Piɛr dĩɛ̃l 3

Canããba nǝ̃ bà blaba cɔ̃mmã

Canãã ɲimãã yo, bláà ɲì nɔ̃ ɲì hã ɲì blaba, gɩ̀-lǝ gɩ̀ nã, ɲì sǝ̃ǝ̃nã wudiɛ'n blaw-ń ba wù sǝ̃n nɔ̃ wù hã Dũnnũ cãwandi, ɲì gaaciegá ce wú hũɔ̃-mã, gɩ̀ síì hi cãwan'n cɔ̃m.

2 Bàá nǝ̃ bà hla bàá ji ne ǹ-da wà ɲi wáà sũɔ̃lɩmmã nã ɲi sǝ̃n hũɔ̃ dɩgaagu, nã̀ã ba ɲì bũũ-ba.

3 Ɲimãã cɔ̃mmã min mã̀ sǝ̃n saa mã́ vaa nǝ̃ ɲì cãnkũɔ̃m'n parɩm'n dɩn sǝ: ɲì yupyãlplaaga, nǝ̃ sãnã pariɛga, nǝ̃ nũɔ̃sǝn kuulaafɩnfaaba.

4 Nǝ̃ ɲi saa ɲí huu ɲì yigasǝri ɲì hla'n kusun'n parɩm'n cɔ̃m nã-i, nǝ̃ gùú parɩmmãã mãã mã̀ síì guu nã ǹ-da.

Mã̀-i ɲì hiɛgá ba gà fa, nã̀ã ba gà fɛ̃.

Mã̀-lǝ mã̀-i nũɔ̃sǝn cɔ̃ngǝ̃ngãmmã Dũnnũ yinɲã nã.

5 Ɲã̀ã́ mãã ɲã̀ yáá gɩ̀ bǝ̃ǝ̃'n canããba mãã yiyalɩmmã nã, bà ɲããparɲinɲã, ɲã̀-i nnĩĩ: bà yáá bàa piɛ bà nãkruɔgu Dũnnũw drɔ.

Bà yáá bà nɔ̃ bà hã bà blaba,

6 nã́ã́ Sɩraw mãã wù yáá wù nɔ̃ wù hã wù bla Ibramãw nã̀ã ba wù be-yǝ wà «Mǝ̃̀ tii.»

Ɲi-ń ba ɲì sǝ̃n hũɔ̃ ǹ-ya cɔ̃mmã́ dii gbǝrsǝri ɲì nã, nã̀ã ba ɲì ce diifɩnfaari, ɲimãã-i wù bisiiba sulammã nã.

7 Blanãã ɲimãã yo, mǝ̃́garà ɲí blǝ ɲì canããba huhorɩmmã nã.

Ɲi saa ɲí fǝ̃ǝ̃ wà cijal'n fãngããgɩ sǝ sùɔ́gɩ dɩn nǝ̃ bibiɛ'n kuugu.

Bláà ɲì bũũ-ba, gɩ̀-lǝ gɩ̀ nã, Dũnnũẁ níé ɲì yiɛgu nã̀ã hã-ɲã́ã̀ nǝ̃ gùú nũmǝ̃nãsǝrii mãã, ɲì min ɲí da yuɔr dɩ̀ nã.

Ɲi-ń ba ɲì ce-dǝ nnĩĩ, kuu'n síì bǝ̃ǝ̃lǝ̃ǝ̃ ɲì Dũnnũ cirǝ̃mmã nã.

Kɩrsa bluubà ji da ywaruugu

8 Yindiɛ, díilà jaaga piɛgǝgɩ dɩngɩ nã.

Bláà ɲì dwal nǝ̃ ɲì ɲĩɛ̃ nã́ã́ ɲũũnãtaa-i, bláà ɲì sɔ̃ ɲì ɲĩɛ̃ hujãndi, bláá ba ɲì buɔ ɲì hla nã nǝ̃ ɲì ɲĩɛ̃.

9 Ba-ń ce-ɲã́ã̀ nǝ̃ diibɩblaari, yindagǝ nã bá tuuraa ɲì nã, bláá ver-dǝ ɲí hã-ba.

Nǝ̃ ɲimãã, bláà ɲì cirǝ̃ǝ̃ Dũnnũw nã ɲì hã-ba wà wú piɛ wù nãkrɔfɩnfaagu bà drɔ, nã̀ã wa Dũnnũ yo, wù bíé-ɲã́ã̀ gùú nã mãã, wù plã wù nũɔ̃gu wà wu ji piɛ wù nãkrɔfɩnfaagu ɲì drɔ.

10 Sulammã nã, dìí mãã dìi yal Dũnnũ cãwan'n sɛbɛw nã, dɩ̀-i nnĩĩ: «Yíi nǝ̃n ba ǹ caa ǹ cuu jirammã dwal ǹ kɔ̃nɲã nã, ń blǝ ǹ hla nã nǝ̃ gaabɩbliɛ'n waamã, nǝ̃ ń hiil kwasǝri ǹ nũɔ̃gɩ nã.

11 Ǹ saa ń ver ǹ furũũgu ǹ hã diibɩblaari, ǹ-ba ǹ ce diifɩnfaari, nã̀ã gbǝ̃ǝ̃ nǝ̃ hyasɩrãgǝ'n caamã.

