Ɨkalata ɨja vʉtatu ɨja
Yohani
Amasio amalongosi
1
Ʉne ne mʼbaha mʉ kɨpʉgha ɨkya vɨtɨki,
nɨkʉkʉlembela ʉve Gayo ghwe mʉghanɨke ghwango,
ghwe jʉno nɨkʉghanile kyangʼhaani.
2 Mʉghanɨke ghwango,
nɨkʉkʉsʉmɨla kwa Ngʉlʉve kuuti,
ʉfivombaghe vʉnofu mʉ sooni.
Nɨkʉkʉsʉmɨla ʉvisaghe nkafu ʉmʼbɨlɨ ndavʉle ghufivomba vʉnofu kuuva vʉmo nʉ Ngʉlʉve.
3 Nɨkahovwike fiijo avɨtɨki avajiitu vamonga ye visile na kʉkʉmbʉʉla kuuti,
ghugadɨlɨla vʉnofu ʉvwakyangʼhaani.
Kange,
nɨkahovwike fiijo ye vambʉlile kuuti,
ghukukala mʉ vwakyangʼhaani ʉvuo.
4 Nakwekɨlɨ kɨno kɨkʉmhelela nɨɨve nʉ lʉkeelo ʉlʉkome,
kukila kupʉlɨka kuuti avanango vikukala mʉ vwakyangʼhaani.
Ʉvʉkoola vwa Gayo
5 Mʉghanɨke ghwango,
ʉlɨ muunhu nnofu vwɨmɨla sino ʉkʉvavombela avɨtɨki avajiitu,
nambe vaave vahesia.
6 Avaanhu avuo voliike apa mʉ kɨpʉgha ɨkya vɨtɨki vʉle ghuhʉfia ʉlʉghano lwako.
Lɨno,
nɨkʉkʉsʉʉma ʉvatange vaghendelelaghe nʉ lʉghendo lwave ndavʉle ikeela ʉNgʉlʉve.
7 Ʉlwakʉva avaanhu avuo kuhʉma vitengʉla ʉlʉghendo lwave kʉkʉmʼbombela ʉMʉtwa ʉYesu,
navikwʉpɨla kɨmonga ɨkya kʉvatanga kuhʉma kʉ vano navɨtɨki.
8 Lɨno,
ʉsue twe vɨtɨki tʉnoghiile kʉkʉvatanga avaanhu avuo.
Mʉ ʉluo tuuva tuvomba ɨmbombo ɨja kʉpʉlɨsia ʉvwakyangʼhaani palɨkɨmo na veene.
ɄDiotilefe nʉ Demetilio
9 Nɨkalembile ɨkalata kʉ kɨpʉgha ɨkya vɨtɨki,
neke ʉDiotilefe jʉno ikuvɨɨka hwene mʉlongosi ghwave,
nailonda kʉkʉmhʉlɨka vwɨmɨla sino nɨkavalembiile.
10 Lɨno,
niliiva nisile ʉkuo,
sooni sino ivomba isa kʉtʉjova fivi ʉsue,
nilivɨɨka pa vʉvalafu.
Ʉmuunhu ʉjuo naivomba lʉluo lwene,
looli isiita kʉkʉvʉpɨla avɨtɨki avajiitu vano vighendela ʉkuo.
Kange,
ɨkʉvakaana na kʉkʉvadaga mʉ kɨpʉgha ɨkya vɨtɨki vano vilonda kʉkʉvʉpɨla avaanhu avuo.
11 Mʉghanɨke ghwango Gayo,
ʉlekaghe kukwɨgha kuvomba imbiivi,
looli ghwɨghaghe kuvomba inofu.
Ʉmuunhu jʉno ivomba inofu,
muunhu ghwa Ngʉlʉve.
Neke ʉmuunhu jʉno ivomba imbiivi,
naankagwile ʉNgʉlʉve.
12 Avaanhu vooni vikwoleka kuuti,
ʉDemetilio muunhu nnono.
Kange,
na mʉ maghendele ghaake ihʉfia ʉvwakyangʼhaani.
Na jʉsue tukwoleka kuuti muunhu nnono,
na jʉʉve ʉkagwile kuuti ʉvwolesi vwitu vwa kyangʼhaani.
Amasio agha kʉhwesia
13 Nɨlɨ ni nyinga isa kʉvavʉʉla,
neke nanilonda kulemba mʉ kalata.
14 Looli nihʉvɨɨla kukwisa kʉlyʉmue ngʼhaningʼhaani kuuti tʉtangʼhane,
neke tʉjove.
15 Ʉlʉtengaano lʉvisaghe nuuve.
Avamanyaani vaako ava apa,
vikʉkʉhʉngɨla.
Na jʉʉve,
ʉvahʉngɨlaghe avamanyaani viitu vooni vano valɨ ʉkuo.