Kɔɩn- "juɛi -gbɛɛa' 'a ‑kao
20
Kea 'wluɛ Moisɩ ‑pee ka: 2 -Ɩn -tmʋʋ' Israɛ ‑kɔʋn: ‑Bo Israɛ i jrɔ', 'dewlɛ 'dʋɩ ‑ɔ ‑ji a 'de aoa' 'blʋa 'di ‑tea' ‑saa ɔɔ' "ju 'sraa 'ʋn ‑wɛe ɔ 'jeɔ Molɔkɩ "nyɩ ɛ ‑mɛ 'mɛɛa mɛ ‑nɩ ɛɛ' ‑kao, nyʋ a muɔ "soi pooa'. 3 ‑Wɛe 'mɔ -ke ɛ 'ma muɛ jia' ‑wɛe ɩn 'jeɔ 'de ɔɔ' 'cɛ "klu ‑sa, dɛ‑nʋɛ' ɔ "nyɩ ɔɔ' "ju Molɔkɩ, ‑wɛe ɔ kpʋʋ 'ma ‑gbu" ‑kwɛai -flɛn" 'de ɔ blaa 'ma 'nynɩ ‑kwɛai 'blʋɔ-. 4 ‑Bo nyʋ ‑wi" jɛɛ "jri "kpei i ‑wɛe ʋʋ seɛ "i nɩ ʋʋ 'jeɛ to ka ɔ "nyɩ ɔɔ' "ju Molɔkɩ ɛ, 'de ʋʋ seɔ 'dba a, 5 ‑mɛ 'mɔ ‑ɔɔ mua "ju ‑nɩa mua ke ɔɔ' ‑gbu" ‑sɔn nyʋ "kpei jia', ‑wɛe ɔmɔ o nyʋ "klein -ʋʋa mua 'de molɔkɩ o, 'ɩn 'je ʋʋ 'de ‑sa.6 -Bo nyɔ jrɔ' mu ɔɔ' -cɛ" ɛ -tɩ i -tea' 'de nyɔ -ke 'mɛ nyʋ a wlʋa o ka jrɔ' ka mɔ 'de ɛ, ‑kɩɩ -gbai" "juɛi -gbɛɛa' -ɔ, 'ma muɛ jia' ɔɔ -tɩ' 'ʋn ‑wɛe 'ɩn 'jeɔ 'de ʋʋa' 'cɛ "klu ‑sa. 7 Ao nʋɛ ao 'je 'pepe nɩ 'de ao 'jeɛ 'ʋn sie. Dɛ dɛ‑nʋɛ' ɛmɛ ‑nɩ 'mɔ ‑nɩ Nyɔsoa aoa' Kea.
8 Aoa' muɛ 'ma kɛ' wɔn 'jea' 'de ka ɩ "sia 'nynɩ ao 'je 'kan na-. 'Mɔ ‑nɩ Nyɔsoa ‑ɔɔ nʋɛ ‑wɛe ao ‑kwɛ "i.
9 Nyɔ "oo nyɔ ‑ɔ po ɔ "bo ke ɔ de ‑soo' o ɛ, nyʋ 'jeɔ 'dba: ‑Jɛ ɔ poa ɔ "bo ke ɔ de ‑soo' o ɛ ‑mɛ ɔɔ' 'mɛɛa nɩɛ 'de ɔɔ' ‑cɛ" "jru.
10 ‑Bo nyɔ kpʋʋn nyɔ jrɔ' nyʋ 'a nynɔ "kpei ɛ, "junmɔu ke 'nynɔnkpao ‑nɩa 'mʋʋa‑ nyɔ 'je ʋʋpʋ 'dba ‑o.
11 ‑Bo nyɔ jrɔ' ke ɔɔ' "bo 'a 'nynɔ ‑te ‑tadue i ɛ, ‑mɛ ɔ ‑sa ɔ "bo "ku "kpei: Nyʋ 'sɔɔn ‑nɩa 'mʋʋa‑ ʋʋ 'je 'mɛ ‑o, ʋʋa' 'mɛɛa nɩɛ 'de ʋʋa' ‑cɛ" "jru.
