Nyɔ 'ɔ ‑kɔ "i nmae 'a 'sraa
7
Kɛ' ‑blaa 'de nyiɔ 'ɔ ‑kɔ "i nmae sraa 'a ‑tɩ' 'ʋn ɛ ka: Ɛɛ' dɛtu ‑teeɛ kpɔ "i ka -cɔɔn' ka-. 2 Dɛ nyʋ 'jea nyʋ ke Nyɔsoa 'a wlu "kpei i -sea 'sraa 'ʋn ‑saa 'mʋʋa-, nyɔ ɔ muɛ ‑pliɔn' cɛan', 'de ‑ta nyɔ ɔ cɛan 'sraadɛ ‑ɛ ‑wee' nɛ dia ‑pliɔn', ‑wɛe 'sraa -sai 'je ɛɛ' nmɔ "kpa 'a 'fɔ ‑wee' "klein -gba. 3 Ɛɛ' ‑ta -blea 'cna ‑wee' "klein, ɛmɛ 'sraa -sai 'je 'sraadɛ 'ʋn nʋʋ‑: Ɛɛ' ‑kun', ɛɛ' 'cna ‑nɩa 'de ɛɛ' 'diidɩ kwii, 4 Ɛɛ' 'kpʋ ‑kwlʋtɛ 'sɔɔn, ɩa 'cna ‑nɩa ɩ "jrui ke, ‑jɩ ‑nɩa 'de ɛɛ' ‑kwlʋ 'dii ke, ɛɛ' -kuo" -pʋn" pɛe, mɩ nyɔ 'je 'e ɛɛ' 'kpʋ ‑kwlʋtɛ -pʋn" ‑sa. 5 'Sraa ‑sai a mu ɩ "jri pooa' 'de "kpa "kpei. Nyɔ 'ɔ ‑kɔ "i nmae 'sraa nɛ ɛɛ dia 'de Nyɔsoa ‑pee ‑o. 6 Nmai nynuu‑ "klein ‑nɩa 'de 'sraa ‑sai 'a "ji 'di -a diɛ, ʋʋa diɛ' 'de ‑ta ‑kwɛa i ɛ, dɛ ‑nʋɛ ɛɛ' dɛtu ‑kwɛ i 'pepe. 7 Ka dɛsaʋn 'a ‑kwɛɛa' 'a 'sraa nmi nʋa kpɔ "i poɛ sʋn ɛ, 'ka nyɔ ɔ nʋ 'de nyʋ 'a ‑kɔ "i nmae 'a 'sraa 'a ‑tɩ' 'ʋn ‑ke: Ɛɛ' 'sraa nmi nɩɛ 'sraa ‑sai, ‑ɔ poa 'sraa ‑nɩa 'mʋʋa- ‑je o 'a dɛ ‑o.'Sraa -sai 'a -nɩ
8 ‑Bo 'sraa ‑sai jrɔ' to nyɔ jrɔ' ɔ' 'sraa ‑ɛ ‑wee' nɛ dia Nyɔsoa "i ɛ, ‑mɛ ɔmɔ ‑ble ɛɛ' 'sraadɛ 'ɛ ku. 9 'Sraadɛ "klein ‑wlʋa 'de 'blʋ 'ʋn, ‑bo nyɔ piɛ 'de nɛ "kpei o, 'de jae‑ 'di o, de poɛlɩ 'di mɔɔ' ‑cɛ" o, 'sraa ‑sai ‑ɔɔ toa' ɛɛ' 'sraadɛ tu Nyɔsoa "i mɔ ‑bleɛ. 10 'Kaa 'sraadɩ "klein ‑wlʋa 'de 'blʋ 'ʋn -ɛ -sea piɛ ɛ, ‑bo nyɔ "bii ɛ 'cna "jri o, ‑bo 'cna seɛ ‑pʋn" nɩ o, "nynuu nmai "klein ‑wlʋa 'de Aarɔn ɔ' "ji 'di ‑bleɛ, nyʋ se ʋʋ "kpei i ‑seea i.
