Kɛ' ‑blaa 'de 'wɛ ‑ɩ ‑nɩa 'de ku ‑pʋn" 'a ‑tɩ' 'ʋn ɛ
13
Nyɔsoa wluɛ Moisɩ ke Aarɔn ‑pee ɛ 'na: 2 ‑Bo kpuɛn" jrɛ' o, nɛ" ke dɛjrɛ' -faan' -nɩa 'de nyɔ jrɔ' 'ɔ ku ‑pʋn", ‑wɛe ɛ nʋ ku 'a 'wɛ ‑ɛ ‑kɔ' 'jrʋwɛ-, nyɔ ɔ muɔ 'sraa ‑sai Aarɔn "i toa', 'de ‑bo ɛ seɔ nɩɛ, ‑mɛ 'sraa ‑sai jrɔ' ‑wlʋa ɔɔ' "ji 'di -mɔ ʋʋ 'jeɛ "i to-. 3 Ɔɔ muɛ ku 'a 'fɔ 'wɛ nɩa ‑pʋn" ja ‑gbʋn 'a. ‑Bo ‑ta 'wɛ nɩa 'mʋʋa‑ ‑pai" ‑nɩa 'demu "plu ‑wɛe "bi ‑gbau" 'jee pa a, ‑mɛ 'jrʋwɛ- deejrɛ' ‑o. ‑Mɛ dɛ ɔ 'jea 'mʋʋa‑ 'a ‑tɩ' 'ʋn ɛ, 'sraa ‑sai a muɛ ka nʋa', "ju ‑nɩa 'mʋʋa‑ se i ‑kwɛ. 4 'Kaa ‑bo ‑taa fan -wɛe -ɛ ‑plu" 'a 'de ɔ ‑pʋn" 'mʋʋa‑ se "bi ‑gbau" paa nyɔ seɛ 'je ɛ, ‑wɛe ' -pai" ‑nɩa 'e se "plu ɛ, 'sraa ‑sai a muɔ 'e nyʋ "klu ‑saa', 'de 'wɩ ‑mɛ" 'sɔn 'di. 5 'Wɩ 'a ‑mɛ" 'sɔn ‑nɛ 'di ɛ, ɔɔ muɔ ja ‑gbʋan'. ‑Bo ɔ 'jeɛ ka, 'wɛ ‑nɩa 'mʋʋa‑ nɩa see ɛ nɩ 'kaa ɛ se "kpei 'kpa 'de ɔ ku ‑pʋn" ɛ, ɔɔ muɛ 'e nyʋ "klu ‑saa', kewlɛ ɛ 'je 'wɩ -mɛ" 'sɔn deejrɩ' nʋ, 6 'Dɔɔ 'sɔɔn -nɩ 'a -kwɛ 'na a 'sraa -sai a muɔ ja ‑gbʋn kewlɛ. ‑Bo 'wɛ ‑nɩa 'mʋʋa‑ 'bɔ fan -tɩ ɛ 'de ɛ se 'boa 'de ɔ ku ‑pʋn" ɛ, 'sraa ‑sai a muɛ ka nʋa' ɔ nɩɛ 'pepe, ‑mɛ nɛ" ‑o. "Ju ‑nɩa 'mʋʋa‑ ɔɔ muɛ ɔɔ' "wliiɛ‑ wɔɔa', ‑wɛe ɔ 'je 'pepe nɩ-. 7 'Kaa -bo nɛ" ‑nɩa 'mʋʋa‑ 'boa 'de ɔɔ' ku ‑pʋn", ‑mɛ 'sraa ‑sai 'jeɔ ja ‑gbʋn, ɔ jea wlu ka ɔ nɩɛ 'pepe ɛ, ɔɔ muɛ de mua' 'de 'sraa ‑sai o, ɔ 'jeɔ ja ‑gbʋn kewlɛ. 