Kɛ' ‑blaa 'de 'wɛ -nɩa 'de nyɔ ku -pʋn" 'a ‑tɩ' 'ʋn ɛ
14
Nyɔsoa wlu' 'de Moisɩ ‑pee ka ɛ 'na: 2 kɛ' ‑blaa 'de nyɔ -ɔɔ ku -pʋn" 'wɛ nɩa 'a i ‑kwɛ ‑tɩ 'ʋn -sɔntɩ nyɔ ɔ muɔ 'de 'sraa ‑sai kpaa' ɛ ka, 3 ɔɔ muɔ 'de ‑ta nyʋ a ‑kwlea ‑saa', ‑wɛe ɔ 'jeɔ ja ‑gbʋn. ‑Bo 'wɛ ‑nɩa ɔ ku ‑pʋn" 'bɔ ɛ, 4 'Sraa ‑sai a muɛ ka nʋa', 'de ɔɔ' i ‑kwɛ ‑tɩ 'ʋn, ɔ ja nawɛ 'sɔɔn, ‑ɩ ‑nɩa 'kmʋ ‑wɛe ‑ɩ ‑kwɛai ɛ, sɛɛtrɩa 'a tie due', jee" jɔ ‑ɛɛ ‑sain' 'a kpʋan 'e nyʋ "jri 'dei ke isɔpʋb 'a 'dao- due' ke-. 5 Ɔɔ muɛ ka nʋa', ao cɛn nawɛ 'ɛ due' ‑pliɔn', 'de maadɛ foo" ʋʋ "jia "ni "jru kpɔ'. 6 ‑Wɛe ɔ 'je nawɛ ‑nɩa 'kmʋ ke, sɛɛtrɩ ‑tie ke, jee" ‑saan ke isɔpʋ 'ʋn "duo-, ɔ 'e "ni ‑ɛ o nawɛ ‑ɛ ‑cɛɛan ‑pliɔn' 'ɔ nmɔ o paa‑. 7 'Sraa ‑sai jɩ 'ʋn "duo ɔ jɩ "ju ‑ɔ ‑jea i ‑kwɛ 'mʋʋa‑ jai ‑fuun kpɛ ‑mɛ" 'sɔn, ɔɔ muɛ wlua' ka ɔ ‑kwɛ i, ‑wɛe ɔ 'e nawɛ ‑siae' "itai ɛ 'je mu.8 "Ju ‑ɔɔ i ‑kwɛ sraa nyʋ 'a ‑saa, muɛ ɔɔ' "wliiɛ‑ wɔɔa', ɔ 'je ɔɔ' ‑pai'' ‑wee' cɛn, ɔ 'e jre 'de "niɔ-, ‑wɛe ɔ 'je i ‑kwɛ. ‑Bo ɛ 'wlʋ 'e ‑mɛ "kpei ɛ, ɔ 'bɛɛ ɔ 'je nyʋ "klu ji, 'kaa ɔ se 'e 'de ɔ o ‑gbu" pai, 'de 'wɩ ‑mɛ" 'sɔn 'di. 9 'Wɩ 'a ‑mɛ" 'sɔn ‑nɩ ɛ, ɔɔ muɛ "mɩɩ ‑nɩa 'e ɔ kui ‑wee' cɛan', ‑jɩ ‑nɩa ɔ "jru o, ɔɔ' ‑fɩn o, ɔɔ' "jri 'a ‑gbaɩn' ke, ‑pai'' ‑siae' ‑wee', ɔɔ muɛ ɔɔ' "wliiɛ‑ wɔɔa', ɔ 'je jre 'de "niɔ 'sʋ ‑mɛ ɔ ‑kwɛ i.
