2 Samuel 7

Yuuntigǝ̃ngã Dawudaẁ gáa yii ǹ-jiraa wù yuuntasǝ'n suɔgu, nǝ̃ Fɩraa-Dũnnũẃ hã-yǝ nǝ̃ fiisaagu ǹ-hiil-yǝ wù ɲããtaaba min mãã bà yáá bàa caliɛ wù nã, bà nãkruɔgɩ nã,

2 yuuntigǝ̃ngãẃ fǝ̃ǝ̃ ǹ-waa Dũnnũ tanhiil Natãw wà: «Tuu ǹ-ne!

Mǝ̃̀ cɔ suɔgɩ nã mãã bàa ce-gǝ nǝ̃ dahuhorgǝgu, nǝ̃ Dũnnũ kuruugɩ́ ba dàa kuɔblɩ'n sǝ̃ǝ̃gɩ nã.»

3 Natãẃ siɛ yuuntigǝ̃ngãw wà: «Yuuntigǝ̃ngã, kã nǝ̃ yiga ń ba ǹ ce cɔ̃m wo cɔ̃m mãã ǹ hiɛga nã, nã̀ã wa Fɩraa-Dũnnũẃ nìɛ ǹ saa.»

4 Gɩ̀ yisuɔgɩ nã, Fɩraa-Dũnnũẃ cãwan díɛ̀dɩ́ hi Natãw

5 wà wú kãã waa nǝ̃ wù mããcier Dawudaw wà Fɩraa-Dũnnũw waa nǝ̃-yǝ wà: «Yíi ji naa ń mã suɔgu ǹ-hã mǝ̃́ ba mǝ̃̀ cɔ-ì?

6 Sulammã nã, ǹ-tuu gùú yuugɩ nã mãã mǝ̃̀ híilá Isɩrayɛl bluuba Misɩra yiɛgu, ǹ-ji vaa nǝ̃ jimããgu, mǝ̃̀ sáa hi ǹ-cɔ suɔgɩ nã.

Mǝ̃̀ cíé mǝ̃̀ waali kúɔ́lɩ nã-i, Dũnnũ bũũkuɔli kusunã.

7 Sùɔ́ wo sùɔ́ mãã mǝ̃̀ kã́ã́ yí ta nǝ̃ Isɩrayɛl bluuba, bàá mãã mǝ̃̀ níé ǹ-hiil-ba bá ba yigantaaba, mǝ̃̀ híí ǹ-waa nǝ̃ Isɩrayɛl nũɔ̃'n nũɔ̃ntaadaba ǹ-da wà hamã nã-i, ba sáa ce dahuhorgǝ'n suɔgu ǹ-hã-m-ì?

8 Yindiɛ, tu nǝ̃ mǝ̃̀ mããcier Dawudaw wà Fɩraa-Dũnnũw, Cuutiiw, wu mãã wù waa dìi dɩ̀-i nnĩĩ nã: “Mǝ̃̀ túulá-n wancen'n sùɔ́gɩ nã-i, tũm'n furũnyiɛgu, n ji da ǹ-ba mǝ̃̀ bluu'n yuuntiiw, Isɩrayɛl yuugɩ nã.

9 Sùɔ́ wo sùɔ́ mãã ǹ wáalá ǹ-ta gɩ̀ nã, mǝ̃̀ yáá dàa nǝ̃-n, mǝ̃̀ pérrá ǹ ɲããtaaba min ǹ yiganyiɛgu, mǝ̃̀ ji ce ǹ yir'n hlǝmmã́ ba mã̀ vaa nǝ̃ ɲũũrũũ yuntaagǝ̃ngĩɛ̃'n yaga.

10 Mǝ̃̀ ji hã Isɩrayɛlw nǝ̃ wancɔm'n sùɔ́gu, mǝ̃̀ bluuba, mǝ̃̀ ji so-ba sùɔ́gɩ dɩngu, ba báa ji ba bà saaraa, cobɩbliɛba báa ji dii bà yinɲã bà nã hlo haasǝ tammã,

11 nã́ã́ haasǝgu mǝ̃̀ yáá mã̀ã kra sugojarriɛba nã, mǝ̃̀ bluu'n yuugɩ nã, Isɩrayɛl bluu'n yuugɩ nã.