12 Nã̀ã wa bàá mãã bàa hũɔ̃ Yitii'n cɔ̃mmã, wú nǝ̃ wùu piɛ wù yinɲã bà drɔ, nã̀ã jǝ̃ǝ̃ wù tũɔ̃gu ǹ-ba wù nɔ̃ bà cirǝ̃mmã; nǝ̃ bàá mãã bà ce diibɩblar-lǝ, wù sǝ̃n hũɔ̃ nǝ̃ bà-lǝ.»

13 Nǝ̃ ɲimãã, ɲi-ń vaa ɲì hla nǝ̃ diifɩnfar'n celli, halii ji ce-ɲã́ã̀ nǝ̃ diibɩblaari?

14 Nǝ̃ halle ba-ń ba bà kãnnã-ɲã́ã̀ ɲì sũɔ̃lɩm'n cɔ̃mmã nã-i yo, ɲì yunɲã̀ dwállá.

Gɩ̀ sùɔ́gɩ nã, bláá sɔ̃ bà nã, bláá ya ɲì kusunɲã́ cu.

15 Nǝ̃ bláà ɲì bũũ Kɩrsa wɩ̀-i ɲì hiɛga nã, wɩ̀-i Yitiiw.

Ɲi mãã ɲĩ̀ĩ piɛ ɲì nãkruɔgu gùú tii'n cɔ̃mmã nã mãã, curo wo curo, wu-ń yugu-ɲã́ã̀ nǝ̃ gɩ̀ cɔ̃mmã bǝ̃ǝ̃ wo bǝ̃ǝ̃, wáalà dɩ́ kaalaa nǝ̃-yǝ.

16 Nǝ̃ ɲi-ń wa ɲí ce-dǝ, bláá ba ɲì buɔ ɲì hla nã, bláá diɛ-ba, nǝ̃ cɔ̃mbɩblammã báa ba ɲì hiɛga nã, gɩ̀-lǝ gɩ̀ nã, bàá mãã bà bǝr kwasiɛga bà dii ɲì nã wà ɲi mãã ɲì fǝ̃ǝ̃ ɲì wáà Kɩrsa hlũũgu sũɔ̃lɩmmã nã, bà kwasiɛga ver ǹ-dii ciiri bà nã.

17 Nã̀ã wa Dũnnũ kusunã cɔ̃m dɩn nǝ̃n bà-lǝ, curo nǝ̃-ń ba ǹ ywar ǹ diifɩnfar'n cɔ̃mmã nã, gùú búɔlá nã ń ba ǹ ywar ǹ diibɩblar'n cɔ̃mmã nã.

18 Kɩrsaẁ hṹɔ̃lã́ kuugu yin dɩnẁ gbɩla gaacĩɛ̃ya'n cɔ̃mmã nã.

Wùú mãã wù sṹɔ̃lã́, wù kúú diicĩɛ̃rǝntaa hãmĩĩ cɔ̃mmã nã-i, ǹ-da ǹ-kã nǝ̃-yáà Dũnnũw nãã.

Bà kúó wù cãnkũɔ̃mã, nǝ̃ Dũnnũ Yuflǝẃ fǝ̃ǝ̃ ǹ-ver ǹ-dii nũmǝ̃nãsǝri wù nã.

19 Gɩ̀-lǝ gùú Yuflǝ fãngããguu cíé, wú kãã waa Dũnnũ cɔ̃mmã, nǝ̃ gùú yuflaabaa mãã bàa suu bà nã.

20 Bà-lǝ bàá yáá bàa hla Dũnnũ cɔ̃mmã Nũhũ bǝ̃ǝ̃gu, nǝ̃ Dũnnũẃ fɛ̃ wù hiɛga nǝ̃-ba, ǹ-ba wù fennãã wà Nũhũw ce batow.

Covĩĩba'n sáá bàa jãn batow nã, Dũnnũẁ yáá wùu kor cwa nɩrsiɛl dɩndɩn.

Wù cíé hũmmã-i mã́ tuu-ba batow nã ǹ-ga hlǝ nǝ̃-ba.

21 Gɩ̀-lǝ gɩ̀ yáá gɩ̀ pɩgaa-ɲã́ã̀ nǝ̃ ɲĩɛ̃mã mãã mã̀ kor-ɲã́ã̀ kuɔkuɔ Yesu Kɩrsa pĩĩm'n cɔ̃mmã nã.

Wù-lǝ wù sǝ̃n saar ǹ-pyar cãnkũɔ̃m'n dɩgaa sǝ, nǝ̃ wù ce yí vaa yì hla Dũnnũ cɔ̃mmã nã, yi báa da ǹ-ba nǝ̃ diibɩblar yì hiɛga nã Dũnnũ yinɲã nã.

22 Yesuẁ tíɛ́ drɔkuɔlɩ nã ǹ-kãã ba Dũnnũ nãdĩĩyiɛgu.

Mɛlɛgɛba, drɔfãngãtaaba, nǝ̃ drɔfãngããgu, ɲã̀ min ɲã́ nǝ̃ Yesu Kɩrsa fãngããgɩ nã-i.