Piɛr dĩɛ̃l 5

Yigantaa'n mããcemmã

Yindiɛ, mǝ̃̀ waa nǝ̃ Igɩlisɩ taa'n vũnvãnããba-i.

Mã́ã yo Igɩlisɩ taa'n vũnvãtii-i nǝ̃-m, mǝ̃̀ díɛ́ Kɩrsa ywaruugu nǝ̃ mǝ̃̀ yinɲã.

Mǝ̃̀ ga da yuɔr wù yuuntasǝ'n fãngããgɩ nã mãã wù ji pɩgaa-gǝ ǹ-ja cwaaba.

2 Dũnnũẁ díilá wù bluubaa mãã ɲì nãkrɔnɲã nã, fǝ̃́ǝ̃lã̀ ɲí blǝ-ba nã́ã́ wanciinw mãã wù blǝ wù kwasǝnɲinɲã nĩĩguu mãã.

Bláá ce-dǝ nã́ã́ ba guur guur-ɲã-i wà ɲí ce-dǝ, nǝ̃ cíyà-dǝ nǝ̃ kusufɩnfaagu, nã́ã́ Dũnnũẁ mãã wù caa ɲí ce-dǝ nĩĩguu mãã.

Cíyà-dǝ nǝ̃ ɲì hiɛga min, bláá ce gɩ́ ba jiicaahlũũ.

3 Dũnnũẁ díilá bàá mãã ɲì nãkruɔgɩ nã, bláá yiirǝǝ bà nã fãngããgɩ nã.

Bà saa bá tuu ɲimãã nǝ̃ǝ̃l-i.

4 Gɩ̀-lǝ gɩ̀ nã, Wanciinãã'n Yuuntiiw-ń ga juo hillaa gùú nã mãã, bà ji hã-ɲã́ã̀ nǝ̃ bɩnǝ̃m'n hucuuguu mãã fɩraa kuugu.

5 Gùú dɩ̀ dɩndɩ-i plaa ɲimãã yo ɲì saa.

Bláà ɲì nɔ̃ ɲì hã vũnvãtaaba.

Ɲì min bláá ba ɲì buɔ ɲì ɲĩɛ̃ nã, nã̀ã wa dɩ́ nàa dìí yal Dũnnũ cãwan'n sɛbɛw nã wà: «Dũnnũẁ gãnãã nǝ̃ buɔnhlantaaba, nǝ̃ bàá mãã bà sǝ̃n buɔ bà hla nã, wú ba wù ne bà-lǝ bà yiɛgu.»

6 Hɩ́rrǝ̀ ɲì hla nã Dũnnũ fãngãã'n taaragu, gɩ̀-lǝ gɩ̀ nã, gùú bǝ̃ǝ̃gɩ-ń ji saa wù nã, wù ji haar-ɲã́ã̀.

7 Pyárrà ɲì cɔ̃njãmmã min ɲì hla nã drɔ ɲí hã-yǝ nǝ̃-mã, nã̀ã wa wùú nǝ̃ wù hla, wùú níyà ɲì nã.

8 Mǝ̃́garà ɲí blǝ ɲì hla, ɲi ba nũmǝ̃nãw, nã̀ã wa, ɲì ɲããtii tiilǝtiiẃ nìɛ wù tɔ̃n, wà wu nã́ã̀ da wú blǝ curo nã́ã́ jaraw mãã wu-ń ce wú ba wù hugũɔ̃ nĩĩguu mãã, wù caa wù mãã wù ji blǝ gùú tii mãã ǹ-cofla.

9 Cíɛlà ɲí cii ɲì hla nã nǝ̃-yǝ, ɲí hiraa dɩ̀ dɩndɩ nã Dũnnũ cɔ̃mmã nã.

Fǝ̃́ǝ̃lã̀ wà ɲi mãã cwansǝrɩ nã nǝ̃ bàá mãã Kɩrsa cɔ̃mmã nã, cuu yanɲã min nã, wà bàá yo bá nǝ̃ gùú ywaruugɩ dɩngɩ nã-i.

10 Ɲi ji ywar bǝ̃ǝ̃dagǝ fiyãã.

Nǝ̃ Dũnnũw mãã wù ne yì min yiɛgu, wù-lǝ wùú tíɛ́ Yesu Kɩrsaw nã ǹ-be ǹ-ji dii-ɲã́ã̀ wù yuuntasǝ'n gbɩgbaamã nã mãã fɩraa.

Wù ji ce ɲí mǝ̃gaa ǹ-hũɔ̃ wù cɔ̃mmã, ǹ-ce ɲí kã nǝ̃ yigagu, nã̀ã piɛ kuu ɲì fãngããgɩ nã, ǹ-ce ɲí mǝ̃gaa ǹ-hiraa dɩ dɩndɩ nã wù cɔ̃mmã nã, nã̀ã vaa ɲì hla mã̀ nã.

11 Fãngããgɩ́ ba wùú dɩn kuugu fɩraa!

Kwaya!

Fyãnufaalaagu

12 Mǝ̃̀ cíé Silvɛ̃w-i wú yal sɛbɛblɩ wáà ǹ-tĩɛ̃ ǹ-hã-ɲã́ã̀.

Mǝ̃n blǝ Silvɛ̃ẃ ba mǝ̃̀ cwanĩĩ-i.

Yalntii-i.

Mǝ̃̀ caa sɛbɛ wáà gbǝ̃ǝ̃ ǹ-pɛ ɲì nã ɲí vaa ɲì hla, nã̀ã pɩgaa-ɲã́ã̀ wà mǝ̃ wáalá dìí mãã, ǹ-kã Dũnnũẁ mãã wù ne yì yiɛgu nĩĩgu mãã, wà dɩ̀-i sulammã.

Hyárrà dìí nã-i.

13 Igɩlisɩ taabaa mãã Babilɔn lǝri^a, bà fyãnuugɩ nàa ɲì nã, mǝ̃̀ bíɛ́ Marka yo, wù fyãnuugɩ nàa ɲì nã.

14 Hlã́ã̀ ɲì ɲĩɛ̃ nǝ̃ cwansǝ'n fyãnuuguu mãã gɩ̀ pɩgaa wà ɲi dwal nǝ̃ ɲì ɲĩɛ̃.

Ɲì min mãã Kɩrsaw nã, Dũnnũẃ hã-ɲã́ã̀ nǝ̃ sɩsɩrãmmã.