12 ‑Bo nyɔ jrɔ' ke ɔɔ' "ju 'a 'nynɔ ‑te ‑tadue i ɛ, ka ʋʋ nɩa 'sɔɔn nyʋ 'je ʋʋpʋ 'dba, dɛ ʋʋ nʋa ɛ nɩɛ ‑tɩn ‑tɩ ‑o ʋʋa' 'mɛɛa nɩɛ 'de ʋʋa' ‑cɛ" "jru.
13 ‑Bo "junmɔu ke ɔɔ' ‑ponmɔu ‑te ‑tadue i ka nyɔ ke 'nynɔkpao 'a ‑tea' ‑tadue i ɛ, ʋʋ nʋɛ dɩ ‑sea' ‑cɛi" nʋʋ ka nɩ-, nyʋ 'je ʋʋpʋ 'dba ‑o ‑wɛe ʋʋa' dɛsaʋn 'a ‑kao nɩɛ 'de ʋʋpʋ "jru.
14 ‑Bo "junmɔu "duo "ju ke de 'ʋn ‑wɛe ʋʋ 'jeɔ "bli "ti ɛ, ‑mɛ ‑tɩn ‑tɩ ‑o, nyɔ ɔ muɛ ʋʋpʋ "jri pooa' ‑wɛe ɛ je 'kan nɩ 'de ‑tɩn ‑tɩ je 'de aopʋ "klu nɩ-.
15 ‑Bo "junmɔu ke nmi ‑te ‑tadue i ɛ, nyʋ 'jeɔ 'dba ‑wɛe nyɔ 'e nmi ‑nɛ 'dba ‑ke. 16 'Kamɔ ɛ nɩ ‑ke ‑bo 'nynɔkpao ke nmi ‑te -tadue i ɛ nyɔ 'je ʋʋpʋ 'dba, ka ʋʋ nɩa 'sɔɔn ɛ ʋʋa' dɛsaʋn 'a ‑kao nɩɛ 'de ʋʋpʋ "jru.
17 ‑Bo "junmɔu jrɔ' "duo ɔ "bo 'dewlɛ ɔ de 'a 'nynɔkpaoju 'ʋn ‑wɛe ʋ 'je ɔɔ' 'nynɔ nɩɛ, 'de ʋʋ 'je ‑ta ‑due i ‑teɛ, ‑mɛ ‑tɩn ‑tɩ ‑o, 'de ʋʋpʋ 'a 'cɛ "juɛi 'bo nyɔ 'je ʋʋpʋ 'a 'cɛ "klu -sa, "junmɔu ‑ke ɔɔ' dedi' 'nynɔkpao ‑tea ‑tadue i 'mʋʋa‑ ɔɔ' dɛsaʋn 'a ‑kao a muɔ "kpei jiia'. 18 ‑Bo "junmɔu ke 'nynɔkpao ‑te ‑tadue i ‑mɛ ʋ toɛ kwa "jɛi ɛ, ka ʋʋ nɩa 'sɔɔn ɛ nyɔ 'je ʋʋpʋ 'de ʋʋa' 'cɛ "klu ‑sa, 'de ʋʋa' baa' nmɔɔ' 'wlʋ na' 'jea 'a ‑tɩ' 'ʋn. 19 ‑Ɩn ‑ke ‑ma de 'a dedi 'dewlɛ ‑mɔ "bo 'a dedi se ‑tadue i ‑te i. ‑Bo nyɔ jrɔ' ke ɔɔ' dedi' 'nynɔkpao ‑te ‑tadue i ɛ, ka ʋʋpʋ nɩa 'sɔɔn ɛɛ' dɛsaʋn 'a ‑kao nɩɛ 'de ʋʋpʋ "jru. 20 ‑Bo nyɔ jrɔ' ke ɔ "bo 'a "dei 'a 'nynɔ ‑te ‑tadue i ɛ, ‑mɛ ɔ ‑sa ɔ "bo 'a dedi "ku "kpei, ka ʋʋpʋ nɩa 'sɔɔn ʋʋa' dɛsaʋn 'a ‑kao nɩɛ ʋʋpʋ "kpei ʋʋpʋ a muɛ 'mɛɛa ʋʋ se "nynuu 'ble i. 21 ‑Bo nyɔ jrɔ' "duo ɔɔ' dedi 'a 'nynɔ 'ʋn ‑wɛe ʋ 'jeɔ "bli ti" ɛ, ɔ ‑sa ɔɔ' "dei "ku "kpei, ʋ se "nynuu 'blei.
