'Sraa ‑saʋn 'a kɛ' 'ɛ "kpei ‑tu" ‑nɛ
6
Nyɔsoa wluɛ Moisɩ ‑pee ɛ 'na: 2 ‑Ɩn -tmʋ kɛ' ‑nɩ 'de Aarɔn ke ɔɔ' "nynuu‑ ‑pee ‑ɩn ‑na: kɛ' ‑nɩa 'e 'sraa ‑ɛ ‑wee' nɛ dia 'a ‑tɩ' 'ʋn ɛ ka: Ɛɛ' 'sraa tu a muɛ 'de "kpa "kpei nɩa' mamaʋ 'sʋ, nɛ se 'mʋ i 'de ɛ "kpei ‑sɔn' 'e ‑sɩn'. 3 ‑Klae" pɛɛn 'sraa ‑sai "jri ɔɔ' ‑paika, ɔ paa ɔɔ' bai" ‑tɔɔn 'ʋn -ɩ -wee' 'fɛɛn tae' nʋa, ɔ ‑sa 'sraadɛ 'ɛ 'cna biʋn' ‑nɩa 'de "kpa "kpei 'de mu, ‑wɛe ɔ poɛ 'e "kpa ‑pʋn". 4 'Sʋ ɔ pooɛ ɔɔ' "wliiɛ‑ fai", ‑wɛe ɔ kpa biʋn' ‑nɩa 'mʋʋa- 'de dɛkpɔ 'de, ‑ta ‑kwɛai. 5 Nɛ ‑ɛɛ wan 'de "kpa "kpei, se 'mʋ i nɔ' 'kmʋ. 'Sraa ‑sai 'a muɛ nae 'de pooa' -klae" pɛɛn jeejee, ɔɔ muɛ 'sraa ‑ɛ ‑wee' nɛ dia 'de nɛ "kpei pooa', ‑wɛe ɔ 'je nyʋ ke Nyɔsoa 'a wlu "kpei i ‑sea 'a sraa 'cna "jri po 'demu. 6 Nɛ ɛ muɛ waan' nɔ" "oo nɔ" ‑wee' 'di, 'de "kpa "kpei, ɛ se 'mʋ i 'nɔ 'kmʋ.7 'Sraa dɛ -wlʋa 'de 'blʋ 'ʋn nyɔ ɔ "nyɩa Nyɔsoa 'a kɛ' ka: Aarɔn ɔ "nynuu a muɛ Nyɔsoa "i toa' 'de "kpa "juɛi. 8 'Sraa ‑sai a muɛ faipʋ ‑nmɔa "jrii 'pepe 'mʋʋa- ke, 'cna ke paifɛn' ‑ɛɛ 'nʋ nmɔa "jrii ɔ ja -ɩ "bia "jri i kwa "jii 'a, ‑wɛe ɔ 'jɩ "jri po 'de "kpa "kpei, 'de ɩa 'nʋ 'je Nyɔsoa 'a pɛe jajaa-, ‑wɛe ɩ 'je ɔɔ' 'sraa dɛ 'ɛ "jriɛ o sie dɛ nɩ. 9 'Sraadɛ 'ɛ tɔo ‑sia 'e 'mʋʋa-, ʋʋ seɛ ‑puun" dɛ o poi, ‑wɛe Aarɔn ke ɔɔ' "nynuu‑ 'jeɛ di, 'de 'sraa ‑saɩn' 'a ‑ta ‑kwɛai 'de -ta nyʋ ke Nyɔsoa a -gbʋʋan "i 'a "kpae 'a -ta -tea kpɔi". 10 Nyʋ seɛ ‑puun" dɛ pii i 'nɔ 'kmʋ. Ɛ mɛ ‑nɩ ʋʋa' ‑nɩ 'ɩn "nyɩa ʋʋpʋ‑ 'de 'sraa dɛ ‑ɛ ‑wee' nɛ dia' o. Ɛɛ' dɛtu ‑kwɛ i 'pepe, ka dɛsaʋn 'a ‑kwɛɛa 'a 'sraa ke, nyɔ 'ɔ ‑kɔ "i nmaea' 'sraa nɩa. 11 Nmai nynuu‑ "klein ‑wlʋa 'de Aarɔn 'ɔ "ji 'di, bɛɛ' ʋʋ 'jeɛ di. Ʋʋa "ji 'a "ji 'a dɛ ‑o, 'de nɔ" "oo nɔ" ‑wee'‑ 'di, -wɛe nyɔ ɔ -sae' 'sraadɛ ‑ɛ ‑wee' nɛ dia nyɔ ɔ "nyɩa Nyɔsoa "kpei. Nyʋ "klein ‑a muɛ "i blaa' 'je kpɔ "i ‑teeɛ.
