"Junmɔu ke 'nynɔkpao 'a ‑tadue i ‑tea' ‑ɛ -sea "inmɔ ɛ
18
Nyɔsoa wluɛ Moisɩ ‑pee ɛ 'na: 2 ‑ɩn ‑wlu 'de Israɛ nyʋ ‑pee ‑ɩn ‑je ka 'da: 'Mɔ ‑nɩ Nyɔsoa aoa' Kea. 3 Ao 'bo ka ɩa nʋʋa 'de Esipʋ nʋʋɛ ‑ta ao "tia 'deɛ, 'de ɛ 'bo ka ɛɛ nʋʋa 'de Kanaa ‑ta 'ma kpa aopʋ ɛ. Ao se ɩa' 'blʋa tu 'a kplɩn 'debla i. 4 Ɩ nɩɛ 'ma kɛ' -o aoa mʋɩ wɔn 'jea ‑wɛe ao 'je 'ma 'srɩn 'a ‑tɩ' ‑tu", 'mɔ -nɩ Nyɔsoa aoa' Kea.5 Aoa muɛ 'ma 'srɩn ke 'ma kɛ' wɔn 'jea. Nyɔ ɔ ‑ɔɔ mua kɩ "sia 'nynɩ nʋa' ɩa muɛ nʋa' ɔ 'je 'kmu nɩ-. 'Mɔ ‑nɩ Nyɔsoa.
6 Aoa' deejrɔ' ke ɔɔ' dedi' 'nynɔkpao se ‑tadue ‑te i. Mɔ ‑nɩ Nyɔsoa.
7 ‑Ɩn ‑ke ‑ɩn de se ‑tadue ‑tei -wɛe ɛ se ‑ɩn "bo "ku "kpei ‑sai. Dɛ nʋɛ' mɛ ‑nɩ ʋ nɩɛ ‑ɩn de ‑o ‑ɩn se ʋ "kukpei ‑sai.
8 ‑Ɩn ‑ke ‑ma "bo 'a 'nynɔ jrɔ' se ‑tadue i ‑te i, ɛ nɩɛ ‑ma "bo "ku "kpei ‑saa' ‑o. 9 ‑Ɩn ‑ke ‑ma dedi' 'nynɔkpao se ‑tadue i ‑tei, ‑bo ʋ nɩ ‑ma "bo 'a "ju o 'dewlɛ ‑ma de 'a "ju o, ‑ʋ -wlʋʋa 'de ‑gbu" ‑sɔn o 'dewlɛ -ʋ -wlʋʋa kpɩɩn‑ ‑wɛe ‑ʋ jia 'de ‑gbu" ‑sɔn o.
10 ‑Ɩn ‑ke ‑ma "junmɔuju 'dewlɛ 'nynɔkpaoju 'a "ju se ‑tadue i ‑tei, ‑ma ‑sa ‑ma ‑cɛ" "ku "kpei. 11 ‑Ɩn ‑ke ‑ma "bo 'a nynɔ ɔ' 'nynɔkpao ju se ‑tadue i ‑tei, ‑bo ɛ nɩ ‑ma "bo 'a 'nynɔkpaoju ɛ, dɛ‑nʋɛ' ʋ nɩɛ ‑ma dedi' 'nynɔkpao.
12 ‑Ɩn ‑ke ‑ma "bo 'a de 'a "ju 'nynɔkpao se ‑tadue ‑te i, ʋ nɩɛ ‑ma "bo 'a dedi' ‑o, 13 -ɩn -ke ‑ma de 'a dedi' se -tadue i -te i dɛ‑nʋɛ' ʋ nɩɛ, ‑ma de 'a dedi' ‑o.
14 ‑Ɩn ‑ke ‑ma "bo 'a dedi' 'a 'nynɔ se ‑tadue i ‑te i ‑wɛe ɛ seɔ "ku "kpei ‑sai dɛ dɛ‑nʋɛ' ʋ nɩɛ ‑ma "bo 'a dedi' 'a 'nynɔ ‑o.
15 ‑Ɩn ‑ke ‑ma "ju 'a 'nynɔ se ‑tadue i ‑te i, ʋ nɩɛ ‑ma "ju 'a 'nynɔ ‑o, ‑ɩn seɔ "ku "kpei ‑sai.
16 ‑Ɩn ‑ke ‑ma dedi' nmɔu 'a 'nynɔ se ‑tadue i ‑te i mɔɔ' ‑cɛ", ‑ma dedi' -o -boɔ "ku "kpei -saa'.
