Ka Boasɩ nʋa Elimelɛkɩ 'a 'kɛn kpa sʋn ɛ
4
-Sɔn' -sɩan' 'sʋ -ta nyʋ a 'jeea 'pee see 'de -kwlɔ ɛ, 'bomɔ Boasɩ -cruun -wɛe ɔ -te i. Ɔɔ -gbʋn a 'emu 'sʋ, "ju ʋʋa' -tɩ' 'jea 'e "jru nɩ -ɔɔ 'nynɩ ɔ "sia 'de Ruitɩ -pee a -si'. 'Sʋ Boasɩ 'dɔɔ, ɔ 'na:-Mɔ -cɔn "i -cɔɔn', -ɩn -kpa a -ta -ɩn -je i -te.
'Kamɔ "ju -nɔ -te i -cɛɛn'-. 2 Boasɩ mua kewlɛ' ɛ, ɔ 'da nyʋ klae" -nɩa 'de -kwlɔ 'ɔ -puue, 'de ɔ 'na aomɔ kpʋn -tɩɩn -ta, 'sʋ -mʋ -teɛ i.
3 Ʋʋ -wee' kpʋan -tɩɩn 'sʋ ɛ, ɔ wlu' 'de "ju Naomi -wi" 'a -tɩ' -nɩa 'e "jru -pee, ɔ 'na: -Aa dedi' Elimelɛkɩ 'a 'nynɔ Naomi 'wlʋa 'e Moabʋ blʋa "kpei ɛ, ʋ 'na ʋ 'je ɔɔ' 'kwla kpɔ -ɛ -nɩa ɔɔ' dɛ 'de- ple. 4 Ɩmɩ 'ma -pɔn 'ɩn 'je 'tmʋ 'de -ʋn -pee, ɛmɛ -tɩ 'ɩn 'da -ʋn, -wɛe -ɩn -je ɛ 'ʋn "duo- 'de nyʋ klae" -wi" ke -kwlɔ nyʋ -wee' "juɛi, 'de ɛɛ' -tɩ' 'je 'de -ʋn "jru nɩ-.
-Bo -ɩn -nɩ ɛ "i -wɛe ɛɛ' -tɩ' 'je 'de -ʋn "jru nɩ ɛ, -mɛ -ɩn -duɛ" 'ʋn. 'De -bo -ɩn se 'e tɛɛn 'ja a, -mɛ -ɩn -tmʋɛ 'de 'ʋn -pee -wɛe 'ɩn 'je juo-. Dɛ-nʋɛ' nyɔ ɛɛ' -tɩ' 'jea 'de "jru nɩ -ɔ -jea -mɔ -sii ɛ, ɔ se nɩ-. -Bo ɛ se -mɔ nɩ ɛ, -mɛ 'mɔ -o.
'Sʋ "ju -nɔ wlu' ɔ 'na 'ɩn nɩɛ "i, ɛɛ' -tɩ' 'je 'de 'ʋn "jru nɩ-.
5 'Bomɔ Boasɩ wluu kewlɛ', ɔ 'na:
-Sɔntɩ -ma mua 'kwla kpɔ -nɛ 'ʋn "dua' 'de Naomi 'kwa -wɛe ɛɛ' -tɩ' 'jea -ma dɛ nɩ ɛ, -mɛ Malɔn 'ɔ Moabʋ 'nynɔ Ruitɩ 'a -tɩ' a muɛ 'de -ʋn "jru nɩa' -ke -wɛe ʋ 'je -ʋn "bli "ti. 'Kamɔ -bo ɛ nɩ ɛ, -wɛe -aa dedi' -ɔ -mɛa ɔɔ' 'nynɩ 'je "jɛi mu 'de ɔɔ' 'kwla "kpei.
6 'Bomɔ "ju -nɔ 'na:
"Ɩɩn-, 'ɩn se 'de tɛɛn-, ɛɛ' -tɩ 'bo 'e 'mɔ "jru nɩɛ -wɛe 'ma 'kɛn je "kpei cɛn. Ɛmɛ -tɩ 'ma cɛn wlu -tie" -sɩan 'ɩn 'na -ɩn -duo" 'kwla kpɔ -nɛ 'ʋn -wɛe ɛ 'je -ma dɛ nɩ-, 'mɔ se 'e tɛɛn-.
7-8 'Sʋ "ju -nɔ -sa "kwlai bɩ' ɔ "nyɩ ɛ Boasɩ -wɛe ɔ 'na -aa' dedi' 'a 'kwla kpɔ -nɛ, ɛɛ' -tɩ' -nɩ 'de -ʋn "jru. Dɛɛ-tɩ ɔ -sa ɔɔ' "kwlai bʋ bɩ' -wɛe ɔ "nyɩ ɛ Boasɩ, ɛmɛ -nɩ 'de Israɛ blʋa "kpei tɛin" ɛ, -bo nyɔ jrɔ' 'je ɔɔ' 'blee -dɩ "kpei sɔn 'de jrɔ' 'kwa a, 'kamɔ ʋʋa nʋ.
