Dɛsaʋn 'a ‑kwɛa' 'a 'sraa
4
Nyɔsoa wluɛ Moisɩ ‑pee ɛ 'na: 2 ‑Ɩn ‑wlu Israɛ -kɔʋn ‑pee ‑ɩn ‑na: ‑Bo nyɔ jrɔ' se "jrii 'jee‑, ‑wɛe ɔ 'je dɛ Nyɔsoa 'na nyʋ 'bo nʋɛ ɔ 'jeɛ nʋɛ, ka nyʋ jea nʋ 'ka ka:3 ‑Bo ɛ nɩ 'sraa ‑sai klaa", ɔmɔ ‑nʋ' dɛsaʋn, ‑wɛe ɛ kpʋʋn 'blʋa ‑wee' ‑flɛn" ɛ, ‑mɛ bli' beɔ ‑kɔ sea ‑pʋn" nɩɛ, mɛ ɔ 'je 'sraa ‑saa 'de ɔɔ' dɛsaʋn 'a ‑tɩ' 'ʋn ɔ 'je Nyɔsoa "nyɩ. 4 Ɔɔ muɛ bli' beɔ ‑nɛ 'de ‑tan 'tan ‑ɛ ‑sɔn nyɔ ke Nyɔsoa 'a ‑gbʋʋn' 'a -gbɛin" -jei" jaa', ɔɔ muɛ kwa "jru ‑tea', ‑wɛe ɔ 'jeɛ ‑pliɔn' cɛn 'de Nyɔsoa "juɛi. 5 'Sraa ‑sai klaa" a muɛ ɛɛ' 'nmɔ "dua, ɔ 'jeɛ 'de ‑ta -kwɛa i 'pepe ja. 6 Ɔɔ paa ‑cɩɛ 'de ɛɛ' nmɔ o, ‑wɛe ɔ ‑gbɛ' -ta -kwɛa i 'pepe 'a tae' fɔ 'de Nyɔsoa "juɛi kpɛ ‑mɛ" 'sɔn. 7 ‑Wɛe nmɔ ‑nɛ, ɔ 'je ɛɛ' jrɛ' "kpa ‑ɛɛ "kpei nyɔ ɔ pooa paifɛn', ‑ɛɛ nʋ' nmɔa "jrii 'a ‑gblʋn blaa 'de Nyɔsoa "juɛi, 'de ‑ta -kwɛa i. Ɛɛ' nmɔ tɔo sia 'e ɛ, ɔ 'jeɛ i 'wla 'de "kpa ‑ɛ "kpei nyɔ ɔ ‑saa 'sraa ‑ɛ ‑wee' nɛ dia ‑sɔn, ɛ nɩɛ 'de ‑tan 'tan ‑ɛ ‑sɔn nyʋ ke Nyɔsoa 'a ‑gbʋʋn' a "i 'a pana'. 8 ‑Wɛe bli' beɔ ɔ ‑saa dɩsaɩn 'a 'sraa 'ʋn ‑nɛ, ɔ 'je ɛɛ' 'cna -wee': -jɩ ‑nɩa ɛɛ' 'didɩ kwii o, -jɩ -ke ɩ "siia "i 'e ‑sa, 9 Ɛɛ' 'kpʋ -kwlʋtɛ 'sɔɔn ke 'cna ‑ɩ ‑nɩa ɛ kui ke, -jɩ -nɩa 'de ɛ ‑kwlʋdi' ke, ɛɛ' -kuo" -pʋn" pɛe ɩ mɩ nyɔ ɔ -sae' 'de ɛɛ' 'kpʋ ‑kwlʋtɛ -pʋn". 10 Ka nyɔ ɔ nʋa 'de nyɔ ke Nyɔsoa 'a wlu "kpei ‑sea' sraa ‑tɩ' 'ʋn 'ka nyɔ ɔ nʋ -ke, 'sraa ‑sai klaa" 'a muɩ "jri poa 'de 'sraa ‑ɛ ‑wee' nɛ dia 'a "kpa "kpei. 11 'Kaa bli' beɔ ‑nɩa 'mʋʋa‑ ɛɛ' ku o, ɛɛ' ‑sɩɩɛn ‑wee'‑ o, ɛɛ' "jru o, ɛɛ' ‑suui o, ɛɛ' 'mɩ ke, dɩ ‑nɩa 'de ɩ 'di ke, 12 ɔɔ muɛ bli' beɔ -siae' 'de 'sraa ‑sana' ‑saa', ‑wɛe ɔ 'jeɛ 'de dɛkpɔ 'de kpa, ‑ta -flɛn" sea nɩ nyɔ ɔ pooa 'sraa -dɛ 'ɛ biʋn' 'kwla, ‑wɛe ɔ 'jeɛ "jri po 'de nae "kpei.
