Aarɔn ke ɔɔ' "nynuu 'a kpɔ "i -tea' 'nynɩ "kpae' poa'
8
Nyɔsoa wluɛ Moisɩ ‑pee ɛ 'na: 2 ‑ɩn -da Aarɔn ke ɔɔ' "nynuunmai -nynuu, ‑ɩn -duo" 'sraa ‑saʋn 'a 'ʋnpaadɩ 'ʋn, ɛ ke 'cna nyʋ a poa nyʋ "jru ke-, ‑ɩn kpa bli' beɔ nyʋ 'jea dɛsaʋn 'a -kwɛa 'a 'sraa 'ʋn ‑saa, 'blae ‑gblɔ 'sɔɔn ɛ ke ‑dipɛn' nyʋ sea ‑puun" dɛ o po 'a too" ke, 3 ‑wɛe ‑ɩn kɩɩɛn nyʋ ‑wee' "klein "jrui, 'de ‑tan 'tan ‑ɛ ‑sɔn nyʋ ke Nyɔsoa a ‑gbʋʋn' a "i "juɛi.4 Ka Nyɔsoa "sia 'nynɩ 'mʋʋa-, 'ka Moisɩ nʋ ‑wɛe nyʋ ‑wee' 'kɩɩɛn "jrui 'de ‑tan 'tan ‑ɛ ‑sɔn nyʋ ke Nyɔsoa a ‑gbʋʋn' a "i "juɛi. 5 'Sʋ dɩ Nyɔsoa "nyɩa Moisɩ ʋʋ 'jea nʋɛ, ɔ 'tmʋɩɩ 'de nyʋ gbaea ‑pee. 6 -Wɛe ɔ toɛ Aarɔn ke ɔɔ' "nynuunmai -nynuu nyʋ -nɩa 'e "kpae' "i, ‑wɛe ɔ nʋ "ni ɔ jre ʋʋpʋ‑. 7 Ɔ paa Aarɔn "bai ‑tɔɔn 'ʋn, ɔ blɛ wlu "kpei, ‑wɛe ɔ po 'e "kpei bai", ‑wɛe ɔ ‑tu" 'e Ɛfɔdɩa, 'de ɔ nʋ efɔdɩ 'a "dbu, ‑wɛe ɔ san "kpei bai" i. 8 ‑Pɔɔ ɔ ‑pee a 'de ɔ ‑kwli'' ɛ, ɛmɛ ‑ɛ 'di nyɔ ɔ po Urimʋb ke, Tumimʋc ke. 9 Ɔɔ ‑piiɛn' Aarɔn dɛfɔ "jrui, ‑wɛe 'de ɛ "juɛi ɔ ‑teɛ 'e "sani ‑gbla ‑ɛ ‑kwɛai ɛ -toɛ ka ɔ -tea kpɔ "i, ka Nyɔsoa 'a ‑cɛ" "sia ɛɛ' 'nynɩ 'de Moisɩ -pee.
10 Moisɩ "duo 'cna nyɔ ɔ poa nyʋ "jru 'ʋn ɛ, ‑wɛe ɔ poɛ ‑ta -kwɛai ke ɛɛ' dɩ ‑wee' "klein "kpei, 'kamɔ ɔ nʋ ‑wɛe ɔ ‑tɩɩ kpɔ "i. 11 Ɔ ‑gba' 'cna "kpa ‑ɛɛ "kpei nyɔ ɔ ‑saa 'sraa kpɛ ‑mɛ" 'sɔn, ‑wɛe ɔ -te' "kpa -ɛɛ "kpei nyɔ ɔ -saa 'sraa o, ɛɛ' "tiei- o, -tiɛn -gblʋ ke ɛɛ' 'di -te dɛ o, ɔ pʋɩ 'cna "kpei, ‑wɛe ɔ 'jɩ kpɔ "i ‑tee-. 12 'Sʋ ɔ poɛ 'cna 'de Aarɔn "jru, ‑wɛe ɔ 'je kpɔ "i ‑teɛ. 13 Ɛ 'wlʋɛ ‑mɛ "kpei 'sʋɛ, ɔ 'kpaa 'e Aarɔn 'ɔ "nynuu, ɔ paa ʋʋpʋ bai" ‑tɔɔn 'ʋn, ɔ blɛ wlʋ "kpei, ‑wɛe ɔ -teɛ ʋʋpʋ 'sraa -saʋn 'a 'fan "jru, ka Nyɔsoa 'a ‑cɛ" 'kpa "sia 'nynɩ 'de Moisɩ -pee ɛ.
