Nyɔsoa a pa 'e ɛɛ' ‑gbu" 'di
24
Dafi 'a 'dʋ.
'blʋa o, dɩ "klein ‑nɩa 'nɔ 'blʋa "kpei o,
'kmʋ ‑wee'‑ o, nyʋ "klein ‑nɩa 'kmʋ ke‑
ʋʋ ‑wee'‑ nɩɛ Nyɔsoa 'a dɛ.
2 Ɛmɛ ‑te' 'blʋa 'bo 'tɔni "kpei
‑wɛe ‑ɛ po 'blʋa 'a wɔn ‑kwlu'
'bo "ni "kpei 'de "ni nɩ 'e 'blʋa ‑sɔn.
3 ‑Ɔ ‑bɛɛ'‑ Nyɔsoa 'a crʋ "kpei 'jaa'
‑wɛe ‑ɔ ‑jeɛ "juɛi ‑gbɛɛ'‑ 'de ɛɛ' ‑gbu" 'di ‑ɛ?
4 Nyɔ ‑ɔ ‑sea' nmɔ kwai nɩ,
‑wɛe ‑ɔ pɛe "kpei flɔan i ɛ,
nyɔ ‑ɔɔ' ‑srɛɛan ‑wɛe ‑ɔɔ' 'tmʋa sɩ
'de foo" 'ʋn ‑tɩ 'ʋn ɛ, ɔmɔ ‑je 'o pa.
5 Ɔmɔ Nyɔsoa 'je "diwan po, dɛ ‑nʋɛ
Nyɔsoa ‑nɩa ɔɔ' 'pʋʋi ɛ ɛmɛ ‑nʋ' ɔ "i 'srɛi 'ʋn.
6 'Oo Nyɔsoa, 'blʋa ‑jea ‑ʋn "juɛi ‑gbɛɛ'
‑wɛe ‑ʋʋ ‑ke ‑ɩn ‑jea "isii 'kamɔ ʋʋ 'je nɩ‑,
Sakɔbʋ 'a Kea. ‑Te' ‑kwlʋ.
7 ‑Kea ‑gbu klaa" 'a kpae"
‑ɩ sea dooa ‑ta 'ble ɛ ao kain ɩ "wɛin,
ao kain ɩ "wɛin ‑wɛe kɛɛma' beɔ 'e ‑gbu" pa.
8 ‑Ɔ ‑nɩ kɛɛma' beɔ ɛ?
Ɛ Nyɔsoa ‑kladiɔn "ikmai,
Ɛ Nyɔsoa, tapoi‑ ‑o.
9 ‑Kea ‑gbu klaa" 'a kpae"
‑ɩ sea doa ‑ta 'ble ɛ ao kain ɩ "wɛin,
ao kain ɩ "wɛin ‑ wɛe kɛɛma' beɔ 'e ‑gbu" pa.
10 ‑Ɔ ‑nɩ kɛɛma' beɔ ɛ?
Ɛ Nyɔsoa ‑kladiɔn "ikmai,
Ɛ Nyɔsoa, tapoi‑ o. ‑Te' ‑kwlʋ.