ɄYesu ikuhʉfia kʉ vavʉlanɨsɨvua vaake lekelalʉbale
21
Pambele,
ʉYesu akihʉfia kange kʉ vavʉlanɨsɨvua vaake kʉ lɨsʉmbe ɨlya Tibelia.a
Ye akyale kukuhʉfia lʉlyale ndɨɨkɨ:
2 ʉSimoni ʉPeteli,
ʉTomasi jʉno akatambʉlwagha Mʉngʼhʉngʉ,
ʉNatanaeli ʉmhʉma mʉ kɨkaaja ɨkya Kana mʉ kɨghavo ɨkya Galilaya,
avaana vavɨlɨ ava Sebedaayib na vavʉlanɨsɨvua vaake avange vavɨlɨ,
vooni avuo valyale palɨkɨmo.
3 ɄSimoni ʉPeteli akavavʉʉla avajaake akati,
“Nilʉta kulova isamaki.”
Aveene vakamwamʉla vakati,
“Na jʉsue tulʉta palɨkɨmo nuuve.”
Pe vakavʉʉka vilʉta,
vakapanda ɨngalava,
neke ɨkɨlo jooni,
navakambʉlɨla kɨmonga.
4 Ye kuhenga,
ʉYesu akɨɨma mʉlʉbale mʉ lɨsʉmbe,
neke avavʉlanɨsɨvua vaake navalyakagwile kuuti ghwe Yesu.
5 ɄYesu akavaposia akati,
“Vanango,
namʉlovile nambe samaki jɨmo?”
Aveene vakamwamʉla vakati,
“Natʉlovile nambe jɨmo!”
6 ɄYesu akavavʉʉla akati,
“Isia ʉvwafu ʉlʉbale ʉlwa kʉndio ʉlwa ngalava,
ʉkuo mulova.”
Pe vakisia ʉvwafu,
neke vakakunua kukwesa,
ʉlwakʉva valyakolile isamaki nyinga.
7 Pepano ʉmʼbʉlanɨsɨvua jʉla,
jʉno ʉYesu alyamʉghanile fiijo,
akamʼbʉʉla ʉPeteli akati,
“Ʉjʉ ghwe Mʉtwa!”
ɄSimoni ʉPeteli ye apʉliike kuuti ghwe Mʉtwa,
akatoola ʉmwenda ghwake ghʉno aveele afulile ye ilova,
akafwala,
pe akitosia mʉ lɨsʉmbe.
8 Avavʉlanɨsɨvua avange vala vakava vikwesa ʉvwafu vʉmemile isamaki,
vilʉta kʉnji kʉ lɨsʉmbe.
Kuhʉma pano valyale,
kufika kʉnji kʉ lɨsʉmbe,
palyale imita kɨlʉndo kɨmo ndɨɨkɨ.
9 Ye vafikile kʉnji kʉ lɨsʉmbe,
vakaghwagha ʉmwoto.
Pa mwoto apuo pweghʉlyale ʉnkate ni samaki.
10 ɄYesu akavavʉʉla akati,
“Mʉleete isamaki simo sino mʉlovile.”
11 Pe ʉSimoni ʉPeteli akingila mʉ ngalava,
akakwesela kʉnji kʉ lɨsʉmbe ʉvwafu vʉla vʉno vʉlyamemile isamaki imbaha.
Isamaki isio silyale kɨlʉndo kɨmo ni fijigho fihaano ni tatu.
Napano isamaki silyale nyinga enendɨɨkɨ,
ʉvwafu navʉlyademwike.
12 ɄYesu akavavʉʉla akati,
“Mwise mʉlavʉke.”
Neke napwealyale nambe jʉmo mʉ vavʉlanɨsɨvua vala,
jʉno alyaghelile kuposia kuuti,
“Ʉve veeve veeni?”
Navalyamposisie,
ʉlwakʉva valyakagwile kuuti ghwe Mʉtwa.
13 ɄYesu akatoola ʉnkate,
akavapeela.
Kange,
akatoola ɨsamaki,
akavapeela.
14 Ʉluo lʉlyale lwa vʉtatu ʉYesu kukuhʉfia kʉ vavʉlanɨsɨvua vaake,
kuhʉma isyʉsɨvua kʉ vafue.
