Sudew 1

Sude sɛbɛw

Fyãnuugu

Mã́ã Sude mã́ã̀, mã́ã mãã Yesu Kɩrsa mããcierw, nã̀ã ba Yakuba hǝ̃ǝ̃w, mã́ã yállà sɛbɛ wáà mǝ̃̀ hã Tiiyǝ Dũnnũẁ bíé bàa, nǝ̃ bá ba wù cituubiiba, nǝ̃ wú cii bà nã ǹ-hã Yesu Kɩrsaw:

2 Dũnnũẃ mǝ̃gaa ǹ-sɔ̃ ɲì hujãndi, nã̀ã hã-ɲã́ã̀ nǝ̃ hyasɩrãgǝgu dugɔ, nǝ̃ ɲì cɔ̃mmã́ dwal wù nã dugɔ!

Blǝnhlanw ǹ-kã cokallɛkwasǝnãã'n yiɛgu

3 Mã́ã cituubii ɲimãã, halle ǹ-da wà gɩ̀ cɔ̃mmã yáá mǝ̃̀ hiɛga nã ǹ-car mǝ̃́ yal ǹ-hã-ɲã́ã̀ yì korɩm'n cɔ̃mmã nã, mã̀ã́ mãã yì tuu guɔ mã̀ nã yì min, dɩ̀ pyã́llã́ mǝ̃̀ nã-i mǝ̃́ yal sɛbɛ wáà ǹ-tĩɛ̃-yǝ ɲì nãã, ǹ-da ǹ-gbǝ̃ǝ̃ ɲì hiɛga ɲí ba narɩmmã nã hũɔ̃m'n cɔ̃mmã nã, mã̀ã́ mãã mã̀ hlã Kɩrsa bluuba yindiingu gbɩla.

4 Nã̀ã wa cwaadaabà ŋmã́ã́ ǹ-jãn ɲì sǝ̃ǝ̃nã, bàá mãã Dũnnũẁ hlã-ba nǝ̃ bà yuɔrɔmmã nǝ̃ mã̀ cɔ̃mmã́ yal fufodii.

Yì Dũnnũẁ níé yì yiɛgu nǝ̃ gùú nelli, gɩ̀ cɔ̃nhlataabá ver gɩ́ vaa nǝ̃ bà ciryaga, nã̀ã hla Yesu Kɩrsaw, wùú mãã yì Yuuntiiw nǝ̃ Yitiiw nǝ̃ wù dɩndɩn.

5 Halle ǹ-da wà ɲi fǝ̃ǝ̃ dɩ̀-lǝ dɩ̀ min dɩ́ jalliɛ ǹ-tã, mǝ̃̀ caa mǝ̃́ kãnãã ɲì nã nǝ̃ Yitiiẁ kórrá Isɩrayɛl bluuba ǹ-hiil-ba Misɩra yiɛgu yindiingu nĩĩguu mãã, nǝ̃ gɩ̀ furũũgɩ nã, wú guu bàá nã mãã bà sáá bàa hũɔ̃ wù cɔ̃mmã.

6 Nǝ̃ mɛlɛgɛbaa mãã bà sáa blǝ bà yuuntasǝ'n wanhirammã nã, nã̀ã hla bà hla'n wanjirammã, wù díilá-ba jɔrgɔba nã fɩraa, dudũũm'n kusuugɩ nã, ǹ-cii sugojaryuugǝ̃ngããgu.

7 Kã́nã̀ã Sodɔm lǝri, nǝ̃ Gomɔr lǝri, nǝ̃ gà tuɔra liɛ'n cɔ̃mmã nã ɲí ne!

Gɩ̀ liɛntaabà díilá bà hla durkũmsǝrɩ nã gùú tammã dɩnmã nã-i, nã̀ã ba bà mǝ̃rǝ̃ǝ̃ nǝ̃ binɲinɲã nǝ̃ mǝ̃rãmmãã mãã kiɛnw nǝ̃ cwaa'n cosǝri; bà cɔ̃mmã̀ túulá ǹ-pɩgaa, nǝ̃ bá ba piirɩmmã nã fɩraa dǝ̃ǝ̃mã kusunã.

