2
'De Sitimʋ ɛ, Nunɩ 'a "ju Sosue' dboɛ nyʋ 'sɔɔn wɔɔ-, -ʋʋ -je 'blʋa -nɛ 'di i 'jrɛ, 'de ɔ 'na Seriko mɛ -kɔn -tɩ'. Ʋʋ nynia Seriko 'sʋ ʋʋ 'pɛn 'de jɛi" 'je nynɔkpao' ʋʋa 'daa Raabʋ o -gbu" 'di. 2 Nyɔ deejrɔ' poɛ Seriko 'a 'blʋa jei "kuan, ka Israɛ -nyʋ jia 'de ɔɔ' 'blʋa 'di 'de "maʋ wɩ 'di, -wɛe ʋʋ 'je ɔɔ' 'blʋa "jrɛ ɛ. 3 'Sʋ Seriko 'a 'blʋa jei dboɛ nyʋ 'de Raabʋ o, ɔ 'na: A "sii nyʋ -pɛan 'de ao -gbu" 'di "kpae, dɛ-nʋɛ' ʋʋ jiɛ -aa 'blʋa -nɛ "jrɛ 'a.4 'Kaa "ju nynɔkpao' -tuɛ" nyʋ 'sɔɔn -nʋ 'kwla -wɛe ʋ -sɛ "kpei ka, ʋ 'na: Kɩɩn, nyʋ -nʋ ji 'de 'ʋn o 'mɛ, 'kaa 'ɩn se -ta ʋʋpʋ 'wlʋa juo-. 5 -Ta -kwlɔ 'ɔ -gbɛin" kan nɔ" a nynia 'sʋ ʋʋpʋ muɛ de -mɛ kwie kpʋn'. 'Ɩn se -ta ʋʋpʋ mua juo-. Ao -too"- ao je ʋʋpʋ 'de bla, ao 'bɛɛ ao 'je ʋʋpʋ jɛɛ-. 6 'De -mɛ ʋ -tuɛ" ʋʋpʋ 'kwla 'de -gbu" 'a "jɛi 'de 'lɛn kpai ʋ poa 'emu -sɔn. 7 'Blʋa jei 'a dbo nyʋ -nʋ 'a -bla' ʋʋpʋ 'de -nao, ʋʋ "duɛ -je -bo nyʋ cɛɛn "i -wɛe nyʋ 'bɛa ɔ 'jea Sudɛn -gbuu 'blʋɔ cɛɛn ɛ. Ʋʋ 'kpa -jei" 'sʋ ʋʋ kan "kwi -kwlɔ -nɛ 'ɛ kpaa" "wɔin 'de ʋʋpʋ 'de.
Ʋʋpʋ ke Raabʋ 'a wlu 'mii 'wɔɔn -tɩ'
8 -Mɛ 'wlʋa 'e -jei" 'sʋ, Raabʋ 'ja 'de "jɛi -wɛe ʋ jɛɛ 'dʋɩ -nʋ, -mɛ ʋʋpʋ se "nyɩɔ 'kpa ke. 9 'Sʋ ʋ 'wlu 'de ʋʋpʋ -pee ʋ 'na: 'Ɩn juo 'nɛ Nyɔsoa "nyɩ aopʋ 'blʋa -nɛ 'mɛ: Faʋn klaa" 'kpa -a -wee' 'ʋn ɛ, -wɛe 'kpɩ wa nyʋ -wee' "i. 10 Dɛ-nʋɛ', -a -wɔn 'ɛ ka Nyɔsoa maa 'tɔniɛ -saan 'de ao "juɛi, -ta ao 'wlʋa Esipʋ ɛ. -A -wɔn 'ɛ -ke dɩ ao nʋa Amɔɔ nyʋ 'a 'blʋa jeʋn -nɩa 'sɔɔn Siɔn ke Ɔkɩ -ʋʋ -blea 'de 'jrʋ 'a 'wlʋʋ 'ɩn fɔo 'de Sudɛn -gbuu -kwli" "jri i, -wɛe ao "nyɩ ʋʋpʋ Nyɔsoa 'de ʋʋpʋ ma" i -saa' 'ʋn 'mɛ. 11 -A -wɔan wlu -nɩ 'sʋ, -aa pɛe cɛn mlɔʋ", -wɛe nyɔ jrɔ' se 'kpɩ mɔ 'ble ɔ 'je ao "juɛi nyna. Dɛ-nʋɛ' mɛ -nɩ Nyɔsoa aoa' Kea mɛ -nɩ Kea 'de jaʋn 'di ke 'nɔ 'blʋa "kpei. 12 Kaan ka la, 'ma bae aopʋ 'mɛ ao -srɛɛn 'de 'ʋn -pee 'de Nyɔsoa 'a 'nynɩ 'ʋn, 'de dɛ 'dɔe 'ɩn nʋa aopʋ "jri i 'a -tɩ' 'ʋn ɛ, aoa muɛ 'ma -gbu" -sɔn nyʋ "i "srɛ dɩ due' -nɩ "jri i nʋa' 'de ao 'je 'ʋn ɛɛ' tɔ' -tɩ nɩa' 'a "jriɛ o sie dɛ "nyɩ 13 ka aoa mʋa 'ma "bo o, 'ɩn de o, 'ma dedi' nmai o, 'ma dedi' nynɔkpae' ke nyʋ nɩa 'de 'ma -gbu" -sɔn ke, aoa muɛ -a "i kaan' ao se -a 'dba i.
