Filemɔ̃w 1

Filemɔ̃ sɛbɛw

Polẁ yállá gùú sɛbɛw ǹ-hã Filemɔ̃w

Fyãnuugu

Mã́ã Pol, mã́ã̀mã kasoduuntiiw Yesu Kɩrsa cɔ̃mmã nã, nǝ̃ mǝ̃̀ cwanĩĩ Timotew, hãmĩĩ yállà sɛbɛ wáà yi hã yì nãmããcier Filemɔ̃w mãã yì cituublɩw,

2 nǝ̃ yì cituublɩ Afiyaw, nǝ̃ Arsipɩw mãã yì nãsɩrǝǝsɩw, nǝ̃ Igɩlisɩ taaba mãã bà tɩgii ǹ suɔgu:

3 yì Tǝ Dũnnũw, bá nǝ̃ Yitii Yesu Kɩrsaw, bá ne ɲì yiɛgu, nã̀ã hã-ɲã́ã̀ nǝ̃ hyasɩrãgǝgu!

4 Mǝ̃̀ dũũ kwayaw mǝ̃̀ hã mǝ̃̀ Dũnnũw pyandiɛ, nã̀ã ba mǝ̃̀ kãnãã ǹ cɔ̃mmã nã mǝ̃̀ cirǝ̃mmã nã,

5 nã̀ã wa mǝ̃̀ nṹɔ̃́ bà waa ǹ hũɔ̃m'n cɔ̃mmã Yitii Yesuw nã, nã̀ã ya Kɩrsa bluuba min, bà cɔ̃mmã̀ dwal ǹ nã.

6 Mǝ̃̀ cirǝ̃ǝ̃ Dũnnũw nã, wú ya ǹ mãã ǹ-tuu guɔ nǝ̃-yáà gùú hũɔ̃mã nã, mã́ ba nǝ̃ fãngããgu, nã̀ã ce bá fǝ̃ǝ̃ diifɩnfaarɩ minw mãã yi ce-dǝ [Yesu] Kɩrsa cɔ̃mmã nã.

7 Sulammã nã, yi da dudwalɩmmã nǝ̃ hyagbǝ̃ngbãndi dugɔ ǹ dwalɩm'n cɔ̃mmã nã, nã̀ã wa mã́ã cwanĩĩ, yíǹ cɔ̃mmã nã, Kɩrsa bluu'n hiɛgà sã́rrã́.

Polw mãã wù cirǝ̃ǝ̃ dìí nã

8 Gùú cíé, halle ǹ-da wà Kɩrsaw nã gɩ̀ hlũũgɩ́ nǝ̃ mǝ̃̀ saa mǝ̃́ ba mǝ̃̀ ji kra dìí mãã dìi saa ǹ-hã-n,

9 mǝ̃̀ kãn wà dwalɩm'n cɔ̃mmã nã, gɩ̀ búɔlá nã mǝ̃́ jiɛriɛ nǝ̃-n, mã́ã Pol, mã́ã mãã vũnvãtiiw, nã̀ã ver ǹ-ba Yesu Kɩrsa kasoduu'n tiiw kuɔkuɔgu.

10 Mǝ̃̀ jiɛriɛ nǝ̃-n Onesɩn^a cɔ̃m nã-i, wùú mãã wù jáa ba mǝ̃̀ bíɛ́w, ǹ-ya mǝ̃́ ba jɔrgɔba nã.

11 Haasǝgu, wù sáá wù pyar dugɔ wù hã-n, nǝ̃ yindiɛ, wù pyar dugɔ wù hã yíì nǝ̃ mã́ã̀.

12 Mǝ̃̀ ver mǝ̃̀ tĩɛ̃-yǝ ǹ nãã, [nǝ̃ yíì, fǝ̃ǝ̃ ń hyar-yǝ,] wùú mãã mǝ̃̀ hiɛ'n curow.

13 Gɩ̀ yáá gɩ̀ dwal mǝ̃̀ nã wú ba mǝ̃̀ tuɔra, ǹ-da ǹ-tuu ǹ sùɔ́gu ǹ-ce mããcemmã ǹ-hã-m, ǹ-ya mǝ̃́ ba jɔrgɔba nã Yesu cɔ̃ndudwalɩm'n cɔ̃mmã nã,

