Sosue 24

Sosue' 'kɩɩn ɛ Israɛ -nyʋ 'a 'blʋa 'a 'blowɔn "jru i 'de Sisɛmʋ. Ɔ 'da Israɛ -nyʋ 'a -Kekpasoa o, ʋʋa' "jrukpɔ i -tenyʋ o, ʋʋa' 'peeje nyʋ ke ʋʋa' "sooa 'a "jrukpɔ i -tenyʋ -wɛe ɔ nynaa ʋʋpʋ i 'de Kea "juɛi. 2 'Sʋ Sosue' wluɛ Israɛ -nyʋ -wee' "klein -pee ɔ 'na: Dɛ Nyɔsoa Israɛ -nyʋ 'a Kea 'tmʋa ɛ ka: Ɛ -kwle 'ʋn -wɛ, aoa' "bɛma Tela -wlʋa Ablaamʋ ke Naɔɔ "ti 'de Eflatɩ 'de -wɛe ʋʋa -gbɛɛ'- -kɩɩ'- deejrɩ' "juɛi 'dee-. 3 'Ɩn -sa aoa' "bɛma Ablaamʋ 'de Eflatɩ 'de, 'ɩn plee ɔ Kanaa blʋa -wee' "kpei i -wɛe 'ɩn nʋɛ ɔ -gbɛn'. -Wɛe 'ɩn nʋɛ ɔ 'wlʋ Isaakɩ, 4 Isaakɩ 'ɩn nʋa -wɛe -ɔ -wlʋa Sakɔbʋ ke Esau ɛ. 'De Esau -mɔ ɛ, 'ɩn "nyɩɔ Sei' blʋa -nɩa crʋ 'nynɩ o i ɛ 'je ɔɔ' dɛ 'kpa, 'de Sakɔbʋ -mɔ ke ɔɔ' "nynuʋ nmai nynuu muɛ Esipʋ. 5 Tɛin" 'ɩn dboɛ Moisɩ ke Aarɔn ke, 'ɩn ja Esipʋ -nyʋ 'wɛ klae" klae" "kpei -wɛe 'ɩn -sa aopʋ- 'demu. 6 'Ɩn -sa aoa' "bɛma -wi" 'de Esipʋ 'sʋ ʋʋ nynɩ ɛ 'de 'Tɔniɛ -saan -kwli", 'kaa Esipʋ -nyʋ o, ʋʋa' tʋ -fʋn -wocro' soo"- a -cria' ke ʋʋa' "sooa -tea soo"- "kpei nʋɛ ʋʋpʋ i ʋʋ je 'mʋa- nyni. 7 Ʋʋ -fɩn" ɛ Nyɔsoa i. -Wɛe Nyɔsoa po kwie 'de ao ke Esipʋ -nyʋ 'nynɩ, ɛ ja ʋʋpʋ "ni "kpei -wɛe ɛ "muu ʋʋpʋ "jru i. Aoa' "jri 'je dɩ 'ɩn nʋa Esipʋ -nyʋ "jri i 'mɛ. -Wɛe ao -kwle 'de -pɩɩɔn" blʋa "kpei 'de nɔ" -tuu" -tuu 'di. 8 'De -mɛ 'de, 'ɩn nʋɛ' ao je 'de Amɔɔ nyʋ 'a 'blʋa -nɩa 'de Sudɛn -gbuu 'a 'jrʋ 'a 'wlʋʋ 'ɩn fɔo 'di "ti. -Wɛe ʋʋa' 'blʋa 'kpa aoa' dɛ, dɛ-nʋɛ' 'ɩn -sa ʋʋpʋ 'a ma" i 'de ao "juɛi. 9 Moabʋ 'a 'Bɩɔ, Sipɔ'ɔ "ju Balakɩ, -mɔ 'na ɔ 'je Israɛ tʋ o -fʋn' -ke. Ɔ 'da Beɔ 'ɔ "ju Balaamʋ ɔ 'je ji ɔ 'je ao -soo' poo-. 10 'Kaa 'ɩn se Balaamʋ doʋn" opo, "diwan mɛ ɔ po aopʋ-, -wɛe 'ɩn -sa aopʋ 'de ɔ 'kwa.