10 'Wɩ 'a ‑mɛ" 'na ‑nɛ "kpei ɛ, ɔɔ muɛ 'blae nynuu 'sɔɔn ‑kɔ sea ‑pʋn" nɩ ke, 'blae ‑gblɔ ‑blea ‑sʋn due' ‑kɔ sea ‑pʋn" nɩ 'ʋn "dua, ‑wɛe ɔ 'je faipʋ -nmɔa "jri i 'pepe 'a "cio ‑mɛ" nyɛ, nyʋ blaa 'cna 'de po, ɛ ke 'cna 'a diicrɛ‑c ɛ tɔo, ɛ 'je Nyɔsoa 'a 'sɛposraadɛ nʋ. 11 'Sraa ‑sai, ‑ɔɔ ‑sa "ju -nɩa 'mua- i ‑kwɛ -sraa a muɛ ɔ ke ɔɔ' 'sraadɛ inynaa' 'de Nyɔsoa "juɛi, 'de -tan 'tan ‑ɛ ‑sɔn nyʋ ke Nyɔsoa 'a ‑gbʋan' "i "juɛi. 12 'Sraa ‑sai a muɛ 'blae 'a due' 'ʋn ''dua, ɛ ke 'cna 'diicre- 'ɛ tɔo- ke-, ɛ 'je nyɔ 'ɔ ‑kɔi" nmae sraa ‑sa, ka nyɔ ɔ nʋa see ɔɔ muɛ 'kan nʋa' 'de Nyɔsoa "juɛi. 13 Ɔɔ muɛ 'blae ‑nɩ ‑pliɔn' cɛan', 'de ‑ta nyɔ ɔ ‑saa dɛsaʋn 'a -kwɛa' 'sraa ke, 'sraa ‑ɛ ‑wee' nɛ dia ke, 'de ‑ta ‑kwɛai ɛ, dɛ dɛ‑nʋɛ' ɛmɛ ‑nɩ, 'sraa ‑sai mɔ ‑ble dɛ nyɔ ‑saa ‑kɔi" nmae 'sraa 'ʋn, ke dɛsaʋn -kwɛa' 'a 'sraa ke, ɛ nɩɛ dɛ ‑kwɛai 'pepe ‑o. 14 'Sraa ‑sai a muɛ nyɔ 'ɔ ‑kɔi" nmae sraa 'a nmɔ ‑nɩa 'mʋʋa‑ 'ʋn "dua, ‑wɛe ɔ 'jeɛ "ju ‑ɔɔ 'sraa ɔɔ ‑sa 'mʋʋa‑ 'a dian doun" 'a pɔɔ' o, ɔɔ' dian ‑cɩɛ ‑gblo ke ɔɔ' dian bɩɛ ‑gblo "kpei blaa-. 15 'De ‑mɛ 'deɛ, 'sraa -sai a muɛ 'cna 'a diicrɛ- -toɔ ‑nɛ 'ʋn "dua, ɔ je ɛɛ' jrɛ' ɔɔ' -cɛ" ɛ kʋʋn a kwa 'a "kpa di po. 16 Ɔɔ muɛ ɔɔ' ‑cɩɛ 'de ɛ o paa', ‑wɛe ɔ 'jeɛ ‑fun' kpɛ ‑mɛ" 'sɔn 'de Nyɔsoa "juɛi. 17 ‑Wɛe 'cna ‑sia 'de ɔɔ' kwa 'a "kpa di, ɔ 'jeɛ "ju ‑nɩa 'mʋʋa‑ 'a dian doun" 'a pɔɔ' o, dian ‑cɩɛ ‑gblo ke dianbʋ 'a bɩɛ ‑gblo blaa‑, 'de ‑ta ɔ blaa nyɔ ɔ' ‑kɔi" nmae sraa nmɔ 'kan a. 18 Ɔɔ muɛ 'cna 'a tɔo ‑sia 'de ɔ kwadi' "i "cniia 'de "ju ‑ɔɔ i ‑kwɛ 'a ‑nɩ sraa nyɔ ɔ ‑saa "jru, ‑wɛe ka nyɔ ɔ nʋa, ‑wɛe nyɔ ɔ ‑kwɛa i ɛ, ɔ 'je 'kan nʋ 'de ɔ "kpei 'de Nyɔsoa "juɛi. 19 ‑Bo ɛ 'wlʋ ‑mɛ "kpei ɛ, ɔɔ muɛ "ju ‑nɔɔ' dɛsaʋn 'a -kwɛa 'a 'sraa ‑saa', ‑wɛe ‑bo ɛ nɩ 'kan a, ka nyɔ ɔ nʋa ‑wɛe nyɔ ɔ nɩa 'pepe ɛ, ɔ 'e 'kan nʋ 'de ɔ ‑pun", ‑wɛe ɔ 'je 'sraa ‑ɛ ‑wɛe nɛ dia' ‑sa. 20 Ɔɔ' muɛ 'sraa ɛ ‑wee' nɛ dia' ke 'sraa dɛ -wlʋa 'de 'blʋ 'ʋn 'de "kpa "kpei ‑tea'. ‑Mɛ ɔɔ' muɛ ka nyɔ ɔ nʋa, ‑wɛe nyʋ 'a dɛsaʋn 'a ‑kwɛa nʋʋa' 'de "ju ‑nɔɔ' ‑tɩ' 'ʋn, 'sʋ ‑mɛ ɔ ‑kwɛ i.