9 'Sʋ Boasɩ wlu' 'de nyʋ klae" ke -kwlɔʋn -gbae a -pee, ɔ 'na:
'de ao -wee' "juɛi -sɩan wɩ 'di ɛ, 'bomɔ dɩ "klein -nɩa 'e Naomi 'kwa -wɛe ɩ nɩa Elimelɛkɩ ke ɔɔ' "nynuu Kilɔn ke Malɔn 'ɔ dɩ ɛ, ɩa 'kpaa- 'ma dɛ -sɩan. 10 Malɔn 'ɔ Moabʋ 'nynɔ Ruitɩ, ʋ 'kpa 'ma 'nynɔ -sɩan -ke -wɛe ɔɔ' 'kɛn 'je ɔɔ' dɛ 'ʋn sie mamaʋ. -Bo ɛ nɩ kan' a, -mɛ ɔɔ' 'nynɩ se i sɔin 'de ɔɔ' dedi' -wi" "kwlu -ke -ta -kwlɔ -nɛ 'di. Ɩa' -tɩ' tu ɛ, ao -wee' "klein 'je ɩa' -ta 'mɛ -sɩan.
11 'Sʋ nyʋ klae" -wi" ke -kwlɔʋn -jea ɛɛ' -ta, ʋʋ -wee' "klein 'na:
Ɩɩn, -a -wee' 'je ɛɛ' -ta 'mɛ. "Ju nynɔkpao' -ʋa pa 'de -ʋn o -gbu" -sɔn -sɩan a, Nyɔsoa pʋ "diwan, -wɛe ka Rasɛlɩ ke Lea nɩa ʋ 'je kan' nɩ-, dɛ-nʋɛ' 'nynʋkpae 'sɔɔn -nʋ, ʋʋpʋ -tu" Israɛ -blʋa. Ka -ɩn dia -kla 'nɔ Eflata nyʋ "kwlu ɛ, -ɩn to ɛɛ' sʋn -wɛe -ɩn -je -ma 'nynɩ "jɛi kpa -ta Bɛtɩlɩɛmʋ -kwlɔ 'di. 12 Nyɔsoa nʋɛ -wɛe "nynuu -ɩn ke 'nynɔkpao -tɔo -nʋ a mua 'wlʋa 'de -ʋn o -gbu" -sɔn ɛ, ʋʋ ke Perɛtɩ, Tamaa ke Suida 'wlʋa 'a "nynuu 'je 'ʋn -tii.
Ruitɩ "tiɛ Boasɩ "bli -wɛe ʋʋ 'wlʋ Obɛdɩ
13 Boasɩ 'a -ɩn -duo" Ruitɩ 'ʋn -wɛe ʋa' -ti" -ʋn "bli -nao. Ɔ ke ʋ "tia ba "bli ɛ, Nyɔsoa nʋɛ' ʋ 'je "kwli 'ble -wɛe ʋ 'wlʋ "junmɔu ju.
14 "Ju -nɔ 'wlʋa 'sʋ ɛ, 'nynʋkpae -ʋʋ -ke Naomi nɩa 'de -kwlɔ wlu' 'de ʋ -pee, ʋʋ 'na: "Diwan kpʋn Nyɔsoa. Ɛmɛ -nʋ ɛ -sɩan -wɛe nyɔ sie 'de aa' kʋan aa' -tɩ' nɩa 'e "jru o -gbu" -sɔn. "Ju -wlʋa -sɩan -ta, ɔɔ' 'nynɩ mu nya 'nɔ Israɛ blʋa "kpei. 15 Ɔɔ' "ju tu a muɛ aa' -suu -gbɔdee "ni poa' -wɛe ɔ 'je aa' -kea" 'kpa -nɛ kwa wɔi -te, dɛ-nʋɛ' aa' "ju 'a 'nynɔ -ʋ -kma aa' -tɩ' -wɛe -ʋa kɛ' kma aʋn "bli ɛ -siia "nynuu nmai nynuu -mɛ" 'sɔn ɛ, ʋmʋ -wlʋ ɔ.
16 Naomi "duɛ "ju pliiɛ 'ʋn 'sʋ ʋ -gbaa 'nɔ, -wɛe ʋ 'kpa ɔɔ' -gbaan -i.
17 Ʋʋa' -po nynʋkpae' -ʋʋ -ke ʋ "kʋʋan i ɛ, ʋʋpʋ -tuu"- ɔ 'nynɩ, ʋʋ 'na:
"junmɔu ju 'wlʋʋ -wɛ 'de Naomi 'kwa, -wɛe ʋʋ -tuu"- ɔ Obɛdɩ -nynɩ. a Ɔmɔ -wlʋ Isai, -wɛe Isai 'wlʋ Dafidɩ.
Dafidɩ 'a "na -wi" 'a tbaa sʋn
18 Perɛtɩ 'a -gbu" -sɔn nyʋ 'a 'nynɩ ka: Perɛtɩ 'wlʋɛ Ɛsrɔn
19 -Wɛe Ɛsrɔn 'wlʋ Lamʋ.
Isai mɔ -wlʋ Dafidɩ.