Ruitɩ muɛ dbo nʋ nyʋ 'a -kɔ "kpei 'tɛan 'de Boasɩ o -kle'
2
Naomi 'a kʋan 'a dedi' jrɔ' -nɩ 'emu, ɔ nɩɛ dɛjei klaa" -kua 'e 'dei -o, ɔ 'wlʋɛ 'de Elimelɛkɩ 'a -kwlin 'di, ɔɔ' 'nynɩ -nɩ Boasɩ.2 'Wɩ deejrɛ' 'sʋ ɛ, Moabʋ 'nynɔ Ruitɩ 'wlu 'de Naomi -pee, ʋ 'na: A "tai 'mi "i -wɛe nyɔ ɛ nʋa 'tʋn -ɔɔ mua 'ma wɛe 'jea' a, 'ɩn 'je 'de ɔ o -kle mu -wɛe 'ɩn 'je ɔɔ' dbo nʋ nyʋ 'a -kɔ' "kpei 'tɛn. 'Sʋ Naomi 'na 'ɩn 'wɔɔn 'e 'wɛ 'ma "ju, a mu! 3 -Wɛe Ruitɩ mu dbo nʋ nyʋ 'a -kɔ "kpei i 'tɛn 'a. Kea siɛ ʋ o 'sʋ, -kle' -ɛ 'di ʋ mua dbo nʋ nyʋ 'a -kɔ' "kpei 'tɛn 'a, ɛ nɩɛ Boasɩ -ɔ -wlʋa 'de Elimelɛkɩ 'a -kwlin 'di 'a -kle' 'di -o.a
4 Ɛ -kwlea 'ʋn dɛ -saan"- 'sʋ ɛ, Boasɩ 'a -cɛkpa' 'wlʋɛ Bɛtɩlɩɛmʋ, ɔ "siɛ i -wɛe ɔ po ɔɔ' dbo nʋ nyʋ 'sɛ-, ɔ 'na:
Nyɔsoa sie aopʋ o! -Wɛe ʋʋpʋ -sɛ "kpei ka ʋʋ 'na: Nyɔsoa po -ʋn "diwan!
5 -Wɛe Boasɩ -tee' ɔɔ' dbo nʋ nyʋ 'a "jrukpɔ i -te i ka, ɔ 'na: Nyɔ -ble 'nynɔkpao -saan"- -nʋ ɛ-?
6 'Bomɔ dbo nʋ nyʋ 'a "jrukpɔ i -tei -nɔ wlu ɔ 'na: "ju nynɔkpao' -nʋ ɛ, ʋ nɩɛ Moabʋ 'nynɔ -o, ʋ ke Naomi -wlʋ 'de Moabʋ -blʋa "kpei -ʋʋ -ji'. 7 Ʋ bae -aʋn 'ɛ, ʋ 'na: Ao "ta i 'mi "i, 'ɩn 'je ɔkɩ kpai -wla 'de ɩa' sea" 'dei 'de dbo nʋ nyʋ 'a -kɔ' "kpei wei 'tɛn. 'Kaa dɛ -tba' -klae" pɛɛn -wɛe -ɛ -jɛɛa nɔ" -nɛ ɛ, ka ʋ nyna kpee 'de dbo "i 'kamɔ ʋ nyna 'de ke, ʋ se fɔn mɔ dɛ -saan"- ke.
8 'Bomɔ Boasɩ wluu Ruitɩ -pee, ɔ 'na: 'Ma "ju, a po doin" i: A 'bo nyɔ jrɔ' o -kle' muɛ 'bode. A ke 'ma dbo nʋ nynʋkpae' sie -ta. 9 -Kle' 'a -ta dbo nʋ nyʋ a nʋʋa dbo ɛ, a sie 'e "jriɛ o, -wɛe a 'je 'e 'nynʋkpae 'de bla, a 'je ʋʋpʋ 'a -kɔ' "kpei 'tɛn. 'Ɩn -teɛ' 'ma dbo nʋ nyʋ kɛ' "i, ʋʋ sea wɔn i tɛɛn i. 'De -bo "ni 'na tʋn a sea aʋn nʋ ɛ, -mɛ a mu 'e jae ʋʋ "jia 'nɩa- de 'di, a 'je "ni 'na.
10 Ɔ -kɔa' wlua' 'sʋ Ruitɩ "sii ɛ 'kɔi, -wɛe ʋ tba "jua i 'de Boasɩ "juɛi, 'de ʋ wlu ɔ -pee, ʋ 'na: 'Mɔ -nɩa 'blʋa 'srʋ 'di 'nynɔ ɛ, 'mɔ -ɩn nʋ 'saaʋn "jri i kaa?
11 'Bomɔ Boasɩ "duo wlu 'ʋn ka 'de Ruitɩ -pee, ɔ 'na: Aa' kʋan 'mɛa a, dɩ "klein a nʋa aa' kʋan de "jri i ɛ, nyʋ -tuu" -tuu po 'ʋn ɩ -wee' 'a "kuan 'mɛ 'pepe 'ɩn jɩ 'wɔn. 'Bo -mɛ 'de ɛ, ka a 'wlʋa 'de a de ke a "bo -pʋn" 'de a "bli blʋa 'di, -wɛe 'blʋa a sea juo due' a jia 'nɔ ɛ 'di ɛ, 'ɩn 'wɔɩn -ke. 12 Dɩ "klein a nʋa 'mʋa- a, Nyɔsoa -sa ʋn ɩa' -kei" ɛ 'je aʋn "nyɩ. Dɛ-nʋɛ' Nyɔsoa -ɛ -nɩa Tʋbo" Israɛ -nyʋ 'a Kea a, -ɛɛ sroo"- a jia 'kwla a, mɛ -je aʋn dɩ -tuu" -tuu "nyɩ.
