Piɛr dĩɛ̃l 1

Piɛr sɛbɛdĩɛ̃lw

Fyãnuugu

Mã́ã Piɛr, mã́ã mãã Yesu Kɩrsa tĩɛ̃tiiw, mǝ̃n-lǝ mã́ã yállà sɛbɛ wáà, mǝ̃̀ tĩɛ̃ mǝ̃̀ hã bàá mãã Dũnnũẁ níé ǹ-hiil-ba, nǝ̃ bá ba bàa buruɔ ǹ-ba gɩ̀ dǝ'n yanɲã: Pɔ̃ yiɛgu, Galasii yiɛgu, Kapadɔsɩ yiɛgu, Asii yiɛgu, nǝ̃ Bitini yiɛgu.

2 Tiiyǝ Dũnnũẁ níé ǹ-hiil-ɲã́ã̀, nã́ã́ wù yáá wùu blǝ-dǝ wà wu ji ce-dǝ nĩĩguu mãã; wù cíé wù Yuflǝw-i, wú ba wù kra ɲì nã ɲì dǝ, ǹ-da ǹ-ba ɲì nɔ̃ ɲì hã Yesu Kɩrsaw, nǝ̃ wù twammãã mãã mã̀ tṹnṹũ, mã̀ã́ yo, mã́ da ǹ-per ɲì nã.

Dũnnũẃ mǝ̃gaa ǹ-ne ɲì yiɛgu, nã̀ã hã-ɲã́ã̀ nǝ̃ hyasɩrãgǝgu dugɔ.

Dũnnũw hlã́ã̀-yáà nǝ̃ nũmǝ̃nãsǝflããri

3 Yáà yí ba yì bũũ Dũnnũw, wùú mãã Yitii Yesu Kɩrsa Tǝw!

Wù mãã wù níé yì hujãndi nã̀ã hã-yáà nǝ̃ nũmǝ̃nãsǝflããri Yesu Kɩrsa pĩĩm'n cɔ̃mmã nã, yí nǝ̃ yìi piɛ yì nãkruɔgu dɩ̀ nã kwelle,

4 ǹ-ba yì fennãã gùú nũɔ̃sǝn ɲinɲãã mãã Dũnnũẁ ga hã wù bluuba nǝ̃-ɲã.

Ɲi ga tuu-ɲã nǝ̃ sùɔ́gu Dũnnũ suɔgu.

Ɲã̀ sɩga bǝ̃ǝ̃lǝ̃ǝ̃, ɲã̀ sɩga bla, ɲã̀ sɩga vaalaa ɲì saa,

5 ɲimãã mãã Dũnnũ fãngããgɩ̀ cii ɲì nã, ɲì hũɔ̃m'n cɔ̃mmã nã, ǹ-ji da ǹ-kor-ɲã́ã̀ cwaaba min yinɲã nã gbaa cuu tãl'n yuugu.

6 Gɩ̀ sùɔ́gɩ nã, bláà ɲì ce kweyi-kweyiw, halle yindiɛ ɲì yigasǝrɩ-ń ba dɩ̀ ji ɲǝ̃ǝ̃ bǝ̃ǝ̃dagǝ fiyãã nǝ̃ cɔ̃ngbǝ̃ǝ̃m'n placin.

7 Gɩ̀-lǝ gɩ̀ gbǝ̃ǝ̃mã hi-ɲã́ã̀, ǹ-da ǹ-fǝ̃ǝ̃ ɲi mãã ɲĩ̀ĩ hũɔ̃ Dũnnũ cɔ̃mmã ǹ-ga hiraa gùú sùɔ́guu mãã.

Ɲimãã hũɔ̃mã́ nǝ̃ solli ǹ-maa sãnãw.

Nǝ̃ halle sãnãw mãã wù bǝ̃ǝ̃lǝ̃ǝ̃, ba-ń ce bá dii-yǝ dǝ̃ǝ̃mã nã ǹ-fǝ̃ǝ̃ wu-ń ba wù fa yindagǝ nã wù sǝ̃n fa.

Gùú nã-i, Yesu Kɩrsaw-ń ga juo hillaa, ɲi ji da buusammã, nǝ̃ fãngããgu nǝ̃ bũũmã.

