Kea' 'a kɛɛma' ke nyiɔ 'ɔ dɛwɔnɩa' ke‑
8
Dafi 'a 'dʋ ‑ɛ ‑crɩɩa' 'de 'dʋ ‑jeopoi 'a 'sbɛ 'di ɛ, ‑bo ɛɛ' 'dʋ tu a sea ble ɛ, ʋʋa bla ‑si' ‑plʋ ‑ɛ ‑wlʋa 'e Gatɩ ɛ.
2 Nyɔsoa, ‑aa Tʋ "bo, ‑ma dɛwɔnɩa' se "jriɛ i ‑saa ‑ka nɩ
'de 'blʋa ‑wee'‑ "klein "kpei.
‑Ma 'nynɩ 'wlʋa ‑siiɛ jaʋn "jrui.
3 Wlu ‑wlʋa 'e "nynuupliiɛ ke "nynumɩɩ" 'wɔn ɛ
ɩa 'bɛɛ ‑ma 'nynɩ "i ‑wɛe ɩa "maa ‑ma tʋnyʋ tai'.
Nyʋ ‑ʋʋa ‑bleea ‑ʋn 'dii ke,
nyʋ ‑ʋʋa ‑fɔan' ‑ʋn o ke, ɩmɩ ‑ɩa ‑sun" ʋʋa' wɔn.
4 ‑Bo 'ɩn ‑gbʋn jaʋn ‑ma sʋn nʋa ke,
'cʋ ke 'cɩ ‑sɩɩn ja a,
5 'ɩn 'na:a Dɛ nyiɔ ‑mɔ nɩ 'ʋn,
‑wɛe ‑ma naa ‑mɔɔ' ‑tɩ' tɔ' "kpei ɛ,
'de dɛ nyiiɔ 'ɔ "ju ‑mɔ nɩ 'ʋn ‑wɛe ‑ma "tu ɔɔ' tɩ' ɛ‑?
6 'De ‑mɛ ɔ ke ‑mɔ Kea se "i ‑tee'‑,
‑wɛe ɔ nɩ 'e ‑ma nʋʋdɩ ‑wee'‑ "jru kpɔ' ɛ‑?
7 Nyiɔ ‑nɔ, ‑ɔmɔ ‑nɩ 'e dɩ "klein ‑ɩn nʋa ‑wee'‑ "jru kpɔ':b
8 'blaa ke ‑faan" ‑gbae ke, 'kwladinmi o,
9 nʋɩ o, ‑smii' o nmi "klein ‑nɩa 'e 'tɔni ‑sɔn,
10 Nyɔsoa, ‑aa Tʋ "bo, ‑ma dɛwɔnɩa' se "jriɛ i ‑saa ‑ka nɩ
'de 'blʋa ‑wee'‑ "klein "kpei.