8 ‑Bo 'sraa ‑sai 'jeɛ ka nɛ" ‑nɩa 'mʋʋa‑ 'boa 'de ɔ ku ‑pʋn" ɛ, ‑mɛ 'sraa ‑sai a muɛ wlua' ka ɔ se i ‑kwɛ: ‑Mɛ 'jrʋwɛ- deejrɛ' ‑o.9 ‑Bo 'jrʋwɛ- deejrɛ' kpʋn nyɔ jrɔ' ɛ, nyʋ a muɔ 'de 'sraa ‑sai o kpaa'. 10 Ɔɔ muɛ ɔ ja ‑gbʋn 'a. ‑Bo ɔ 'je kpuɛn" ‑plua" 'de ɔ ku ‑pʋn", ‑wɛe ‑ɛ ‑pluu" -pai" ‑nɩa 'e ɛ, ‑wɛe ɔɔ' "sɩɩn- 'je "i nyɩa a, 11 ɛ nɩɛ 'jrʋwɛ- deejrɛ' ‑ɛ cɛn ‑ci' o-, 'sraa ‑sai a mua ka nʋa', "ju ‑nɔ se i ‑kwɛ, ɛ se ‑tɩ' kɔn ‑wɛe nyʋ 'jeɔ nyʋ o tɛɛn-, ɔɔ' 'wɛ poɛ "jri "kpae', ɔ se i -kwɛ ka -cɔɔn' ka-. 12 'De dɛ ‑wlʋa ɔɔ' "jru o, ‑ɛ ‑jɛa ɔɔ' bʋ o, ‑ta "oo ‑ta 'sraa ‑sai a mua ‑gbʋn 'a, ‑bo 'wɛ ‑nɩa 'mʋʋa‑ nɩ 'e ɛ, 13 'sraa ‑sai a muɛ de ‑saa' ɔ 'jeɔ ja ‑gbʋn. ‑Bo ɔ 'jeɛ ka 'wɛ ‑nɩa 'mʋʋa‑ nɩa 'de ɔɔ' ku ‑wee' "klein ‑pʋn" ɛ, ɔɔ muɛ wlua' ka, "ju ‑nɩa 'mʋʋa‑ ‑kwɛ i: Dɛ dɛ‑nʋɛ', ɛmɛ ‑nɩ ɔ ‑wee' nɩɛ "puu, ɔ nɩɛ 'pepe 14 'kaa 'wɩ ‑ɛ 'di nyʋ a mua -sɩɩn' 'jea ɛ 'je "kpae pɛɛn- 'de ɔ ku ‑pʋn" ɛ, ‑mɛ ɔ 'kpa nyɔ ‑sea i ‑kwɛ. 15 ‑Bo 'sraa ‑sai 'je kpaiɛ- 'de ɔ ‑pʋn" ɛ, ‑mɛ ɔɔ muɛ wlua' ka ɔ se i ‑kwɛ: ‑Kɔ nɩ 'de ɔ ‑pʋn" ɔ se i ‑kwɛ: 'Jrʋwɛ- deejrɛ' ‑o. 16 ‑Bo kpaiɛ- ‑nɩa 'mʋʋa‑ "plu ɛ, "ju ‑nɩa 'mʋʋa‑ a muɛ 'de 'sraa ‑sai o 'de mua', 17 'sraa ‑sai a muɔ ja ‑gbʋn 'a. ‑Bo ɔ 'jeɛ ka ‑kɔ ‑nɩa 'mʋʋa‑ "pluu ‑cɛɛn' ɛ, ɔɔ muɛ ka nʋa' -kɔ -kwɛ i -mɛ "ju ‑nɩa 'mʋʋa‑ ‑kwɛ i ke-.
