Nyʋ ke dɩ -tea Nyɔsoa 'a -tea' a
27
Nyɔsoa wluɛ Moisɩ ‑pee ɛ 'na: 2 ‑ɩn ‑wlu 'de Israɛ -nyʋ ‑pee ‑ɩn ‑na: ‑Bo nyɔ jrɔ' cɛn wlu ‑tie'' ‑wɛe ɔ 'e nyɔ jrɔ' Nyɔsoa "nyɩ ɛ ka ɔ 'je ɛɛ' sɔɔn' po sʋn nʋ 'ka ka. 3 ‑Bo ɛ nɩ "junmɔu ‑ɔɔ ‑sʋn nɩa 'e kwla 'sɔɔn ke kwla ‑mɛɛo" 'nynɩ ɛ, ɔɔ' sɔɔn' nɩɛ "taman 'a kwla ‑mm", ka 'wɛi ‑nɩa 'e "nyɩɩna' 'a dɛwɔn nɩsʋn nɩa. 4 ‑Bo ɛ nɩ 'nynɔkpao ɛ ‑mɛ ʋʋa' sɔɔn' nɩɛ "taman 'a kwla taan. 5 ‑Bo ɛ nɩ nyɔ -ɔ -sʋn nɩ 'e mm" ke 'de kwla 'sɔɔn 'nynɩ ɛ, -bo ɛ nɩ "junmɔuju ‑ɔɔ ‑sʋn nɩa 'e ‑mm" ke 'e kwla 'sɔɔn 'nynɩ ɛ, ɔɔ' sɔɔn' nɩɛ "taman 'a kwla 'sɔɔn, ‑wɛe 'nynɔkpao ‑saan" -nɩ nɩɛ "taman ‑puue. 6 ‑Bo ɛ nɩ nyɔ -ɔ -sʋn nɩa 'e 'cʋ due' "kpei ‑ɛ ‑jɛa ‑sʋn ‑mm" ɛ nmɔuju a nɩɛ "taman ‑mm" ‑wɛe 'nynɔkpaoju 'a nɩ "taman taan. 7 -Bo ɛ nɩ nyɔ -ɔ -sʋn nɩa 'e ‑sʋn 'a kwla ‑mɛɛo" "kpei ‑ɛ mua nya, "junmɔu a ‑nɩ nɩɛ "taman -puue 'jɔ ‑mm", wɛe 'nynɔkpao a nɩɛ "taman ‑puue.8 ‑Bo nyɔ ‑cɛan' wlu ‑tie" se dɛ 'jea 'bɛɛ ‑wɛe ɔ 'je dɛ ‑ke ɛ ‑kooa "i 'mʋʋa‑ de to ɛ, nyɔ ɔ muɔ 'de 'sraa ‑sai "juɛi kpaa' ‑wɛe ka ɔɔ' dɛ 'je sʋn nɩa, 'sraa ‑sai 'je ɛɛ' sɔɔn' po 'kan.
9 ‑Bo ɛ nɩ nmi jrɛ' nyʋ bɛɛ ɔ 'je kwai ‑sa ɔ 'je Nyɔsoa "nyɩ ɛ, nyɔ ɔ muɛ ja ‑gbʋn 'a ka dɛ ‑teea kpɔi" nɩa. 10 Nyʋ se 'ɛ jrɛ' ‑kɔ o pooi, nyʋ se ɛɛ' ‑jɛ ‑nmɔa "jrii -jɛ ‑nynia "jrii ‑kɔ o pooi, 'de -jɛ ‑nynia "jrii ‑jɛ ‑nmɔa "jrii ‑kɔ o pooi, dɛ dɛ‑nʋɛ' ‑bo nyɔ "sii nmi jrɛ' dee jrɛ' ‑kɔ o ɛ, kɩ nɩa 'sɔɔn ɛ, -jɛ nyʋ "siia ‑kɔ o ke ‑jɛ nyʋ "siia ‑kɔ o ɩ ‑wee' a muɛ kpɔ "i ‑teea' 'de Nyɔsoa 'a -tɩ' 'ʋn.
