Sosue' "siiɛ Moisɩ -kɔo
1
-Jɛ Moisɩ Nyɔsoa 'a dbo nʋɩ 'mɛa 'sʋ, Nyɔsoa wluɛ 'de Nunɩ 'a "ju Sosue' -nɩa Moisɩ 'a kwa wɔi -tei 'dee- -pee: 2 'Ma dbo nʋɩ Moisɩ 'mɛɛ. Kaan ka la, -nmae dɩ -ɩn -ke 'blʋa -wee' 'je Sudɛn cɛn -wɛe ao 'je 'de 'blʋa -ɛɛ wlu cɛan -tie" ɛ 'jea Israɛ -nyʋ "nyɩɛ ɛ 'di pa. 3 Ka 'ɩn 'tmʋɛ 'de Moisɩ -pee ɛ, 'ɩn "nyɩ aopʋ 'blʋa 'a 'fɔ aoa' bɩ a mua 'di "sia a. 4 Aoa' 'blʋa a muɛ 'de -pɩɩɔn" blʋa "kpei 'wlʋa ɛ 'je Diban 'a crɩ ke "ni -gbuu klaa" nyɔ ɔ 'daa Eflatɩ jɛɛ, ɛ cɛn Ɛtɩ -blʋa 'di -tie" ɛ je Meditelane' jɛɛ 'de 'jrʋ 'a 'wlʋ 'ɩn fɔo. 5 'De -ma 'kmʋ nɩa" -wee' "klein 'ʋn ɛ, nyɔ jrɔ' se 'bɛɛ ɔ 'je -ʋn "juɛi i nyna, dɛ-nʋɛ' mɛ -nɩ 'ɩn ke -ma muɛ naa' ka 'ɩn ke Moisɩ naa, 'ɩn se -ʋn 'plʋ sʋn i poo i 'de 'ɩn se -ʋn 'bɔ i -ke. 6 -Duo" 'kpɩ 'ʋn, -kuu -ma -cɛ" i, dɛ-nʋɛ' -mɔ -ɔɔ mu 'blʋa -nɛ 'de 'blʋa -ɛɛ wlu 'ɩn cɛan -tie" 'ɩn 'jea ʋʋa' "bɛma "nyɩ 'di paa'. 7 -Duo" 'kpɩ 'ʋn -crɔɔn', -kuu tɔ' i -ɩn -je kɛ' 'ma dbo nʋɩ Moisɩ "nyɩa -ʋn wɔn 'je, -bo ɛɛ' -je "i -gbla" a, -bo kɔan ke dian o muɛ. -Bo ɛ nɩ 'kan -mɛ -ma muɛ dɛ 'ʋn 'wlʋa, 'de dɛ "o dɛ -ma mʋa nʋa' 'je -ʋn kwa 'wɔɔn-. 8 Kɛ' 'ɛ 'sbɛ -nɛ -ɩn -cɩɛn jee jee, nʋɛ 'dii 'jrʋ -gbao ke "maʋ ke, 'de -ɩn -jeɛ wɔn 'je, -wɛe ka ɛ 'crɩa -je 'kan nʋ, -bo ɛ nɩ 'kan a, 'de dɩ -ma nʋa 'je -ʋn kwa 'wɔɔn-, -wɛe -ɩn -je dɛ 'ʋn 'wlʋ. 9 'Ɩn se -ʋn -tmʋʋ 'dee-, 'ɩn se 'na -duo" 'kpɩ 'ʋn 'de -kuu -ma -cɛ" i -ke? Dɛjrɛ' 'ɛ faʋn 'bo -ʋn -nʋɛ', 'de dɛ 'bo -ʋn 'di i waa, dɛ-nʋɛ' 'mɔ Nyɔsoa -ma Kea 'ɩn ke -ma muɛ naa' 'de dɩ "klein -ma mʋa nʋa' 'di.Sosue' 'tmʋɛ Israɛ nyʋ 'a "jrukpɔ i -tenyʋ
10 Sosue' 'tmʋʋɛ Israɛ -nyʋ 'a "jrukpɔ i -tenyʋ, ɔ 'da ka: 11 Ao ple aoa' -kwlena' "kpei i -wɛe ao 'je wlu 'de 'blʋa -nɛ -wee' -pee ao 'je ka 'da: Ao nmae aoa' diidɩ, dɛ-nʋɛ', dɛ -mua' -ɛ -jɛa 'wɩ taan a, aoa muɛ Sudɛn -gbuu -nɛ cɛan', -wɛe ao 'je 'blʋa -ɛɛ wlu Nyɔsoa aoa' Kea cɛan -tie", -ɛ -jea aoa' dɛ 'kpa 'di pa.
12 Sosue' wluɛ 'blʋa 'a 'blowɔn Rubɛnɩ o, Gadɩ ke Manase 'a nɩ 'a tɔo -pee ka: 13 Ao po dɩ Moisɩ, Nyɔsoa 'a dbo nʋɩ 'tmʋa -kwlʋ o. Ɔ wluɛ aopʋ -pee ka, ɔ 'na: Nyɔsoa aoa' Kea "nyɩ aopʋ 'blʋa -nɛ 'mɛ, -wɛe ɛ "nyɩ aopʋ 'flɛʋn nɩa' 'de ɛ 'di. 14 Aoa' 'nynʋkpae o, "nynuu ke aoa' "nɔdɩ a muɛ 'nɔ Moisɩ "nyɩa aopʋ 'de Sudɛn -gbuu 'de sia', 'kaa ao nyʋ "klein -kua 'e 'dei -ɔ -bɛa tʋ -fʋan' a, aoa muɛ 'de aoa' dedi' 'a tʋ 'a nya kɔan' ao 'je ʋʋpʋ kwa wɔi -te', 15 'sʋ Nyɔsoa aoa' Kea 'je ʋʋpʋ 'flɛʋn nɩa' "nyɩ, ka ɛ "nyɩa aopʋ -ke ɛ, 'de ʋʋpʋ mɔ 'je 'de 'blʋa -ɛ -nyɩ" a ʋʋpʋ, -ɛ -jea ʋʋa' dɛ nɩ 'di pa. 'De -mɛ 'de 'sʋ aoa muɛ 'de aoa' 'blʋa 'di de mua', -wɛe ao 'je 'de 'blʋa Nyɔsoa 'a dbo nʋɩ Moisɩ "nyɩa aopʋ 'de Sudɛn -gbuu 'a 'jrʋ 'a 'wlʋʋ 'ɩn fɔo. 16 Ʋʋ -sɛ "kpei ka 'de Sosue' o, ʋʋ 'na: -Aa muɛ dɩ "klein -ɩn -sia" 'nynɩ 'de -a -pee -wee' nʋa', -ta "o -ta -ɩn dbo -aʋn -aa muɛ 'e mua'. 17 -Aa muɛ -ʋn wɔn 'jea 'de dɩ -wee' 'ʋn, ka -aa -jea Moisɩ wɔn ɔ. Nyɔsoa -ma Kea sie -ʋn o, ka ɛ sia Moisɩ o -ke ɛ. 18 Nyɔ -kuua "jru -ɔɔ mua 'cɛn 'kpaa 'de dɛ -ɩn -tmʋa 'a -tɩ' 'ʋn, 'de -ɔ sea -ʋn wɔn 'je i ɛ, ɔ 'je 'mɛ -o. Kɩɩn, -duo" 'kpɩ 'ʋn 'de -kuu tɔ' i.