Sosue 10

Selisalɛmʋ 'a 'blʋa jei Adɔni Sedɛkɩ 'wɔan ka Sosue' kpʋan Ai -kwlɔ -wɛe ɔ -sɛ -wee' i ɔ "nyɩ 'ɛ Nyɔsoa a, dɛ ɔ nʋa Seriko ke ɛɛ' 'blʋa jei 'dee ɛ, mɛ ɔ nʋ ɛɛ' Ai ke ɛɛ' 'blʋa jei "jri i -ke. Ɔ 'wɩɩn -ke ka Gabaɔn nyʋ ke Israɛ -nyʋ cɛan wlu -tie" 'de ʋʋa' 'flɛ 'ʋn -te -tɩ 'ʋn -wɛe ʋʋ -tea i 'de ʋʋpʋ "kwlu ɛ. 2 'Sʋ faʋn klaa" 'kpɔ 'ʋn 'ɛ, dɛ-nʋɛ' mɛ -nɩ Gabaɔn nɩɛ "kwi -kwlɔ -ɛ -kɔn -tɩ', ka 'blʋa jeʋn 'a -tena' nɩa -ɛ -sii Ai, -wɛe ɛɛ' nyʋ -nɩɛ 'di -wee' nɩɛ -tapoi. 3 Ɛmɛ -tɩ Adɔni Sedɛkɩ Selisalɛmʋ 'a 'blʋa jei dboɛ -tadboʋn 'de Oamʋ -nɩa Eblɔn 'ɔ 'blʋa jei o, Pireamʋ -nɩa Ɩamʋtɩ 'a blʋa jei o, Ɩafia -nɩa Lakisɩ 'a 'blʋa jei ke Debii -nɩa Eklɔn 'ɔ 'blʋa jei wo, -wɛe ʋʋ 'je wlu ka: 4 Ao ji 'ʋn kwa wɔi -te' -a -je Gabaɔn nyʋ tʋ o -fʋan' mʋ, dɛ-nʋɛ' mɛ -nɩ ʋʋ -tuɛ" 'flɛ 'ʋn -te -tɩ 'de ʋʋ ke Sosue' ke Israɛ -nyʋ 'nynɩ

5 'Kamɔ ɛ nɩ -wɛe Amɔɔ -nyʋ 'a 'blʋa jeʋn -mm", -jʋ -wlʋa Selisalɛmʋ o, Eblɔn o, Ɩamʋtɩ o, Lakisɩ ke Eklɔn poɛ wlu -tadue -wɛe ʋʋ kɔn 'de ʋʋa' "sooa 'a nya 'de ʋʋ mu Gabaɔn tʋ o -fʋan'. Ʋʋ -tuɛ" ʋʋa' -kwlena' 'de Gabaɔn "juɛi -wɛe ʋʋ -tee -fʋan'. 6 Gabaɔn nyʋ dboɛ nyʋ 'de Sosue' o -mɛ ɔ nɩɛ 'de -kwlena ' -nɩa 'de Kilgalɩ ɛ -wɛe ʋʋ 'da ka: -Ɩ -bo -ma "juɛi nʋʋ nyʋ o "maeɛ. -Too"- -je ji -ɩn -je -a o 'wlʋ, 'kpɩ a 'mɩa -mii', -pʋʋ' -aʋn, dɛ-nʋɛ' mɛ -nɩ Amɔɔ -nyʋ 'a 'blʋa jeʋn "klein -nɩa 'de crʋ 'di i poɛ wlu -tadue -wɛe ʋʋ ji -a o -fʋan'. 7 Sosue' ke ɔɔ' "sooa -wee' "klein ke tʋ -fʋn -nyʋ -kua 'e 'dei 'wlʋɛ Kilgalɩ -wɛe ʋʋ mu.

8 Nyɔsoa 'wlu 'de Sosue' -pee ka ɛ 'na: 'Blʋa jeʋn -nʋ 'a faʋn 'de -ʋn -nʋɛ', dɛ-nʋɛ' -ma muɛ tʋ 'a "jru kpaa' 'de ʋʋpʋ "kpei, ʋʋ deejrɔ' se -ʋn "juɛi i nyna i.

