Kor. dĩɛ̃l 1

Korɛ̃tɩ taa'n sɛbɛdĩɛ̃lw

Polẁ yállá gùú sɛbɛdĩɛ̃lw ǹ-hã Korɛ̃tɩ lǝ'n Igɩlisɩ taaba

Fyãnuugu

Mã́ã Pol, mã́ã mãã Dũnnũẁ bíé-m mǝ̃́ ba Yesu Kɩrsa tĩɛ̃tiiw, ǹ-vaa nǝ̃ wù kusuugu, yí nǝ̃ yì cwanĩĩ Sɔsɩtɛnw, hãmĩĩ yállà sɛbɛ wáà.

2 Korɛ̃tɩ lǝ'n Igɩlisɩ taa ɲimãã mãã ɲì bũũ Dũnnũw, wù kárrá ɲì nã ɲì dǝ ǹ-hã Yesu Kɩrsaw, yi yállá sɛbɛ wáà ǹ-hã ɲimãã-i.

Dũnnũẁ bíé-ɲã́ã̀ ɲí ba wù bɩgaaba, ɲì min nǝ̃ bàá mãã bà cirǝ̃ǝ̃ Yitii Yesu Kɩrsaw nã sùɔ́ wo sùɔ́.

Wù-lǝ wɩ̀-i bà Tiiw, nǝ̃ hãmĩĩ yo, yì yow.

3 Mǝ̃̀ cirǝ̃ǝ̃ yì Tǝ Dũnnũw nã bá nǝ̃ Yitii Yesu Kɩrsaw, wà bá ne ɲì yiɛgu nã̀ã hã-ɲã́ã̀ nǝ̃ hyasɩrãgǝgu.

Dũnnũẁ hã wù bluuba nǝ̃ ɲããhuhorɩnɲã

4 Ɲi mãã Yesu Kɩrsaw nã, gùú cíé Dũnnũẃ ne ɲì yiɛgu, gɩ̀-i, mǝ̃́ ba mǝ̃̀ dũũ kwayaw mǝ̃̀ hã-yǝ bǝ̃ǝ̃ wo bǝ̃ǝ̃ ɲì cɔ̃mmã nã.

5 Sulammã nã, ɲi mãã Yesu Kɩrsaw nã, gùú cíé Dũnnũẃ hã-ɲã́ã̀ nǝ̃ ɲinhuhoranɲã min mãã wù hlũũgɩ nã.

Gɩ̀ ɲinhuhoranɲã sǝ̃ǝ̃nã, ɲããdĩɛ̃lãnɲã-i nnĩĩ: ɲi fǝ̃ǝ̃ sulammã, nã̀ã ba ɲì fǝ̃ǝ̃ ɲì waa-mã.

6 Gùú tammã dɩnmã-i, yi wáalá Kɩrsa cɔ̃mmã nǝ̃-ɲã́ã̀, ɲí hũɔ̃-mã nǝ̃ ɲì hiɛga min,

7 ǹ-ba ɲì cii wù jol'n yuugu, fuwɔ ǹ-ce Dũnnũẃ hã-ɲã́ã̀ nǝ̃ ɲinɲã min wù hlũũgɩ nã.

Gɩ̀ sùɔ́gɩ nã, kuu'n sɩga naa-ɲã́ã̀.

8 Wùú Dũnnũẁ ji dii kɩkǝmmã ɲì nã fuwɔ ǹ-ga hi gɩ̀ kǝǝri, ǹ-da ǹ-ce Yitii Yesu Kɩrsa jol'n yuugu, ba báa da wanyuɔrɔmmã ɲì nã.

9 Dũnnũw yalntii-i, wù bíé-ɲã́ã̀ ǹ-dii-ɲã́ã̀ gbǝllɩ nã nǝ̃ Yitii Yesu Kɩrsaw mãã wù bíɛ́w.

Burɔm'n jãnɩmmã Korɛ̃tɩ lǝ'n Igɩlisɩ taaba sǝ̃ǝ̃nã

10 Mã́ã cwanãã ɲimãã, mǝ̃̀ cirǝ̃ǝ̃ ɲì nã Yitii Yesu Kɩrsa yiirɩ nã: bláà ɲì waa yal dɩndi.

Bláá ya burɔmmã́ jãn ɲì sǝ̃ǝ̃nã, nǝ̃ gbǝ́wà nǝ̃ ɲì ɲĩɛ̃, ɲì hiɛgá ba sùɔ́gɩ dɩngu nǝ̃ ɲí ba ɲì kãn tammã dɩnmã.