21 ‑Bo "ju ‑nɩa 'mʋʋa‑ se dɛ 'jea 'bɛɛ -wɛe ɔ 'je dɩ "klein ‑nɩ jaa, ɔɔ muɛ 'blae ju due' 'ʋn "dua ɔ 'jeɛ nyʋ -kɔi" nmae 'a 'sraa -saa. -Wɛe ɔ 'jeɛ Nyɔsoa "nyɩ 'de ka nyɔ ɔ nʋa -wɛe nyɔ ɔ -kwɛa i ɔ 'je 'kan nʋ 'de Nyɔsoa "juɛi, ʋʋ 'je 'kan nʋ 'de ɔɔ' -tɩ' 'ʋn, ɔɔ muɛ ka 'sraadɛ -wlʋa 'de 'blʋ 'ʋn nɩa faipʋ -nmɔa "jri i 'pepe a "kio tan nyɔ "bia 'cna "jri i "kpei -tua" ɛ ke 'cna 'ditrɛ- tɔo ke-. 22 Ɔɔ muɛ -gbɛɛ 'sɔɔn 'dewlɛ, "pau nynuu 'sɔɔn 'ʋn ''dua, ka ɔɔ' 'jeedɛ nɩa, nawɩ 'a due' a muɛ dɛsaʋn 'a 'sraa ‑saa', ‑wɛe jrɛ' 'e 'sraa ‑ɛ ‑wee' nɛ dia nʋ. 23 'Wɩ 'a ‑mɛ" na ‑nɛ ɛ, ɔɔ muɩ 'sraa ‑sai kpaa', ‑wɛe ɩ 'je ɔɔ' i ‑kwɛa 'sraadɛ nɩ‑ 'de -tan 'tan ‑ɛ ‑sɔn nyʋ ke Nyɔsoa a ‑gbʋan' 'a paana'. 24 'Sraa ‑sai a muɛ 'blae ju ‑ɛ ‑jea ‑kɔ "i nmae 'a 'sraa ‑sa ke 'cna 'a 'dicre- 'ɛ tɔo 'ʋn ''dua, ‑wɛe ɔ 'je ka nyɔ ɔ nʋa see ɔ 'je 'kan nʋ -wɛe ɔ 'jɩ Nyɔsoa "nyɩ. 25 Ɔɔ muɛ 'blae ju ‑ɛ ‑jea ‑kɔi" nmae 'sraa ‑pliɔn' cɛan', ‑wɛe ɔ 'je ɛɛ' nmɔ 'ʋn ''duo-, ɔ 'jeɛ "ju ‑ɔ i ‑kwɛ sraa ɔɔ ‑saa 'a dian doun" 'a pɔɔ' o, ɔɔ dian ‑cɩɛ ‑gblo ke ɔɔ dian bɩɛ ‑gblo blaa‑. 26 Ɔɔ muɛ 'cna 'a jrɛ' 'de ɔɔ' kʋan a kwadi' poa'. 27 Ɔ muɛ ɔɔ' ‑cɩɛ nʋa' ɔ 'je 'cna ‑nɩa 'de ɔ 'kwa ‑gba' 'kpɛ ‑mɛ" 'sɔn 'de Nyɔsoa "juɛi. 28 ‑Wɛe ɔ 'je 'cna ‑nɩa 'mʋʋa‑ 'a dɛ ‑saan", "ju ‑ɔɔ i ‑kwɛ 'sraa ɔ ‑saa 'a dian doun" pɔɔ o, diansʋn 'a ‑cɩɛ ‑gblo ke dianbʋ 'a bɩɩɛ ‑gblo blaa, 'de ‑ta ɔ blaa ‑kɔi" nmae 'sraa 'a nmi 'a nmɔ ɛ. 29 Ɔɔ muɛ 'cna 'a tɔo‑ ‑sia 'de ɔ 'kwa "i "cniia 'de "ju ‑ɔɔ i ‑kwɛ sraa ɔ ‑saa' "jru, ‑wɛe ‑bo ɛ nɩ 'kan a, ‑wɛe ka nyɔ ɔ nʋa 'de nyɔ 'ɔ i ‑kwɛa -tɩ' 'ʋn ɛ, ɔ 'je 'kan nʋ 'de Nyɔsoa "juɛi. 30 Ka nyɔ ‑ɔɔ 'sraa ɔɔ ‑saa 'mʋʋɛ jaa' a, -bo ɛ nɩ -gbɛɛ o 'dewlɛ "pau o 'sraa -sai a muɛ 'ʋn "dua, 31 due' nɩɛ dɛsaʋn 'a -kwɛa' 'a 'sraa, ‑wɛe due' ke 'sraa dɛ -wlʋa 'de 'blʋ 'ʋn 'je 'sraa ‑ɛ ‑wee' nɛ dia nɩ-. 'Sraa ‑sai 'a muɛ ka nyɔ ɔ nʋa, ‑wɛe nyɔ 'ɔ ‑kwɛa i nʋʋa' 'de Nyɔsoa "juɛi, 'de "ju ‑nɩa 'mʋʋa‑ 'a ‑tɩ' 'ʋn.
