Aarɔn ke ɔɔ' "nynuu 'a 'sraa -saa' -tea'
9
'Wɩ 'a ‑mɛ" na ‑nɩ "kpei ɛ, Moisɩ 'da Aarɔn ke ɔɔ' "nynuu ke Israɛ -nyʋ 'a klae". 2 ‑Wɛe ɔ wlu ka 'de Aarɔn ‑pee: ‑Ɩn -duo" bli' ‑tɔo due' ‑ɛ ‑jea dɛsaʋn 'a 'sraa -sa 'ʋn, ɛ ke 'blae ‑gblɔ ‑ɛ -jea 'sraa -ɛ ‑wee' nɛ dia ‑saa, kɩ nɩa 'sɔɔn dɛjrɛ' 'bo ɩ ‑pʋn" nɩ ɛ. ‑Ɩn ‑to ɩ Nyɔsoa "i. 3 'De ‑ɩn ‑je wlu ka, 'de Israɛ -nyʋ ‑pee: Ao "duo -faan" ‑gbao ‑ɛ ‑jea dɛsaʋn 'a -kwɛa' 'sraa 'ʋn ‑saa a, bli' ‑tɔo -blea -sʋn due' ɛ ke 'blae ju -blea -sʋn due' dɛjrɛ' sea ‑pʋn" nɩ, ɩ 'je 'sraa ‑ɛ ‑wee' nɛ dia' ‑saa, 4 Bli' beɔ ke 'blae ‑gblɔ nyʋ 'jea ‑pliɔn' cɛn 'de Nyɔsoa "juɛi, ‑ɩ ‑jea nyʋ ke Nyɔsoa 'a wlu "kpei ‑sea' sraa nɩ-, dɛkwai ‑sa -sraa ‑ɛ ‑nɩa faipʋ nyʋ beea 'cna "jrii ɛ mɛ ‑ke ɛ 'je 'bʋ ɩ naa‑, dɛ dɛ‑nʋɛ' Nyɔsoa 'a muɛ ɛɛ' ‑cɛ" 'kwla ‑saa 'de ao ‑pee ‑sɩan.5 Ʋʋpʋ ja dɩ "klein Moisɩ tbaa 'wɔin 'mʋʋa‑, 'de -tan 'tan ‑ɛ ‑sɔn nyʋ ke Nyɔsoa a ‑gbʋʋan "i "juɛi. Israɛ -nyʋ ‑wee' "klein 'kpaa 'e 'mɛ, ‑wɛe ʋʋ nyna i 'de Nyɔsoa "juɛi. 6 ‑Wɛe Moisɩ wlu ka: Dɛ Nyɔsoa nɩa "i ‑bo ao nʋ, ‑wɛe ɛ 'je ɛɛ' kɛɛma' dɛ 'kwla -sa 'de aopʋ -pee ɛ ka. 7 Ɔɔ kpa wlu nya 'sʋ, ɔ wlu 'de Aarɔn ‑pee: ‑Ɩn ‑kpa 'e "kpa ‑pʋn", ‑ɩn ‑sa ‑ma dɛsaʋn 'a ‑kwɛa' ke ‑ma 'sraa ‑ɛ ‑wee' nɛ dia, -wɛe ka nyɔ ɔ nɔa se -ɩn ‑je 'kan nʋ 'de ‑ma dɛsaʋn ke, Israɛ nyʋ 'a dɛsaʋn kwɛa' 'a -tɩ' 'ʋn, -wɛe -ɩn -je Israɛ -nyʋ 'a 'sraadɛ to-, -wɛe ka nyɔ ɔ nʋa see 'de nyʋ 'a dɛsaʋn 'a -kwɛa' 'a -tɩ' 'ʋn ɛ -ɩn -je 'kan nʋ 'de Israɛ -nyʋ 'a -tɩ' 'ʋn ke-, ka Nyɔsoa nɩɛ "i ɛ.
8 Aarɔn 'kpaa 'de "kpa ‑ɛ "kpei nyɔ ɔ ‑saa 'sraa ‑pʋn", ‑wɛe ɔ ceɛn bli' ‑tɔo ‑ɛ ‑nɩa ɔɔ' dɛsaʋn 'a -kwɛa' 'a 'sraadɛ ‑pliɔn'. 9 Ɔɔ' "nynuu jɔ ɛɛ' nmɔ, ɔ paa ɔɔ' ‑cɛjɔ 'de ɛ o, ‑wɛe ɔ blɛɛ "kpa 'a ‑gblʋn, ‑wɛe ɔ 'wlɛ ɛɛ' tɔo -sia 'e 'de "kpa ‑sɔn. 10 Ɛɛ' 'cna o, ɛɛ' 'kpʋ ‑kwlʋtɛ ke ɛɛ' -kuo" -pʋn" pɛe ke, ɔ pʋɩ "jri 'de "kpa "kpei 'de dɛsaʋn 'a -kwɛa' 'a -tɩ' 'ʋn, ka Nyɔsoa "sia 'nynɩ 'de Moisɩ -pee ɛ. 11 Ɔ ‑sa ɛɛ' nmi ke ɛɛ' ku 'de 'sraa ‑sana', ‑wɛe ɔ pʋɩ "jri 'de dɛkpɔ 'de.