13 'De Ruitɩ 'na: 'Oo 'ma 'blei, -mɛ 'mɔ -ɔ -je 'saaʋn ka 'de -ʋn "jri 'dee! -Ma wlu -jɛ -mɛ -tuɛ" 'ʋn -tɩ' -kwlii', wlu -ɩn -tmʋa -ta a, ɛ "siɛ -ma dbo nʋ nynɔkpao' "i, 'de -mɛ 'kamɔ 'ɩn ke -ma dbo nʋ nynʋkpae' 'a due' mʋ 'a -plai' pa mɔ "pɩ.
14 -Jɛ dɛdi nɔ" nynia 'sʋ ɛ, Boasɩ 'da Ruitɩ 'mɛ, ɔ 'na: A 'kpaa -ta, -a -je dɛ di. A tba aa' -dipɛn' tie 'de sma' o!
Ʋ -tea i 'de dbo nʋ nyʋ -pʋn" 'sʋ ɛ, Boasɩ "nyɩ ʋ dɩ jɔ -ɩ -daa'. Ʋ di' ʋ je dbo -wɛe ʋ -te' ɩa' -jɩ -siae' 'de i.
15 -Ta ʋ -teea dbo nʋ nyʋ 'a -kɔ' "kpei i 'tɛan -pʋn" kewlɛ' ɛ, 'sʋ Boasɩ siɛ ɔɔ' dbo nʋ nyʋ wlu o ɔ 'na:
Ao "tai "ju nynɔkpao' -nʋ "i, ʋ 'je ɔkɩ 'a sea" 'nynɩ o i 'tɛn -ke. Ao 'bo ʋ o wluɛ! 16 Ao 'jee "jri i mɔ 'ɔ -cɛ" ao 'je ɔkɩ 'a kpai "i "tai ɩ 'je blu -wɛe ʋ 'jɩ 'tɛn. Ao 'bo ʋ dɛjrɛ' 'ɛ "bli -cɩɛ.
17 'Kamɔ Ruitɩ 'tɛn dbo nʋ nyʋ 'a -kɔ' "kpei mamaʋ 'sʋ 'jrʋ je i blu, -wɛe ʋ bla ɔlɩsɩ ʋ 'tɛn 'a. 'Sʋ ɩ nʋɛ ɔkɩ 'a blɔ klaa" due', 18 -wɛe ʋ kpa ɩa' blɔ -nɛ -kwlɔ. Ʋ nynia -kwlɔ 'sʋ ɛ, ʋ toɛ blɔ -nɛ ʋa' kɔan de "i. -Wɛe ʋ "nyɩ ʋ dɩ jɔ -daa' ɩa' tɔe ʋ dboa -wɛe ɩ -siae' 'de ɛ.
Naomi juɛ dɛ Kea nʋa "i
19 'De Naomi -te' ɛ ʋ i, ʋ 'na: Ruitɩ, -ta ka a 'tɛn ɛ dbo nʋ nyʋ 'a -kɔ' "kpei i kan' -sɩan a-? "Ju -ɔ -jea aa' wɛe ɛ, "diwan kpʋn ɔ.
'Bomɔ "ju -ɔ o -kle' Ruitɩ nʋʋa dbo ɛ, ʋ "si ɔɔ' 'nynɩ 'de ʋa' kɔan de -pee ʋ 'na: "Ju -ɔ o -kle' 'ɩn nʋʋa dbo -sɩan a, ɔɔ' 'nynɩ -nɩ Boasɩ.
20 'De Naomi wlu' 'de ʋa' "ju 'a 'nynɔ -pee, ʋ 'na: Nyɔsoa 'a "diwan kpʋn ɔɔ' "ju tu. Dɛ-nʋɛ' ɛmɛ -to ɛɛ' nyiɔ 'ɔ -tɩ' kma sʋn 'de -apʋ -ɔ -nɩa 'kmʋ ke -aa 'cɛ -mɛa -pee. 'Bomɔ Naomi wluu, ʋ 'na: "Ju -nɔ, ɔ nɩɛ -aa dedi -o, nyʋ -aa -tɩ' nɩa 'e "jru ɛ, ʋʋa' due' -nao.
21 'Sʋ Moabʋ 'nynɔ Ruitɩ "duɛ wlu 'ʋn kewlɛ', ʋ 'na: "Ju -nɔ, ɔ wluɛ 'ʋn -pee ɔ 'na 'ɩn ke ɔɔ' dbo nʋ nyʋ mu 'de ɔ o -kle' mamaʋ, 'sʋ ɔɔ' diidɩ 'a "kwli -wee' 'je -kle' i -kwɛ.
22 'Sʋ Naomi 'na: 'Ma "ju, -bo ɛ nɩ kan' -mɛ nmɔ "jri i. A 'kpa ɔɔ' dbonʋ nynʋkpae' -pʋn" -wɛe ʋʋ ke a 'je na, 'de a je nyɔjrɔ' o -kle' mu -wɛe ʋʋ je aʋn 'mɩ "mlai 'nɛɛ-.
23 Ruitɩ ke Boasɩ 'a dbonʋ nynʋkpae' -tɛn ɔɔ' dbo nʋ nyʋ 'a -kɔ' "kpei i mamaʋ 'sʋ ɔɔ' ɔkɩ ke -ble' je -kle i -kwɛ. 'Kaa Ruitɩ ke ʋa' kʋan de -te i.