13 ‑Bo ɛ nɩ Israɛ nyʋ ‑wee' se "jrii 'jee ‑ʋʋ nʋ dɛsaʋn, ‑bo ʋʋ seɛ juo mɔ 'de, ‑wɛe dɩ Nyɔsoa 'a kɛ' 'na ʋʋ bo nʋɛ, ‑wɛe ʋʋ 'jɩ nʋɛ ‑mɛ ʋʋ ‑wee' nɩɛ nyʋ 'pee kpʋan ‑o. 14 ‑Bo ʋʋ 'je ɛɛ' dɛsaʋn tu "kpei i ɛ, ‑mɛ bli' beɔ mɛ ʋʋ 'je ʋʋa' dɛsaʋn 'a 'sraa 'ʋn ‑saa. Nyɔ ɔ muɛ ‑tan 'tan ‑ɛɛ ‑sɔn nyʋ ke Nyɔsoa 'a ‑gbʋʋn' a "juɛi jaa'. 15 Israɛ ‑nyʋ 'a klae" ‑wi" a muɛ kwa "jru ‑tea', ‑wɛe ʋʋ 'jeɛ ‑pliɔn' cɛn 'de Nyɔsoa "juɛi. 16 'Sraa ‑sai klaa" a muɛ ɛɛ' nmɔ 'de ‑ta -kwɛa i 'de -tan 'tan -sɔn jaa'. 17 Ɔɔ muɛ ɔɔ' ‑cɩɛ 'de ɛɛ' nmɔ o paa', ‑wɛe ɔ 'jeɛ tae' fɔ ‑nɩa 'de Nyɔsoa "juɛi ‑gba' kpɛ ‑mɛ" 'sɔn. 18 Ɔɔ muɛ ɛɛ' nmɔ "kpa 'a ‑gblʋn blaa', 'de ‑tan 'tan ‑ɛɛ ‑sɔn nyʋ ke Kea a ‑gbʋʋn' a 'di, 'de Nyɔsoa "juɛi. -Wɛe ɛɛ' nmɔ ɔ tɔo -siae' ɔ 'jeɛ i 'wla 'de "kpaa ɛ "kpei nyɔ ɔ -saa 'sraa -ɛɛ -wee' nɛ dia sɔn -ɛ -nɩa 'de -tan 'tan -ɛɛ 'di nyʋ ke Nyɔsoa -gbʋan' "juɛi. 19 ‑Wɛe ɔ 'je ɛɛ' 'cna ‑wee' 'de ‑sa, ɔ 'jeɛ "jri po 'de "kpa "kpei. 20 Bli' 'a tɔo sia 'e muɛ, ka ɔ nʋa 'de 'sraa ɔ ‑sa, 'de ɔɔ' ‑cɛ" kpa 'a dɛsaʋn 'a ‑tɩ' 'ʋn, ka mɔ ɔ 'je nʋ. 'Ka 'sraa ‑sai klaa" 'je nʋ, ka nyɔ ɔ nʋa nyʋ ke Kea 'a wlu "kpei ‑sea' sraa, ‑wɛe Nyɔsoa 'je ʋʋa' dɩsaɩn -kwɛ'. 'Kamɔ 'sraa -sai klaa" 'je nʋ 'de ʋʋpʋ "kpei -wɛe ʋʋa' dɩsaɩn- 'je -kwɛ. 21 Ɔɔ muɛ bli' ‑nɩa 'mʋʋa‑ 'de 'sraa ‑sana' ‑saa' ɔ jɛ 'de dɛkpɔ 'de kpa, ‑wɛe ɔ 'jeɛ "jri po, ka ɛ 'tmʋʋa 'de bli -saa "i 'a ‑tɩ' 'ʋn ɛ. 'Kamɔ Israɛ ‑wee' "klein 'a dɛsaʋn 'a ‑kwɛa' 'a 'sraa 'je nɩ-.