14 'Sʋ ʋʋ jɔ bli' ‑ɛ ‑jea dɛsaʋn 'a 'sraa ‑saa a. Aarɔn ke ɔɔ' "nynuu ‑teɛ kwa "jru. 15 Moisɩ cɩɛn ‑pliɔn', ‑wɛe ɔ "duo ɛɛ' nmɔ 'ʋn 'de ɔ ‑cɛi", ‑wɛe ɔ blɛɛ "kpa 'a -gblʋn, 'de ɛ 'jei ‑kwɛ. ‑Wɛe nmɔɔ' tɔo ‑sia 'e ɛ, ɔ wlɛi 'de "kpa ‑sɔn 'de ɔ ‑teeɛ kpɔi", ‑wɛe nyʋ 'je dɛsaʋn 'a kwɛɛa' 'a 'sraa ‑sa 'de mu. 16 Ɛɛ' 'mɩ 'a 'cna ke, ‑jɩ ‑cri" ɛɛ' -kuo" -pʋn" pɛe "jrui ke, ɛɛ' 'kpʋ ‑kwlʋtɛ 'sɔɔn ke, ɩa 'cna ke, ɔ "dui 'ʋn ɛ ‑wɛe ɔ puɩ "jri 'de "kpa "kpei. 17 'Kaa bli' a tɔo ‑sia 'e: Ɛɛ ku, ɛɛ' ‑sɩɩɛn, ɛɛ' "nyni, ɔ poɩ "jri 'de dɛkpɔ 'de, ka Nyɔsoa 'a ‑cɛ" "sia 'nynɩ ɔ 'jea nʋɛ.
18 'De ‑mɛ 'de ɛ, ʋʋ jɔ 'blae -gblɔ, -ɛ ‑jea 'sraa ‑ɛ ‑wee' nɛ 'jea 'di 'ʋn nʋʋɛ, Aarɔn ke ɔɔ' ''nynuu -teɛ' kwa "jru. 19 Moisɩ cɩɛn ‑pliɔn', ‑wɛe ɔ blaa ɛɛ' nmɔ "kpa 'a 'fɔ ‑wee'‑. 20 Nyʋ cɩɛn ɛ kpɔ, ‑wɛe Moisɩ po ɩ ke ɛɛ' "jru o, ɛɛ' 'cna "jri. 21 Ɛɛ' 'mɩ ke ɛɛ' bɩ ke, ʋʋ wɔɔ 'ɩ 'de "ni o, ‑wɛe Moisɩ puɩ ‑wee' "jri 'de "kpa "kpei, ɛ nɩɛ 'sraadɛ ‑ɛ ‑wee' nɛ dia, -ɛɛ 'nʋ a jaa Nyɔsoa 'a pɛe ja ‑o, 'sraadɛ nyʋ "nyɩ 'a Nyɔsoa, 'ɛ ‑wee' nɛ dia' ‑o, ka Nyɔsoa 'a ‑cɛ" "sia 'nynɩ 'de Moisɩ ‑pee ɛ.
22 Ɛ 'wlʋa ‑mɛ "kpei ɛ, Moisɩ jaa 'e 'blae ‑gblɔ ɔ' 'sɔɔn ‑nɛ ‑nɩa 'nynɩ "kpae poa' 'a ‑nɩ ɛ, Aarɔn ke ɔɔ' "nynuu ‑teɛ' kwa "jru. 23 Moisɩ cɩɛn ‑pliɔn' ‑wɛe ɔ blɛɛ 'ɛ nmɔ Aarɔn ɔ' dian doun" 'a pɔɔ', ɔ blɛɛ ɔɔ' dian sʋn 'a ‑cɩɛ ‑gblo ɛ ke ɔɔ' dian bɩɛ -gblo. 24 ‑Wɛe ɔ 'kpaa 'e Aarɔn 'ɔ "nynuu-, ɔ blaa nmɔ 'de ʋʋa' dian doun" 'a pɔɔ' 'de, ʋʋa' dian sʋn 'a ‑cɩɛ -gblo ke ʋʋa' dianbʋ 'a bɩɛ -gblo. Nmɔɔ' tɔo ‑sia 'e ɛ ɔ blɛɛ "kpa 'a 'fɔ ‑wee'‑. 25 Moisɩ "duɛ ɛɛ' 'cna o, ɛɛ' ‑kun' o, 'cna "klein ‑pooa ɛɛ' 'mɩ "jru i o, ɛɛ' -kuo" -pʋn" pɛe "jru i o, ɛɛ' 'kpʋ ‑kwlʋtɛ 'sɔɔn ke ɩa 'cna ‑nɩ "jru i o, ɛ ke ɛɛ' dianbʋ ke-. 26 Too" ‑ɛɛ 'di ‑dipɛn' nyʋ sea ‑puun" dɛ o po nɩa, ‑wɛe ‑ɛ ‑tea 'de Nyɔsoa "juɛi 'mʋʋa-, ɔ ‑sae' ‑kato'd -sea' -puun" dɛ o mu nyɔ ɔ da -wɛe nyɔ ɔ dia, ɛ ke ‑jɛ nyʋ piia 'cna ke, ɛɛ' -saan"- ‑nɩ ke, ɔ ‑tɩ' 'de nmi 'a 'cna ke, ɛɛ' bʋ ‑nɩa 'mʋʋa- "kpei, 27 Ɔ ‑tɩ' ‑wee' "klein 'de Aarɔn ke ɔɔ' "nynuu 'kwa, ‑wɛe ɔ 'tmʋ ʋʋpʋ ʋʋ 'jɩ Nyɔsoa "i to-, -wɛe ʋʋ to ɛ "i ka nyɔ ɔ nʋa see ɛ. 28 'Sʋ Moisɩ "duo dɩ ‑nɩa 'mʋʋa- 'ʋn ɛ kewlɛ' 'de ʋʋpʋ 'kwa, ‑wɛe ɔ pʋɩ "jri 'de 'sraa ‑ɛ ‑wee' nɛ dia' "kpei. Ɛ nɩɛ dɛ 'ɛ "jri "kpae pooa' 'sraa, ‑ɛɛ 'nʋ 'a jaa Nyɔsoa 'a pɛe ja, nyʋ "nyɩa Nyɔsoa, -ɛ -wee' nɛ dia o-.
