Kea a kpʋɛn wlu "kpei
12
Dafi 'a 'dʋ ɔ "nyɩa bleʋn 'a klaa" ɔ 'jea ble 'de blaadɩ ‑ɩa "dbu nɩa ‑mɛ" na "kpei ɛ.
2 ‑Ɩn ji Tʋ "bo, "isrɛʋn ‑wee'‑ a ‑kwɛ',
wlu "kpei kpʋn nyʋ ‑wee'‑ a sɔn i 'de nyʋ "klu.
3 Nyʋ a diiɛ ba sɩ wɔn,
nyɔ ɔ pooɛ ba mɩɩɔ srɛ i ‑wɛe ɔ 'ble pɛe saʋn‑.
4 Tʋ "bo, nyʋ ‑ʋʋa pooa nyʋ mɩɩɔ srɛ i ke,
nyʋ ‑sea' wlu 'wɔn nɩ ke‑, ‑ɩn ‑sa ʋʋpʋ‑ i.
5 Nyʋ ‑ʋʋa wlua ‑ʋʋ ‑na:
‑Aa mɩɩɔ mɛ ‑nʋɛ ‑wɛe ‑a ‑kmai",
‑aa wɔn ‑nɩ ‑aa ‑cɛ" 'ɛ Kea,
nyɔ ‑bɛɛ' ‑a "jru 'jaa ɛ‑, ‑ɩn ‑sa ‑mʋ i.
6 Wɛenyʋ ke
"nmianyʋ ‑ʋʋa ‑tʋa" 'kle 'a ‑tɩ' 'ʋn ɛmɛ ‑ɛɛ ‑tɩ' Tʋ "bo 'na:
'Ma muɛ 'ʋn sɔan' ‑wɛe 'ɩn je pɛe 'a blua'
'de nyʋ ʋʋa ‑tua" 'kle "kpei ja‑.
7 Tʋ "bo 'a wlu nɩɛ 'pepe ɛ se ‑flɛn" ‑pʋn" nɩ‑,
ɛ nɩɛ ka 'wɛi jɔ nyʋ a ‑sa "nyni 'ʋn 'de poo" ‑sɔn
‑wɛe nyɔ ɔ wɔɔa nɩa. Ɛ ‑kwɛi kpɛ ‑mɛ" 'sɔn.
8 ‑Mɔ, Tʋ "bo, ‑mɔ ‑ɔ mu wɛenyʋ o sia'
‑ɔɔ mu ʋʋa' ‑tɩ' ‑tu" 'a 'de nyʋ saɩn 'a
"kwli ‑nʋ ‑pʋn" mamaʋ 'sʋ.
9 'Diwɔnyniʋn a ‑saa' ‑ta ‑wee'‑ "klein,
‑wɛe ʋʋa' nʋʋdɩ a kpʋʋn nyʋ ‑wee'‑ ‑flɛn".