8 Halle ǹ-da wà ɲi sáá ɲĩ̀ĩ da-yǝ nǝ̃ ɲì yinɲã, wù cɔ̃mmã́ dwal ɲì nã.

Nǝ̃ halle kuɔkuɔ yo ɲi sǝ̃n da-yǝ, nǝ̃ ɲí nǝ̃ ɲĩ̀ĩ hũɔ̃ wù cɔ̃mmã, gùú cíé, ɲí ba dudwalɩmmã nã, mã̀ã́ mãã curo síì gbǝ̃ǝ̃ ǹ-taa-mã nǝ̃ curo.

9 Nã̀ã wa ɲi mãã ɲì hṹɔ̃lã́ Yesu cɔ̃mmã, Dũnnũẁ ji kor-ɲã́ã̀.

10 Dũnnũẁ mãã wù níé ɲì yiɛgu nã̀ã kor-ɲã́ã̀, wù tanhiilaabà wáalá gɩ̀ cɔ̃mmã.

Bà mǝ̃́gará ǹ-tiisǝ gɩ̀ korɩm'n cɔ̃mmã́ kaalaa.

11 Kɩrsa Yuflǝw mãã wù yáá bà nã, wù-lǝ wùú túɔ́ ǹ-ja-ba nǝ̃ ywaruuguu mãã gɩ̀ yáá gɩ̀ ji hi-yǝ nǝ̃ wú da ǹ-da wù yuuntasǝ'n fãngããgu.

Dũnnũ tanhiilaa báà, bá wa bá caa ǹ-fǝ̃ǝ̃ gùú bǝ̃ǝ̃guu mãã cɔ̃m mã́ã̀mã̀ ji ce, nǝ̃ mã̀ mãã mã̀ ji ba nĩĩguu mãã.

12 Dũnnũẃ fǝ̃ǝ̃ ǹ-pɩgaa-dǝ ǹ-ja-ba wà cɔ̃m mã́ã̀, mã̀ síì ce bàá bǝ̃ǝ̃ sǝ, nǝ̃ mã̀ ji ce ɲimãã cɔ̃m nã-i.

Yindiɛ, bàá mãã bà waa Yesu cɔ̃ndudwalɩmmã, bà wáalá gɩ̀ cɔ̃mmã nǝ̃-ɲã́ã̀.

Bà wáalá-mã nǝ̃ Dũnnũ Yuflǝ fãngããguu mãã Dũnnũ tĩ́ɛ̃lã́ gɩ́ hlǝ wù nãã ǹ-ji hã-ba.

Halle mɛlɛgɛba nǝ̃ bà hla, bà caa bá fǝ̃ǝ̃ gɩ̀ cɔ̃mmã.

Dũnnũ tãnkuuraa'n waal'n tammã

13 Gɩ̀ sùɔ́gɩ nã, díilà-dǝ ɲì yunɲã nã, ɲí da ɲi ba ɲì ce mããcemmã ɲì hã Dũnnũw.

Mǝ̃́garà ɲí blǝ ɲì hla nã.

Dũnnũẁ mãã wù ji ne ɲì yiɛgu gùú yuuguu mãã Yesu Kɩrsaẁ ji hillaa ɲì nã, píɛlà ɲì nãkruɔgu dìí nã-i kwelle.

14 Bláà ɲì nɔ̃ ɲì hã Dũnnũw, bláá duu ɲì yisɩnã gaabɩbliɛga nã mãã gà yáá ɲì nã haasǝgu, gùú nã mãã ɲi sáá ɲĩ̀ĩ hi ǹ-fǝ̃ǝ̃ Dũnnũw.

15 Gɩ̀-lǝ gɩ̀ nã, Dũnnũw mãã wù bíé-ɲã́ã̀, wù mãã wù sǝ̃n hũɔ̃ dɩgaagu sǝ, ɲimãã yo, ɲì cɔ̃mmã min nã, bláá ba ɲì hũɔ̃-gǝ.

16 Sulammã nã, dɩ̀ yállá wà: «Mǝ̃n mãã mǝ̃̀ sǝ̃n hũɔ̃ dɩgaagu, ɲimãã yo, bláá ba ɲí hũɔ̃-gǝ.»

17 Ɲi mãã ɲi-ń ce ɲí ba ɲì cirǝ̃ǝ̃ Dũnnũw nã, ɲi be-yǝ wà: «Tɩtii», wà wù-lǝ wùú járrà curo wo curo'n sugolli ǹ-vaa nǝ̃ wù diicerǝdi, wà wu sǝ̃n pyariɛ cwaa nã, gɩ̀-lǝ gɩ̀ nã, bláà ɲì wáà sũɔ̃lɩmmã nã, cuu wáá nã fuwɔ ɲì yunɲã̀ ji ta ǹ-ga suu, ǹ-da ǹ-ba ɲì pɩgaa cwaaba wà ɲi bũũ Dũnnũw.