9 Dɛ -tba' Kilgalɩ ɛ, Sosue' 'na "maʋ wɩ due' 'di 'sʋ ɔ je ʋʋpʋ "kpei waan-. 10 Nyɔsoa -sa ʋʋpʋ -je 'kwa 'de Israɛ -nyʋ "jɛi -wɛe tʋ sɩaɩn'- ka 'de Gabaɔn nyʋ "juɛi, Israɛ -nyʋ nʋɛ ʋʋpʋ i mamaʋ 'sʋ dɛ -tba' 'de Bɛtɩ Orɔn 'ɔ 'ja na' -ɛ -jea Aseka ke Makeda ke. 11 -Ta Amɔɔ -nyʋ nɩa Israɛ -nyʋ "juɛi i plea' -wɛe ʋʋ nɩa Bɛtɩ Orɔn -crea' a, Nyɔsoa nʋɛ' "ni -kɩɩn klae" klae" a jea 'de "jɛi 'wlʋ ɩa jea blʋ dɛ -mʋa' -ɛ -jɛa Aseka a, ɩ 'dba nyʋ -tuu" ɛ je Israɛ -nyʋ 'a -placnɛ -sii.

12 'Wɩ -ɛ 'di Nyɔsoa nʋɛ -wɛe Israɛ -nyʋ kpa tʋ 'a "jru 'de Amɔɔ -nyʋ "kpei ɛ, Sosue' "wɔɔ 'de Israɛ -nyʋ -wee' "juɛi ɔ 'na: 'Jrʋ ɛ nyna i 'de Gabaɔn "jru! 'De -mɔ 'cʋ, -nyna i 'de Ajalɔn 'ɔ wlao "jru.

13 -Wɛe 'jrʋ nyna i, 'cʋ -mɛ 'bɔ na -tɩ 'mɛ mamaʋ 'sʋ Israɛ 'blʋa je ʋʋa' tʋnyʋ -wee' 'a dbaa' -kɔ'. Ɛmɛ -crɩɩɛ' 'de "i "srɛ i 'a 'sbɛ 'di. 'Jrʋ -teɛ -gbao mamaʋ 'sʋ ɛ maa ɛɛ' i blʋa' i ɛ je 'wɩ due' nʋ. 14 'Wɩ deejrɛ' se 'kan nɩ due' 'de ɛmɛ "juɛi ke 'de ɛ 'de nyʋ 'je ɛɛ' 'wɩ tu "i poo-, -ta Nyɔsoa pooa nyɩɔ wlu doʋn" o ɛ. -Bo ɛ nɩ 'kan -mɛ ɛɛ' -cɛkpa' -a -fʋn' Israɛ -nyʋ 'a tʋ. 15 -Mɛ 'wlʋa 'e -jei" 'sʋ Sosue' ke Israɛ -nyʋ -wee' muɛ de 'e Kilgalɩ.

16 -Ta ʋʋa -fʋan' a, 'blʋa jeʋn -mm" -nʋ 'kpa 'kwla -wɛe ʋʋ pa bliia' 'de Makeda 'a "sou 'a -kwlewɔn 'di. 17 Ʋʋ jea 'blʋa jeʋn -nʋ "jriɛ 'de Makeda 'a "sou 'a -kwlewɔn 'di 'sʋ ʋʋ jiɛ Sosue' 'tmʋa 18 'sʋ Sosue' poɛ ʋʋpʋ -kei" ɔ 'na: Ao "tun "soi 'de -kwlewɔn -nɛ 'ɛ paana' -wɛe ao -sae' nyʋ ʋʋ 'je ɛ i fʋo-, 19 'kaa ao 'de i 'peɛn 'emu: Ao nʋ aoa' tʋnyʋ i -wɛe ao 'je ʋʋpʋ 'de "sii-! Ao 'de ʋʋpʋ "i "taa ʋʋ 'de ʋʋa' "kwi -kwlɔ 'dii paa dɛ-nʋɛ' Nyɔsoa aoa' Kea -sa ʋʋpʋ sʋn "kpei!

20 Sosue' ke Israɛ -nyʋ 'a tʋ dʋ ʋʋpʋ 'mɛ ka -cɔɔn' ka -wɛe ʋʋ 'dba ʋʋ -wee' "klein -bo ɛ se nyʋ due' due' ka mʋ -pa' ʋʋa' "kwi -kwlɔ -blaa -gblo" 'dei 'di nɩ ɛ. 21 -Wɛe Israɛ -nyʋ -wee' "klein nɩ -gbla' -gbla' ʋʋ ji de 'de Sosue' -pʋn" 'de -ta ʋʋa -kwea' 'de Makeda a. -Mɛ 'wlʋae -jei" 'sʋ nyɔ deejrɔ' 'de 'blʋa -nɩa 'mʋa- 'di se Israɛ -nyʋ wɔn o to kpɛ due'.