8 Nǝ̃ dɩ̀ min drɔ, gɩ̀ cwaabà wáà tammã dɩnmã nǝ̃-ba: bá nǝ̃ bàa piɛ bà nãkruɔgu bà dãnsǝ̃lãga drɔ, ǹ-ba bà bla bà cãndi, nã̀ã hla Dũnnũ yuuntasǝri, nã̀ã ba bá tuuraa ɲããnǝ̃ǝ̃gǝ̃ngãnɲãã mãã drɔgu.

9 Nã̀ã da gùú nã mãã mɛlɛgɛba yuuntii Misɛlw, bà yáá bà fa bà ɲĩɛ̃ nã nǝ̃ tiilǝtiiw, nã̀ã ba bà yii Musa cãndɩ nã, wù sáa siɛ ǹ-tuuraa tiilǝtiiw nã nǝ̃ nãdɔ̃mmã, nǝ̃ wù wáalá wà: «Yitiiẃ piir-n!»

10 Nǝ̃ cwaa báà mãã bà sǝ̃n fǝ̃ǝ̃ gùu, bà tuuraa gɩ̀ nã, nǝ̃ bà mãã bà fǝ̃ǝ̃ gùú mãã nǝ̃ bà hla nã́ã́ kwasǝnɲinɲãã mãã ɲã̀ sǝ nǝ̃ cɔ̃nfǝ̃ǝ̃gǝgu, gɩ̀ bǝ̃ǝ̃lǝ̃ǝ̃ bà nã.

11 Hujãncɔ̃mmã́ nǝ̃ bà drɔ, nã̀ã wa bà túulá Kayɛ̃ hlũũgu, ǹ-nǝ̃ǝ̃ ǹ-dii bà hla Balam vaalammã nã, jin'n dal'n cɔ̃mmã nã, nã̀ã ba piirǝmmã nã Kora tammã ǹ-ga guu nã.

12 Bá nǝ̃ nã́ã́ vyajuutɩntrã-i ɲì cwansǝ'n wuur'n sɔsǝrɩ nã, gùú sùɔ́guu mãã bà jiraa juwuukaagɩ nã bà sǝ̃n ce-gǝ nǝ̃ ciiri, nã̀ã ba bà ne bà hla'n cɔ̃mmã dɩndɩn.

Bá nǝ̃ nã́ã́ Dũnnũ vãllii mãã saluugɩ̀ suro-dǝ; dɩ̀ sǝ̃n nɔ̃, nã̀ã ba nã́ã́ tubikuuguu mãã gɩ̀ sǝ̃n ŋmǝ̃ǝ̃ blɩ gɩ̀ bǝ̃ǝ̃gɩ nã, nǝ̃ gɩ-ń fuur, gɩ́ nǝ̃ gùu ku ǹ-ji da yinhǝ̃ǝ̃lw,

13 nǝ̃ bà gaaciegaa mãã gà ce ciiri, gà ba nã́ã́ lwaakɩnkanpiirii mãã dɩ̀ mũũ dɩ̀ suro hũmpuguluu'n dɩgaagu, nǝ̃ bà ba nã́ã́ ŋmĩɛ̃gaa mãã gà vĩɛ̃, gàá mãã dudũũmbyaarìi kra ǹ-ba dɩ̀ fennãã gà nã fɩraa.

14 Bàá cɔ̃mmã nã-i, Enɔkɩw mãã Adɩmã huɔnblɩ nɩrhǝ̃ǝ̃lnãw, wú tɔ ǹ-waa bà cɔ̃mmã nã wà: «Níyà, Yitiiẁ júó nǝ̃ wù kurɔncindii mãã wùu kra dɩ̀ nã dɩ̀ dǝ,

15 ǹ-ba wù ji jar cwaaba min sugolli, ǹ-pɩgaa bà cɔ̃nhlasǝ'n gaaciega, nǝ̃ cãwaagbǝ̃ǝ̃yaga minw mãã bà wáalá-ga wù yuunã, ǹ-ya bá ba diicĩɛ̃rǝntaabaa mãã bà hlárá Dũnnũw.»