22 Aoa' 'je 'ma kɛ' ke 'ma 'srɩn wɔn 'je -o, ‑wɛe ka ɩ "sia 'nynɩ ao 'je 'kan nʋ. ‑Bo ɛ nɩ 'kan a ‑mɛ 'blʋa ‑ɛɛ 'di 'ma kpa aopʋ ‑wɛe ao 'je "ti sea aopʋ wɔn ‑sa i. 23 Ao se 'blʋɩ 'ma nʋa i 'de aopʋ "juɛi 'a kplɩn 'de bla i, dɛ‑nʋɛ' dɩ "klein ʋʋ nʋa 'mʋʋa‑ 'a ‑tɩ' 'ʋn mɛ ‑tɩ ʋʋa nyaa 'mii. 24 Ɛmɛ ‑ɛɛ ‑tɩ' 'ɩn 'tmʋʋ aopʋ ‑wɛe 'ɩn 'na: Aopʋ ‑a mua ʋʋa' 'blʋa 'blea, 'ma muɛ aopʋ "nyɩa ɛ 'je aoa' dɛ nɩ-, ɛ nɩɛ 'blʋa ‑ɛ 'di 'nɔnɔ ke dʋ 'a 'cna ‑gbuu a ‑sia'. 'Mɔ ‑nɩ Nyɔsoa aoa' Kea, ‑ɔ ‑tea aopʋ kpɔi" 'de 'blʋa "klein ‑sia 'demu "klu. 25 Ɛmɛ ‑ɛɛ ‑tɩ nmi ‑jɩ ‑kwɛai o ‑jɩ sea i ‑kwɛ o, nʋʋɛ ‑jɩ ‑kwɛai o, ‑jɩ sea i ‑kwɛ o ao ‑sɩɩ' "kpei i, ‑wɛe ao 'bo aoa' ‑cɛ" ‑flɛn" kpʋʋn ɛ 'de nmi ke nʋʋɩ ke dɩ "klein ‑ɩa cniia -pɛɛ' 'de 'ɩn ‑tea kpɔ "i ‑wɛe 'ɩn 'na i se i ‑kwɛ 'ɛ ‑tɩ' 'ʋn. 26 Aoa' muɛ i ‑kwɛa 'de 'ma ‑tɩ' 'ʋn, dɛ dɛ‑nʋɛ' 'mɔ Nyɔsoa 'ɩn ‑kwɛ i ‑wɛe 'ɩn ‑teeɛ aopʋ kpɔi" 'de 'blʋa -wee' "klein "klu ‑wɛe ao 'je 'ma ‑tea' ‑te.
27 "Junmɔu 'dewlɛ 'nynɔkpao ‑ɔɔ mua 'mɛ nyʋ o wlua' 'de ‑ɔɔ mua de ‑sia', nyʋ 'je "sou 'a 'sʋ 'a 'sʋ nʋ ‑wɛe ʋʋ 'jeɔ 'dba, ʋʋa' 'sʋ 'a 'sʋ mɔ ʋʋa' dɛsaʋn 'a ‑kao a mua "jru nɩa'.