11 Mã́ã cwanãã, ɲi-ń da mǝ̃́ waa dɩ̀-lǝ cwaabà hlǝ́rá Kulowe suɔgɩ nã, ǹ-juo waa nǝ̃-m wà ɲi sǝ ɲĩ̀ĩ gbǝ yalli dɩndɩ nã.

12 Mǝ̃̀ caa mǝ̃́ wa burɔmmã jã́nnã́ ɲì sǝ̃ǝ̃nã.

Badaaba-ń ce bá waa wà ba duu mã́ã Pol mã́ã nã-i, badaabà waa wà ba duu Apolɔsɩ nã-i, badaabà waa wà ba duu Piɛr nã-i, nǝ̃ badaaba-lǝ bà waa wà ba duu Kɩrsa nã-i.

13 Ɲi kãn wà Kɩrsaw nǝ̃ wùu buruɔ-ì?

Gɩ ba nã́ã́ mã́ã Pol mã́ã kúú ɲì cɔ̃mmã nã gbǝl'n daagɩ nã-ì?

Dàa bà ɲĩ́ɛ̃lã́-ɲã́ã̀ nǝ̃ mã́ã Pol yir-iì?

14 Mǝ̃̀ dũũ kwaya Dũnnũw nã, ǹ-da wà mǝ̃ sáa ɲĩɛ̃ curo ɲì sǝ̃ǝ̃nã, gɩ-ń vã ǹ-hlǝ Kɩrsɩpiisɩw nǝ̃ Gayusɩw dɩndɩn nã.

15 Gɩ̀ sùɔ́gɩ nã, curo'n sɩraa ɲì sǝ̃ǝ̃nã wùú mãã wù ji gbǝ̃ǝ̃ ǹ-waa wà wu bátisé mã́ã yiirɩ nã-i.

16 Sulam-i, ǹ-pya bà-lǝ bà nã, mǝ̃̀ bátisé Sɩtefanasɩw suɔntaaba.

Nǝ̃ gɩ-ń vã ǹ-hlǝ bà-lǝ bà nã, mǝ̃̀ sáa fǝ̃ǝ̃ wà mǝ̃ bátisé curodiɛ hlo.

17 Kɩrsaẁ sáa tĩɛ̃-m wà mǝ̃ kãã ba mǝ̃̀ ɲĩɛ̃ cwaa sǝ, nǝ̃ wù tĩ́ɛ̃lã́-m wà mǝ̃́ kãã ba mǝ̃̀ waa Dũnnũ cɔ̃ndudwalɩm-i nǝ̃-ba.

Nã̀ã waa nǝ̃-m hlo wà mǝ̃ báa waa-mã nǝ̃ cwaa'n cɔ̃nfǝ̃ǝ̃gǝ'n cãwanĩɛ̃ga, Kɩrsa gbǝl'n daagɩ báa ji ba mǝ̃ǝ̃lǝ̃ǝ̃kuugu bà yinɲã nã.

Dũnnũ fãngããgu nǝ̃ wù cɔ̃nfǝ̃ǝ̃gǝ'n cɔ̃mmã

18 Nã̀ã wa yi-ń ba yì waa Yesu kúúcɔ̃mmã gbǝl'n daagɩ nã, bàá mãã vaalam'n hlũũgɩ nã, bá ba bà ne gɩ́ ba baahãrsǝ'n cɔ̃m-i.

Nǝ̃ hãmĩĩ mãã korɩm'n hlũũgɩ nã, yì fǝ̃́ǝ̃lã́ wà Dũnnũ fãngãã-i.

19 Nã̀ã wa dɩ̀ yállá wà: «Mǝ̃̀ ji bǝ̃ǝ̃lǝ̃ǝ̃ cɔ̃nfǝ̃ǝ̃rǝ̃ǝ̃'n cɔ̃nfǝ̃ǝ̃gǝgɩ nã, nã̀ã hla-gǝ gbɩla gbɩla.»

20 Dũnnũw-ń ba wùu waa dɩ̀-lǝ, cuu wáà cɔ̃nfǝ̃ǝ̃gǝgɩ̀ ji pyar bii dugɔ-i?

Dàa Musa hlũũ'n yuntaa'n cɔ̃nfǝ̃ǝ̃gǝgɩ̀ ji pyar bii dugɔ-i ǹ-hã-ba Dũnnũ yinɲã nã?

Kuɔkuɔ cincariɛ'n cɔ̃nfǝ̃ǝ̃gǝgɩ̀ ji pya bà nã nǝ̃ bii wù yinɲã nã?

Dũnnũẁ wáalá dɩ̀-lǝ ǹ-pɩgaa wà cuu wáà cɔ̃nfǝ̃ǝ̃gǝgɩ nǝ̃ nã́ã́ baahãrsǝ-i wù yinɲã nã.

