‑kwlɩ" 'de ‑sɔn' 'di.
6 Tʋ "bo, ‑ɩn po ‑ma nyiɔɔ' wɛe 'jea ke,
‑ma nyiɔɔ' ‑tɩ' kmaa' ‑tɩ' ‑kwlʋ o.
Dɛ ‑nʋɛ, ɛmɛ ‑nɩ ɩ nɩ' 'wɩ 'o 'wɩ ‑wee'‑ 'di.
7 Tʋ "bo, dɩsaɩn 'ɩn nʋa 'de 'ma ‑koa" kpae" ɛ,
‑ɩn ‑bo ɩa' ‑tɩ' ‑kwlʋ o pooɛ.
‑Ɩn po ‑ma nyiɔɔ' ‑tɩ' kmaa' ke
‑ma 'diwɔnmɔa' 'a ‑tɩ' ‑kwlʋ o.
8 Tʋ "bo nmɔ 'diwɔn,
ɛ "srɛi ɛɛ tɔɔ dɛsaʋnʋɩ ‑jeblʋ ɔ 'jea kpa.
9 Nyʋ ‑ʋʋa jaa ʋʋa' ‑cɛ" ja,
ɛɛ tɔɔ ʋʋpʋ ‑jeblʋ ‑srɛai" o,
ɛɛ tɔɔ ʋʋpʋ‑ ‑jeblʋ ‑cɛɛn'‑.
10 Tɔ' ‑tɩ ke nyiɔɔ' ‑tɩ' kmaa'
mɩ ‑nɩ Tʋ "bo 'a ‑jeblʋ,
'de ka ɩ "siia 'nynɩ ‑ɔ nʋa kan' ke
nyɔ ‑kpʋan' dbɛɛdɛ ‑nɩa 'de
ɔ ke Kea 'nynɩ 'a ‑tɩ' 'ʋn.
11 'De ‑ma nyiiɔ' ‑tɩ' kma ‑tɩ 'ʋn ɛ,
Tʋ "bo, ka 'ma dɩsaɩn mɩ 'je ɩ ‑ti 'de ɛ,
ɛ 'wlʋɩ "kpei.
12 Nyɔ ‑ɔɔ pleea Tʋ "bo,
ɔmɔ ɛɛ tɔɔ ‑jeblʋ ɔ 'jea kpa.
13 Ɔɔ muɛ 'kmʋ nɩa' 'de 'mʋa‑ 'ʋn,
‑wɛe ɔɔ' "nynuu‑ 'je 'blʋa "i 'bɔɔ‑.
14 Tʋ "bo a ‑sa ɛɛ' pɛe 'kwla
'de nyʋ ‑ʋʋa ‑tea' ɛɛ' ni' ‑pee.
'De ɛ 'je kan' nɩ ‑wɛe ʋʋ 'je ɛɛ' dbɛɛdɛ juuo‑.
15 'Ma "jri nɩɛ 'o ‑mɔ Tʋ "bo ‑pʋn'' jeejee,
dɛ ‑nʋɛ ‑mɔ ‑sa 'ma bʋ 'de nya" sai 'di.
16 Ɛ ‑gbʋn 'ʋn ja, ɛ 'je 'ma wɛe‑,
dɛ ‑nʋɛ 'ɩn 'kpa wɛenyɔ, 'ɩn nɩɛ due'.
17 'Ma pɛe a ‑siɛ' ‑sro, ‑ɩn ‑seie 'ʋn, tai' "maa 'ʋn ɛ.
18 ‑Ɩn ‑gbʋn 'ma "nmia ke 'ma 'kle ja,
‑ɩn ‑kɔ' 'ma dɩsaɩn‑
19 Ɩn ‑gbʋn, dɛ 'ma tʋnyʋ ‑tia,
dɛ 'ma 'ʋnyɩa' kmai" ɛ.
20 'De ‑ɩn 'ʋn 'bo 'ma paa 'kwla,
‑ɩn kpʋn 'mii, ‑tɩn' 'bo 'mii 'dbaa.
21 ‑Ɩn ‑te' 'ʋn kwa wɛi dɛ dɛ‑nʋɛ',
ɛmɛ ‑nɩ 'ɩn tba ‑ʋn tɔi".
22 ‑Ɩn ‑sa Israɛ 'kle ‑wee'‑ "kpei 'oo Kea.