11 ‑Bo nyɔ jrɔ' cɛn dɛ jrɛ' ɛ wlu ‑tie" 'de Nyɔsoa ‑pee ‑wɛe nmi ‑ɛ sea i ‑kwɛ see ɛ, nyɔ sea bɛɛ- ɔ 'jea 'sraa 'ʋn ‑saa ‑wɛe ɔ 'jeɛ to ɛ, nyɔ ɔ muɛ 'e 'sraa ‑sai "juɛi jaa', 12 ɔmɔ ‑ɔɔ muɛ ɛɛ' "i nmɔ sʋn ke ɛɛ' "i nynii sʋn ja ‑gbʋn 'a ‑ɔ ‑je ɛɛ' sɔɔn' po, ‑wɛe dɛ ɔ 'tmʋa mɛ nyɔ 'je ja ‑gbʋn. 13 ‑Bo nyɔ ‑ɔɔ toɛ ɛɛ' 'sraadɛ tu nɩɛ "i ɔ 'jeɛ ‑seie ɛ ‑mɛ 'de ‑mm" "kpei ɔɔ muɛ due' 'e ‑tea'.
14 ‑Bo nyɔ jrɔ' nɩɛ "i ɔ 'je ɔɔ' ‑gbu" Kea "nyɩ ɛ, 'sraa ‑sai klaa" a muɛ ɛɛ' nɩsʋn ja ‑gbʋn 'a, ‑wɛe ɛɛ' sɔɔn' ɔɔ mua poa' mɛ nyʋ ‑wee' 'je ja ‑gbʋn. 15 ‑Bo nyɔ ‑nyɩɛ'' Nyɔsoa nɩɛ "i ɔ 'jeɛ ‑seie ɛ, ‑mɛ 'de ɛɛ' sɔɔn' -nɩa ‑mm" "kpei ɛ ɔɔ mua 'e due' ‑tea', ‑wɛe ɛ 'je ɔɔ' dɛ 'kpa 'de ‑kɔo 'de.
16 ‑Bo nyɔ jrɔ' "nyɩ ɔɔ' kwla jrɛ' Nyɔsoa 'a, ɛɛ' sɔɔn' ke dɛ nyʋ 'jea' 'e do- 'a -tisun mua "i ‑kooa', "taman kwla ‑mm" ɛ nɩ ookɩa 'a "cio 'kmɛ taan. 17 ‑Bo ɔ to ɔɔ' ‑kle' 'de ‑sʋn 'a kwla ‑mm" ‑kwle ‑kɔ' 'di ɛ, ‑mɛ ɛɛ' sɔɔn' ‑nɛ mɛ nyʋ 'je ja ‑gbʋn. 18 'Kaa ‑bo ɔ "nyɩ ɔɔ' ‑kle' Nyɔsoa ‑mɛ ‑sʋn kwla ‑mm" 'a ‑kwle ‑kɔ' 'wlʋ o ‑jei", 'sraa ‑sai 'a muɛ ‑sʋn ‑siae' ‑sʋn kwla ‑mm" 'a ‑kwle ‑kɔ' dee "juɛi ja ‑gbʋn 'a ‑wɛe ɔ 'je ɛɛ' sɔɔn' po, ɔ bɛɛ' ɔ 'e ɛɛ sɔɔn' "kpei cɛn.
19 ‑Bo nyɔ -nyɩa" ɔɔ' ‑kle' Kea nɩɛ "i ɔ 'jeɛ ‑seie ɛ, ɔɔ muɛ ‑mm" due' "kpei ‑tea' 'de ɛɛ' sɔɔn' "kpei ‑wɛe ɔ 'je ɔɔ' ‑kle' 'ʋn "duo 'de ‑kɔ o de. 20 ‑Bo ɔ se ɔɔ' ‑kle' ‑seie ‑wɛe ɔ 'jeɛ ple 'de nyɔ jrɔ' 'kwa a ‑mɛ ɔ seɛ bɛɛ- ɔ 'jeɛ ‑seie 'bode, 21 -mɛ ɛɛ' 'kwla tu, nɔ" ‑ɛɛ 'di nyʋ 'jea ‑sʋn 'a kwla ‑mm" 'a ‑kwle ‑kɔ' ‑tu" ɛ, nyɔ ɔ muɛ Nyɔsoa "nyɩ 'a ka dɛ nyʋ sea sʋn ‑pʋn" ‑te i 'bo de ɛ, ɛɛ' muɛ 'sraa ‑sai 'a dɛ 'kpaa' 'bode. 22 ‑Bo nyɔ jrɔ' -tɩn' 'kwla -wɛe ɔ "nyɩɛ Nyɔsoa, 'de ‑mɛ ɛ se ɔɔ' 'kɛn nɩ ɛ, 23 'sraa ‑sai 'a muɛ ‑sɔn ‑siae' ‑wɛe nyʋ 'jea 'blʋa 'a ‑kwle ‑kɔ' ‑tu" ja ‑gbʋn 'a ‑wɛe ɔ 'je ɛɛ' sɔɔn' po. Nyɔ -toɛ 'mʋa a muɛ ɛɛ' sɔɔn' -nɩa 'mʋa toa' 'de 'wɩ ‑nɩa 'mʋʋa‑ 'di dɛ dɛ‑nʋɛ' mɛ ‑nɩ ɛ ‑teɛ Nyɔsoa 'a ‑tea'. 24 'Blʋa 'a ‑kwle ‑kɔ' ɔ nɔ" ɛ, ɛɛ muɛ nyɔ ‑ɔɔ 'kɛn ɛ nɩa see 'kwa de ji 'a. 25 Ɛɛ' sɔɔn' a muɛ pooa' ka 'wɛi ‑nɩa "nyɩɩna' nɩa, ɛɛ' due' nɩɛ ‑kerab 'a kwla 'sɔɔn.