14 nǝ̃ mǝ̃̀ sǝ̃n caa mǝ̃́ ce cɔ̃m nǝ̃ mǝ̃̀ sáa fǝ̃ǝ̃ ǹ kãnɩmmã, ǹ diifɩnfar'n cellɩ báa ji ba nã́ã́ guurɩm-i, nǝ̃ dɩ́ ba ǹ kusunã cɔ̃mmã.

15 Gɩ-ń dwal, wù kã́ã́ ɲí buruɔ bǝ̃ǝ̃dagǝ fiyãã, ǹ-da ǹ-ver ǹ-ji ba nǝ̃-n fɩraa,

16 ǹ-ba wù sǝ lɔ hlo, nǝ̃ ǹ-maa dɩ̀-lǝ: wú ba ǹ cwanĩĩw mãã ǹ cituublɩw.

Wú nǝ̃ nĩĩgɩ-i mǝ̃n saa ǹ-car, nǝ̃ wù ga ba nĩĩgɩ-i yíǹ saa ǹ-maa, ǹ-vaa nǝ̃ ɲì cwansǝri, nǝ̃ ɲì cwansǝri Yitiiw nã.

17 Nǝ̃-ń ba ǹ ne wà ǹ jambla-i nǝ̃-m, hyar-yǝ nã́ã́ n hyar mã́ã-i.

18 Nǝ̃ wu-ń ba wùu yuɔruɔ nǝ̃-n, yindagǝ nã wù saa wú hã-n nǝ̃ gɩdagǝ, piɛ-gǝ mǝ̃n yuugɩ nã.

19 Mã́ã Pol, mã́ã yállà-dǝ nǝ̃ mǝ̃̀ hla'n nãkruɔgu, mǝ̃̀ ji ver-gǝ ǹ-hã-n, nǝ̃ gɩ̀ sáa hi mǝ̃́ ce ń kãnãã wà yíì nǝ̃ ǹ hla, ǹ saa ń hã-m nǝ̃ kuudagǝ, gùú mãã ǹ hla'n nũmǝ̃nãsǝri.

20 Ũwũũ, mã́ã cwanĩĩ, pɛ mǝ̃̀ nã nǝ̃-dǝ Yitiiw nã: ce mǝ̃̀ hiɛgá sɩrĩɛ̃ Kɩrsaw nã.

21 Mǝ̃́ nǝ̃ mã̀ã piɛ mǝ̃̀ nãkruɔgu dɩ̀ nã wà n ji nɔ̃ ǹ-hã-m, gùú cíé mǝ̃́ ba mǝ̃̀ yal mǝ̃̀ hã-n, nã̀ã ba mã̀ã fǝ̃ǝ̃ wà n ji ce ǹ-maa mǝ̃̀ círǝ̃́ǝ̃ dìí nã.

22 Ǹ-pya dɩ̀-lǝ dɩ̀ nã, tɩ́gɩnǝ̃̀ǝ̃ wancɔmmã nã ɲí hã-m, nã̀ã wa ɲì cirǝ̃m'n cɔ̃mmã nã, mǝ̃̀ ne wà mǝ̃ ga ba nǝ̃-ɲã́ã̀.

Fyãnuugu

23 Epafrasɩw mãã mǝ̃̀ nãkasoduuntiiw Yesu Kɩrsaw nã, wù fyãn-n,

24 bá nǝ̃ mǝ̃̀ nãmããcieraabaa mãã Markaw, Arisɩtarkɩw, Demasɩw, nǝ̃ Lukaw.

25 Yitii Yesu Kɩrsaẃ ne ɲì yiɛgu!