12 Nyɔsoa wluɛ 'de Moisɩ ‑pee ɛ 'na: 13 Aarɔn ke ɔɔ' "nynuu‑ ke, 'dɛ ʋʋ 'jea 'sraa 'ʋn ‑saa ʋʋ 'jea Nyɔsoa "nyɩ, -sɔn -tɩ nyɔ po ʋʋpʋ 'cna "jru, ‑wɛe ʋʋ 'jea 'sraa -sai klaa" 'kpa 'de ʋʋ 'jea kpɔ "i ‑tee ɛ ka: Faipʋ ‑nɩa 'pepe 'a ''cio taan -ɛ -je 'sraa -saa 'wɩ "o 'wɩ -wee' di, ɛɛ' tɔo ‑klae" pɛɛn, ‑wɛe ɛɛ' tɔo ‑kwie" ka-. 14 Faipʋ ‑nɩa 'mʋʋa-, nyɔ ɔ muɛ 'cna nʋa', ‑wɛe ɔ 'jeɛ bla, ‑wɛe nyʋ 'je ɛɛ' kpan pi 'de poɛlɩa 'di. Ɛɛ' tii ‑ɩ ‑cɛɛan i 'mʋʋa-, mɛ nyʋ 'je 'sraa 'ʋn ‑saa, 'de ɛɛ' nʋ' 'je Nyɔsoa 'a pɛe jajaa‑. 15 ‑Bo Aarɔn ɔ' "ju due' pooɛ 'cna "jru, ‑wɛe ɔ 'jeɔ ‑kɔo sii ɛ, 'sraa due' koun ‑nɩa 'mʋʋa-, mɛ ɔ 'je ‑sa ‑wi" ‑wee' ‑ke: Ɛ nɩɛ Nyɔsoa 'a ‑nɩ ‑o jeejee, ɛ ‑wee' 'je "jri pooɛ ‑o. 16 'Sraa ‑sai 'a ‑cɛ" 'ɛ 'sraa -wlʋa 'e 'blʋ 'ʋn ɔ ‑saa, ɔɔ muɛ ‑wee' 'e to 'a, ɛɛ' jrɛ' se dii ɛ i.
17 Nyɔsoa wluɛ Moisɩ ‑pee ɛ 'na: 18 ‑Ɩn ‑wlu 'de Aarɔn ke ɔɔ' "nynuu‑ ‑pee ‑ɩn ‑na: Dɛsaʋn 'a ‑kwɛɛa' 'a 'sraa 'a kɛ ka: Dɛ nyʋ 'jea 'sraa 'ʋn ‑saa 'mʋʋa-, nyɔ ɔ muɛ ‑pliɔn' cɛan' 'de ‑ta nyʋ a cɛan 'sraa dɛ ‑ɛ ‑wee' nɛ dia ‑pliɔn' 'de Nyɔsoa "juɛi ‑ke ɛ. Ɛɛ' ‑nɩ 'sraa tu ‑kwɛ i 'pepe. 19 'Sraa ‑sai ‑ɔɔ poa ɛɛ' 'sraa tu 'a ‑saa' ‑je o ɛ, ɔɔ muɛ dia' 'de ‑tan 'tan ‑ɛ ‑sɔn nyʋ ke Nyɔsoa a ‑gbʋʋn' a 'di, 'de ‑ta -tea kpɔ "i ɛ.
20 Nyɔ "oo nyɔ ‑ɔɔ -mua' ɛɛ' 'sraa nmi "i blaa', ‑mɔ ‑teeɛ kpɔ "i. ‑Bo ɛɛ' nmɔ "to 'de "wliiɛ‑ jrɛ' "kpei ɛ, nyɔ ɔ muɛ -ta ɛ "toa wɔɔa' 'de ‑ta ‑kwɛa i ɛ. 21 ‑Bo nyɔ pi ɛɛ' nmi 'de jae‑ 'di ɛ, nyʋ a muɛ jae‑ ‑nɛ waa', 'de ‑bo ɛ nɩ 'de nɩɩɛjae 'di, ‑mɛ nyʋ 'jeɛ 'dii kplan -wɛe nyʋ 'jeɛ wɔɔ‑ 'de "niɔ- 22 Nmai nynuu "klein ‑nɩa 'e 'sraa ‑sai 'a "ji 'di -a diɛ, ʋʋa muɛ di 'a: ɛɛ' dɛtu ‑kwɛ i 'pepe. 23 'Kaa, nmi "klein nyʋ ‑saa dɛsaʋn 'a 'sraa 'ʋn, ‑wɛe ‑ɛɛ nmɔ nyʋ 'jea 'de ‑ta -kwea i kpa, nyʋ se mɛ dii. Ɛɛ' muɛ "jri pooa'.