11 Ao cɛn Sudɛn -gbuu 'mɛ -wɛe ao nyni Seriko. Nyʋ -blea ɛɛ' "kwi -kwlɔ -tu 'di -fʋn ɛ aopʋ- ʋ o -wɛe ao kpa tʋ 'a "jru 'de ʋʋpʋ "kpei, 'kamɔ ao nʋ ke -nɛ 'de Amɔɔ nyʋ o, Felesi nyʋ o, Kanaa nyʋ o, Ɛtɩ -nyʋ o, Kikasɩ -nyʋ o, Ɛfi nyʋ ke Sebusɩ -nyʋ "kpei. 12 'Ɩn ja boo "wlu klae" 'de ao Amɔɔ nyʋ 'a 'blʋa jei 'sɔɔn -wi" i ɛ. Ɛ se aoa' -placnɛ ke aoa' plʋ mɩ -nyɩ" ao tʋ 'a "jru kpaa' nɩ-. 13 'Blʋa -ɛɛ -tɩ' 'ʋn ao sea 'kle 'jee due' mɛ 'ɩn "nyɩ aopʋ-, "kwi -kwlɔ ao sea po mɩ ao "ti 'di, 'finyɛ ke olifʋ ao sea do mɩ -ɩa "bi aoa di.

14 Sosue' 'na: Kaan ka la, ao plee Nyɔsoa -wɛe ao 'jeɛ "juɛi -gbɛɛ'- 'de "i "srɛ 'a 'ʋn ke wlu "kpei i kpʋn 'a 'ʋn. Ao to -kɩɩ'- aoa' "bɛma -wi" a -gbɛa' "juɛi 'de Eflatɩ 'de ke Esipʋ 'kpʋ "i, -wɛe ao 'je Nyɔsoa 'a 'sʋ 'a 'sʋ "juɛi -gbɛɛ'-. 15 'De -bo seɛ "i nɩ ao 'je Nyɔsoa "juɛi -gbɛɛ'- 'jaa, -mɛ ao -sae' -kɩɩ'- -jɩ ao 'jea "juɛi -gbɛɛ'- -sɩan: -Jɩ aoa' "bɛma a -gbɛa' "juɛi 'de Eflatɩ 'de -ae" Amɔɔ nyʋ -jʋ -ʋʋa 'blʋa 'di ao -tia -sɩan 'a, 'mɔ ke 'ma -gbɛin" 'di nyʋ a muɛ Nyɔsoa "juɛi -gbɛa'.

16 Israɛ -nyʋ -wee' -sɛ "kpei ʋʋ 'na: -A -je Nyɔsoa "itaa -wɛe -a -je -kɩɩ'- deejrɩ' "juɛi -gbɛɛ'- -mɩ se -a "jru 'di mɔ cɛɛn due'! 17 Dɛ-nʋɛ' mɛ -nɩ Nyɔsoa -aa Kea mɛ -sa -a ke -a "bɛma -wi" 'de Esipʋ 'blʋa -ɛ 'di -ɩn -nɩa kʋʋɔnkwla' 'dee ɛ, ɛ nʋɛ jrii'- -tuu" -tuu -kmai" 'de -jri" "kpei, ɛmɛ -cri" -a kwa "kpei 'de -je -wee' -a -naa "i "kpei ɛ ke 'de 'blʋa -wee' "klein -a -cɛan 'dii ke. 18 Nyɔsoa mɛ -nʋ' 'bʋɩ -nɩ -wee' "klein i 'de -a "juɛi -wɛe Amɔɔ nyʋ -tia" 'de 'blʋa -nɛ 'di -mʋ 'a -nɩ -teɛ' 'e -tɛ. Kɩɩn, -a -mɔ -ke ɛ, -a -nɩɛ "i -a -je Nyɔsoa "juɛi -gbɛɛ'- dɛ-nʋɛ' ɛ nɩɛ -aa Kea.

19 'Sʋ Sosue' 'wlu 'de Israɛ -nyʋ -pee, ɔ 'na: Ao se 'bɛɛ ao 'je Nyɔsoa "juɛi -gbɛɛ'-, dɛ-nʋɛ' ɛ nɩɛ Kea -ɛ -kwɛa i ɛ, Kea -ɛ -blea -kwlɛn ɛ. Ɛ se aoa' "jru kua' ke aoa' dɩsaɩn 'a -kɔ "kpei 'wlʋ i.