29 Moisɩ "duo 'blae -gblɔ -nɩa 'nynɩ "kpae' po sraa 'a ‑kwli" -puo 'ʋn ɛ, ‑wɛe ka nyɔ ɔ toa dɛ Nyɔsoa "i ɔ nʋ 'kan-. Ɔɔ' ‑nɩ di na' ‑nao, 'kamɔ Nyɔsoa blɛ ɛɛ' kɛ' ɛ "nyɩɔ.
30 'De ‑mɛ 'de ɛ, Moisɩ "duo 'cna nyʋ poa nyʋ "jru o, nmɔ ‑nɩa "kpa "kpei 'ʋn ɛ, ‑wɛe ɔ -gbɩ' Aarɔn ke ɔɔ' 'ʋnpaadɩ, ɔɔ' "nynuu‑ ke ʋʋa' 'ʋnpaadɩ ke-. 'Kamɔ ɔ ‑tee Aarɔn o, ɔɔ' "nynuu o, ʋʋa' "wlii‑ kpɔ "i.
31 Moisɩ wluɛ Aarɔn ke ɔɔ' "nynuu ‑pee ɔ 'na: Ao pi 'blae 'sɔɔn -nɩ 'a nmi 'a ‑jɛ -siae', 'de ‑tan 'tan ‑ɛ ‑sɔn nyʋ ke Nyɔsoa a ‑gbʋʋn' a "i "juɛi. Aoa muɛ ɛ ke, ‑dipɛn' ‑nɩa 'de 'nynɩ "kpae' po sraadɛ 'ɛ too" 'di diia', ka 'ɩn bla ɛɛ' kɛ' 'ɩn "nyɩa aopʋ, ‑wɛe 'ɩn 'na: Aarɔn ke ɔɔ' "nynuu a muɩ dia'. 32 Aoa muɛ nmi ke ‑dipɛn' ɩa' tɔe ‑sia 'e "jri poa'. 33 'De 'wɩ ‑mɛ" 'sɔn 'di ɛ, dɛ -mua' ‑ɛ ‑jɛa aoa 'nynɩ "kpae poa' 'a ‑kɔ' 'ɔ ‑kwɛɛa', ao se ‑tan 'tan ‑ɛɛ ‑sɔn nyʋ ke Nyɔsoa a ‑gbʋʋn' a "i 'di 'de -gbɛin" -jei" fɔo 'wlʋ i. Nyʋ a muɛ 'wɩ ‑mɛ" 'sɔn 'ʋn "dua, ‑wɛe nyʋ 'je aoa dbo 'a 'nynɩ "kpae' po. 34 Dɛ ‑a nʋa 'de aopʋ "kpei ‑ta -sɩan, Nyɔsoa mɛ ‑da 'kan, ‑wɛe ɛ 'je aoa' dɛsaʋn ‑kwɛ'. 35 Aoa muɛ i ‑tea', 'de ‑tan 'tan ‑ɛɛ ‑sɔn, nyʋ ke Nyɔsoa a ‑gbʋʋn' a "i 'di 'de -gbɛin" -jei" fɔo, de 'wɩ ‑mɛ" 'sɔn 'di, "maʋ o 'jrʋ ‑gbao o, aoa muɛ Nyɔsoa 'a dbo nʋa', ‑wɛe ao je 'mɛ, dɛ ‑nʋɛ 'kamɔ Nyɔsoa bla ɛɛ' kɛ' ɛ "nyɩ 'ʋn. 36 Dɩ Nyɔsoa jaa 'de Moisɩ 'kwa, ‑wɛe ɔ "nyɩa Aarɔn ke ɔɔ' ''nynuu ʋʋ 'jea nʋɛ, ʋʋ nʋɩ ‑wee' 'mɛ.