Mǝ̃̀ ji hiil-n ǹ ɲããtaaba min nãkrɔnɲã nã, ǹ-hã-n nǝ̃ fiisaagu.

Ǹ-pɛ nã, Fɩraa-Dũnnũẁ tu nǝ̃-n, wà wùú nǝ̃ wù hla, wu ji ce ǹ suɔgɩ́ ba yuntaa'n suɔgu ǹ-hã-n:

12 Ǹ hũnɲũɔ̃mã-ń ji tã, nǝ̃ ń kã ɲí kãã ba mǝ̃rãmmã nã nǝ̃ ǹ tǝvũnvãnããba, yíǹ furũũgɩ nã, mǝ̃̀ ji ce ǹ furũntiidiɛẃ tuu ǹ sùɔ́gu, wùú mãã wù ji hlǝ ǹ nũɔ̃gɩ nã, nã̀ã dii kɩkǝmmã wù yuuntasǝrɩ nã.

13 Wù-lǝ wùú ji mã suɔgu ǹ-bũũ mǝ̃̀ yiiri, mǝ̃̀ ji dii kɩkǝmmã wù yuuntasǝ'n guujirakuugɩ nã fɩraa.

14 Mǝ̃̀ ji ba nã́ã́ wù tǝ-i, nǝ̃ wú ba nã́ã́ mǝ̃̀ bíɛ́-i.

Wu-ń ce diibɩblaari, mǝ̃̀ ji piir-yǝ nǝ̃ cwaanbii'n valuugu, nã́ã́ tiiyǝw mãã wù mũũ wù bíɛ́w nĩĩgu mãã.

15 Nǝ̃ mǝ̃̀ níé wù yiɛgu nĩĩgu mãã, mǝ̃̀ síì ɲǝ̃ǝ̃ ǹ-hũɔ̃-gǝ, nã́ã́ mǝ̃̀ cíé-dǝ nǝ̃ Sayulw nĩĩgu mãã, ǹ-jii-yǝ ǹ hlũũgɩ nã.

16 Ǹ furũũgɩ nã, ǹ nũɔ̃ntaaba nǝ̃ ǹ yuuntasǝrɩ̀ ji ba fɩraa, ǹ yuuntasǝ'n guujirakuugɩ̀ ji ba nǝ̃ kɩkǝmmã fɩraa.”»

17 Ǹ-vaa nǝ̃ cãwanĩɛ̃ gáàga min nǝ̃ Dũnnũẁ cíé Natãẃ da kuu wo kuu, wú ta ǹ-kãã taa-ga ǹ-ja Dawudaw.

18 Gɩ̀-i yuuntigǝ̃ngãẃ Dawuda suro ǹ-kã Fɩraa-Dũnnũ yigagɩ nã ǹ-kãã waa nǝ̃-yǝ wà: «Mǝ̃̀ Tii Fɩraa-Dũnnũ, halǝmblǝ-i nǝ̃-m?

Mǝ̃̀ suɔgu bii gɩ̀ nã, nǝ̃ ń ce mǝ̃́ juo hi sùɔ́ gúɔ̀ mãã mǝ̃́ nǝ̃ gɩ̀ nã?

19 Nǝ̃ dìí yo, ń ne dɩ́ kol ǹ yinɲã nã mǝ̃̀ Tii Fɩraa-Dũnnũ!

Ń nìɛ ǹ blǝ ǹ mããcier'n nũɔ̃ntaaba ǹ gaaciega nã mãã dàa gà jo yergaa, nǝ̃ ń fǝ̃ǝ̃ ǹ-ba ǹ waa-dǝ nǝ̃ curo'n blɩ mã́ã, mǝ̃̀ Tii Fɩraa-Dũnnũw!

20 Mǝ̃̀ Tii Fɩraa-Dũnnũ!

Mã́ã Dawuda mã́ã̀, mǝ̃̀ ji gbǝ̃ǝ̃ ǹ-waa hadɩ-i nǝ̃-n ǹ-pya nã?

Ǹ fǝ̃ǝ̃ ǹ mããcierw!