32 'Kamɔ kɛ' ‑ɛɛ ‑blaa 'de nyɔ ‑ɔɔ ku ‑pʋn" 'wɛ nɩa, 'de ‑ɛɛ jrɛɛ a i ‑wɛe ‑ɔ sea tɔi" dɛ 'ble, ‑wɛe ‑ɔ ‑je ɔɔ' i ‑kwɛ -sraa ‑sa nɩ-.
-Gbu" 'a -puue -tɩ
33 Nyɔsoa wlu' 'de Moisɩ ke Aarɔn ‑pee ‑wɛe ɛ 'da ka: 34 ‑Bo ao pa 'e Kanaa 'blʋa 'ma mua aopʋ "nyɩa, ‑ɛ ‑jea aoa' dɛ nɩ "kpei ɛ, ‑bo 'ɩn nʋɛ ‑wɛe ‑gbu" jrɛ' ‑pun" 'je ‑puue ka 'jrʋwɛ- nɩa, 35 ‑gbu" 'a jei a muɛ 'sraa ‑sai o mua', ɔ 'je wlu ka: 'Ɩn siɛ dɛjrɛ' "jriɛ o 'de 'ma ‑gbu" ‑pʋn", ka dɛɛ' pa puu" ɛ. 36 'Sraa ‑sai a muɛ nyʋ 'tmʋʋa, ʋʋ 'je dɩ ‑wee' 'e ‑gbu" 'di ‑sa, ‑wɛe ɔ 'jeɛ ja ‑gbʋn, ‑bo ɛ nɩ 'kan a, ‑mɛ dɩ ‑nɩa 'e ‑gbu" 'di ɩ ‑wee' se ‑flɛn" kpʋn i. 'Sʋ, ɔɔ muɛ 'e ‑gbu" 'di paa', ‑wɛe ɔ 'jeɛ ja ‑gbʋn.
37 Ɔɔ muɛ ɛɛ' ‑kɔ ja ‑gbʋn 'a: ‑Bo ɛ 'nɛ 'de ‑gbu" ‑pʋn", 'de ɛɛ' "bi 'je -kɔ tuwɩn 'dewlɛ ɛ 'je wɔi ‑sain' ɛ, ‑wɛe ɛɛ' "bi 'je "jriɛ o sie ka nɩ 'de ‑gbu" 'a blo' ‑pʋn" ɛ, 38 'Sraa ‑sai a muɛ "kpae "siia, ‑wɛe ɔ 'jeɛ "wɛin "i kan, 'de 'wɩ ‑mɛ" 'sɔn 'di. 39 Ɔɔ muɛ 'e de mua' 'de 'wɩ 'a ‑mɛ" 'sɔn ‑nɛ 'di, ‑bo ɔ 'jeɛ ka ɛɛ' ‑kɔ 'boa 'de ‑gbu" 'a 'blo ‑pun" ɛ, 40 'Sraa ‑sai a muɛ nyʋ 'tmʋʋa ʋʋ 'je ‑gbu" 'a "soi ‑flɛn" nɩa ‑pʋn" 'e ‑sa, ʋʋ 'jɩ 'kwla po 'de ‑kwlɔ 'de, 'de ‑ta sea i ‑kwɛ. 41 ‑Wɛe ɔ 'je ‑gbu" 'a 'blo ‑nɩa 'de ɛ 'di kwii kplan ‑wɛe ɛɛ' 'blʋ ‑wlʋa 'e ɔ 'jɩ 'kwla po, 'de ‑ta sea i ‑kwɛ 'de ‑kwlɔ 'de. 42 Nyʋ a muɛ "soi dee‑ "dua ‑wɛe nyɔ 'jɩ "soi soa nyʋ ‑sae' ‑kɔo poo‑, ‑wɛe nyɔ 'je 'blʋ 'ʋn "duo ɔ 'je ‑gbu" 'a 'blo sʋan 'de ‑kɔɔ' de.