18 Ɲi fǝ̃́ǝ̃lã́ wà ɲì tǝvũnvãnããba yáá gùú mǝ̃ǝ̃lǝ̃ǝ̃ yaga nã, ɲi túulà bàá sùɔ́gɩ-i nǝ̃ Dũnnũẃ juo sǝ̃ǝ̃ ǹ-hiil-ɲã́ã̀ dɩ̀ nã nǝ̃ solkɩnkandi.

Wù sáa hũɔ̃-ɲã́ã̀ nǝ̃ kwaplar sǝ yindagǝ nã sãnã, ɲã̀-lǝ ɲã̀ ji gbǝ̃ǝ̃ ǹ-bǝ̃ǝ̃lǝ̃ǝ̃.

19 Nǝ̃ wù hṹɔ̃lã́-ɲã́ã̀ nǝ̃ Kɩrsa twam-i, mã̀-i nũɔ̃sǝn twammã.

Bà kúó-yǝ nã́ã́ bà mãã ba-ń ce bá ko tũmblɩw nĩĩguu mãã ǹ-jãn siimã.

Wu-ń ce wú ba wù sǝ nǝ̃ yuɔrɔm, nã̀ã ba wù sǝ nǝ̃ dor.

20 Dũnnũẁ yáá wùu ne ǹ-hiil wɩ̀-i, wà wùú ji ce-dǝ, nǝ̃ cuuw ji da wú nǝ̃ǝ̃.

Yindiɛ, cuu tãl'n bãn ɲã́ã̀ nã, Dũnnũẁ júó ǹ-ji pɩgaa-yǝ ǹ-ja cwaaba gbaa ɲimãã cɔ̃mmã nã-i.

21 Wùú cɔ̃mmã nã-i, ɲí hũɔ̃ Dũnnũ cɔ̃mmã, gùú Dũnnũw mãã wù pĩ́ĩlã́ ǹ-hiil-yǝ cugutaaba sǝ̃ǝ̃nã, nã̀ã hã-yǝ nǝ̃ wù yuuntasǝ'n fãngããgu.

Gùú cíé, ɲí hũɔ̃ Dũnnũ cɔ̃mmã nã̀ã piɛ ɲì nãkruɔgu wù drɔ.

22 Ɲi hṹɔ̃lã́ sulammã ǹ-per ɲì hla nã, ǹ-da ǹ-ba ɲì dwal nǝ̃ ɲì ɲĩɛ̃ huhorɩmmã nã, nã́ã́ ɲũũnãtaa-i nǝ̃-ɲã́ã̀.

Bláà ɲì dwal nǝ̃ ɲì ɲĩɛ̃ nǝ̃ kusuugɩ dɩngu.

23 Ɲi fǝ̃́ǝ̃lã́ wà Dũnnũw cíé ɲí ver ǹ-huu ǹ-tu nǝ̃ wù cãwandii mãã nũmǝ̃nãw.

Cãwan díɛ̀dɩ́ nǝ̃ fɩraa.

Wù-lǝ wù sǝ̃n ku nã́ã́ ɲì tǝhuubabaa mãã bà kurǝǝ nĩĩgu.

Wù síì gbǝ̃ǝ̃ ǹ-ku.

24 Sulammã nã, dɩ́ nàa dìi yal Dũnnũw cãwan'n sɛbɛw nã wà: «Curow, wú nǝ̃ nã́ã́ hĩɛ̃-i.

Wu-ń da yiiri danii danii yoo, dɩ́ nǝ̃ nã́ã́ hyãplum-i.

Hĩɛ̃gɩ̀ kuul, plummã̀ hlɔnãã.

25 Nǝ̃ Yitii'n cãwan-lǝ, dɩ́ nǝ̃ fɩraa-i.»

Dɩ̀-lǝ dɩ̀-i Yesu cɔ̃ndudwalɩmmãã mãã bà tu-mã nǝ̃-ɲã́ã̀.