22 Sosue' 'na ʋʋ -sa dɩ 'de "soi 'a -kwlewɔn "juɛi -wɛe ʋʋ 'je 'blʋa jeʋn -mm" -nʋ "kpae "sii ʋʋ 'je 'ɔ ja. 23 'Ka ʋʋ nʋ -cɛɛn'- -wɛe ʋʋ jɔ 'blʋa jeʋn -mm" -nɩa 'de "soi 'a -kwlewɔn 'di, 'blʋa jeʋn -wlʋa Selisalɛmʋ o, Eblɔn o, Ɩamʋtɩ o, Lakisɩ ke Eklɔn ke ɛ. 24 -Ta ʋʋa -saa' 'blʋa jeʋn -nʋ 'demu -wɛe ʋʋ 'jeɔ jaa, Sosue' 'da Israɛ -nyʋ -wee' 'mɛ -wɛe ɔ wlu "sooa -wi" 'a klae" ke ɔ -fʋan' tʋ -pee ka ɔ 'na: Ao 'kpa -ta -wɛe ao 'je bʋ 'de 'blʋa jeʋn -nʋ 'a -plʋn "kpei.

"Sooa 'a klae" -nʋ 'kpaa 'e 'wɛ -wɛe ʋʋ nʋ 'kan -cɛɛn'-. 25 Sosue' -sa wlu de ɔ 'na: Faʋn 'de ao nʋɛ, aoa' dɩ 'de cɩɛn! Ao "duo 'kpɩ 'ʋn, ao kpʋʋn aoa' -cɛ" i! Dɛ-nʋɛ' mɛ -nɩ 'ka Nyɔsoa mu aoa' tʋnyʋ aoa mʋa o -fʋan' -wee' nʋa'.

26 Ɛ 'wlʋa -mɛ "kpei ɛ, Sosue' 'dba ʋʋpʋ 'mɛ -wɛe ɔ -pee' ʋʋpʋ 'a "ku 'de tu -mm" ja. 'De ʋʋpʋ sie mamaʋ 'sʋ kwie je kpʋn-. 27 -Ta 'jrʋ a blʋa i 'sʋɛ, Sosue' 'na ao "sii ʋʋa' "ku i -wɛe ao jɩ -fi" e 'de Soaa 'a -kwlewɔn 'di -ta 'blʋa jeʋn -nʋ paa 'kwla 'de ɛ. 'Sʋ ʋʋa nʋɛ "soi klae" ʋʋa jeɛ 'ɛ wɔn "i kan ɩ nɩ 'e 'wɛ -sɩan ke.

28 Ɛɛ' 'wɩ tu 'di ɛ, Sosue' kpʋn Makeda 'mɛ, ɔ nʋɛ -placnɛ ɔ je ɛɛ' 'blʋa jei ke dɛ "klein -nɩa 'kmʋ 'dba ɔ je Nyɔsoa "nyɩ ɔ se 'e dɛjrɛ' sie. Ka ɔ nʋa Seriko 'a 'blʋa jei 'kamɔ ɔ nʋ -jɔ -nɩa 'de Makeda -ke.

29 Sosue' 'wlʋa Makeda 'sʋ ɔ ke Israɛ -nyʋ -wee' "klein muɛ Libʋna tu o -fʋan'. 30 Nyɔsoa -sa ɛ ke ɛɛ' 'blʋa jei sʋn "kpei 'de Israɛ -nyʋ 'kwa, ʋʋ nʋɛ -placnɛ ʋʋ je dɛ "klein -nɩa 'kmʋ 'de ɛ 'di 'dba ʋʋ se 'e dɛjrɛ' sie. Ka Sosue' nʋa Seriko 'a 'blʋa jei 'ka ɔ nʋ ʋʋpʋ 'a 'blʋa jei.

31 Sosue' 'wlʋa Libʋna 'sʋ ɔ ke Israɛ -nyʋ -wee' "klein muɛ Lakisɩ. Ʋʋ poɛ -kwlena' 'de ɛɛ' "kwi -kwlɔ -tu "juɛi -wɛe ʋʋpʋ -fʋn' ɛ tʋ o. 32 Nyɔsoa -sa Lakisɩ sʋn "kpei 'de Israɛ -nyʋ 'kwa -wɛe ʋʋpʋ kpʋn ɛ 'de 'wɩ 'a 'sɔɔn -nɩ "kpei; ʋʋ nʋɛ -placnɛ 'ɛ "nma jri ʋʋ je dɛ -nɩa 'de ɛ 'di -wee' 'dba ka ɛ nʋa 'de Libʋna a. 33 Oramʋ -nɩa Kesɛɛ 'ɛ 'blʋa jei jiɛ Lakisɩ o 'wlʋa 'kaa Sosue' 'blɔ, ɔmɔ ke ɔɔ' "sooa ke ɛ ɔ se ʋʋa' nyɔjrɔ' 'kmʋ sie.

