Sosue 23

Nyɔsoa "nyɩa Israɛ -nyʋ 'flɛ 'ʋn -tea', -wɛe ʋʋa' tʋnyʋ -jia' ʋʋpʋ 'dei 'a wlu ʋʋpʋ o 'bode, -mɛ Sosue' 'kpa -kea". 2 'Sʋ Sosue' 'a -kɩɩɛn Israɛ -nyʋ o, ʋʋa' -kekpasoa o, ʋʋa' "jrukpɔ i -tenyʋ o, ʋʋa' 'peeje nyʋ ke ʋʋa' "sooa 'a "jrukpɔ i -tenyʋ "jru i -wɛe ɔ 'na: 'Ɩn 'kpa -kea" -wɛ la. 3 Aoa' -cɛ" 'je dɩ Nyɔsoa aoa' Kea nʋa 'blʋɩ -nɩa 'de aopʋ- "juɛi "jri i 'mɛ: Ɛɛ' -cɛkpa' -fʋn' ʋʋpʋ tʋ o. 4 Ao -gbʋn: 'Ɩn "nyɩ aoa' 'blʋa 'a 'blowɔn 'blʋɩ -ɩa nyʋ nɩa 'kmʋ ke 'dewlɛ 'blʋɩ -ɩa nyʋ 'a ma" 'ɩn -sa i, 'de Sudɛn ke 'tɔniɛ nyɔɔ 'daa Meditelane' 'a 'jrʋ 'a i blu ' ɩn fɔo ɩ 'je aoa' 'kɛn nɩ. 5 Nyɔsoa aoa' Kea 'a -cɛ" -ɛɛ mu ʋʋpʋ dɩ 'kwa -saa' -ɛ -jɩ aopʋ- "nyɩ, ɛɛ muɛ nʋa' ʋʋpʋ 'je ple 'de ao "juɛi -bo aoa sea 'e 'kpaa a -wɛe ao 'je ʋʋpʋ i nʋ 'de ao 'je ʋʋa' 'blʋa 'ʋn "duo, ka Nyɔsoa 'tmʋɛ 'de ao -pee ɛ. 6 Ao 'ble 'kpɩ ao 'je kɛ' wɔn 'je -wɛe dɩ "klein -crɩa' 'de Moisɩ 'a kɛ' 'ɛ 'sbɛ 'di ao 'jɩ nʋ, ao 'de dian o 'dewlɛ kɔan o muɛ. 7 Ao ke 'blʋa -siae' 'de aopʋ- "kwlu 'de o beɛ, ao 'de ʋʋa' -kɩɩ'- tɔ' "kpei i naa, ao 'de dɛ 'ɛ wlu -tie" cɛɛn 'de ʋʋa' -kɩɩ'- 'a 'nynɩ 'ʋn, ao 'de ʋʋa' -kɩɩ'- 'a dbo nʋɛ 'de ao 'de "jru ja jaa ao 'de ɩ "juɛi -gbɛɛ'. 8 'Kaa ao ke Nyɔsoa aoa' Kea "sii "i, ka aoa nʋɛ dɛ -jɛa -sɩan a. 9 'Sʋ Nyɔsoa a muɛ 'blʋa -kma "i 'de -ɛ -tia "i dɩ 'kwa -sa 'a ɛ 'je ao "nyɩ, 'de -mɛ dɛ -jɛa -sɩan nyɔ jrɔ' se ao "juɛi nyna. 10 Aoa' nyɔ due' a muɛ nyʋ "wlu due' i nʋa', dɛ-nʋɛ' Nyɔsoa aoa' Kea a muɛ aoa' tʋ -fʋan', ka ɛ "sia ɛɛ' 'nynɩ see ɛ. 11 Ao -tu" aoa' -cɛ" 'ɛ -tɩ' ao 'je Nyɔsoa aoa' Kea 'a "dia 'je. 12 -Bo ao -saa "jru -jei" 'de ao ke 'blʋɩ -sia 'de aopʋ- "kwlu 'je "i "sii ɛ, -wɛe ao ke ʋʋpʋ a jea ba "bli i "tii 'de ao ke ʋʋ 'je o bee ɛ, 13 ao juo nɛ ka Nyɔsoa aoa' Kea sea 'blʋɩ -nɩ dɛ 'kwa -sa i ɛ se aopʋ- "nyɩ i. 'Sʋ ʋʋpʋ a muɛ -sepɩɛ ke 'sai nɩa', ʋʋa muɛ ka klaejɔ nɩa nɩa' 'de aopʋ- -pʋn" -wɛe ʋʋ 'je "wi nɩ 'de ao "jri. -Bo ɛɛ sea 'e 'bɔɔ 'sʋ ao -wee' 'je i sɔn 'de 'blʋa 'dɔe Nyɔsoa aoa' Kea "nyɩa aopʋ- 'di.

14 Ɛ ka, -ta nyɩɔ -wee' a mua mɛ -ɛɛ -je 'ma "duo 'ʋn. Ao juo nɛ 'de aoa' pɛe ke aoa' -suu -wee' "klein 'ʋn ka 'dɩ 'dɔe Nyɔsoa aoa' Kea "sia 'nynɩ nʋa a: Ɩ nʋɛ aopʋ- "jrii 'mɛ ɩa' due' ka se 'blʋɔ sie. 15 Kɩɩn, ka Nyɔsoa aoa' Kea nʋa dɩ 'dɔe ɛ "sia 'nynɩ -wee' 'kamɔ ɛɛ mu dɩsaɩn ɛ "sia 'nynɩ 'de aopʋ- 'a -tɩ' 'ʋn -wee' 'je nʋɛ 'sʋ ao -wee' 'je i sɔn 'de 'blʋa 'dɔe ɛ "nyɩa aopʋ -nɛ 'di. 16 -Bo ao se dbɛɛdɛ Nyɔsoa aoa' Kea poa 'de ao ke ɛ 'nynɩ wɔn 'je -wɛe ao 'je -kɩɩ'- deejrɩ' "juɛi -gbɛɛ'- 'a mu ɛ, Nyɔsoa a muɛ aopʋ- 'cɛn i 'kpaa -wɛe ɛ 'je aoa' ma" i -sa kaan kaan 'de 'blʋa 'dɔe ɛ "nyɩa aopʋ- 'di.