Sabur 27
Gɩ̀ hlǝ́rá Dawuda nã-i.
Fɩraa-Dũnnũw mǝ̃̀ gbɩgbaamã nǝ̃ mǝ̃̀ korɩmmã: mǝ̃̀ ji sɔ̃ halii nã-i? Mǝ̃̀ ciitiiw-i Fɩraa-Dũnnũw, mǝ̃̀ saa mǝ̃́ ba mǝ̃̀ ɲãnãã halii yiga nã-i?
2 Cobaliɛbà mãã ba-ń ba bà kuganãã mǝ̃̀ nã, bà caa bá ce mǝ̃́ ba bà jerkũɔ̃mã, bàá mãã mǝ̃̀ cuɔltaaba, nǝ̃ mǝ̃̀ ɲããtaaba, bà-lǝ bàá vérrà bà juu bà hla bà duruu.
3 sɩrǝǝsɩba kuruɔgɩ-ń suro ǹ-hiraa mǝ̃̀ yuunã, mǝ̃̀ hiɛga sǝ̃n sɔ̃ cɔ̃m nã. Halle byaarɩ-ń suro mǝ̃̀ yuunã, mǝ̃̀ hla nã̀ã ba nǝ̃ nãkrɔpiɛsuɔgu-i.
4 Mǝ̃̀ cirǝ̃ǝ̃ kuugɩ dɩn nã-i Fɩraa-Dũnnũw saa, gùú mãã mǝ̃̀ caa-gǝ nǝ̃ mǝ̃̀ hiɛga min: mǝ̃̀ caa mǝ̃́ ba Fɩraa-Dũnnũ suɔgu mǝ̃̀ yunɲã min nã, ǹ-ba mǝ̃̀ ne wù faagu, nã̀ã ba mǝ̃̀ ne-yǝ wù bũũm'n suɔgu kusunã,
5 nã̀ã wa wù cii mǝ̃ nã wù bũũm'n kuɔblɩri kusunã, blasǝ'n yuugɩ nã, wù ji ŋmǝ̃ǝ̃rǝ̃ǝ̃ mǝ̃̀ nã wù kuɔblɩ'n wancĩĩmã nã, wù ji haar ǹ-piɛ-m tɩntalɩmdamã drɔ.
6 Mǝ̃̀ ɲããtaabaa mãã bàa caliɛ mǝ̃̀ nã, mǝ̃̀ yuugɩ̀ máalá ǹ-hlǝ bà yunɲã drɔ ǹ-tã. Mǝ̃̀ ji jãn siimã ǹ-bũũ Fɩraa-Dũnnũw wù kúɔ́lɩ nã nǝ̃ dudwalɩm'n kaasuugu, mǝ̃̀ ji hyar hlãnɲã, mǝ̃̀ ji bɩnǝ̃ǝ̃ wù nã.
7 Fɩraa-Dũnnũ, nɔ̃ mǝ̃̀ yalli, nã̀ã wa mǝ̃̀ be yíi-i, ne mǝ̃̀ hujãndi nǝ̃ ń siɛ-m.
8 Mǝ̃̀ hiɛgà waa nǝ̃-m wà: «Bláà ɲì caa-m!» Mǝ̃́ nìɛ mǝ̃̀ caa-n ń ba mǝ̃̀ tuɔra, Fɩraa-Dũnnũ!
9 Báa ver ǹ furũũgu ń hã-m, báa juu ń tĩɛ̃ ǹ mããcierw nǝ̃ hyadũũgu! Yíi-i mǝ̃̀ pyannãtiiw: báa ya mǝ̃́ ba, báa nǝ̃nǝ̃ǝ̃ mǝ̃̀ nã, mǝ̃̀ kortii Dũnnũ!
10 Halle mǝ̃̀ tǝw nǝ̃ mǝ̃̀ ɲũw, ba-ń nǝ̃nǝ̃ǝ̃ mǝ̃̀ nã-i yo, Fɩraa-Dũnnũẁ ji hyar-m.
11 Fɩraa-Dũnnũ, kal-m nǝ̃ ǹ hlũũgu, cal ń dii-m sũɔ̃lɩm'n hlũũgɩ nã, mǝ̃̀ ɲããtaa'n cɔ̃mmã nã.
12 Báa nǝ̃nǝ̃ǝ̃ mǝ̃̀ nã, mǝ̃́ ba mǝ̃̀ kuurǝǝ'n nãkruɔgɩ nã, nã̀ã wa kwasǝnããbaa mãã wà ba nṹɔ̃́ nã̀ã da cɔ̃m ǹ-kã mǝ̃̀ yiɛgu, bà sórrá mǝ̃̀ yuunã, cwaadaba-i, bà juuraa nǝ̃ hyadũgaacie-i mǝ̃̀ yuunã.