18 ‑Bo nyɔ dee jrɔ' 'ble pluun" 'de ɔ ‑pʋn" ɛ ‑wɛe ɛ 'je 'bɔ ɛ, 19 ‑wɛe 'de ɛɛ' ‑kɔ "i kpo ‑nɩa 'e 'je "plu ɛ, 'dewlɛ ɛ 'je wɛi ‑san i ɛ, ɔɔ nyɔ tu a muɛ mua', 'sraa ‑sai 'jeɔ ja ‑gbʋn. 20 ‑Bo ɛ paa "bi 'de ɔɔ' ku 'di, ‑wɛe 'sraa ‑sai 'jeɛ, 'de -pai" ‑nɩa 'e 'je "plu, ‑mɛ 'jrʋwɛ- deejrɛ' mɛ ‑tee 'de pluun" ‑nɩa 'mʋʋa‑ 'di. 'Sraa -sai a muɛ nʋa' ɔ se i -kwɛ 21 'Kaa ‑bo 'sraa ‑sai nɩɔ ja ‑gbʋan', ‑wɛe ɔ se -pai" plu 'je 'de ɛɛ' ‑kɔ "i ɛ, 'de "bi ‑gbau" se 'de ɛɛ' "pa "i nɩ ɛ -wɛe ɛɛ' fan a, ɔɔ muɔ 'de nyʋ "klu ‑saa', 'de 'wɩ ‑mɛ" 'sɔn 'di. 22 ‑Bo 'ɛ 'boa' 'de ɔ ku ‑pʋn" ɛ, ‑mɛ 'sraa ‑sai a muɛ wlua' ka ɔ se i ‑kwɛ, 'jrʋwɛ deejrɛ' ‑nɩ ɔ ‑pʋn". 23 'Kaa ‑bo kɛ nɩa se -bo ɛ nɩ 'kan ɛ se 'boa' a, ‑mɛ pluun" ‑nɩa 'mʋʋa‑ 'a "pa ‑o, 'sraa ‑sai a muɛ nʋa' ɔ ‑kwɛ i.
24 Jrɛ' ka ‑ta: ‑Bo nɛ di nyɔ jrɔ', ‑wɛe ɛɛ' ‑kɔ 'jeɔ ‑pʋn" nɩ ɛ, ‑wɛe ɛ 'je fan a 'de ɛ 'je "plu 'dewlɛ ɛ 'je wɛi ‑sain'-. 25 'Sraa ‑sai a muɛ ɔ ja ‑gbʋn 'a ‑bo -pai" "plu 'de -taa fan a, 'de "bi 'je ɛɛ' ‑kɔ "i pa a, ‑mɛ 'jrʋwɛ- deejrɛ' mɛ ‑teea 'de nɛ 'ɛ ‑kɔ "i 'mʋʋa‑. 'Sraa ‑sai a muɛ wlua' ka ɔ se i ‑kwɛ, dɛ dɛ‑nʋɛ' 'mɛ ‑nɩ 'jrʋwɛ- deejrɛ' ‑kpʋn' ɔ. 26 'Kaa, ‑bo ‑ta 'sraa ‑sai -a ‑gbʋn ɔ ja 'mʋʋa‑ ɔ se -pai" plu- jrɛ' 'je 'bo ɛɛ' ‑kɔ "i, 'de "bi dee jrɛ' se 'de ‑kɔ "i pa a, ‑wɛe kpaiɛ- 'je fan -tɩ 'bo ɛ, ɔɔ' muɛ 'e nyɔ ‑pʋn" ‑saa' 'de 'wɩ ‑mɛ" 'sɔn 'di. 27 'Sraa ‑sai a muɔ ja ‑gbʋn 'a 'de 'wɩ 'a ‑mɛ" 'sɔn ‑nɛ "kpei, ‑bo ɛɛ' ‑kɔ 'boa 'de ɔ ‑pʋn" ɛ, ɔɔ muɛ ka nʋa' ɔ se i ‑kwɛ, dɛ dɛ‑nʋɛ' mɛ ‑nɩ 'jrʋwɛ deejrɛ' ‑nɩ -ɔ ‑pʋn". 28 'De ‑bo ‑ta ɛ ‑tea ɛ ‑tee' mu ɛ se 'boa, -wee' ɛɛ' fan a, ‑mɛ nɛ 'ɛ ‑kɔ o-, 'sraa ‑sai 'a muɛ wlua' ka "ju ‑nɩa 'mʋʋa‑ ‑kwɛ i, dɛ dɛ‑nʋɛ' mɛ ‑nɩ nɛ 'ɛ ‑kɔ ‑nɩa 'mʋʋa‑ a "pa ‑o.
