3
-Sɔn' dee -sɩan' -klae" pɛɛn 'sʋ, Sosue' ke Israɛ -nyʋ -wee' 'wlʋ 'de Sitimʋ 'mɛ, -wɛe ʋʋ "si i 'de Sudɛn -gbuu -kwli". Ʋʋ -kwle 'e 'wɛ kpɩɩn- -wɛe ʋʋ jeɛ cɛn. 2 'De 'wɩ taan 'di ɛ, ʋʋa' "jrukpɔ i -tenyʋ na -ta ʋʋa -kwlea' 'ʋn 3 -wɛe ʋʋ 'tmʋʋ Israɛ -nyʋ ka ʋʋ 'na: -Bo aoa sea 'sraa -saʋn -nɩa Lefi -wi" 'je, ʋʋa sea Nyɔsoa aoa' Kea 'a dbɛɛdɛ 'ɛ -gbau' a kpaa, -mɛ ao 'wlʋ 'e -ta aoa -kwlea' -wɛe ao 'jeɛ 'de bla. 4 'Kaa 'de ɛ ke ao 'nynɩ ɛ, -jeblʋ 'a -to due' mɛ -jee' nɩ-. Ao 'boɛ -pʋn" 'kpaa. -Bo ɛ nɩ 'kan -mɛ -jeblʋ ao 'jea kpa aoa muɛ jua', dɛ-nʋɛ' mɛ -nɩ ao se ɛɛ' -je -tu kpa due'.5 Sosue' 'wlu 'de Israɛ -nyʋ -pee, ɔ 'na: Ao nʋɛ ao 'je i -kwɛ, dɛ-nʋɛ' ɛ mɛ -nɩ -klae" ɛ, Nyɔsoa a muɛ dɩ klae" nʋa' 'de aopʋ 'a -kwea'-.
6 'De 'sraa -saʋn -mu -pee ɛ, ka Sosue' 'da ka: Ao "duo dbɛɛdɛ 'ɛ -gbau' 'ʋn -wɛe ao 'je 'de Israɛ -nyʋ "juɛi -si'. Ʋʋ "dua dbɛɛdɛ 'ɛ -gbau' 'ʋn 'sʋ ʋʋpʋ -siɛ' ʋʋ "juɛi. 7 Nyɔsoa 'wlu 'de Sosue' -pee ɛ 'na: 'De -sian wɩ -nɛ 'di ɛ, 'ma muɛ -mii" 'bɛa 'de Israɛ -nyʋ -wee' "klein "jri "kpei -wɛe ʋ 'jeɛ juo ka 'ɩn ke Moisɩ nɩa ka 'ɩn ka -ma mu nɩa' -ke. 8 -Tmʋʋ 'sraa -saʋn -ʋʋ -blea dbɛɛdɛ 'ɛ -gbau' ka -ɩn -na: -Bo ao jɛɛ Sudɛn -gbuu "kpɩ, -bo "sii bʋ 'de "niɔ ɔ, ao nyna i 'mʋa-. 9 'Sʋ Sosue' 'wlu 'de Israɛ -nyʋ -wee' "klein -pee ɔ 'na: Ao 'kɩɩn nɔ' -wɛe ao 'je Nyɔsoa aoa' Kea 'a wlu doin" opo. 10 -Wɛe Sosue' 'da ka: Ka ao 'jeɛ juo sʋn nʋ ka 'kmʋ nɩ -Kea nɩa 'de aopʋ 'a -kwea' a -wɛe ɛɛ mua Kanaa nyʋ o, Ɛtɩ -nyʋ o, Ɛfi nyʋ o, Felesi nyʋ o, Kikasɩ -nyʋ o, Amɔɔ -nyʋ ke Sebusɩ dɛ 'kwa -sa: 11 'Blʋa -wee' "klein 'a Tʋbo" 'a dbɛɛdɛ 'ɛ -gbau' a jiɛ Sudɛn -gbuu cɛan' 'de ao -wee' "juɛi 12 Kaan ka la, ao -sa nyʋ 'a -pue 'jɔ 'sɔɔn 'de Israɛ 'ɛ 'blʋa 'a 'blowɔn di, nyɔ due' 'wlʋ 'de 'blʋa 'a 'blowɔn due' 'di. 13 -Bo 'sraa -saʋn -blea Nyɔsoa 'a, 'blʋa -wee' 'a Tʋbo" 'a dbɛɛdɛ 'ɛ -gbau' a sea bʋ 'de Sudɛn wɔn "sii "kpɩ -mɛ "ni a cɛn -tie": Ɛɛ' -jɛɛ -wlʋa de 'kwea fɔo -mɛ ɛ muɛ i nyna 'a ka 'blo nɩa. 14 Nyʋ -wee' 'a -nmae -tan 'tan -ɛ -ke ʋʋ 'jea Sudɛn cɛn, 'sraa -saʋn -blea dbɛɛdɛ 'ɛ -gbau' a na 'de ʋʋpʋ "juɛi. 15 Ɛ nɩɛ Ɔkɩ 'a cɛn nɔ" -mɛ Sudɛn -gbuu "jii ɛ poɛ bae' i. Nɔ" -ɛ 'di 'sraa -saʋn -blea dbɛɛdɛ 'ɛ -gbau' a nynia 'de "ni -kwli" -wɛe ʋʋa "sii a bʋ 'de "ni o ɛ, 16 "Ni -a -wlʋa 'de 'kwea fɔo 'bɔ -si' -tɩ 'mɛ -wɛe ɛ nʋ ka nyɔ 'ɔ bla 'blo -tɔɔn' -tɔɔn, ɛ tba 'de "kwi -kwlɔ nyɔ ɔ 'daa Adan -ɛ -nɩa 'de Sartan -kwlɔ -pʋn", 'de -mɛ "ni -mua -sɔin' fɔo 'de 'tɔniɛ 'tɔn -siia "i -mɩ -wee' 'ma. Israɛ -nyʋ cɛn Sudɛn 'de Seriko "juɛi. 17 'Sraa -saʋn -blea Nyɔsoa 'a dbɛɛdɛ 'ɛ -gbau' nynai 'de Sudɛn -gbuu -ma' 'a -kwea'-, -wɛe Israɛ -nyʋ a -si' 'de 'blʋa -jea' 'soɛ "kpei. Ʋʋ nyna -si' -si' 'sʋ Israɛ -blʋa -wee' je -si' 'a -kwɛ'.