21 Wù pɩ́gará cuu cwaaba nǝ̃ wù cɔ̃nfǝ̃ǝ̃gǝgu, nǝ̃ bàá nǝ̃ bà cɔ̃nfǝ̃ǝ̃gǝgɩ min, bà sáa ji gbǝ̃ǝ̃ ǹ-fǝ̃ǝ̃-yǝ.

Bà mãã bà sáa ji gbǝ̃ǝ̃ ǹ-fǝ̃ǝ̃-yǝ nnĩĩ nã, gùú cíé yi mãã yí waa gùú Dũnnũ cãwandii mãã yì ja-ba, bà-lǝ bá ba bà ne dɩ́ ba baahãrsǝri, nǝ̃ Dũnnũ-lǝ, wú wa wu ji tuu-dǝ ǹ-kor bàá nǝ̃n hṹɔ̃lã́-dǝ.

22 Yahudyabà caa bá da cɔ̃npɩgam-i, nǝ̃ Grɛkɩba-lǝ, bá wa ba nã́ã̀ da bá fǝ̃ǝ̃ cɔ̃mmã nǝ̃ bà hla'n cɔ̃nfǝ̃ǝ̃gǝgu.

23 Nǝ̃ hãmĩĩ-lǝ, bà gbǝ́ǝ́ gùú Kɩrsaw mãã daagɩ nã, yi waa wùú cɔ̃m-i yì ja cwaaba.

Cãwan díɛ̀dɩ̀ ce Yahudyabá ba bà ver furũũ, nã̀ã ba dɩ̀ hlǝ baahãrsǝri cwaa'n dɩgaliɛ saa.

24 Nǝ̃ Dũnnũẁ bíé bàá mãã Yahudyaba nǝ̃ Grɛkɩba sǝ̃ǝ̃nã, bà fǝ̃́ǝ̃lã́ wà Kɩrsaw pɩ́garà Dũnnũ fãngããgu nǝ̃ wù cɔ̃nfǝ̃ǝ̃gǝgu.

25 Nã̀ã wa cwaabà mãã bà ne dìí wà Dũnnũ baahãrsǝ-i, dɩ̀-lǝ dɩ̀ máalá bà cɔ̃nfǝ̃ǝ̃gǝgu, nǝ̃ bà mãã bà ne dìí mãã dɩ́ ba wù mǝ̃nkursǝri, dɩ̀-lǝ dɩ̀ maa bà fãngããgu.

26 Mã́ã cwanãã ɲimãã mãã Dũnnũẁ níé ǹ-hiil-ɲã́ã̀, níyà ɲì hla, ɲí ne kɛ-i: yi-ń wa yi ne-dǝ cuu cwaa'n tammã nã, cɔ̃nfǝ̃ǝ̃rǝ̃ǝ̃bà sáa bũũ ɲì sǝ̃ǝ̃nã, fãngãtaabà sáa bũũ ɲì sǝ̃ǝ̃nã nǝ̃ cogǝ̃ngãã yo, bà sáa bũũ ɲì sǝ̃ǝ̃nã.

27 Nǝ̃ cuu cwaabà mãã bà ne ɲã̀ã́ mãã baahãrsǝ'n ɲinɲã, Dũnnũẁ níé ǹ-hiil ɲã̀-i ǹ-dii ciiri cɔ̃nfǝ̃ǝ̃rǝ̃ǝ̃ba nã, nã̀ã ne ǹ-hiil ɲã̀ã́ mãã bà ne-ɲã́ã̀ wà mǝ̃nkursǝ-i ǹ-dii ciiri fãngãtaaba nã.

28 Dũnnũẁ níé ǹ-hiil comǝ̃ǝ̃lǝ̃ǝ̃baa mãã cuu cwaabà sǝ̃n ne bá hlǝ cwaa, ǹ-da ǹ-bǝ̃ǝ̃lǝ̃ǝ̃ dìí mãã nũɔ̃sǝn dǝlli bà yunɲã nã.

29 Gɩ̀ sùɔ́gɩ nã, curo'n sɩriɛ wùú mãã wù ji gbǝ̃ǝ̃ ǹ-bũũ wù hla Dũnnũ yigagɩ nã.

30 Nǝ̃ Dũnnũẁ cíé yí ba curoẁ dɩndɩnw nǝ̃ Yesu Kɩrsaw.

Wù cíé Yesuẃ ba yì cɔ̃nfǝ̃ǝ̃gǝgu.

Wùú cɔ̃mmã nã-i yí ba cosũɔ̃lbaba wù yinɲã nã.

Wù kárrá yì nã yì dǝ, nã̀ã hiil-yáà diicĩɛ̃rǝ'n nãkruɔgɩ nã,

31 ǹ-da ǹ-vaa nǝ̃ dɩ̀ yállá nĩĩgu mãã wà: «Curo nǝ̃-ń wa ń bɩnǝ̃ǝ̃ ǹ hla nã, ba nǝ̃ bɩnǝ̃ǝ̃ ǹ hla nã Cuutii Dũnnũ cɔ̃mmã nã.»