29 ‑Bo ɛ nɩ "junmɔu -ae' 'nynɔkpao mɔ ‑ble ‑kɔ, "ko ɔɔ' "jru ‑pʋn" ‑ɛ, "ko ɔɔ' ‑gbeɛ" ‑pʋn" ɛ, 30 'Sraa ‑sai a muɛ 'plɩɩ- ‑nɩa 'mʋʋa‑ ja ‑gbʋn 'a. ‑Bo ɛ paa "bi 'de ɛ ‑pʋn" ɛ, ‑wɛe 'de ɛ "ji ‑pai" ‑nɩa 'e 'je ‑sʋʋ' nɩɛ, 'dewlɛ ɩ 'je kai -ka kai nɩ ɛ, 'sraa ‑sai a muɛ wlua' ka ɔ se i ‑kwɛ: ‑Mɛ plɩɩ- ‑o, ɛ mɛ ‑nɩ 'wɛ ‑ɛɛ kpʋn ɔɔ' "jru 'dewlɛ ɔɔ' ‑gbeɛ" ke. 31 'Kaa, ‑bo ‑ta 'sraa ‑sai a -gbʋn ɔ ja, ‑bo ɛ se "bi paa 'dewlɛ ‑pai" nɩa see ɩ se 'kan nɩ-, ‑mɛ 'sraa ‑sai a muɔ 'e nyʋ "klu ‑saa' 'de 'wɩ ‑mɛ" 'sɔn 'di. 32 'De 'wɩ 'a ‑mɛ" 'sɔn ‑nɛ "kpei, ‑bo ɔ ‑gbʋn ɛ ja ɛ se 'boa, ‑bo "mɩɩ‑ ‑nɩa 'e nɩ -sʋʋ", 'de "bie se 'e nɩɛ, 33 'wɛ nʋɩ ‑nɩa 'mʋʋa‑ 'a muɛ "jru i 'wlaa, 'kaa ɔɔ muɛ 'e ‑ta plɩɩ- nɩa 'mʋʋa‑ 'e siia', ‑wɛe 'sraa ‑sai 'jeɔ 'e nyɔ "klu ‑sa kewlɛ 'de 'wɩ ‑mɛ 'sɔn 'di. 34 'Wɩ 'a ‑mɛ" 'sɔn ‑nɛ di ɛ, 'sraa ‑sai a muɛ ja ‑gbʋn 'a. -Bo 'wɛ ‑nɩa 'mʋʋa‑ se 'boa 'de ɔ ‑pʋn" ɛ, ‑wɛe ɛ se "bi paa, ɔɔ muɛ wlua' ka ɔ ‑kwɛ i, 'wɛ nʋɩ ‑nia 'mʋʋa‑, ɔɔ muɛ ɔɔ' "wliiɛ‑ wɔɔa' ‑wɛe ɔ 'je i ‑kwɛ. 35 'Kaa ‑bo 'pleɛ- ‑nɩa 'mʋʋa‑ 'boa 'de ɔ ‑pʋn", 'demɛ- 'sraa -sai jea ka nʋ ɔ ‑kwɛ i ɛ, 36 -Bo 'sraa ‑sai 'jeɛ "kpei ka plɩɩ- 'bo a, ɔ seɛ ja ‑gbʋn i 'bode ‑bo "mɩɩ‑ ‑nɩa 'e nɩ ‑sʋʋ' ɛ: "Ju ‑nɩa 'mʋʋa‑ se ikwɛ‑. 37 ‑Bo 'wɛ nɩa 'mʋʋa‑ se 'boa a, ‑wɛe ‑pai" ‑mɛa 'de ɛɛ' ‑kɔ "i 'je woi kpeɛ, ‑mɛ ɔɔ' 'wɛ 'bɔɔ: Ɔ ‑kwɛ i. 'Sraa ‑sai a muɛ ka nʋa' ɔ ‑kwɛ i.
38 ‑Bo ɛ nɩ "junmɔu, ɛ nɩ 'nynɔkpao 'de dɛ -plua" ‑te 'de ɔ ku ‑pʋn" ɛ, 39 'sraa ‑sai a muɛ ɔ ja ‑gbʋn 'a, ‑bo dɩ ‑tea 'de ɔ ‑pʋn" 'mʋʋa‑, ɩa' "plu sʋn nɩ "flee flee- ɛ, ‑mɛ 'wɛ ‑nɩa 'mʋʋa‑ se ‑tɩ' kɔn: 'Wɛ nʋɩ ‑nɔ ‑kwɛ i.