21 Ǹ cíé cɔ̃ngǝ̃ngãm mã́ã̀mã̀ min mã́ suu, nã̀ã pɩgaa-mã ǹ-ja ǹ mããcierw ǹ nũɔ̃'n pãl'n cɔ̃mmã nã-i ǹ-vaa nǝ̃ ǹ kusuugu.

22 Mǝ̃̀ Tii Fɩraa-Dũnnũ, ǹ yuugɩ̀ bṹũlã́!

Sulammã nã, ǹ-vaa nǝ̃ yi nṹɔ̃́ dìi, curo'n sǝ tuugu, nǝ̃ Dũnnũdiɛ'n sɩriɛ nã́ã́ yíi sǝ.

23 Cuuw nã, nã́ã́ coplǝrdaarɩ́ nìɛ, dìí mãã ǹ bluu'n tuugu, nã́ã́ Isɩrayɛl bluu-i?

Eeh Dũnnũ, ǹ júó ǹ ji pã ǹ-hũɔ̃-ba, ǹ-ce bá ba ǹ bluuba, ǹ-da ǹ-hiil ǹ yiiri, nã̀ã ce cɔ̃nnorɩmdamã, cɔ̃npɩgamdaamã́ suu ǹ-hã-ba, ǹ-hã bà yiɛgu.

Ǹ plã ǹ-hũɔ̃ ǹ bluubaa mãã Misɩra yiɛgu, ǹ ɲǝ̃́ǝ̃lã́ ǹ-tĩɛ̃ coplaaga nǝ̃ bà dũnnũba bà yigagɩ nã.

24 Ǹ díilá kɩkǝmmã ǹ bluuba nã, Isɩrayɛl bluuba, bá da ǹ-ba ǹ bluuba fɩraa, nǝ̃ Fɩraa-Dũnnũ yín juo ba bà Dũnnũw.

25 Yindiɛ, mǝ̃̀ Tii Fɩraa-Dũnnũ, ǹ wáalá gùú cãwanĩɛ̃gaa mãã ǹ-kã ǹ mããcierw nǝ̃ wù nũɔ̃ntaa'n yiɛgu, ce gá suu fɩraa, nã́ã́ ǹ wáalá-dǝ nĩĩgu mãã.

26 Bá ba bà be ǹ yir'n bũũmã fɩraa nã̀ã ba bà waa wà: “Fɩraa-Dũnnũ, Cuutii, wɩ̀-i Isɩrayɛl bluu'n Dũnnũw”.

Ǹ mããcier Dawuda suɔgɩ́ ba nǝ̃ kɩkǝmmã ǹ yigagɩ nã!

27 Sulammã nã, Fɩraa-Dũnnũ, Cuutii, Isɩrayɛl bluu'n Dũnnũ, yíǹ-lǝ yíi pɩ́gará ǹ hla ǹ-ja ǹ mããcierw wà: “Mǝ̃̀ ji ce suɔgɩ́ ba yuntaa'n suɔgu ǹ-hã-n!”

Gùú cíé mǝ̃́ da hyagbǝ̃ngbãndi ǹ-ce cirǝ̃m mã́ã̀.

28 Yindiɛ, mǝ̃̀ Tii Fɩraa-Dũnnũ, yíi-i Dũnnũw!

Ǹ cãwanĩɛ̃ga sulam-i, nǝ̃ ń fǝ̃ǝ̃ ǹ-juo waa mããfɩnfam mã́ã̀ nǝ̃ ǹ mããcierw.

29 Gɩ̀ sùɔ́gɩ nã, piɛ ǹ nãkrɔfɩnfaagu ǹ mããcier'n nũɔ̃ntaaba nã bá ba fãngãtasǝrɩ nã fɩraa ǹ yinɲã nã!

Sulammã nã, mǝ̃̀ Tii Fɩraa-Dũnnũ yíǹ-lǝ yíi wanãã, nǝ̃ ǹ nãkrɔfɩnfaa'n piɛmã ǹ mããcierw drɔ, mã̀ã́ ji ce ǹ nãkrɔfɩnfaagɩ́ ba ǹ mããcier'n suɔgɩ nã fɩraa.»