ɄYesu nʉ Peteli
15 Ye vamalile kulia,
ʉYesu akamposia ʉSimoni ʉPeteli akati,
“Simoni mwana ghwa Yohani,
ʉnganile ʉne kukila vʉle vanganile avange ava?”
ɄPeteli akamwamʉla akati,
“Eena Mʉtwa,
ʉve ʉkagwile kuuti nɨkʉghanile.”
ɄYesu akamʼbʉʉla akati,
“Ʉdɨmaghe ingʼholo sango.”
16 ɄYesu akamposia ʉlwa vʉvɨlɨ akati,
“Simoni mwana ghwa Yohani,
ʉnganile?”
ɄPeteli akamwamʉla akati,
“Eena Mʉtwa,
ʉve ʉkagwile kuuti nɨkʉghanile.”
ɄYesu akamʼbʉʉla akati,
“Ʉlolelelaghe vʉnono ingʼholo sango.”
17 Akamposia ʉlwa vʉtatu akati,
“Simoni mwana ghwa Yohani,
ʉnganile?”
ɄPeteli akasukunala,
ʉlwakʉva amposisie ʉlwa vʉtatu kuuti,
“Ʉnganile?”
Akamwamʉla akati,
“Ghwe Mʉtwa,
ʉve ʉkagwile sooni,
ʉkagwile kuuti nɨkʉghanile.”
ɄYesu akamʼbʉʉla akati,
“Ʉdɨmaghe ingʼholo sango.
18 Kyangʼhaani nɨkʉkʉvʉʉla,
ye ʉlɨ nsoleka ʉlyale ghufwala jʉʉve amenda na kulʉta kʉno ghulonda.
Neke ghuliiva mʉghogholo,
ghuligholosia amavoko ghaako,
ʉmuunhu ʉjʉnge ɨkʉkʉkʉnga na kʉkʉkʉtwala kʉno naghulonda.”
19 ɄYesu alyajovile isio kuvonia vʉle ʉPeteli ilifua vwɨmɨla kʉkʉmʉghinia ʉNgʉlʉve.
Ye ajovile isio,
akamʼbʉʉla ʉPeteli akati,
“Ʉmbɨngɨlɨlaghe.”
20 ɄPeteli akasyetʉka,
akamwagha ʉmʼbʉlanɨsɨvua jʉno ʉYesu alyamʉghanile fiijo,
ɨkʉvavɨngɨlɨla mʉmbele.
Ʉmʼbʉlanɨsɨvua ʉjuo ghwe jʉno alyeghiime pa kɨfuva kya Yesu ye valɨ pilia ɨkyakʉlia ɨkya pakɨvwilile,c
ghwe jʉno alyamposisie ʉYesu kuuti,
“Mʉtwa,
ghwe veeni jʉno kyaɨkʉkwohela?”
21 ɄPeteli ye amwaghile ʉmʼbʉlanɨsɨvua jʉla,
akamposia ʉYesu akati,
“Ghwe Mʉtwa,
kilihʉmɨla kɨki kwa mʼbʉlanɨsɨvua ʉjʉ?”
22 ɄYesu akamwamʉla akati,
“Nave nilonda ʉjʉ aave mwʉmi kuhanga niliiva nigomoka,
ʉve kɨkʉkʉvava kɨki?
Ʉve mbɨngɨlɨlaghe.”
23 Amasio aghuo ghano ʉYesu alyajovile,
ghakapʉlɨkɨka kʉ vavɨngɨlɨli vinga,
pe vakasaghagha kuuti,
ʉmʼbʉlanɨsɨvua ʉjuo nailifua.
Neke ʉYesu naalyajovile kuuti,
ʉmʼbʉlanɨsɨvua ʉjuo nailifua,
ʉlwene alyatiile,
“Nave nilonda ʉjʉ aave mwʉmi kuhanga niliiva nigomoka,
kɨkʉkʉvava kɨki?”
24 Ʉmʼbʉlanɨsɨvua ʉjuo ghwe jʉno ikwoleka isi sooni,
kange ghwe jʉno alembile isi.
Ʉsue tʉkagwile kuuti ʉvwolesi vwake vwa kyangʼhaani.
ɄYesu alyavombile isingi nyinga
25 Kwesili isingi nyinga sino alyavombile ʉYesu.
Sale silembue sooni,
nisaagha kuuti ɨɨsi jooni najaale jikwɨla kuvɨɨka ifitabu ifio.