17 ‑Ɩn ‑ke 'nynɔkpao ke ʋʋa' 'nynɔkpaoju o, ʋʋa' "naju- -nɩa 'nynɔkpao 'dewlɛ "junmɔuju 'a "ju, se ‑tadue i ‑te i, dɛ ‑nʋɛ ʋʋ nɩɛ -ma dedi' ‑o, ɛ nɩɛ ‑tɩn' ‑tɩ klaa" ‑o.
18 ‑Ɩn se ‑ma 'nynɔ ɔ' "dei 'ʋn "duo i ʋ se ‑ma 'nynɔ nɩ i nɔ" ‑ɛɛ 'di ‑ma 'nynɔ nɩa 'kmʋ ɛ, ‑ma muɛ ‑cnuɛn" "blo ‑saa' 'de ʋʋpʋ 'nynɩ.
19 Nɔ" ‑ɛɛ 'di 'nynɔkpao toa kwa "jɛi ‑wɛe ʋ sea i ‑kwɛɛ ‑ɩn ke ʋ se ‑tadue i ‑te i.
20 ‑Ɩn ‑ke Israɛ -i jrɔ' ɔ 'nynɔ se ‑tadue i ‑tei ‑wɛe ɛ je ‑ʋn ‑flɛn" kpʋʋ-.
21 ‑Ɩn se ‑ma "ju to i ʋʋ seɔ 'sraa 'ʋn ‑saa i 'de Molɔkɩa ‑pee, ‑ɩn se ‑ma Kea "ku "kpei -sa i. 'Mɔ ‑nɩ Nyɔsoa -ma Kea.
22 ‑Ɩn se "jumɔu o 'pɛn i ka nyɔ ke 'nynɔkpao 'a ‑tea ‑tadue i, ɛ nɩɛ seaɩn- ‑tɩ ‑o.
23 ‑Ɩn ‑ke nmi jrɛ' se ‑tadue i ‑te i ‑wɛe ɛ se ‑ʋn ‑flɛn" kpʋʋ i. 'Nynɔkpao ke nmi se ‑tadue i ‑te i, dɩ ‑sea' nʋ ka nɩ 'a ‑cɛ "i nʋa' ‑o.
24 Ao 'bo ɩa dɩ tu nʋʋɛ ‑wɛe ɩ 'bo aopʋ ‑flɛn" kpʋʋɛ, ɩa' nʋʋa' mɛ dɛ‑nʋɛ' ‑wɛe 'blʋa 'ma nʋa i 'de aopʋ "juɛi ɛ ‑wɛe ʋʋ kpʋʋ ʋʋa ‑cɛ" ‑flɛn". 25 Ɛɛ kpʋʋɛ 'blʋa ‑wee' ‑flɛn", 'ma muɛ ɛɛ' ‑kao ʋʋpʋ "kpei jaa' ‑wɛe 'blʋa 'je ɛɛ' 'cɛ wɔn ‑sa.
26 'De aopʋ Israɛ -nyʋ mɔ ɛ, aoa' 'je 'ma kɛ' ke 'ma 'srɩn wɔn, Israɛ i o 'dʋɩ ‑tia" 'de aopʋ "klu se dɩ ‑blea ‑tɩn 'mʋʋa‑ 'ɩa 'dɛ "o dɛjrɛ' nʋɩ. 27 Dɛ‑nʋɛ' ɩa' dɩ tu mɛ nyʋ ‑tia" 'de 'blʋa ‑nɩa 'mʋʋa "kpei 'de aopʋ "juɛi nʋ, ‑wɛe -ɩ -kpʋʋ kanaa 'blʋa ‑flɛn". 28 Ao 'sroo ‑kwlii' ‑wɛe ‑bo ao kpʋʋɛ ‑flɛn" ɛ je aopʋ wɔn -sa ‑ke ka ɛ ‑sa 'cɛ ‑nɩa aopʋ "juɛi wɔn ɛ. 29 Dɛ‑nʋɛ' nyʋ ‑nʋʋa ‑tɩn' dɩ ‑nɩa 'mʋʋa‑ ‑cɛi" nyʋ 'jeɔ 'de ɔɔ' 'cɛ "klu ‑sa.
30 'De ɛɛ' ‑tɩ' 'ʋn ɛ aoa muɛ 'ma kɛ' wɔn 'jea ‑wɛe ao se ‑tɩn' dɩ ‑ɩa nʋʋa 'demu ‑mɛ aopʋ se 'e ji ke nʋɩ, ao se aoa' ‑cɛ" ‑flɛn" kpʋʋi 'de ɩa' ‑tɩ' 'ʋn, 'mɔ ‑nɩ Nyɔsoa aoa' Kea.