34 Sosue' 'wlʋa Lakisɩ 'sʋ ɔ ke Israɛ -nyʋ -wee' "klein muɛ ʋʋa' -kwlena' -tua" 'de Eklɔn "juɛi, -wɛe ʋʋ -fʋn' ɛ tʋ o. 35 Ɛɛ' 'wɩ tu 'di mɛ ʋʋ kpʋn ɛ -wɛ ʋʋ nʋ -placnɛ -ɛɛ "jri "nma ʋʋ -sa dɛ "o dɛ nɩa 'de ɛ 'di -wee' 'kmʋ ʋʋ "nyɩ Nyɔsoa ɔ se dɛjrɛ' 'e sie, ka ɛ nʋa 'de Lakisɩ ɛ.

36 Sosue' 'wlʋa Eklɔn 'sʋ ɔ ke Israɛ -nyʋ -wee' "klein muɛ Eblɔn -wɛe ʋʋ -fʋn' ɛ tʋ o. 37 Ʋʋ kpʋɛn' -wɛe ʋʋ 'dba ɛɛ' 'blʋa jei -placnɛ "i, ɛɛ' dɩ "klein -nɩa 'kmʋ -ɩ -nɩa 'de ɛ 'di ɛ ke "kwi -kwlɔ -jɛ' 'blea ke. Dɛjrɛ' se 'kmʋ sie- ka ɛ nʋa 'de Eklɔn ɔ. Sosue' -sa "kwi -kwlɔ -nɛ -wee' i -wɛe ɔ -sa ʋʋpʋ 'a ma" i ɔ "nyɩ Nyɔsoa. 38 -Mɛ 'wlʋa mʋ 'sʋ, Sosue' ke Israɛ -nyʋ -wee' "klein jiɛ Debii de -wɛe ʋʋ -fʋn ɛ tʋ o. 39 Sosue' ke ʋʋ kpʋn Debii -nɛ ke ɛɛ' 'blʋa jei -wɛe ʋʋ kpʋn "kwi -kwlɔ -jɛ' 'blea -ke. Dɩ -nɩa 'kmʋ 'de ɛ 'di ɔ nʋɛ -placnɛ -wɛe ʋʋ -sa ʋʋpʋ 'a ma" i 'de ʋʋ "nyɩ Nyɔsoa 'de ɔ se dɛjrɛ' 'kmʋ sie ka ɛ nʋa 'de Eblɔn ɛ. Ka ɔ nʋa Libʋna ke ɛɛ' 'blʋa jei ɛ 'ka ɔ nʋ Debii ke ɛɛ' 'blʋa jei -ke.

40 Sosue' kpʋn 'blʋa -nɩ -wee' 'mɛ, ɔɔ' tʋ dʋ 'blʋa jeʋn -nɩa 'de crʋɩ 'dii 'mɛ, -jʋ -nɩa 'de Nekɛfʋ o, 'de wlao -nɩa "ni -gbuu wɔin ke -jʋ nɩa 'de crʋɩ 'a -kwlewɔn 'dii ke. Ɔ -sa ʋʋpʋ 'a ma" i 'mɛ ɔ se 'e nyɔjrɔ' sie -wɛe ɔ "nyɩ Nyɔsoa ka Tʋbo" Israɛ -nyʋ 'a Kea "sia ɛɛ' 'nynɩ ɛ. 41 Sosue' 'a tʋ du 'blʋa -tba' Kadɛsɩ Banea' -ɛ -jɛa Kasa a ɛ ke Kosɛnɩ -blʋa -ɛ -jɛa Gabaɔn ɛ. 42 Sosue' kpa tu kpɛ due' 'su ɔɔ' tʋ du 'blʋa jeʋn -wee' 'mɛ -wɛe ɔ "duo ʋʋpʋ 'a 'blʋa 'ʋn dɛ-nʋɛ' Nyɔsoa, Israɛ -nyʋ 'a Kea a -fʋn' ɛɛ' 'cɛ 'ɛ tʋ. 43 'De -mɛ 'de 'sʋ Sosue' ke Israɛ -nyʋ -wee' ke ɔ muɛ de 'de Kilgalɩ 'a -kwlena'.