40 ‑Bo nyɔ 'ɔ "mɩɩ‑ 'a sea ɔɔ' "jru ‑pʋn" ‑kwɛɛ, ‑mɛ 'kpaa' ‑o, ɔ ‑kwɛ i. 41 ‑Bo "mɩɩ‑ ‑kwɛ 'de ɔ "juɛi fɔo ɛ, ‑mɛ 'kpaa ‑nɩa 'de ɔɔ' "jua a kpai" ‑o, ɔ ‑kwɛ i. 42 'Kaa ‑bo ‑kɔ ‑ɛɛ "plua kpa ‑sain' 'a -jei" ‑tan 'de ɔɔ 'kpaa ‑nɩa 'e "jru ‑kwea "i ɛ, 'de -bo ɛ -te ɔ "jua kpae" ɛ, ‑mɛ 'jrʋwɛ deejrɛ' mɛ ‑teea 'de ɔɔ' 'kpaa -nɩa 'de ɔ "jru -kwea ke ɔ "juɛi 'mʋʋa‑. 43 ‑Bo ‑ta 'sraa ‑sai a ‑gbʋn' ɔ ja 'mʋʋa‑, ɔ 'je plʋʋn" -ɛ "plua ‑san i wɛi 'de ɔ "jru 'dewlɛ ɔ "juɛi ɛ, ‑wɛe ɛ ke 'jrʋwɛ deejrɛ' ‑kooɔ' ɛ, 44 ‑mɛ 'jrʋwɛ deejrɛ' ‑kpʋn' "ju ‑nɩa 'mʋʋa‑, ɔ se i ‑kwɛ, ‑wɛe 'sraa ‑sai 'jeɛ 'tmʋ ka ɔ sea i ‑kwɛ ɛ. Ɔɔ' "jru mɛ 'wɛ kpʋn.
45 Nyɔ -ɔ ku 'wɛ kpʋn 'kan a, ɔɔ muɛ "wliiɛ ‑faea' 'ʋn paa', ‑wɛe ɔ se dɛ "jru ‑tu" i, ɔɔ muɛ ɔɔ "jua 'a 'fɔ ‑nɩa 'e ‑sɔn fɔo dɛdi' blaa', ‑wɛe ɔ 'je wlu "jɛi kpa ka: Se i ‑kwɛ, se i ‑kwɛ. 46 "Nɔ ‑ɛɛ 'di 'wɛ ‑nɩa 'mʋʋa‑ nɩɔ ‑pʋn" ‑wɛe ɛ sea bɔ ke ɛ, ɔ se i ‑kwɛ. Ɔɔ muɛ "tia 'de dɛkpɔ 'de.
47 ‑Bo jee' jɔ wliiɛ-, 'dewlɛ 'fɛɛn wliiɛ‑ jrɛ', ‑ɛ ‑pun" 'je ‑puue ‑wɛe ɛ ‑kɔ 'jrʋwɛ- deejrɛ' ɛ, 48 'dewlɛ tae' fɔ o, dbaa wliiɛ‑ o, nmi ku o, dɩ ʋʋ nʋa nmi ku 'ʋn o, 49 ‑bo ɛ ke sii" wɩn 'a ‑kooɔ' sʋn muu i o, 'dewlɛ ɛ ‑sain' wɛi, 'de "wliiɛ‑ ‑pʋn" ke 'de nmiku ‑pʋn" o, 'de tae' fɔ ‑pʋn" 'de dbaa wliiɛ‑ ‑pʋn", 'dewlɛ dɩ ʋʋ nʋa nmiku 'ʋn ‑pʋn", 'jrʋwɛ- 'ɛ jrɛ' ‑nɩa "wliiɛ‑ 'ʋn ‑o: Nyɔ ɔ muɛ 'sraa ‑sai "i toa' ɔ 'jeɛ ja -gbʋn. 50 Ɔɔ muɛ ja ‑gbʋn 'a, ‑wɛe ɔ 'jeɛ "wɛin kan 'de 'wɩ ‑mɛ" 'sɔn 'di. 51 'Wɩ 'a ‑mɛ" 'sɔn ‑nɛ 'di ɛ, 'sraa ‑sai a muɛ ja ‑gbʋn 'a. ‑Bo ɛ 'boa 'de ''wliiɛ‑ ‑nɩa 'mʋʋa‑ o, tae' o, dbaa wliiɛ‑ o, nmiku o, dɩ nmiku nʋa "kpei ɛ, ‑pʋʋa' ‑nɩa 'mʋʋa‑ seɛ bɛɛ- ɛ 'jee 'wlʋ, ɛɛ' dɛtu se i ‑kwɛ. 52 Ka "oo ka ɛ 'je ɛ nɩ mɔɔ' -cɛ" 'deɛ, ɛ 'e "jri pooɛ ‑o, dɛ dɛ‑nʋɛ' ɛɛ' ‑puue' ‑kɔ ‑nɩa 'mʋʋa‑ se 'e 'wlʋ i, ɛɛ' dɛtu 'je "jri pooɛ ‑o.