Wlu "kpei -sea' 'a 'sraa
11 Kɛ' ‑blaa 'de nyɔ ke Nyɔsoa 'a wlu "kpei ‑seea' sraa nyɔ ɔ ‑sa, nyʋ "nyɩa Nyɔsoa ɛ ka: 12 ‑Bo ɛ nɩ Nyɔsoa 'sɛpo sraa 'a ‑tɩ' 'ʋn ɛ, -mɛ 'de "nɔdɛ- ‑nɩa 'mʋʋa- "kpei ɛ, ‑kato'a klae" nyʋ sea ‑puun" dɛ o po nyɔ ɔ da -wɛe nyɔ ɔ dia, ‑ɛɛ 'pɔo nyʋ "bia 'cna "jrii ɛ, ‑wɛe ɩa' mɩɩ" nyʋ sea ‑puun" dɛ o po, ‑wɛe nyɔ ɔ ‑gba' 'cna "kpei ɛ, ɛ ke ‑kato' nyʋ nʋa faipʋ ‑kwɛa i 'pepe nyʋ "bia 'cna "jrii ɛ, ɩmɩ nyɔ ɔ ‑saa 'sraa 'ʋn. 13 Nyɔ ɔ ‑teɛ' ‑dipɛn' nyɔ ɔ poa ‑puun" dɛ o "kpei, ɛmɛ ‑gbaa nyʋ ke Nyɔsoa 'a wlu "kpei ‑sea 'sraa nyʋ ja 'de Nyɔsoa 'sɛpo -tɩ 'ʋn. 14 Nyɔ ɔ ‑sɩ "kpei mɩ" mɩ", ‑wɛe nyɔ ɔ "nyɩ Nyɔsoa, ‑jɩ nyʋ ‑sae' 'mʋʋa-, 'sraa ‑sai ‑ɔ ‑blaa nyʋ ke, Nyɔsoa 'a wlu "kpei ‑sea' sraa 'a nmɔ "kpa a, ɔmɔ ‑blɩ. 15 Nyɔsoa 'a wlu "kpei ‑sea 'sraa 'a nmi nyʋ ja 'de Nyɔsoa 'sɛpo ‑tɩ' 'ʋn ɛ, nyʋ -jɩ a muɛ ɩ ‑wee'‑ di 'a, 'de 'wɩ ‑ɛ 'di nyʋ ‑saa ɛɛ' 'sraa tu. Ɛɛ' jrɛ' se ‑sɔn' 'de 'pɛɛn i.
16 'Kaa nyɔ ke Nyɔsoa 'a wlu "kpei i ‑seea 'sraa ‑nɩa 'mʋʋa- -bo nyɔ jɛ, ‑wɛe ɔ 'je wlu cɛn 'de dɛ jrɛ' 'ɛ ‑tɩ' 'ʋn, 'de kewlɛ ɔ ‑sa dɛ kwai ɔ je Nyɔsoa "nyɩ o, nyʋ a muɛ ɛɛ' nmi 'a jrɛ' dia', 'wɩ ‑ɛɛ 'di nyʋ a ‑saa ɛɛ' 'sraa tu-, 'kaa ɛɛ' -sɔn' dee ‑sɩan', ɛɛ' tɔo ‑siae' ɛ, nyɔ 'bɛɛ ɔ 'jeɛ di. 17 ‑Bo ɛ 'pɛɛn 'wɩ 'sɔɔn 'de ɛ, ‑mɛ nyɔ ɔ poɛ ɛɛ' nmi tɔo ‑sia 'e "jri. 18 'Kaa nyɔ ‑ɔɔ mua ɛɛ' nmi di 'a, 'de 'sraa 'a 'wɩ 'a taan ‑nɛ "kpei ɛ, ‑mɛ ɔɔ' 'sraadɛ se kpʋʋn ɛ i, ɛ se ja ‑gbʋʋn ɛ i. Dɛ dɛ‑nʋɛ' ɛɛ' nmi tu kpʋɛn ‑flɛn", ‑wɛe nyɔ ‑ɔɔ muɛ di 'a ‑teɛ ɔɔ' ‑cɛ" dɛsaʋn "jru.
19 Ɛɛ' nmi bla dɛjrɛ' ‑sea' i ‑kwɛ "i, ɛ se dii ɛ i, nyɔ ɔ poɛ "jri. Nyɔ "klein ‑kwɛai mɔ ‑bɛɛ ‑ɔ ‑je ɛɛ' 'sraa tu 'a nmi di, 20 'Kaa ‑bo nyɔ jrɔ' di nyʋ ke Nyɔsoa 'a "i "sii sraa, ‑ɛ ‑nɩa Nyɔsoa 'a nmi ɛ, de ‑mɛ ɔ se i ‑kwɛɛ, nyʋ 'jeɔ 'de Israɛ -nyʋ "kwlu ‑sa. 21 'Ka mɔ ɛ nɩ ‑ke, ‑bo nyɔ jrɔ' di ɛɛ' 'sraadɛ tu-, ‑ɛ ‑nɩa Nyɔsoa 'a 'sraadɛ 'ɛ nmi, 'de ‑mɛ ɔ bla dɛjrɛ' ‑wlʋa 'de nyiɔ ‑pʋn" "i, ‑wɛe ‑ɛɛ kpʋʋan nyiɔ ‑flɛn" ɛ, "ko ɛ nɩɛ nmi -sea' 'mɛ jrɛ' ‑ɛ sea i ‑kwɛ, 'de dɛjrɛ' ‑ɛ sea i ‑kwɛ nyɔ 'ɔ blai" ɛ, ‑mɛ nyʋ 'je ɔɔ' nyɔ tu 'de Israɛ -nyʋ "kwlu ‑sa.
