Saburw (Psaumes) 72

Sabur 72

Ǹ-hlǝ Solmãnw nã.

Eh Dũnnũ, ce yuuntigǝ̃ngãẃ ba wù jar sugolli yíi tammã, hã yuuntigǝ̃ngã'n bíɛ́w nǝ̃ ǹ sũɔ̃lɩmmã!

2 Wú ba wù jar ǹ bluu'n sugolli nǝ̃ sũɔ̃lɩmmã, nǝ̃ hujãncɔ̃mntaabaa mãã ǹ bɩgaaba, ǹ-vaa nǝ̃ ǹ hlũsũɔ̃lgǝgu.

3 Tãnsǝrɩ́ ba dɩ̀ hã-ba nǝ̃ hyasɩrãgǝgu, nǝ̃ tãmbiigá ba gà hã-ba nǝ̃ sũɔ̃lɩmmã.

4 Bàá mãã ǹ bluu'n hujãncɔ̃mntaaba, wú hũɔ̃ bà nũɔ̃gu, wú kor kuokuo'n tãnkuuraaba, nã̀ã mugunãã kãnnãtaaba nã!

5 Bǝ̃ǝ̃gɩ-ń ba dìɛ gɩ̀ hlǝ, nǝ̃ hyargaagɩ́ ba gɩ̀ hiil gbɩgbaamã, ǹ bluubá ba bà sɔ̃ ǹ nãã, ǹ-tuu brǝnnɔ̃nɲã ǹ-ga kra brǝnnɔ̃ndaaɲã nã.

6 Yuuntigǝ̃ngãẃ ba nã́ã́ duɔgu mãã gɩ̀ duruu fugagɩ nã, nã́ã́ dɔhũmmãã mãã tũn hlɔ̃mmã nã!

7 Wù yuuntasǝrɩ nã, hlũsũɔ̃lgǝgɩ́ ba gɩ̀ pisɩrĩɛ̃ gɩ̀ maar, nǝ̃ ǹ-ya hyargaagɩ́ ba gɩ̀ hiil gbɩgbaamã, hyasɩrãgǝgɩ́ bũũ!

8 Wù ji ba yuuntiiw, ǹ-tuu lwaakɩnkandaarɩ nã ǹ-ga kra dɩdaarɩ nã, nǝ̃ ǹ-tuu Efratɩ lwaagɩ nã, ǹ-ga kra cuu kǝǝrɩ nã.

9 Jerkwarntaabà ji kuulǝǝ wù yigagɩ nã, nǝ̃ wù ɲããtaabà ji ba bà nãn huruugu.

10 Tarsisɩ lǝ'n yuuntigǝ̃ngãw, nǝ̃ bàá mãã lwaakɩnkandìi caliɛ bà nã, bà ji ba bà pã nãndi nǝ̃ Seba yuntaagǝ̃ngĩɛ̃ba, nǝ̃ Saba bɩgaabà ji ba bà jo nǝ̃ ɲããbũũɲinɲã.

11 Yuntaagǝ̃ngĩɛ̃ba min bà ji kuulǝǝ wù yigagɩ nã, coplaaga min gà ji ce mããcemmã ǹ-hã-yǝ.

12 Nã̀ã wa wù ji hiil kuokuow mãã kaasuugɩ nã, nǝ̃ hujãncɔ̃mntiiw mãã curo'n sǝ nǝ̃ wù pɛ wù nã.

13 Wù ji sɔ̃ mǝ̃nkurnĩĩw nǝ̃ kuokuo'n hujãndi, nã̀ã kor kwakwaa'n nũmǝ̃nãsǝri;

14 wù ji sǝ̃ǝ̃ ǹ-hiil-ba kãnnãmmã nã, nǝ̃ hyadũgaaciega nã, nã̀ã wa bà twammã̀ ji ba nǝ̃ solli wù yinɲã nã.

15 Yuuntigǝ̃ngãẃ ba nũmǝ̃nãw! Bà ji hã-yǝ nǝ̃ Seba sãnãw, bà ji ba bà cirǝ̃ǝ̃ Dũnnũw nã bà hã-yǝ pyandiɛ, bà ji ba bà cirǝ̃ǝ̃ wà Dũnnũẃ piɛ wù nãkrɔfɩnfaagu wù drɔ bǝ̃tã.

16 Jaagà ji car wù yiɛgu, tãnsǝ'n yunɲã nã, nǝ̃ jasunɲã̀ ji ba ɲã̀ saaraa nã́ã́ Libã lǝ'n tubiɲin-i; cwaabà ji ba bà suro liɛga nã nã́ã́ ɲũũrũũhĩɛ̃-i.

17 Wù yiirɩ́ ba fɩraa, wú ba dìɛ pyandiɛ nã́ã́ bǝ̃ǝ̃-i! Yí ba yì ta wùú nã-i yì cirǝ̃ǝ̃ Dũnnũw nã yì hã yì ɲĩɛ̃ wà wú piɛ wù nãkrɔfɩnfaagu yì drɔ, coplaaga min gà ji ba gà waa wà yuuntigǝ̃ngã'n yuugɩ dwállá.

18 Fɩraa-Dũnnũ yiirɩ́ bũũ, Isɩrayɛl Dũnnũw, wùú dɩn mãã wù ce cɔ̃nnorɩmmã.

19 Wù yiiri mãã nǝ̃ yuuntasǝ'n gbɩgbaamã, dɩ́ bũũ fɩraa, ɲũũrũũgɩ min gɩ́ yu nǝ̃ wù yuuntasǝ'n gbɩgbaamã! Kwaya! Kwaya!

20 Jese bíɛ́ Dawuda cirǝ̃mmã̀ tĩ́ɛ̃́ níɛ̀-i.