Sura ni Suro
Yohane
anu katoluna
Tabea
1
1 Sura ei anu lako si aku, tadulako nu topepotuu si Pue Ala, kupakatu si iko Gayu, rangaku anu kupokaasi. 2 Pokaku anu kupokaasi, mekakae aku kuperade bona wotomu, katuwumu ai katuwu nu tanuanamu malompe-lompe.3 Matono mpuu raraku, lawi ria sira basangkia pokata sampepepotuuta anu dongka si aku mangkeni bambari kono si iko, raulira: mepotuu liliu iko i patudu anu mamonso, mpane babeiamu mangula mbui patudu anu makono etu. 4 Melumbu mpuu katonoku ane kuepe bambari anu manguli anaku sira mangula liliu patudu anu mamonso.
I Yohane motoia i Gayu
5 Pokaku! Iko tau anu matundu, motulungi liliu pokata anu mensopi i boeamu, nauda baria mani sira nuinsani. 6 Ria sira topobambari Ngkora anu mai i se ei mopadongka i jumaa, kono i asimu. Kusarumaka bona nutulungi sira ai nupopangoka lompe sira, bona pensani sira mopaliliu polumakoara. Etumo anu mopakatono rara ni Pue Ala. 7 Lawi i rara mpolumakora mobambari sangaNa, baria ria mogalo apa anu rasumbara lako i tau sira, anu baria mepotuu si Pue Ala. 8 Mewali kita topepotuu si Pue Ala, sangangaa tatulungi sira singka rangata anu mepotuu si Pue Ala, lawi ane tababei ewa etu, lempona mobago simbela kita i rara nu pobagora, mangkeni bambari anu mamonso.
I Yohane mosalai i Diotrepes mpane motoia i Demetrius
9 Riamo saudi anu kuuki i suraku, kupakatuka i ope-ope pokata sampepepotuuta i se etu. Agaiana i Diotrepes anu naunde mewali tadulako i rara jumaa, baria naunde modoko kami. 10 Mewali, ane dongka aku luwu, ina kupakanotoka ia babeiana anu madaa. Napakadaa liliu kami, agaiana baria mamonso apa anu nauli. Ai baria etu ngkida anu nababei. Ane pokata anu mobambari Ngkora Magali mensopi sira i boeana, baria sira nadoko, mpane naombo mbui sira tau anu mangunde modoko topobambari Ngkora Magali etu. Mpane napopensuwu sira lako i jumaa.
11 Pokaku anu kupokaasi! Inee iko mampeulai apa anu madaa. Peulaimode apa anu malompe. Tau anu mobabei lompe, napoana sira ni Pue Ala. Agaiana tau anu mobabei daa, baria mani sira manginsani i Pue Ala.
12 Ane i Demetrius, ratoia ia nu ope-ope tau. Kalawiana sintoto mpuu ia ratoia, lawi babeiana mangula patudu anu mamonso. Kami mbui kitoia ia, ai nuinsani, apa anu kipadongka mamonso.
Kasopoa lolita
13 Maisi mani anu kupenoka kupadongkaka iko, agaiana baria kuunde mouki ope-ope i rara nu sura ei. 14 Lawi pesarumakaku bariamo masae ina momberumpa kita, bona ria tempota mololita simbela.
15 Mekakae aku bona mansumba iko kalompe nu katuwu. Maisi tabea lako i ope-ope simadamu i se ei. Nupadongka kowo tabeaku i ope-ope rangaku anu ria sira i se etu.