‑A sɛ' dɛ ‑ɩn kpa tʋ 'a "jru ɛ
21
Dafi 'a 'dʋ ɔ "nyɩa bleʋn 'a klaa" a.
2 'Oo Tʋ "bo ‑ma "ikmaa' a nʋɛ 'blʋajei 'mʋa‑,
'mʋa‑ klaa" ‑nɩ 'de ɔ pɛe o dɛ ‑ɩn ‑nyɩɔ" 'pʋʋa 'a ‑tɩ' 'ʋn.
3 Dɛ ɔɔ' pɛe a ‑pɔan' a i ‑ɩn ‑nyɩ" ɔ.
‑Wɛe dɛ ɔɔ ‑pɔan' a ‑ɩn seɔ ‑kwlʋ nynii‑. ‑Te' ‑kwlʋ.
4 ‑Ɩn ‑jɔ "diwan‑ ‑tuu" ‑tuu,
‑wɛe ‑ɩn ‑teɔ' 'sani 'a ‑gbla "jru.
5 'Kmʋnɩa' ɔ ‑teea' ‑mii' ɛ, ‑ɩn ‑nyɩ" 'ɔ.
‑Ɩn ‑tu" ɔɔ' 'wɩ mɩ 'a ‑cɛ" "kpei 'mɛ,
ɔɔ muɛ 'kmʋnɩa' mamaʋ.
6 Dɛ ‑ɩn ‑seie ɔ ɛɛ' ciaan"‑
‑nɩa 'de ɔ "kpei "bɛi.
‑Ɩn nʋɛ' ɔ nɩɛ dɛwɔn,
‑wɛe ɔ nmɔɔ 'de nyʋ "jri 'dei.
7 ‑Ɩn nʋɛ', "diwan‑ 'jeɔ kpʋn
'de nɔ" ‑wee'‑ 'di.
Dɛ ‑mɔ Kea nɩa 'de ɔ ‑pʋn" ɛ,
ɛɛ 'mʋa‑ "ji 'ɔ.
8 'Blʋajei ‑teɛ' Tʋ "bo ‑kwlɩ",
Kea ‑nɩa 'e dɩ ‑wee'‑ "klein "jrukpɔ' 'ɔ
'diwɔnmɔa' nʋɛ' ɔɔ' dɩ se crɛ i.
9 ‑Ma sʋn a muɛ ‑ma tʋnyʋ jɛɛa',
‑ma diiansʋn a muɛ nyʋ ‑nyɩa ‑ʋn 'ʋn jɛɛa'.
10 ‑Ma muɛ nʋa' ka nɛ ‑gban nɩa ʋʋ 'je kan' nɩ‑,
‑sɔn ‑tɩ ‑ma mua de 'wlʋʋa' a.
Tʋ "bo 'a 'cɛn ɛ muɛ ʋʋ "kpei jia,
‑wɛe ɛ 'je ʋʋa' ma" i ‑sa.
‑Wɛe nɛ 'je ʋʋ di.
11 ‑Ma ‑muɛ ʋʋa' "ji i ‑saa'
‑ta 'blʋa ‑nɛ "kpei,
'de ʋʋa' ma" 'je i sɔn‑
'de nyiɔɔ' "nynuu‑ "klu.
12 Ʋʋa ‑pɔn ‑ma dɛsaʋn "jrii nʋa' i,
ʋʋa naa ‑ʋn tɔ' saʋn "kpei,
'kaa ʋʋ se ɩa' nʋa' 'a 'kpɩ 'ble i.
13 Ʋʋa muɛ ‑ʋn "juɛi plea'
‑wɛe ‑ɩn ‑je ʋʋpʋ‑ 'sɩn "kpei tba.
14 Ɛ sɔn 'ʋn, ɛ 'je ɛɛ' "ikmaa' to‑ 'oo Tʋ "bo,
‑aa muɛ blea', ‑a ‑je dɩ bla
'de ɛɛ' "ikma ‑tɩ 'ʋn.