20 -Bo ao "taa Nyɔsoa "i -wɛe ao 'je 'dʋɩ -kɩɩ'- "juɛi -gbɛɛ'- ɛ, ɛɛ muɛ de "bia ɛ 'je ao dɛsaʋn "jri i nʋ. Ɛmɛ -nʋa' ao dɛ 'dɔe "jri i 'dee ɛ, ɛɛ muɛ aoa' ma" i -saa'. 21 'Sʋ ʋʋ -sɛ "kpei 'de Sosue' -pee ka: "Kɩɩn- 'ee, ɛ nɩɛ Nyɔsoa mɛ -aa mu "juɛi -gbɛɛ'- 'a. 22 Sosue' -sɛ de ɔ 'na: Aoa' -cɛ" -nɩ aoa' -cɛ' 'ɛ -tɩ' 'a -ta 'je i, aoa' -cɛ" -na -ɔ -sae' Nyɔsoa -ɔ -jeɛ "juɛi -gbɛɛ'-. -Wɛe ʋʋpʋ 'wɔɔn nɛ ʋʋ 'na -a nɩɛ -aa -cɛ" 'ɛ -tɩ' 'a -ta 'je i. 23 Ao -sa 'dʋɩ -kɩɩ -nɩa 'de ao "kwlu ke i -wɛe ao -wee' 'je 'de Nyɔsoa Israɛ -nyʋ 'a Kea o "bie 'de aoa' pɛe -wee' "klein 'ʋn. 24 -Wɛe 'blʋa -wee' wlu 'de Sosue' -pee ʋʋ 'na: -Aa muɛ Nyɔsoa -aa Kea "juɛi -gbɛɛ'- 'a, 'de -aa muɛ wɔn 'jea.

25 Ɛɛ' 'wɩ tu 'di 'de Sisɛmʋ ɛ, Sosue' poɛ dbɛɛdɛ 'de ʋʋ ke Nyɔsoa 'nynɩ -wɛe ɔ "nyɩ ʋʋpʋ kɛ' ke 'srɩn, 26 Sosue' 'crɩ dɩ -nɩ -wee' 'mɛ 'de Kea 'a kɛ' 'ɛ 'sbɛ 'di. 'Sʋ ɔ "duɛ "sou klaa" 'ʋn ɔ nynɛ ɛ i 'de 'mʋa- de, 'de Telebɛntɩ -tu -sɔn 'de Nyɔsoa 'a "juɛi -gbɛɛna', 27 -wɛe Sosue' wlu ka 'de nyʋ -wee' -pee ɔ 'na: "sou -nɛ nɩɛ -tɩ' 'a -ta 'je i -o 'de -a 'nynɩ, dɛ-nʋɛ' ɛ 'wɔn wlu Nyɔsoa 'tmʋa -aʋn -wee' 'mɛ. Kɩɩn, ɛɛ muɛ -tɩ' 'a -ta 'je i -a -wlʋa Kea o -wɛe ao seɛ 'bɔ i ɛ.

28 'Sʋ Sosue' "taa nyʋ -wee' "i ʋʋ je ʋʋa' 'blʋa -nɩa ʋʋa' 'kɛn 'dii muu do do-.

Sosue' 'a 'mɛ -tɩ

29 Dɩ -nʋa 'mʋa- 'wlʋa 'e -jei" 'sʋ Nyɔsoa 'a dbo nʋɩ, Nunɩ 'a "ju Sosue' 'mɛɛ -mɛ ɔ 'bleɛ -sʋn 'a 'kmɛ due' -puue (110). 30 Ʋʋ -te' ɔ i 'de 'blʋa 'a 'fɔ -nɩa ɔɔ' 'kɛn 'di, 'de Eflaimʋ 'a 'blʋa -nɩa 'de crʋ 'dii, 'de Tinatɩ Sela 'de Gaasɩ -crʋ 'a 'kwea fɔo. 31 Sosue' 'a 'kmʋ nɩ nɔ" ɛ, Israɛ -nyʋ -wee' a -gbɛɛ'- Nyɔsoa "juɛi, ɔ 'mɛa 'wlɛ ɛ, -ta -kekpasoa -jea dɩ Nyɔsoa nʋa Israɛ -nyʋ "jri i 'mʋa- 'a -ta a nɩa 'kmʋ -ke ɛ. 32 Ʋʋ nmae ɛ Sosɛu 'a 'kpɩ Israɛ -nyʋ -sa Esipʋ i 'de Sisɛmʋ. Ʋʋ nmae ɔ i 'de 'blʋa Sakɔbʋ -tɩan wɛi 'a 'kmɛ due' (100) 'de Amɔ -nɩa Sisɛmʋ 'a "bo, ɔɔ' "nynuu 'kwa, ɛɛ' 'blʋa tu nɩɛ Sosɛu 'a "nynuʋ nmai nynuu 'a 'kɛn -o. 33 Aarɔn 'ɔ "ju Eleasa 'mɛɛ 'de 'mʋa- -ke -wɛe ʋʋ nmae ɔ i 'de crʋ ʋʋ "nyɩa ɔɔ' "ju Pineasɩ 'de Eflaimʋ 'a 'blʋa -nɩa 'de crʋ 'dii "jru