22 Nyɔsoa wluɛ 'de Moisɩ ‑pee ɛ 'na: 23 ‑Ɩn -tmʋʋ' Israɛ nyʋ ‑ɩn ‑na: Ao se bli' o, 'blae o, gbao 'a 'cna dii. 24 Nmi ‑mɛa "cɛ o, ‑jɛ kpʋʋn nmi 'faiai o, ‑mɩ ɩa 'cna 'bɛɛ ɛ 'je dɛjrɛ' nʋ, 'kaa ao sɩ dii. 25 Nyɔ "o nyɔ ‑ɔɔ mua nmi nyʋ ‑saa 'sraa 'ʋn, ʋʋ "nyɩa Nyɔsoa nyɔ 'jea "jri po 'a 'cna dia', nyʋ a muɔ 'de Israɛ -nyʋ "kwlu ‑saa'. 26 ‑Ta "oo ‑ta aoa mua "ti 'a, ‑bo ɛ nɩ nʋʋɛ o, ɛ nɩ nmi ‑sia 'e mu ao sɩ 'a nmɔ dii. 27 Nyɔ ‑ɔɔ mua nmi jrɛ' 'ɛ nmɔ dia' a, nyʋ a muɔ 'de Israɛ -nyʋ "kwlu ‑saa'.
28 Nyɔsoa wluɛ 'de Moisɩ ‑pee ɛ 'na: 29 ‑ɩn ‑wlu 'de Israɛ -nyʋ ‑pee, ‑ɩn ‑na: Nyɔ ‑ɔɔ mua ɔ ke Nyɔsoa 'a wlu "kpei ‑seea sraa ‑saa', ɔɔ muɛ ɛɛ' ‑jɛ ɔ 'jea Nyɔsoa "nyɩ jaa'. 30 Ɔɔ' ‑cɛ" 'kpa ‑ɔɔ muɛ kwa 'ble 'a, ‑ɔ ja ɛɛ' 'cna Nyɔsoa "juɛi ‑wɛe nɛ 'jeɛ ‑wee' di. Ɔɔ ja ɛɛ' -pɛɛ, ‑wɛe ka nyɔ ɔ nʋa ɔ 'je ɛɛ' -pɛɛ 'kan nʋ 'de Nyɔsoa "juɛi. 31 'Sraa ‑sai a muɛ ɛɛ' 'cna "jri poa', 'de "kpa "kpei, 'de ɛɛ' -pɛɛ ‑mɛ, Aarɔn ke ɔɔ' "nynuu‑ ‑bleɛ. 32 Aoa muɛ ao ke Nyɔsoa 'a "isii sraadɛ 'ɛ dianbʋ 'sraa ‑sai "nyɩ 'a. 33 Aarɔn 'ɔ "ju ‑jɔɔ mua nyɔ ke Nyɔsoa 'a "isii 'sraadɛ 'ɛ nmɔ ke, ɛɛ' ‑ta blea 'cna Nyɔsoa "nyɩ 'a, ɔmɔ ‑ble ɛɛ' dianbʋ-. 34 Israɛ -nyʋ ke, Nyɔsoa 'a "isii sraadɛ 'ɛ -pɛɛ ke, ɛɛ' dianbʋ, ʋʋa ‑saa 'de ʋʋa 'sraadɛ "kpei, ʋʋa "nyɩa 'ʋn ɛ, 'ma "nyɩɛ Aarɔn ke ɔɔ' "nynuu‑, ɛ nɩɛ kɛ' ao 'jea nʋ nɔ" "oo nɔ" ‑wee' "klein 'di. 35 Ɛmɛ ‑nɩ Aarɔn ke ɔɔ' "nynuu 'a ‑nɩ, ʋʋ 'jea 'de 'sraa ʋʋ "nyɩa Nyɔsoa, ‑ɛ ‑wee' nɛ dia "kpei ‑sa, 'wɩ ‑ɛɛ di nyʋ 'jea ʋʋ kpɔi" ‑tee, ‑wɛe ʋʋ 'jea Nyɔsoa 'a 'sraa ‑saʋn nɩɛ. 36 Ɛmɛ Nyɔsoa 'na Israɛ -nyʋ "nyɩ ʋʋpʋ‑ dɛ tba 'wɩ ‑ɛɛ 'di, nyɔ ɔ mu ʋʋpʋ‑ 'cna "jru poa'. Ɛ nɩɛ kɛ' ‑ɛ ‑je nʋʋɛ ‑o, 'de nɔ" "oo nɔ" ‑wee'‑ 'di, 'de ʋʋa' "ji 'a "ji 'a ‑tɩ' 'ʋn.
37 Ɩmɩ ‑nɩ kɛ' ‑ɩ ‑blaa, 'de 'sraadɛ ‑ɛ ‑wee' nɛ dia o, 'sraadɛ -wlua 'de 'blʋ 'ʋn o, dɛsaʋn 'a ‑kwɛɛa 'a 'sraa o, nyɔ 'ɔ ‑kɔi" nmae 'a 'sraa o, nyʋ kpɔi" ‑tea' 'a 'sraa ke, nyʋ ke Nyɔsoa 'a wlu "kpei ‑seea 'sraa 'a ‑tɩ' 'ʋn. 38 Nyɔsoa "nyɩ 'ɩa kɛ tu Moisɩ mɛ 'de Sinai crʋ "kpei 'de -pɩɔn" 'blʋa- "kpei, 'wɩ ‑ɛɛ 'wɩ tu 'di, ɔ 'na Israɛ nyʋ "nyɩ ʋʋa' 'sraadɛ Nyɔsoa.