Kea 'a nʋʋdɩ ke ɛɛ' wlu ke‑
19
Dafi 'a 'dʋ ɔ "nyɩa bleʋn 'a klaa" a
2 Jaʋn a 'tmʋɛ Kea 'a 'beɔdɛ 'ɛ ‑tɩ',
Dɩ ‑nɩa 'e jaʋn ‑kwlʋ a ‑sa Kea 'a nʋʋdɩ 'nynɩ.
3 ‑Sɔn' ɔ tɔɔ ɩ ‑sɔn' jrɛ' 'mɛ,
Kwiie a ‑seea' kwiie jrɛ' ‑kwlʋ.
4 Ɩ se wlu nɩ‑, ɩ se 'tmʋʋtɩ‑ nɩ‑, nyɔ 'ɔ 'wɔn ɩa' wlu.
5 Ɩa' ‑cɛ" 'kpa po ɩa' ‑cɛ" ɛ "kuuan, ɩa' cnuɛn" ɛ muɛ 'blʋa 'a "ti na'.
Kea ‑peeɛ' 'jrʋ 'bo jaʋn ‑kwlʋ.
6 Ka nyɔ ‑blea 'nynɔ dee' 'ʋn a 'wlʋa 'de ɔ o ‑gbu"
‑wɛe ɔɔ "siia "kpae 'de 'mʋa‑ 'ʋn nɩa,
ka ‑tiɛngblʋ kpa i ke 'mʋa‑ a ‑sia' 'kamɔ 'jrʋ nɩ‑
7 Ɛɛ sɔn 'ʋn 'ɛ 'de jaʋn 'a 'fɔ jrɛ' o,
‑wɛe ɛɛ ‑crai" 'de 'fɔ ‑sia 'e mu o. Ɛɛ' nɛ 'ɛ seea dɛjrɛ'.
8 Tʋ "bo 'a kɛ' nɩɛ 'pepe, ɛɛ poɛ nyʋ 'a 'kmʋ fai",
dɩ ɛ 'tmʋa, ɩ ‑wee'‑ nɩɛ tɔ' ‑tɩ.
Ɛɛ "nyɩɛ nyʋ ‑flɔan 'ʋn tɔ' 'di nɩa'.
9 Tʋ "bo 'a kɛ' "srɛi, ɛɛ poɛ nyʋ 'mʋa‑ pɛe o.
Tʋ "bo 'a kɛ' nɩɛ 'pepe, ɛɛ ‑gba' i ɛ nyɔ 'ɔ "jri.
10 ‑Bo Tʋ "bo 'a faʋn nɩ 'de nyiɔ 'ʋn ɛ,
ɛɛ poɛ "jri "kpae 'pepe 'de nɔ" "o nɔ" ‑wee'‑ 'di.
Tʋ "bo 'a 'tmʋʋ ‑tɩ ‑wee'‑ nɩɛ tɔ' ‑tɩ, ɩ "srɛi.
11 Ɩ nmɔ "jrii ɩ je 'sani ‑sii, ɩ je 'sani ‑tuu" ‑kweai ‑sii.
Ɩ nmɔ wɔn ɩ je dʋ 'a 'cna ‑sii,
ɩ je dʋ 'a 'cna ‑wlʋa 'e 'kɔɔn dee kpan "i ‑sii.
12 Tʋ "bo, ‑ma kɛ' nɩɛ 'srɩn ‑o 'de ‑ma 'dbonʋɩ ‑pee.
'Kaa nyɔ ‑ɔɔ mʋɩ wɔn 'jea a, ‑mɔɔ' muɛ ɛɛ' crɔn' klaa" dia'.
13 Nyɔ ‑juuo ɔɔ' dɩsaɩn ‑wee'‑ "klein ɛ‑?
Dɩsaɩn 'ɩn nʋa 'ɩn sea "i juuo ɛ, ‑ɩn ‑wlʋɩ "kpei.
14 ‑Ɩn ‑tɛɛn 'ʋn ‑cɛi" 'bɛɛ‑ nyʋ kɩɩn, ʋʋ 'bo 'ʋn "jru 'jaa.
‑Bo ɛ nɩ kan' ‑wɛe 'ɩn je wlu' 'wlʋ 'de 'ɩn je dɩsaɩn klae" nʋ.
15 Wlu ‑wlʋa 'de 'ʋn 'wɔn o,
‑jɩ 'ma naa tɔ' "kpei o, ‑ɩn kpʋn ɩ, Tʋ "bo.
'Ma ‑kliosou", 'ma ‑seie i.