12 ‑Wɛe ɔ ceɛn 'sraa ‑ɛ ‑wee' nɛ dia ɛɛ' ‑nɩ 'blae ‑gblɔ ‑pliɔn'. Ɔɔ' "nynuu jɔ ɛɛ' nmɔ, ‑wɛe ɔ blɛɛ "kpa 'a fɔ' ‑wee' "klein. 13 Ʋʋ "nyɩɔ 'sraadɛ ɛɛ' kpi ɛ ke ɛɛ' "jru ke. Ɔ pʋɩ "jri 'de "kpa "kpei. 14 Ɔ wɔɔ ɛɛ' 'diidɩ ke ɛɛ' bɩ ke, ‑wɛe ɔ po ɩ "jri 'de 'sraadɛ ‑ɛ ‑wee'‑ nɛ dia "kpei.
15 Ɛ 'wlʋɛ ‑mɛ "kpei ɛ, Aarɔn toɛ Israɛ nyʋ 'a 'sraadɛ -wlʋa 'de 'blʋ 'ʋn, ɔ "duɛ -faan" gbao ‑ɛ ‑nɩa ʋʋa' dɛsaʋn 'a ‑kwɛ 'sraadɛ 'ʋn, ɔ ceɛn ‑pliɔn', ɔ ‑sɛɛ 'sraa 'ʋn, ‑wɛe ʋʋa' dɛsaʋn 'je ‑kwɛ, ka ɔ nʋa 'de ɔɔ' -cɛ" -tɩ' 'ʋn. 16 Ɔ toɛ 'sraa ‑ɛ ‑wee' nɛ dia -wɛe ɔ "nyɩ Nyɔsoa, ka nyʋ 'jeɛ nʋɛ. 17 Ɔ toɛ 'sraadɛ -ɛ -wlua 'de 'blʋ 'ʋn: Ɔ "jii kwa, ‑wɛe ɔ poɛ "jri 'de "kpa "kpei, ɛ ke 'sraa -ɛ ‑wee' nɛ dia -ɛ nʋa ‑klae" pɛɛn. 18 Ɔ cɛn bli' beɔ ke, 'blae ‑gblɔ Israɛ -nyʋ ja ‑ɩ ‑nɩa ʋʋ ke Nyɔsoa 'a wlu "kpei ‑sea' sraa ‑pliɔn'. Ɔɔ' "nynuu jɔ ɩa' nmɔ, ‑wɛe ɔ -gbɛ' "kpa 'a 'fɔ ‑wee' "klein. 19 -Wɛe ʋʋ "nyɩɔ bli 'a 'cna ke 'blae 'a 'cna o, ɛɛ' ‑kun', 'cna ‑nɩa ɛɛ' 'diidɩ "jrui, ɛɛ' 'kpʋ ‑kwlʋtɛ ke, ɛɛ' -kwʋo" -pʋn" pɛe ke-. 20 Aarɔn ɔ' "nyunuu ‑teɛ' ɩa' 'cna 'de nmi 'sɔɔn ‑nɩa 'mʋʋa‑ 'a ‑kwlɩ" ‑puo "kpei, ‑wɛe Aarɔn po 'ɩa 'cna "jri 'de "kpa "kpei. 21 Aarɔn "nyɩ Nyɔsoa ɩa' ‑kwlɩ" ‑puo ke ɛɛ' dianbʋ, ka nyɔ ɔ nʋa Moisɩ "sia 'nynɩ.
22 Aarɔn ‑kɔa' dɛsaʋn 'a ‑kwɛa' 'a 'sraa ke, 'sraa ‑ɛ ‑wee' nɛ dia ke, nyʋ ke Nyɔsoa 'a wlu "kpei ‑sea sraa ‑saa 'sʋɛ, ɔ kpa sʋn -wee' "jɛi ‑wɛe ɔ po nyʋ ‑wee' "diwan, 'sʋ ɔ 'wlʋɛ 'e "kpa "kpei ɔ "siɛ i. 23 Moisɩ ke Aarɔn pa 'e -tan 'tan ‑ɛ ‑sɔn nyʋ ke Nyɔsoa a ‑gbʋʋan "i di, ‑wɛe ʋʋ "siia "kpae' 'sʋ ʋʋ poɛ 'blʋa ‑wee' "diwan-. 'Sʋ Nyɔsoa 'a kɛɛma' dɛ poɛ "jri "kpae' ʋʋ ‑wee' jeɛ. 24 Nɛ 'wlʋɛ 'de Nyɔsoa "juɛi, ‑wɛe ɛ di 'sraa ‑ɛ ‑wee' nɛ dia ke, ɩa' 'cna ‑nɩa 'e "kpa "kpei ke-. Ʋʋ 'jeɛ 'sʋɛ, 'blʋa ‑wee' a nʋɛ 'mʋa‑, ‑wɛe ʋʋ ‑wee' ‑cri" "jrii.