योहानाअ तीजों कागलों
1
सालामाअ गोठ
1 मांअ मेराला दोस्दार गायु, आंय, वोळीलुंअ वोळील योहान तोअपेअ ईं कागलों लेखुंह। तोअपेअ आंय हाची रीते माया राखुंह। 2 मेराला दोस्दार, आंय पोरमेहेराल ओरुज कीअहुं का, तो तुल बादी बाबोतींहम सुखी राखे, खास कीईन जेंहकींअ तोअ जीव सुखी हाय तेंहकींअ तो तुल नीरगु बी राखे। 3 आंय खुब खुस वीयोह, काहाका, थोळाक ख्रीस्ती पावुह ईंहीं आलाह आने तीयाहां मांन आख्यों, तुं हाची गोठी पोरमाणे चालोह। आंह, तुं पोरमेहेराअ हाची गोठी पोरमाणे चालोह। 4 मांअ आत्मीक पोयरें तीयु गोठी पोरमाणे चालतेंह एंहकींअ जांहांअ बी आंय उनाअहुं, तांहांअ आंय खुब खुस वीअहुं।
सेवाअ खातुर पोयसाहांअ टेको
5 मेराला दोस्दार, फीरी-फीरीन सेवा केअनारा ख्रीस्ती सेवोकुंहन तुं नांह ओअखुअतो तेबी, जांहांअ बी तुं तीयाहांन मोदोत केरांअ काय बी कीअहो, तांहांअ तुं खोरेखोर ईसुअज सेवा ईमानदारीअ रीते कीअहो। 6 तीयाहांमेर्याअ थोळाक सेवोकुहुं, तीयाहांपेअ तुं केंहडी माया राखोह तीया बाबोताम, ईंहींर्याअ मोंडोळाअ आगलांअ आखी देखाव्योंह। पोरमेहेराल पोसोंद पोळे तेंहकींअ तेंहडा लोकाहांअ वाट खोरचाअ खातुर मोदोत कीअहो ता हारों।
7 जांहांअ ते सेवोक ईसुअ बाबोताम लोकाहांन आखांअ नींग्या तांहांअ, ख्रीस्तुपेअ वीसवास नांय केअनाराहां तीयाहांन काय नांह देदों। 8 तीयाअ लीदे, ख्रीस्तुपेअ वीसवास केअनारा आपुअ, एंहडा लोकाहांन खांअ ने पोयसा दांअ जोजे, ईयाअ खातुर का, पोरमेहेराअ हाची गोठ बीहराहांन हीकवांअ खातुर आपुंह तीयाहांन मोदोत कीअ सेकजी।
योहानाअ वीरुद केअनारा दीयोतीरेफुअ बाबोताम
9 तीया ख्रीस्ती सेवोकुंहन मोदोत केरांअ आखीन मांयुं मोंडोळुपेअ कागलों लेखलों। पेन, दीयोतीरेफे मांयुं जों लेखलों तीयाअ पोरमाणे नांह केअतो। काहाका, तो सोतेज मोंडोळाअ आगेवान बोंणांअ मागेह। 10 तीयाअ लीदे, तो जों केअहे तों, आंय तींहीं आवेंह तांहांअ, बादाहांअ आगलांअ उगाळों पाळेंह। तो जों आखेह तीयाकींअ आमनेंह नुकसान केरांअ खातुर तो आमांअ बाबोताम खोट्या-खोट्या गोठ्या फेलावेह। नुकसान केअनार्या गोठ्या कीईन बी तो नांह ताराअतो। तो सोते तीया सेवोकुंहन आवकार केरांअ ना पाळेह ओतोंअज नांय, पेन जें तीयाहांअ आवकार केरांअ मागतेंह, तीयाहांन तो मोंडोळामनेअ काडी थोवेह, आने एंहकींअ कीईन तो तीयाहांन तीया सेवोकुंअ आवकार केअता ओटकावेह।
हारें कामें केरांअ सालाह
11 मेराला दोसदार, तीयाअ खाराब होंवांय तुं मां तेअतो। उलटों, बीहराहांअ हार्या होंवांय तेअजे! ईत राखजे का, हारें कामें केअनारा लोक खोरेखोर पोरमेहेराअ हाय, पेन खोटें कामें केअनारा लोकाहीं पोरमेहेराल नांह ओअख्यो।
देमेत्रीयुअ खातुर भोलामोण
12 ईं कागलों लीअ आवनारा देमेत्रीयुअ आवकार कीईन तीयाअ मोदोत क्योव ता हारों। तीयाल ओअखुअनारें वीसवासी बादें तीया बाबोताम एंहडी साक्सी देतेंह का, तों हारों मांहुंअ हाय। तों बी पोरमेहेराअ हाची गोठी पोरमाणेज चालेह। ईयाकींअ ईं देखाय आवेह का, तों हारोंज मांहुंअ हाय। आने आमां बी साक्सी देताह का, तों हारों मांहुंअ हाय। तुल खोबुर हाय का, तीया बाबोताम आमां जों आखताह तों खेरोंज हाय।
सेल्या गोठ्या
13 मांयुं लेखांअ चालु केअलों तांहांअ तुल खुब गोठ्या लेखांअ वीचार आथो, तेबी, ते आंय आमी कागलाअ मारफोते लेखांअ नांह मागतो। 14 पेन आंय तुल माहरीज मीलांअ आस्या राखुंह। तांहांअ आपुंह एक-बीहराअरी उरु-बुरु गोठ्या कीअहुं।
15 पोरमेहेर तुल सांतीअ ओनुभोव केरावे! ईंहींर्याअ आपुअ दोस्दार तुल सालाम देताह। तींहींर्याअ आपुअ दोस्दारुंहन बादाहांन मांअ सालाम देजे!