53 ‑Bo 'sraa ‑sai 'jeɛ ka ‑kɔ ‑nɩa 'mʋʋa‑ se 'boa a, 'de "wliiɛ‑ ‑nɩa 'mʋʋa‑ "kpei ɛ, 54 Ɔɔ muɛ nʋa' ao wɔɔ ɛ, ‑wɛe ɔ 'jeɛ "wɛin kan ke -nɛ 'wlɛ 'de 'dɔɔ due' 'di. 55 ‑Bo ɛ ‑kɔ' wɔɔa' a, 'sraa ‑sai a muɛ ja ‑gbʋn 'a kewlɛ, ‑bo ɛ se fai" pooɛ, nyʋ seɛ "kpei i 'je ɛ, ‑bo ɛ se 'boa mɔɔ ‑cɛ" mɔ 'de ɛ, ɛɛ' dɛtu se i ‑kwɛ, ‑bo ɛɛ' ‑puua' nɩ 'de ɛɛ "jri 'dɔe 'dewlɛ ɛɛ' saɩn' mɔ -pʋn" 'de ɛ, ɛ 'je "jri pooɛ ‑o. 56 ‑Bo ‑ta ɛ ‑kɔa' wɔɔa' a, 'sraa ‑sai 'jeɛ ka ɛɛ' ‑kɔ se 'boa a, ɔɔ muɛ ɛɛ' ‑ta ‑nɩa 'mʋʋa‑ 'de saa', de nmiku, tae' o, 'dewlɛ dbaa wliiɛ‑ ‑nɩa 'mʋʋa‑ ‑pʋn". 57 ‑Bo ɛɛ' ‑kɔ ‑nɩa 'mʋʋa‑ ji de 'de nya a, ‑mɛ ɛɛ' ‑puua' a kpa "kpei, ‑ma muɛ dɛ -nɩa 'mʋʋa‑ "jri pooa'. 58 'De ‑bo ɛ nɩ 'ʋn paa wliiɛ‑, tae' fɔ dbaa wliiɛ‑ 'dewlɛ, 'dɛ nyʋ nʋa nmiku 'ʋn ‑ɩn ‑wɔɔa, ‑wɛe dɛ ‑nɩa 'de ɛ ‑pʋn" ‑kwɛa 'e ɛ, ‑mɛɛ muɛ wɔɔa' kpɛ 'sɔɔn ‑nɛ kewlɛ, ‑wɛe ɛ 'je i ‑kwɛ.
59 'Kamɔ kɛ' blaa -puua' -nɩa 'de 'ʋn paa wliiɛ‑ ʋʋ dba jee" 'ʋn o, 'fɛɛn wliiɛ‑ o, 'de tae' fɔ o, dbaa wliiɛ‑ ke dɛ ʋʋ nʋa nmiku 'ʋn o, ɩa' ‑tɩ' 'ʋn ‑nao. Ɩmɩ ‑a nʋɛ ‑wɛe ‑bo ɛ ‑kwɛ i o, ɛ se i ‑kwɛ o, nyʋ a 'jeɛ "kpei i.