6
Seriko -kwlɔ kan ɛɛ' 'blo -blaa ɛ 'dei 'a kwlu -wee' "wɛin -wɛe ʋʋ nɩ 'de ɩ 'de, 'de Israɛ -nyʋ 'a pleea' 'ʋn. Nyɔ deejrɔ' 'ɔ cɛɛn 'de kwlu ɔɔ' pa 'de ɔɔ' "si "kpae. 2 Nyɔsoa wluɛ 'de Sosue' -pee ka ɛ 'na: -Ɩn -gbʋn 'nɔ, 'ɩn "nyɩ -ʋn Seriko o ɛɛ' 'blʋa jei ke ɔɔ' "sooa -kua 'e 'dei -nʋ 'mɛ -ke. 3 'De 'wɩ -mɛɛo"- 'di ɛ, -ɩn -ke -ma "sooa -pɩn' "kwi -kwlɔ -nɛ kpɛ due' 'de -sɔn' 'di. 4 'Sraa -saʋn -mɛ" 'sɔɔn a muɛ 'blae -gbɩn 'blea -wɛe ʋʋ 'je 'de dbɛɛdɛ 'ɛ -gbau' "juɛi nɩ. 'Wɩ 'a -mɛ" 'sɔɔn -nɩ 'di ɛ, aoa muɛ "kwi -kwlɔ -nɛ -pɩn' 'a kpɛ -mɛ" 'sɔɔn, -wɛe 'sraa -saʋn 'je -gbɩn -nɩ bla. 5 -Bo 'blʋa -wee' 'wɔn -kaʋn wlu -tɛan 'di 'mʋa- 'sʋ nyʋ -wee' a muɛ "wɔa -kaan" ka- -wɛe "kwi -kwlɔ -nɛ 'ɛ 'blo -wee' 'je blʋ 'e ʋʋpʋ "juɛi. 'Sʋ 'blʋa -wee' -tee tu -fɔan', nyɔ due' -tu" -je "jriɛ 'de ɔ "juɛi.6 Nunɩ 'a "ju Sosue' 'da 'sraa -saʋn -wee' 'mɛ -wɛe ɔ wlu ʋʋpʋ -pee ɔ 'na: Ao "duo dbɛɛdɛ 'ɛ -gbau' 'ʋn 'de aoa' kpʋan" wli "kpei -wɛe aoa' -mɛ" 'sɔɔn 'je aopʋ "kwlu wlʋ ʋʋ 'je -kaʋn -mɛ" 'sɔɔn -nʋa 'blae 'a -gbɩn 'ʋn -wɛe ao 'je 'de Nyɔsoa 'a dbɛɛdɛ 'ɛ -gbau' 'a nya -si'.
7 -Wɛe ɔ wlu 'de nyʋ -wee' -pee ɔ 'na: -A mu: Ao -pɩn' "kwi -kwlɔ -nɛ, -mɛ "sooa -blea poodɩ nɩ 'de Nyɔsoa 'a dbɛɛdɛ 'ɛ -gbau' "juɛi.
8 Nyʋ -wee' nʋɛ ka Sosue' "sia 'nynɩ ɛ: 'Sraa -saʋn -mɛ" 'sɔɔn -blea -kaʋn -mɛ" 'sɔɔn -nʋa 'blae 'a -gbɩn 'ʋn bla 'de Nyɔsoa "juɛi 'de ʋʋ -te -kaɩn -nɩ 'a blaa' -pʋn" -wɛe dbɛɛdɛ 'ɛ -gbau' nɩ 'de ʋʋpʋ 'de. 9 Tʋ -fɔn -nyʋ nɩɛ 'de 'sraa -saʋn -blea dbɛɛdɛ 'ɛ -gbau' "juɛi -wɛe dee 'jrʋ -mʋ bla 'de ɛ 'de; ʋʋa 'na 'de -kaʋn 'a wlu "i 10 Sosue' 'tmʋʋ 'blʋa -wee' 'mɛ ɔ 'na: Ao 'de -cruɛn" poɛ, ao "mu wɔn, ao 'de wluɛ mamaʋ 'sʋ 'wɩ -ɛ 'di 'ɩn 'jea nʋ ao "wɔ 'je nyni. 11 Nyɔsoa 'a dbɛɛdɛ 'ɛ -gbau' -pɩn' "kwi -kwlɔ -nɛ 'mɛ kpɛ due', -wɛe ʋʋ -wee' mu 'de -kwlena' de "maʋ ʋʋ 'je 'mʋ.
12 -Sɔn' dee -sɩan', Sosue' -crʋʋn' pɛɛn ɔ je "nyɩɔ sɔn -wɛe 'sraa -saʋn "duo Nyɔsoa 'a dbɛɛdɛ 'ɛ -gbau' 'ʋn 'de kpʋan" wli "kpei. 13 'Sraa -saʋn -mɛ" 'sɔɔn -blea 'blae -gbʋn -mɛ" 'sɔɔn, 'kpa -jei" -mɛ Nyɔsoa 'a dbɛɛdɛ 'ɛ -gbau' bla 'de ʋʋpʋ 'de, -wɛe ʋʋpʋ a bla 'blae -gbʋn. 14 Ʋʋ -sa "kwi -kwlɔ -nɛ 'ɛ -pɩn' 'a de kpɛ due' -wɛe ʋʋ ji de 'de -kwlena'. 'Kamɔ ʋʋpʋ nʋ 'de 'wɩ -mɛɛo"- 'di.