16 Gɩ̀ cwaabà hugɔ̃nãã, nã̀ã ba bà wanãã bà cɔ̃mmã yuunã bà sǝ̃n hiraa, nã̀ã ba bà wáà ǹ-vaa nǝ̃ bà yisɩnã cɔ̃mbɩblammã; bà waa nɔ̃dwalcãwanĩɛ̃ga bà huɔruɔ bà hla nã, nã̀ã ba bà waa-ga nǝ̃ cwaaba bà da bà hlǝmmã.

17 Nǝ̃ mã́ã cituubii ɲimãã-lǝ, Yitii Yesu Kɩrsa tĩɛ̃taabà wáalá dìi ǹ-ta ǹ-tã, kã́nã̀ã dɩ̀ nã.

18 Bà yáá bà waa nǝ̃-ɲã́ã̀ wà: «Cuu tãl'n bǝ̃ǝ̃gu, hiilkwãmǝ̃nãtaabà ji ba dìɛ, bàá mãã cɔ̃nhlataabaa mãã bà ji duu bà yisɩnã cɔ̃mmã nã.»

19 Bà-lǝ bàá jówà nǝ̃ burɔmmã; bà hla'n cosǝrɩ́ nǝ̃ dìi jiraa bà yuugɩ nã, nǝ̃ Dũnnũ Yuflǝ sǝ.

Kɩrsa bluuba mãã bà saa bá ce dìi

20 Mã́ã cituubii ɲimãã-lǝ, yáalà ɲì hũɔ̃mã mãã mã̀ hlǝ Dũnnũw nã, mã́ pɛ ɲì nã ɲí vãnãã wù hlũũgɩ nã, nǝ̃ Dũnnũ Yuflǝẃ pɛ ɲì nã ɲí ba ɲì ce cirǝ̃mmã.

21 Cíilà ɲì hla nã Dũnnũ dwalɩmmã nã, ɲí ba ɲì fennãã gùú bǝ̃ǝ̃gɩ nã mãã Yitii Yesu Kɩrsaẁ ji pɩgaa wù hujãn'n sɔ̃lli, ǹ-hã-yáà nǝ̃ fɩraa nũmǝ̃nãsǝri.

22 Bàá mãã bà hiɛgà car-ba, bláà ɲì sɔ̃ bà hujãndi.

23 Kórrà ɲí hiil badaaba dǝ̃ǝ̃mã nã; nǝ̃ badaa-lǝ, bláà ɲì sɔ̃ bà hujãndi, nǝ̃ cíyà-dǝ nǝ̃ gbǝrsǝri.

Nǝ̃ bà gaacĩɛ̃ya'n kuuladɩganɲã-lǝ, yáalà ɲã̀-lǝ ɲã̀ cɔ̃mmã́ bla ɲì nã.

24 Wùú mãã wù ji gbǝ̃ǝ̃ ǹ-cii ɲì nã nǝ̃ durummã, nã̀ã ce ɲí hiraa wù faa'n gbɩgbaam'n yigagɩ nã ǹ-ba ɲi sǝ nǝ̃ yuɔrɔmmã, nã̀ã ba dudwalɩmmã nã dugɔ,

25 buusammã, nǝ̃ yuuntasǝri, nǝ̃ pyãluugu, nǝ̃ fãngããsǝrɩ́ ba wù kuugu [ǹ-tuu fuwɔ dĩɛ̃lãmmã nã], nǝ̃ kuɔkuɔgu, nǝ̃ fuwɔ fɩraa!

Kwaya!

Wùú mãã wù tíɛ́ [Yitii Yesu Kɩrsaw nã] ǹ-kor-yáà, wɩ̀-i Dũnnũw nǝ̃ wù dɩn.