'Ma Kea Dɛɛtɩ‑ ‑ɩn ‑bɔ 'ʋn ‑ɛ
22
Dafi 'a 'dʋ ɔ "nyɩa bleʋn 'a klaa" 'jea dɩ bla ‑wɛe ɔ 'jea dee ɛ. ‑Sɔn' wɔin" kwɛ 'ɛ 'dʋ ‑o.
2 'Ma Kea, 'ma Kea, Dɛɛtɩ‑ ‑ɩn ‑bɔ 'ʋn ɛ,
ɩn ‑tɛɛn 'ɩn o, ‑wɛe ‑maa' ji 'ʋn o 'wlʋʋa 'de ‑mɛ 'ma 'da ‑ʋn ‑ɛ?
3 'Ma Kea, ‑bo ‑sɔn' ‑sɩn' 'ma 'da ‑ʋn ‑ɛ,
‑maa' 'wɔn 'ʋn. 'De "maʋ, 'ma wee' 'sʋ 'maa fɔn‑.
4 'De ‑mɛ ‑ɩn ‑kwɛi ‑ɩn ‑teɛ ‑ma Tʋ "bo kpatɛ‑ "kpei
'de Israɛnyʋ 'a bleedʋ 'a ‑kwea'‑.
5 ‑Mɔ ‑a "bo ‑wi" tba tɔi" 'de‑,
kɩɩn ʋʋ ‑teɛ' ‑ʋn ‑kwlɩ" ‑wɛe ‑ma ‑seie ʋʋpʋ‑.
6 ‑Bo ʋʋ 'da ‑ʋn 'de ʋʋ 'je ‑ʋn tɔi" tba,
‑ma muɛ ʋʋpʋ‑ ‑seia' ‑tɩn' se ʋʋpʋ‑ "i 'dbaa i.
7 'De 'mɔ ɛ, 'ɩn nɩ sɩɛ'ʋn 'mɩmɩ ‑o, 'ɩn se nyiɔ nɩ‑.
Nyiɔ ‑wee'‑ a ‑cree"‑ 'ʋn 'ɛ, 'blʋa ‑wee' a blaa 'ʋn 'blʋɔ‑,
8 Nyʋ "klein ‑jeaa' 'ʋn "jriɛ ‑wee'‑ a wlaa 'ʋn 'ɛ,
ʋʋ ‑wee'‑ a 'kɩɩɛ', ʋʋa 'sa 'nynɩɛ ʋʋa jea "jru i ‑fuuan"‑:
9 Ɔ ‑teɛ' Tʋ "bo ‑kwlɩɩ? Ɛ ‑seie ɔ ‑la 'ee,
ɔ se 'na Tʋ "bo 'a ‑tɩ' mɩ ‑ɩa nʋɔɔ 'mʋa‑, ɛ 'pʋʋ nɔ 'la 'ee.
10 Kɩɩn, ‑ta 'ɩn nɩa "jupliɛ ɛ, ‑mɔ ‑cri" 'ʋn kwa "kpei,
‑ta 'ɩn nɩa 'de 'ɩn de 'a "kwli 'di ɛ ‑mɔ ‑sie 'ʋn o.
11 'Ɩn siɛɛ ‑saan"‑ ʋʋ je 'ʋn ‑ɩn kwa ‑te',
'ɩn se 'wlʋ ke ‑ɩn je 'ma Kea nɩ‑.
12 ‑Ɩn ‑bo 'ʋn o teɛn, dɛ ‑nʋɛ 'ma jiɛ ‑tɩ' 'jea'.
Nyɔ jrɔ' se 'e nɩ‑ ‑ɔ ‑je 'ʋn o 'wlʋ.
13 Bli' ‑gblɔ ‑tuu" ‑pin' 'ʋn 'ɛ,
wɔnkma nmi ‑wlʋa Basan pooɛ 'ʋn ‑kweea'‑.
14 Ɩ 'baiɛ wɔn 'de 'ʋn ‑pee,
ɩ nɩ ka ‑plaa ‑ɛɛ ‑wɔ" 'a ‑wɛe ‑ɛɛ ‑faea' dɛ i nɩa.
15 'Kpɩ wa "mii "ni 'wlʋʋɛ 'ɩn bʋ ‑sɔn,
'ma pɛe ‑kɔ' dʋ 'a "kao‑ ‑ɛɛ cɛan "ni ɛ.
16 'Ma ‑pliɔn' ‑je jɛ 'sʋɛ ka maʋn' "ka nɩa,
'ma mɩɩɔn 'nɛ 'de 'ma wɔɔn' "jɛi kwea‑,
‑ma kpa 'ʋn 'de 'mɛbie "wɛin.
17 ‑Gbe' 'a ‑gbaapʋ ‑pin' 'ʋn 'ɛ,
'diwɔnyniiʋn 'a ‑gbae pooɛ 'ʋn "kpei,
ʋʋ "fiiɛ 'ma bɩ ke 'ma sɩn 'mɛ.
