20
Nyɔsoa 'wlu 'de Sosue' -pee -wɛe ɛ -te' ɔ i ɛ 'na: 2 -Ɩn tu" Israɛ -nyʋ 'srɩn -nɩ: Ao sae' "kwi -kwlɔ -ɩ 'di nɩa 'kwla pana', ka 'ɩn jɛɛ Moisɩ 'kwa -wɛe 'ɩn 'tmʋɛ 'de ao -pee ɛ. 3 Nyɔ -sea' tɔ' te' 'de -ɔ seɛ juo -wɛe -ɔ -dba nyiɔ, bɛɛ 'nɛ ɔ 'je 'kwla pa 'de mu -bo ɛ nɩ 'kan -mɛ nyɔ -jea -jɔ -mɛa kpan "kpei -sa seɔ 'dba i. 4 "Ju -dba "ku 'mʋa- a muɛ plea' ɔ 'je 'de "kwi -kwlɔ -nɩ 'a due' 'di mu -wɛe ɔ 'je i nyna 'de ɛɛ' paana' -wɛe dɩ -nʋa, ɔ jɩ 'tmʋ de "kwi -kwlɔ 'ɔ klae" -pee. Wi" -mʋ a muɛ ɔɔ' 'mʋa- de "ti -tɩ 'wɔan 'de ɔ 'je ʋʋpʋ "kwlu "ti.5 -Bo nyɔ -jea -jɔ -mɛa o 'wlʋ nʋ -jɔ -dba "ku i ɛ, ʋʋ seɔ 'de to i, dɛ-nʋɛ' mɛ -nɩ ɔ se tɔ' -te' ɔ se ɔ 'dba, ɔ se ɔɔ' saʋn 'dii 'blee- due'. 6 Ɔɔ muɛ 'de ɛɛ' "kwi -kwlɔ -tu 'di sia' mamaʋ 'sʋ nyʋ -kɩɩan' "jru i 'je ɔɔ' 'pee 'je, mamaʋ 'sʋ ɛ 'je 'sraa -sai klaa" -ɔ -nɩa dbo i 'de ɛɛ' nɔ" tu 'di 'a 'mɛa' jɛɛ-. -Bo -mɛ 'wlʋ 'e -jei" 'sʋ ɔ 'bɛɛ 'nɛ ɔ 'je 'de ɔ o -gbu" -sɔn de mu 'de ɔɔ' "kwi -kwlɔ -ɛɛ 'di ɔ 'wlʋa -wɛe ɔ 'kpa 'kwla a.
7 'De ɛɛ' -tɩ' 'ʋn ɛ, "kwi -kwlɔ Israɛ -nyʋ -tea kpɔ "i ɩ ka: Kɛdɛsɩ 'de Galile -ɛ -nɩa 'de Nɛftali 'a 'blʋa -nɩa 'de crʋ 'dii, Sisɛmʋ -nɩa 'de Eflaimʋ 'a 'blʋa 'a crʋɩ 'dii, Kiriatɩ Aaba, ɛ mɛ -nɩ Eblɔn -ke, 'de Suida 'a crʋɩ 'dii. 8 'De sudɛn 'fɔ -sia 'emu o ɛ, de Seriko 'a 'jrʋ 'a 'wlʋʋ na' fɔo, ʋʋ -sae' Besɛ de crʋ "kpo -nɩa -pɩɩɔn" 'sʋ 'de Rubɛnɩ a 'blʋa 'a 'blowɔn 'di, Ramɔtɩ 'de Galadɩ ɛ nɩɛ Gadɩ 'a 'blʋa 'a 'blowɔn 'ɔ "kwi -kwlɔ ke Golan 'de Basan ke, mɩ -nɩ manase 'a 'blʋa 'a 'blowɔn ɔ' "kwi -kwlɔ. 9 Israɛ -nyʋ -sae' ɩa' "kwi -kwlɔ -tu 'mɛ -wɛe ɩ 'je ʋʋ -wee' ke 'dʋɩ -tia" 'de ʋʋ "kwlu 'a 'kwla paana' 'nɩ, -bo ɛ nɩ 'kan -mɛ nyɔ "o nyɔ -sea tɔ' -te' -ɔ -dba nyiɔ 'beɛ 'nɛ ɔ 'je 'kwla pa 'de mu. -Bo ɛ nɩ 'kan -mɛ -ta ʋʋ se ɔɔ' 'pee 'je ke ɛ, nyɔ -jea -jɔ -mɛa o 'wlʋ seɔ 'dba i.