43 ‑Bo ɛɛ' ‑kɔ ji de ‑mɛ nyʋ jea "soi 'de ‑sa a, 'de nyʋ jeɛ' kui kplan ‑wɛe nyɔ jea ‑gbu" 'a 'blo sʋan 'de ‑kɔo de ɛ, 44 'Sraa ‑sai a muɛ ja ‑gbʋn 'a, ‑bo ɔ 'jeɛ ɛɛ' ‑kɔ, ɛ 'boa 'de ‑gbu" ‑pʋn" ɛ, ‑mɛ ‑gbu" 'a -pua' -sea 'e 'wlu i ‑o: ‑Gbu" ‑nɛ se i ‑kwɛ. 45 Nyɔ ɔ muɛ waa'. Ɛɛ' "soi o, ɛɛ' ‑gbaa" ke ɛɛ' 'kao kpiin' ‑wee' nyɔ ɔ mui 'de ‑kwlɔ 'de kpaa', 'de ‑ta sea i ‑kwɛ ɛ.
46 Nyɔ "oo nyɔ ‑ɔɔ mua ɛɛ' ‑gbu" tu 'di paa' ‑mɛ ɛ kaan ''wɛn "i ɛ, ‑mɔ se i ‑kwɛ i mamaʋ 'sʋ kwie a jea kpʋn. 47 Nyɔ ‑ɔɔ mua 'e 'pɛan 'de ‑ɔɔ mua dɛdia' 'demu, ‑mɔ ɔɔ muɛ ɔɔ' "wlii‑ wɔɔa'.
48 'Kaa ‑bo 'sraa ‑sai, ‑ta ɔɔ jia ‑mɛ nyʋ jea ɛɛ' sʋʋan -kɔ 'de ‑kɔɔ' de, ɛɛ' ‑kɔ se 'boa, ɔɔ muɛ ka nʋa ‑gbu" ‑nɩa 'mʋʋa‑ ‑kwɛ i, dɛ dɛ‑nʋɛ' mɛ ‑nɩ ɛɛ' ‑puua' ‑kwɛ 'e 'mɛ. 49 ‑Bo nyɔ 'je ɛɛ' i ‑kwɛɛa' 'a 'sraa ‑sa a, 'sraa ‑sai a muɛ nʋɩ 'sɔɔn o, sɛɛtrɩ 'a tie o, jee" jɔ ‑sain' a ke, isɔpʋ 'a 'dao- 'ʋn ''dua. 50 Ɔɔ muɛ nʋʋɩ 'a due' ‑pliɔn' cɛan' 'de maa jae‑ ‑tuu" ni "jia "jru kpɔ. 51 ‑Wɛe ɔɔ muɛ sɛɛtrɩ 'a tie- o, isɔpʋ o, jee" jɔ ‑sain' a ke, nʋʋɛ ‑nɩa 'kmʋ 'ʋn "dua, ‑wɛe ɔ 'je nʋʋɛ nyʋ cɛan ‑pliɔn' ɔ nmɔ, ɛ ke "ni -beea "i o paa‑, ɔɔ muɛ "ni -nɩa 'mʋʋa- ‑gbu" jai ‑gbaa' kpɛ ‑mɛ" 'sɔn. 52 'Kamɔ ɔɔ muɛ ‑gbu" 'a -flɛɛn" ‑nɩa 'mʋʋa‑ 'de ‑saa' 'de nawɛ 'ɛ nmɔ o, ‑tuu" ni 'a "ni o, nawɛ ‑sea 'mɛ o, sɛɛtrɩ -tie o, isɔpʋ ke, jee" jɔ ‑saan 'ʋn. 53 Ɔɔ muɛ nʋʋɛ ‑sea 'mɛ "itaa 'de ‑kwlɔ 'de, ɛ 'je "wan 'de ‑gbae "kpei woi. 'Sʋ ka nyɔ ɔ nʋa -wɛe -gbu" a -kwɛa i ɛ ɔɔ muɛ 'kan nʋa' 'de ‑gbu" ‑nɩa mua‑ 'a -tɩ' 'ʋn, ‑mɛ ɛ ‑kwɛ i.