18 Nyʋ 'bɛɛ' ʋʋ 'je 'ma 'kpɩ ‑sro',
'ma tʋnyʋ a gbʋɛn 'ʋn ja wlowlo.
19 Ʋʋ ‑seea' 'ma 'ʋnpaadɩ 'ʋn
‑wɛe ʋʋ po 'ma "bai klaa" soa' 'ʋn.
20 'De ‑mɔ ɛ 'oo Tʋ "bo, ‑ɩn ‑bo 'ʋn o teɛn fiin;
‑Mɔ ‑nɩa 'ma 'kpɩ ɛ, ‑ɩn ‑too" "mii.
21 ‑Ɩn ji ‑ɩn ‑je 'ʋn 'pʋʋ‑ 'de ‑placnɛ "i.
‑Cri" 'ʋn kwa "kpei 'de ‑gbe' ‑wi" ‑nʋ 'a 'cɛn "wɛin.
22 ‑Ɩn ‑sa 'ʋn 'de ‑plaa 'wɔn,
‑ɩn ‑saa 'ʋn ‑jei" 'de bli' 'a ‑gbɩn "juɛi,
kɩɩn ‑ɩn ‑wɔn 'ma 'dawlu 'mɛ.
23 'Ma muɛ ‑ma ‑tɩ' 'tmʋa 'de 'ma de 'di ‑wi" "juɛi,
‑wɛe 'ɩn 'je ‑ma 'nynɩ "i 'bɛɛ‑ 'de nyʋ ‑wee'‑ "klein 'a ‑kweea'‑.
24 Aopʋ‑ ‑ɔɔ ‑jea Tʋ "bo wɔn ɛ ao 'bɛɛ ɛɛ' 'nynɩ",
Sakɔbʋ 'a "nynuu‑ ao 'tmʋ ɛɛ 'beɔdɛ 'ɛ ‑tɩ',
Israɛ 'ɛ "nynuu‑, ao ‑gbɛɛ'‑ ɛ "juɛi.
25 ‑Ta nɩa" jei nɩa 'de 'kle 'di ɛ ɔ seɔ sʋn i poo‑,
ɛ seɔ "jriɛ ‑pʋn" ‑sa. "Ɩɩn‑, ɔɔ' 'dawlu ɔ poa, ɛ poɛ doun" o.
26 ‑Mɔ ‑ɔɔ nʋɛ ‑wɛe 'ma 'bɛɛ ‑ma 'nynɩ "i
'de nyʋ ‑tuu" ‑tuu 'a ‑kwea'‑,
dɩ "klein ‑ɩa wlu 'ɩn cɛan ‑tie" 'ma mʋɩ ‑wee'‑ nʋa'
'de nyʋ ‑ʋa ‑gbɛɛa' ‑ʋn "juɛi ‑wee'‑ 'a ‑kwea'‑.
27 Wɛenyʋ didɛ ʋʋ 'je dbo,
kɩɩn nyʋ Tʋ "bo nʋa ‑wɛe ‑ʋʋ ‑nɩa 'kmʋ 'bɛɛ ɛɛ' 'nynɩ "i
Ao ‑kwle 'kmʋ.
28 Dɛ ‑nynia' 'blʋa 'a "tiin'
‑wee'‑ a muɛ ‑ma ‑tɩ' ‑kwlʋ o poa' Tʋ "bo.
Ka ʋʋ ‑wee'‑ ‑tia ʋʋ ‑wee'‑ a muɛ ‑ʋn o "biia
‑wɛe ʋʋ 'je ‑ʋn "jʋɛi ‑gbɛɛ'‑.
29 Dɛ ‑nʋɛ Tʋ "bo nɩɛ 'beɔ ɛmɛ ‑nɩ 'e 'blʋa ‑wee'‑ "jru kpɔ'.
30 Wɔnkmaʋ "klein ‑nɩa ‑ta 'blʋa ‑nɛ "kpei a muɛ dɛ dia'
‑wɛe ʋʋ 'je ‑ʋn "juɛi ‑gbɛɛ'‑.
31 Ʋʋa' "ji ‑wi" ‑mʋ ‑ke ɛ,
ʋʋa muɛ Tʋ "bo "juɛi nʋa'
‑wɛe ʋʋ 'je ɛɛ' ‑tɩ' 'tmʋ 'de nyʋ ‑ʋʋa mua ʋʋ 'de tbaai" ‑pee.
32 ‑Mʋ ‑wi" ‑wee'‑ a muɛ ɛɛ' "isrɛ ‑tɩ ke
'dɔe Kea nʋa 'de ɛɛ' 'cɛ ‑wi" ‑pee 'tmʋa'
'de nyʋ ‑ʋʋa mua 'wlʋʋa' 'de ʋʋpʋ‑ 'de ‑pee.