Saburw (Psaumes) 51

Sabur 51

Dawuda hlǝ̃ǝ̃gu, gɩ̀ hlǝ́rá hlãnhyarriɛ'n yuuntii'n sɛbɛw nã-i.

2 Yuuntigǝ̃ngã Dawudaẃ fǝ̃ǝ̃ ǹ-tuu Uuri ciɛ Batɩsebaw, Dũnnũ tanhiil Natãẃ kã wù nãã. Dawudaẃ waa wà:

3 Eh Dũnnũ, ne mǝ̃̀ yiɛgu ǹ-vaa nǝ̃ ǹ kusufɩnfaagu! Ǹ-vaa nǝ̃ hujãndii mãã dìi bũũ, hu ń suu mǝ̃̀ yuɔrɔmmã nã!

4 Mǝ̃̀ yúɔrúɔ nǝ̃ dìí mãã, ca mǝ̃̀ nã ń pyar-dǝ, nǝ̃ per mǝ̃̀ nã nǝ̃ mǝ̃̀ diicĩɛ̃rǝdi,

5 nã̀ã wa mǝ̃̀ hṹɔ̃lã́ mǝ̃̀ yuɔrɔmmã, nǝ̃ mǝ̃̀ diicĩɛ̃rǝ yo dɩ́ ba pyandiɛ mǝ̃̀ yigagɩ nã.

6 Mǝ̃̀ cíé diicĩɛ̃rǝdi ǹ-jãn ǹ nã, mǝ̃̀ cíé diibɩblaari ǹ yinɲã nã, ǹ-jãn yíi dɩn nã-i. Gùú cíé cincaruugɩ̀ sǝ ǹ sugojaruugɩ nã, ń nǝ̃ nã̀ã sũɔ̃l ǹ cãwanĩɛ̃ga nã.

7 Ũwũũ, mǝ̃̀ huumã nã dìi, mǝ̃̀ yúɔrúɔ; mǝ̃̀ ɲũẁ túulá mǝ̃̀ kusuugu gùú nã mãã, diicĩɛ̃rǝdɩ̀ yáá dìi nɩsɩ mǝ̃̀ nã ǹ-tã.

8 Nǝ̃ ǹ caa sulammã́ ba hiɛ'n taarɩ nã: ce mǝ̃́ fǝ̃ǝ̃ vũnvãnãmmã mǝ̃̀ hiɛ'n kusuugɩ nã!

9 Per mǝ̃̀ nã nǝ̃ isopetuugu, mǝ̃̀ ji ba yalla; ca mǝ̃̀ nã, mǝ̃̀ ji pesǝ ǹ-maa kurandow.

10 Ce mǝ̃́ nɔ̃ kweyi-kweyi hlãnɲã nã, nǝ̃ dudwalɩm'n ɲinɲã nã, nǝ̃ ǹ káráa gùú kukuunɲã nã, ɲã́ ba ɲã̀ ce kweyi-kweyiw.

11 Pyar ǹ yinɲã mǝ̃̀ gaacĩɛ̃yaga nã, hu ń suu mǝ̃̀ yuɔrɔmmã min nã.

12 Dũnnũ, nǝ̃ǝ̃ hiɛgaa mãã yalla gà nã mǝ̃̀ nã, ver-m, nǝ̃ ń ce mǝ̃́ hiraa dɩ̀ dɩndɩ nã!

13 Báa nǝ̃nǝ̃ǝ̃ mǝ̃́ hal ǹ nã, báa vũɔ̃-m nǝ̃ ǹ Yuflǝw!

14 Hã-m nǝ̃ ǹ korɩm'n dudwalɩmmã, nǝ̃ ń pɛ mǝ̃̀ nã nǝ̃ yuflǝw mãã wù ji ce mǝ̃́ dii mǝ̃̀ hla ǹ cɔ̃mmã nã!

15 Mǝ̃̀ ji kal yuɔrɔtaaba nǝ̃ ǹ hlũsǝri, diicĩɛ̃rǝntaabá ver ǹ-jo ǹ nãã.

16 Dũnnũ, mǝ̃̀ korɩm'n Dũnnũ, hiil-m twammãã mãã mã̀ tṹnṹũ mã̀ nãkrɔnɲã nã, gɩ̀-lǝ gɩ̀ nã, mǝ̃̀ nãmbendɩ̀ ji ba dɩ̀ hyar ǹ sũɔ̃lɩm'n cɔ̃mmã.

17 Mǝ̃̀ Tii, cugur mǝ̃̀ nɔ̃biɛnɲã, mǝ̃̀ nũɔ̃gɩ̀ ji ba gɩ̀ bɩnǝ̃ǝ̃ ǹ nã.

18 N nã́ã̀ ba ǹ caa siimã, mǝ̃ nã́ã̀ mã̀ã jãn-mã ǹ hã-n, nǝ̃ siimãã mãã bà ye-mã nǝ̃ yellɩ nã, mã̀ sǝ̃n dwal ǹ nã.

19 Siimãã mãã Dũnnũẁ caa-mã, mã̀-i hiɛgaa mãã gàa cor. Dũnnũ, hiɛgaa mãã gàa cor, nã̀ã ba gàa hɩr gà hla nã, ǹ sǝ̃n hla-ga.

20 Ǹ-ya ń ba ǹ kusufɩnfaagɩ nã, ce Siyɔ̃ lǝri nǝ̃ diifɩnfaari, mã Serusalɛm dofũũli.

21 Gɩ̀-lǝ gɩ̀ nã, sũɔ̃lɩm'n siimã, nǝ̃ mã̀ã́ mãã bà ye-mã nǝ̃ yellɩ nã, nǝ̃ mã̀ã́ mãã bà ye kwasǝnkukukuugɩ min, mã̀ ji dwal ǹ nã; gɩ̀-lǝ gɩ̀ nã, bà ji jãn-n nǝ̃ ninbliɛba ǹ siijãnkuugu drɔ.