22 ‑Bo ɛ nɩ nyɔ "jru kpɔ i ‑tei mɔ ‑se "jrii 'jee‑, ‑wɛe ‑ɔ nʋ dɛsaʋn jrɛ' Nyɔsoa ɔɔ' Kea 'na nyʋ bo nʋɛ 'de ɛɛ' kɛ' 'di, ‑wɛe ‑ɛɛ 'pee kpʋn ɛ, 23 ‑bo nyʋ 'tmʋɔ ɔɔ' dɛsaʋn ‑nɩa 'mʋʋa‑, ɔɔ muɛ ‑faan" ‑kɔ sea ‑pʋn" nɩ 'sraa 'ʋn ‑saa'. 24 Ɔɔ muɛ gbao ‑nɩa 'mʋʋa‑ kwa "jru ‑tea' kpɩɩn‑, ‑wɛe ɔ 'jeɛ ‑pliɔn' cɛn, 'de ‑ta nyɔ ɔ cɛan 'sraadɛ ‑ɛ ‑wee' nɛ dia -pliɔn', 'de Nyɔsoa "juɛi. Ɛ nɩɛ dɛsaʋn 'a -kwɛa' 'a 'sraa ‑o. 25 'Sraa ‑sai a muɛ ‑cɩɛ nʋa', ɔ 'je dɛsaʋn 'a 'sraadɛ 'ɛ nmɔ 'ʋn "duo-, ‑wɛe ɔ 'jeɛ "kpa ‑ɛɛ "kpei nyɔ ɔ ‑saa 'sraa ‑ɛ ‑wee' nɛ dia 'a -gblʋn kwii cri, ‑wɛe ɔ 'je ɛɛ' tɔo i 'wla 'de ɛ ‑sɔn. 26 'Sraa ‑sai 'a muɛ ɛɛ' 'cna ‑wee' "jri poa' 'de "kpa "kpei, ka nyɔ ɔ nʋa 'de nyiɔ ke Nyɔsoa 'a wlu "kpei ‑sea 'sraa ‑tɩ' 'ʋn. 'Kamɔ 'sraa ‑sai 'je nʋ, 'de nyʋ "jru kpɔ i ‑tei ‑nɩa 'a dɩsaɩn 'a ‑tɩ' 'ʋn, ‑wɛe Nyɔsoa 'je ɔɔ' dɛsaʋn -kwɛ'.
