Nmi 'a nmɔɔ' kɛ'
17
Nyɔsoa wluɛ 'e Moisɩ ‑pee ka ɛ 'na: 2 ‑Ɩn ‑wlu 'de Aarɔn o ɔɔ' "nynuu ke Israɛ -nyʋ ‑pee ‑ɩn ‑na: kɛ' Nyɔsoa bla ɩ ka: 3 ‑Bo Israɛ -i jrɔ' 'wlu 'e Israɛ -nyʋ "klu ‑wɛe ɔ 'je bli' o 'blae 'dewlɛ -faan" gbao -pliɔn' cɛn 'de ‑ta ʋʋa ‑kwlea, "ko 'de dɛkpɔ 'de ɛ-, 4 ‑wɛe ɔ seɛ 'e ‑ta nyʋ ke Nyɔsoa 'a ‑gbʋʋan "i 'a paana' ja 'de ‑ɔ seɛ Nyɔsoa "nyɩ 'de -ta -kwɛa i ka 'sraa dɛ nɩa, -bo ɔ se 'kan nʋɛ nyʋ 'je ɛɛ' nmɔ ɔ' ‑tɩ' ɔ i ‑tee' ‑o: Dɛ dɛ‑nʋɛ' mɛ ‑nɩ ɔ 'wla nmɔ i ɔ 'je i nʋɛ ‑o ɔ 'je ɔɔ' 'cɛ ‑wi" "klu 'wlʋ. 5 'De ɛ je 'kan nɩ-, ‑bo ʋʋ 'je ʋʋa 'sraa ‑sa 'de 'kwladii 'de ɛ, Israɛ -nyʋ 'je dɛ ʋʋ 'jea 'sraa 'ʋn ‑saa 'sraa ‑sai ja-, 'de ‑ta nyʋ ke Nyɔsoa a ‑gbʋʋan "i "juɛi ja, ʋʋ 'jeɛ Nyɔsoa "nyɩ, wɛe ʋʋ 'jeɛ nyʋ ke Nyɔsoa 'a dbɛɛdɛ 'ɛ 'sraa 'ʋn ‑saa. 6 'Sraa ‑sai a muɛ ɛɛ' nmɔ "kpa ‑ɛ "kpei nyɔ ɔ ‑saa' 'sraa nyɔ "nyɩa Nyɔsoa ‑gbaa', 'de ‑ta nyʋ ke Nyɔsoa a ‑gbʋʋan "i paana', ‑wɛe ɔ 'je ɛɛ' 'cna "jri po 'de ɛɛ' 'nʋ 'je Nyɔsoa 'a pɛe jajaa-. 7 -Bo ɛ nɩ 'kan -mɛ Israɛ nyʋ se kɔin ‑ɩ ‑maa ‑ɩ ‑kɔ' ‑faan" ‑gbao ʋʋa -gbɛa "juɛi 'de ɛ 'sraa dɛ "nyɩ i "pɩ, ɛ nɩɛ kɛ' ‑o 'de "nɔ "oo nɔ" ‑wee' 'di 'de aoa' "ji 'a "ji ‑tɩ' 'a 'ʋn.8 ‑Ɩn ‑wlu ka 'de ʋʋ ‑pee kewlɛ' ‑ɩn ‑na: ‑Bo Israɛ -i jrɔ' 'dewlɛ dʋɩ ‑nɩa 'de ao "klu jrɔ' nɩɛ "i ɔ 'je 'sraa ‑ɛ ‑wee' nɛ dia ɛ ke 'sraa jrɛ' -saa, 9 ‑wɛe ɔ se dɛ ɔ ‑saa 'sraa 'ʋn 'de ‑ta nyʋ ke Nyɔsoa 'a -gbʋʋan "i paana' ja a, ‑wɛe ɔ 'jeɛ Nyɔsoa "nyɩ ɛ, nyɔ 'jeɔ ɔɔ' 'cɛ "klu -sao.
10 ‑Bo Israɛ -i jrɔ' 'dewlɛ 'dʋɩ jrɔ' ‑ɔ ‑tɩa" 'de aopʋ "klu ɔ di nmɔ ɛ, 'ma muɔ "kpei "bia ‑wɛe 'ɩn 'jeɔ 'de aopʋ "klu ‑sa. 11 Dɛ dɛ‑nʋɛ', mɛ ‑nɩ 'de nmɔ 'ʋn 'bo dɛ "klein Nyɔsoa nʋa 'a 'kmʋnɩa nɩ-, 'de 'mɔ ɛ, 'ɩn "nyɩɛ aopʋ 'mɛ 'de "kpa "kpei ‑wɛe ɛ 'je aoa' 'kmʋ 'a dɛsaʋn 'a ‑kwɛdɛ nɩ-. Dɛɛ ‑tɩ nmɔɔ ‑kwɛa' nyiɔɔ' dɛsaʋn ɛ, ɛmɛ ‑nɩ 'kmʋnɩa' ‑nɩ 'de ɛ 'ʋn. 12 Ɛmɛ ‑tɩ 'ɩn wlu 'de Israɛ -nyʋ ‑pee 'ɩn 'na aoa' jrɔ' se nmɔ dii, ‑wɛe 'dʋɩ ‑tia" 'de ao "klu ‑mɔ seɛ dii mɔ "pɩ.
13 ‑Bo Israɛ ‑i jrɔ' 'dewlɛ 'dʋɩ ‑tia" 'de aopʋ "klu ‑wɛe ɔ 'e 'kwla paa' mu ‑wɛe ɔ 'je nmi jrɛ' 'dewlɛ nʋʋɛ jrɛ' kpʋn ɔ bɛɛ' ɔ 'jea diɛ, ‑mɛ ɔ 'wla ɛɛ' nmɔ i 'de 'blʋɔ ‑wɛe ɔ 'jeɛ 'blʋ "kpei ‑cri". 14 Dɛ dɛ‑nʋɛ' ɛ mɛ ‑nɩ dɛ "klein Nyɔsoa nʋa ‑bo ɛ nɩ 'kmʋ ke ɛ mɛ nmɔ mɛ -nɩ ɛɛ' 'kmʋ. Ɛmɛ ‑tɩ 'ɩn wlu 'de Israɛ -nyʋ ‑pee 'ɩn 'na: Ao 'bo dɛ "klein Nyɔsoa nʋa 'a nmɔ diiɛ, dɛ dɛ‑nʋɛ' ɛɛ' nmɔ mɛ ‑nɩ ɛɛ' 'kmʋ. Nyɔ "oo nyɔ ‑ɔɔ muɛ diia' nyʋ 'jeɔ 'e nyʋ "klu ‑sa.