26 'Kaa ‑mɛ nyɔ jrɔ' seɛ bɛɛ- ɔ 'je ɔɔ' nɔ" dɩ 'a "i ‑sa ‑nynuu Nyɔsoa kwa ‑te, dɛ dɛ‑nʋɛ' ‑bo ɛ nɩ nɔ" dɩ klae" ke mɩɩ" 'a "i ‑sa ‑nynuu ɛ ‑mɛ ɛ nɩɛ Nyɔsoa 'a dɩ ‑o se. 27 ‑Bo ɛ nɩ nmi ‑sea i ‑kwɛ ɛɛ' "i ‑sa ‑ju ɛ, ‑mɛ ɛɛ' jei a muɛ ɛɛ' sɔɔn' nyʋ poa, ‑mm" due' "kpei ‑tea' ‑wɛe ɔ 'je 'ɛ ‑seie, ‑bo ɛ se ‑seie ɛ ‑mɛ 'sraa -sai a muɛ plea', ɛɛ' sɔɔn' ‑pooa 'mɛ nyʋ 'je 'ɛ 'ʋn ‑tɩɩn.
28 'De ɛ ‑mɛ 'de ɛ, -bo nyɔ -te' dɛ deejrɛ' Nyɔsoa 'a -tea' a: ''ko nyiɔ, nmi ‑ɛ, 'dewlɛ ɔɔ' 'kwla 'a -ɛ -nɩa ɔɔ' 'kɛn ɛ, nyʋ seɛ bɛɛ- ɔ 'je ɛ ple 'dewlɛ ɔ 'je ɛ ‑seie. Dɛ dɛ‑nʋɛ' dɛ "klein ‑tea Nyɔsoa 'a -tea' ‑kwɛ i 'pepe, ɛ nɩɛ Nyɔsoa 'a dɛ ‑o. 29 -Bo ɛ nɩ nyɔ nyʋ -tea kpɔ "i 'de Nyɔsoa -tɩ' 'ʋn ɛ, nyʋ seɛ bɛɛ- nyʋ 'je ɔ ‑seie, nyʋ 'je ɔ dba ‑o.
30 Dɛ 'ɛ ‑puue ‑nɛ ‑ɛ ‑wlʋa 'e 'blʋ 'ʋn ke -ɛ ‑wlʋa 'e tu jai Nyɔsoa ‑bleɛ: Ɛ ‑teeɛ kpɔi" 'de ɛɛ' ‑tɩ' 'ʋn. 31 ‑Bo nyɔ jrɔ' nɩɛ "i ɔ 'je dɛ ɛɛ' ‑puue ‑nɛ ‑seie ɛ, ɔɔ muɛ ɛɛ' sɔɔn', ‑mm" due' "kpei ‑tu" 'a -wɛe ɔ 'jeɛ -seie.
32 Nɔ" dɩ klae" ke mɩɩ" ‑wee' nyɔ ɔ -tui" ɩa' ‑puue ‑nɛ "i juo 'na, ‑mɩ ‑teeɛ kpɔi" 'de Nyɔsoa 'a -tɩ' 'ʋn. 33 Ɛɛ' jei se jɛ ‑nynai" ke jɛ ‑nmɔai" "kpei i ‑seea i, ‑wɛe nyʋ seɛ ‑kɔ o poo i, ‑bo nyʋ pooɛ ‑kɔ o mɔɔ' ‑cɛ" 'de ɛ nmi 'sɔɔn ‑nɩ, jɛ nyʋ pooa ‑kɔ o ke-, ‑jɛ pooɛ ‑kɔ o ke ɩ ‑wee' "klein ‑teeɛ kpɔi" ‑wɛe nyʋ seɛ bɛɛ- ɔ 'jɩ ‑seie.
34 Kɛ' Nyɔsoa "nyɩa Moisɩ 'de sinai crʋ "kpei ‑wɛe ɔ bla 'de Israɛ nyʋ ‑pee ɩ mɩ ‑nao.