27 ‑Bo ɛ nɩ nyɔ jrɔ' 'de ʋʋ "klu, mɔ ‑se "jrii 'jee ‑wɛe ‑ɔ nʋ dɛsaʋn jrɛ' Nyɔsoa 'na nyʋ bo nʋɛ 'de ɛɛ' kɛ' 'di, ‑wɛe ɛmɛ ‑ɛɛ 'pee kpʋn ɔ ɛ, 28 ‑bo ɔ juuɛ ka ɔ nʋa dɛsaʋn ɛ, ‑mɛ ɔ ja gbao nynɔ ‑kɔ sea ‑pʋn" nɩ 'de ɔɔ' dɛsaʋn ‑nɩa 'mʋʋa‑ 'a ‑tɩ' 'ʋn. 29 Ɔɔ muɛ ɔɔ' sʋn 'de ɛ "jru ‑tea', ‑wɛe ɔ 'jeɛ ‑pliɔn' cɛn, 'de ‑ta nyɔ ɔ ‑saa 'sraa ‑ɛ ‑wee' nɛ di a. 30 'Sraa ‑sai a muɛ ‑cɩɛ nʋa', ɔ 'je ɛɛ' nmɔ 'ʋn "duo-, ‑wɛe ɔ 'jeɛ cri 'de "kpa ‑ɛɛ "kpei nyɔ ɔ ‑saa 'sraa ‑ɛ ‑wee'‑ nɛ dia 'a ‑gblʋn kwii, ‑wɛe ɔ 'je ɛɛ' tɔo i 'wla 'de ɛ ‑sɔn. 31 Ɔɔ muɛ ɛɛ' 'cna ‑wee' 'de ‑saa', ka nyɔ ɔ nʋa 'de nyiɔ ke Nyɔsoa 'a wlu "kpei ‑sea' sraa 'a ‑tɩ' 'ʋn, ‑wɛe ɔ 'jeɛ "jri po 'de "kpa "kpei, ‑bo ɛ nɩ kaan ‑wɛe ɛɛ' 'nʋ 'je Nyɔsoa 'a pɛe jajaa‑. 'Kamɔ 'sraa ‑sai 'je nʋ, 'de ɔɔ' dɛsaʋn 'a ‑kwɛa' 'a ‑tɩ' 'ʋn, ‑wɛe Nyɔsoa 'je ɔɔ' dɛsaʋn -kwɛ'.
32 ‑Bo "ju ‑nɩa 'mʋʋa‑ ja 'blae ju, ‑mɛ ɛɛ' 'nynɔ ‑kɔ sea ‑pʋn" nɩɛ, mɛ ɔ 'je ja- -ɛ -je ɔɔ' dɛsaʋn 'a -kwɛa' 'a 'sraa nɩ-. 33 Ɔɔ muɛ ɔɔ' sʋn 'de ɛ "jru ‑tea', ‑wɛe ɔ 'jeɛ ‑pliɔn' cɛn, 'de ‑ta nyɔ ɔ 'cɛan 'sraadɛ ‑ɛ ‑wee'‑ nɛ dia -pliɔn'. 34 'Sraa ‑sai a muɛ ‑cɩɛ nʋa' ɔ 'je ɛɛ' nmɔ 'ʋn "duo-, ‑wɛe ɔ 'jeɛ cri 'de "kpa ‑ɛɛ "kpei nyɔ ɔ ‑saa 'sraa ‑ɛ ‑wee'‑ nɛ dia 'a ‑gblʋn kwii, ‑wɛe ɔ 'je ɛɛ' tɔo i 'wla 'de ɛ ‑sɔn. 35 Ɔɔ muɛ ɛɛ' 'cna ‑wee' 'de ‑saa', ka nyɔ ɔ nʋa 'de 'blae -ju -ɛ -nɩa nyiɔ ke Nyɔsoa 'a wlu "kpei ‑sea' sraa 'a ‑tɩ' 'ʋn, ‑wɛe ɔ 'jeɛ "jri po 'de "kpa "kpei, 'de 'sraa dɩ nyʋ -sa kwai -ɩ -wee' nɛ dia nyʋ "nyɩa Nyɔsoa, 'de ɩ "kpei. 'Kamɔ 'sraa ‑sai 'je nʋ, 'de ɔɔ' dɛsaʋn 'a ‑kwɛa' ‑tɩ' 'ʋn, ‑wɛe Nyɔsoa 'je ɔɔ' dɛsaʋn -kwɛ'.