14 Nyʋ 'sɔɔn -nʋ wluɛ ʋ -pee ka: -A -teɛ kein" ke -a -je 'mɛ 'de aa' -kɔi" -bo dɛ -tmʋʋa' -ta sie 'de -aa 'sʋ 'nynɩ ɛ. -Ta Nyɔsoa a mua -a 'blʋa -nɛ "nyɩa a, tɔ' -tɩ -o, ka nʋa dɛ 'dɔe 'mʋa- 'kamɔ -aa mu wlu "kpei i kpʋan' -a -je "i "srɛ dɩ nʋ.
15 'De -mɛ Raabʋ 'a -gbu" poɛ 'de 'blo -blaa "kwi -kwlɔ 'dei -pʋn", ɛ nɩa 'kan 'sʋ ʋa -kwle ɛ 'de 'blo -nɛ "jru. 'Sʋ ʋ nʋɛ "dbu ʋ "siɛ 'dʋɩ 'sɔɔn -nʋ i 'de 'blo 'de.
16 'Sʋ ʋ 'na ao muu 'de crʋ -nɩa 'nɩa- o fɔo, -bo ɛ nɩ 'kan 'de ʋ 'je nyʋ -a -pɔan ʋʋpʋ i "jri i "maa-, ao pa 'kwla 'demu 'de 'wɩ taan 'di -mɛ nyʋ -nʋ 'jea -kwlɔ de ji. -Bo -mɛ 'wlʋ 'e -jei", 'sʋ ao 'bɛɛ ao 'je -je 'ʋn "duo 'de -kɔɔ' de.
17 Israɛ -nyʋ 'sɔɔn -nʋ wluɛ ʋ -pee ka: Ka -jɛ a wlua a 'na -a cɛan -tie" -wɛe -a -srɛɛan wɔn 'je sʋn nʋ 'ka ka: 18 -Bo -a nyni 'de -aa 'blʋa 'di, a "duo jee" -saan 'ʋn -wɛe a 'jeɛ -po" -aa mua "i cɛn 'a i saan. -Wɛe a 'je aa' "bo o, a de o, aa' dedi ke -gbu" -sɔn nyʋ ke. 19 -Bo nyɔ deejrɔ' 'wlʋ 'de ao -gbu" 'di 'de ɔ 'je "kpae "si ɛ, ɔmɔ -nʋɛ' -wɛe ɔ 'mɛ, -a se dɛjrɛ' nʋ, ɔɔ' nmɔ se 'de 'ʋn "jru nɩ. -Bo ɛ se -mɛ nɩ-, -bo nyʋ po nyʋ -nɩa 'de aa' -gbu" 'di sʋn -pʋn" ɛ, -mɛ ɔɔ' 'mɛa nɩɛ 'de -a "jru. 20 'De -bo dɛ -a -tmʋa 'de -aa 'sʋ 'nynɩ -ɛ -pa' 'kwla poɛ "kpae ɛ, -mɛ wlu -a cɛan -tie" -wɛe -a -srɛɛan a, -a seeɛ wɔn 'jei 'bode. 21 -Wɛe ʋ -sɛ "kpei ka, ʋ 'na: 'Ɩn 'wɔɔn 'nɛ! Ka ao "sia 'nynɩ 'kamɔ ɛ 'je nɩ-! -Wɛe ʋ "taa nyʋ 'sɔɔn -nʋ "i ʋʋ mu, 'de ɛ "sri 'sʋ, ʋ je jee" -saan i san 'de -po" -nɛ "i. 22 Nyʋ 'sɔɔn -nʋ 'a -mu' 'de crʋɩ -nɩ "kpei, -nʋʋ 'e 'wɩ taan -nao, 'de ʋʋ nɩ 'sʋ nyʋ -mua' ʋʋpʋ i -pɔan' je de ji, ʋʋ -pɔn nyʋ 'sɔɔn je woi -pɔn -pɔn ʋʋ se ʋʋ 'je. 23 Nyʋ 'sɔɔn -nʋ 'a -bi" e "jru -cre crʋ -cɛn' Sudɛn. Ʋʋa' -jɛɛ Nunɩ 'a "ju Sosue', -po' ɔ dɩ "klein ʋʋ 'jea 'a "kuan -nao. 24 'De Sosue' -pee ʋʋ 'na: Tɔ' -tɩ -o, Nyɔsoa "nyɩ -aʋn 'blʋa -nɛ 'mɛ, dɛ-nʋɛ' mɛ -nɩ faʋn 'kpa nyʋ -wee' 'ʋn ɛ 'de -aa -tɩ' 'ʋn.