15 'De 'wɩ 'a -mɛ" 'sɔɔn -nɩ "kpei ɛ, ʋʋ -crʋʋn' ʋʋ je 'ʋn sɔn -wɛe ʋʋ -pɩn' "kwi -kwlɔ -nɛ ka ʋʋa -tee a "i see ɛ. Ɛɛ' 'wɩ tu 'a 'sʋ 'di mɛ ʋʋ -pɩn' ɛ kpɛ -mɛ" 'sɔɔn. 16 Ɛɛ' -pɩn' 'a kpɛ -mɛ" 'sɔɔn -nɩ ɛ, 'sraa -saʋn a bla -kaɩn 'sʋ, Sosue' wluɛ nyʋ -wee' -pee ɔ 'na: Ao "wɔ, dɛ-nʋɛ' Nyɔsoa "nyɩ aopʋ "kwi -kwlɔ -nɛ 'mɛ. 17 "Kwi -kwlɔ -nɛ, aoa muɛ ɛ ke dɩ "klein -nɩɛ 'di 'a ma" i -sa 'a ao 'jɩ Nyɔsoa "nyɩ. Raabʋ -nɩa -kwlɔ i -te 'nynɔ 'ɔ 'sʋ -je 'kmʋ sie ɛ ke nyʋ -nɩa 'de ʋ "wɛin ke, dɛ-nʋɛ' mɛ -nɩ ʋ -tuɛ" -aa tʋ naa nyʋ -a dboa 'kwla. 18 'Kaa ao 'sroo -kwli i 'de dɩ -tea Nyɔsoa 'a -tea' 'mʋa- 'a -tɩ' 'ʋn. Ao 'de ɩa' deejrɛ' 'ʋn "duɛ, -wɛe ɛ je 'kan nɩ 'de ao je Israɛ -nyʋ 'a -kwlena' 'kle "kpei ja -wɛe ɛɛ' ma" je i -saa 'pepe. 19 Wɛi ke "sani o, -tiɛn ke nɩɛ -wee' "klein a muɛ Nyɔsoa 'a -tea' -tea' -wɛe nyʋ 'jɩ 'de Nyɔsoa 'a wɛi i -tena' po. 20 Ʋʋ bla -kaʋn 'sʋ, Israɛ -nyʋ -te' ʋʋ je 'wɔn, 'blo 'wlaa 'de ɛ "sri Israɛ -nyʋ je 'de "kwi -kwlɔ -nɛ 'di 'wlaa-, due' -tuɛ" ɔ "juɛi "jriɛ 'sʋ ʋʋ je ɛ -wee' kpʋn. 21 Ʋʋ 'dbaa "nynuu nmai ke 'nynʋkpae o, "nynuu "mɩɩ ke -kɩɩ" mɔ 'ɔ -cɛ" o, bli' beɔ o, 'blae ke soofae' ke dɩ "klein -nɩa 'kmʋ 'de "kwi -kwlɔ -nɩa 'mʋa- 'di -placnɛ "i ʋʋ je Nyɔsoa "nyɩ 22 Sosue' wluɛ tʋ naa nyʋ 'sɔɔn ɔ dboa -ʋʋ -jea 'blʋa -nɛ ja -gbʋn -pee ka ɔ 'na: Ao mu 'de Raabʋ -nɩa -kwlɔ i -te 'nynɔ "wɔin, ao -sa ʋ ke ʋa' 'cɛ -wee' 'mʋa- ka ao cɛn ɛɛ' wlu -tie" ɛ.
23 Nyʋ 'sɔɔn -nʋ muɛ 'de Raabʋ "wɛin -wɛe ʋʋ ja Raabʋ o, ʋ "bo ke ʋ de o, ʋa' de 'a "nynuu o, ʋa' "wliiɛ ke ʋa' -kwlin 'di nyʋ, -wɛe ʋʋ -te' ʋʋpʋ i 'de Israɛ -nyʋ 'a -kwlena' -pʋn". 24 'Sʋ Israɛ -nyʋ poɛ "kwi -kwlɔ -nɛ ke dɩ -nɩɛ 'di -wee' "klein "jri, -bo ɛ se wɛi o, "sani ke dɩ -nʋa -tiɛn ke nɩɛ 'ʋn mɩ -sie 'demu -wɛe nyɔ ɔ -te' i 'de Nyɔsoa -gbu" 'di. 25 Sosue' "taa -kwlɔ i -te 'nynɔ Raabʋ "i ʋ je 'kmʋ nɩ, ɛ ke nyʋ -nɩa ʋa' -kwlin 'di o, ke ʋa' "wliiɛ -wee' ke, dɛ-nʋɛ' mɛ -nɩ ʋ -tuɛ" nyʋ Sosue' dboa -ʋʋ -jea Seriko "jrɛɛ 'kwla. Ʋ "tiɛ 'de Israɛ -nyʋ "kwlu -sɩan ke. 26 'De ɛɛ' nɔ" tu 'di, Sosue' -srɛɛn' 'de Seriko 'a -tɩ' 'ʋn:
'Daɩn kpʋn nyɔ -na -ɔ -je -kwlɔ -nɛ po 'de -kɔɔ' de 'de Nyɔsoa "juɛi ɛ,
-Ɔ -jea Seriko po 'de -kɔɔ' de ɛ.
Ɔɔ' "ju nmɔu ju klaa" mɔ 'je 'e to -wɛe ɔ 'je ɛɛ' -gban -te',
'De ɔɔ' "ju nmɔu ju -tba' 'de klaa" 'de mɔ ɔ 'je 'e to -wɛe ɔ 'je ɛɛ' kpaa" 'de po.
27 'Kamɔ Nyɔsoa sie Sosue' o -wɛe ɔɔ' 'nynɩ 'wlʋa a 'kpaa "kpei 'de 'blʋa kpei i.